ߣߌ߫ ߘߊ߬ߡߊ߲߬ ߓߊ߯ߙߊ ߟߊߘߎ߲߫ ߘߊ߫ ߟߋ߬ ߞߎ߲߬ߠߊ߬ߛߌ߰ߟߊ ߓߟߏ߫߸ ߒ߬ߓߊ߬ ߞߎ߲߬ߠߊ߬ߛߌ߮ ߖߘߍ߬ߓߊ߬ߞߎ߲ ߓߘߊ߫ ߘߊ߬ߡߊ߲߬ ߓߊ߯ߙߊ ߟߊߕߐ߲߫ ߜߘߋߜߘߋ ߞߍ߫ ߛߌ߯ߙߌ߲߫ ߝߊ߲߭ ߓߍ߯ ߟߊߘߍ߬ߣߍ߲ ߘߐ߫، ߘߊ߬ߡߊ߲߬ ߓߊ߯ߙߊ ߛߊ߬ߙߌ߬ߦߊ߬ ߛߐߛߐ ߞߊ߲߬߸ ߏ߬ ߕߍ߫ ߞߍ߫ ߟߊ߫ ߛߌ߯ߙߌ߲߫ ߡߎ߬ߕߎ߲߬ ߝߋߝߋ߫، ߞߊ߬ ߓߍ߲߬ ߟߊ߬ߛߋ߬ߟߌ߬ ߞߊ߲ ߘߏ߫ ߡߊ߬߸ ߡߍ߲ ߞߍߣߍ߲߫ ߘߍ߬ߒ߬ߡߊ߬ ߟߊ߬ߛߋ߬ߟߌ ߘߌ߫߸ ߂߀߂߆ ߣߍߣߍߓߊ ߕߋ߬ߟߋ߫ ߂ ߡߊ߬߸ ߣߌ߫ ߞߏߕߌ߯ ߡߐ߰ ߟߏ߯ߟߎ߫ ߞߵߊ߬ ߞߟߊ߬ߣߐ߬ߦߊ߫߸ ߣߊߟߌ߬ߡߎ߲߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߣߌ߫ ߟߊ߬ߞߊ߲߬ߘߊ߬ߟߌ ߣߌ߫ ߘߎ߰ߞߣߍ ߣߌ߫ ߓߐ߰ߝߍ ߣߌ߫ ߘߊ߬ߡߊ߲ ߞߏߕߌ߮ ߟߎ߬ ߘߌ߫.

ߟߊ߬ߛߋ߬ߟߌ߬ ߛߓߍ ߣߌ߲߬ ߞߣߐ߫߸ ߊ߬ ߝߐߣߍ߲߫ ߞߏ߫ ߛߌ߯ߙߌ߲߫ ߘߎ߰ߞߟߏ ߓߘߊ߫ ߘߐߖߊߛߌ߫ ߟߋ߬ ߞߏߛߓߍ߫، ߓߊߏ߬߸ <<ߜߋ߬ߟߎ߲߬ߠߌ߲ ߣߌ߫ ߞߘߐߓߐߟߌ ߗߋߦߊߟߌ ߡߍ߲ ߠߎ߬ ߟߊߥߟߌ߬ ߘߊ߫ ߞߊߙߏ߫ ߛߊ߬ߣߍ߲ ߠߊ߫ ߞߊ߬ ߕߊ߯ ߛߌ߯ߙߌ߲߫ ߕߌ߲߬ߞߎߘߎ߲ ߘߐ߫߸ ߏ߬ ߟߎ߫ ߞߵߊ߬ ߟߊߞߙߐ߬ߛߌ߬ ߞߏ߫ ߌ ߓߊ߯ ߦߋ߲߬ ߓߐ߰ߝߍ ߡߊߝߟߍ߫ ߕߋ߲߬߸ ߌ ߢߊߟߋ߬ ߓߐ߫ ߟߊ߫، ߞߵߏ߬ ߞߎ߲߭ ߞߍ߫ ߊ߬ ߘߐߕߌߢߍ ߘߌ߫ ߛߊߣߌ߲߫ ߢߌߣߌ߲ߠߊ ߟߎ߬ ߓߟߏ߫ ߘߊ߬ߡߊ߲ ߞߣߐ߫߸ ߡߍ߲ ߠߎ߬ ߕߴߊ߬ ߞߍ߫ ߟߊ߫ ߛߊ߬ߙߌ߬ߦߊ߬ ߞߣߐ߫.>>

ߊ߬ ߝߐߣߍ߲߫ ߛߓߍ ߣߌ߲߬ ߞߣߐ߫߸ ߞߏ߫ ߛߊߣߌ߲߫ ߢߌߣߌ߲ߠߊ ߟߎ߬ ߦߋ߫ ߕߙߏ߬ߞߏ ߡߍ߲ ߠߊߓߊ߯ߙߊ߫ ߟߊ߫߸ ߏ߬ ߓߘߊ߫ ߘߎ߰ߞߟߏ ߘߐߕߌߢߍ߫߸ ߞߊ߬ ߛߣߍ߬ߘߎ߰ ߞߏ ߓߊ߲߫߸ ߞߊ߬ ߦߙߌ ߟߎ߫ ߤߟߊ߬ߞߌ߬، ߞߏ߫ ߣߴߌ ߞߊ߬ ߖߋ߬ߟߌߓߊ߬ ߓߊߓߊ ߡߊߝߟߍ߫ (ߣߌߖ߭ߍߙ)߸ ߞߊ߬ ߓߊߝߌ߲ߓߊ߫ ߡߊߝߟߍ߫ (ߕߍ߲ߞߌߛߏ߫)߸ ߞߵߏ߬ ߟߴߊ߬ߟߎ߬ ߟߊߡߌߣߌ߲ ߞߊ߲߬߸ ߏ߬ ߟߎ߬ ߓߘߊ߫ ߕߌߢߍ߫߸ ߞߵߊ߬ߟߎ߬ ߘߐߞߛߐ߫߸ ߞߵߊ߬ߟߎ߬ ߜߋߘߋ߲߫ ߞߌ߬ߢߍ ߟߊ߫، ߞߵߊ߬ ߛߐ߬ߘߐ߲߬ ߜߎ߸ ߖߌ߫ ߛߌߟߊ ߏ߬ ߟߎ߫ ߟߋ߬ ߖߌߘߐ߫ ߣߌߡߊ ߟߎ߬ ߝߣߊ߫ ߘߊ߯ ߦߌߟߊ ߘߌ߫، ߊ߬ ߘߏ߲߬߸ ߁߉߇߁ ߠߊ߫߸ ߘߎߢߊ߫ ߖߡߊ߬ߣߊ ߡߍ߲ ߠߎ߬ ߓߍ߲߬ ߘߴߊ߬ ߡߊ߬ ߞߏ߫ ߞߊ߬ ߖߌ߫ ߛߌߟߊ ߟߎ߬ ߟߊߞߊ߲ߘߊ߫߸ ߖߌ߬ߣߍ߬ ߦߴߏ߬ ߖߡߊ߬ߣߊ ߘߏ߫ ߟߋ߬ ߘߌ߫، ߏ߬ ߟߋ ߞߏߛߐ߲߬߸ ߞߏ߫ ߓߊ ߏ߬ ߟߎ߬ ߡߊ߲߫ ߞߊ߲߫ ߞߊ߬ ߘߐߞߛߐ߫ ߢߊ߫ ߛߌ߫ ߡߊ߬.

ߏ߬ ߟߋ ߘߐ߫߸ ߟߊ߬ߛߋ߬ߟߌ߬ ߛߓߍ ߣߌ߲߬ ߞߵߊ߬ ߝߐ߫߸ ߞߏ߫ ߕߙߏ߬ߞߏ ߟߊߖߌ߱ ߖߌ ߘߐ߫ ߛߊߣߌ߲߫ ߢߌߣߌ߲߫ ߞߊ߲ߡߊ߬߸ ߥߟߊ߫ ߞߊ߬ ߛߊߣߌ߲ ߞߏ߬ ߓߊߖߌ ߣߌ߫ ߞߐ߰ߖߌ ߟߎ߬ ߘߐ߫߸ ߥߟߊ߫ ߞߊ߬ ߝߏߘߏ߲ߕߊ ߟߎ߬ ߣߌ߫ ߞߐ߰ߖߎ߮ ߣߌ߫ ߖߌߣߍ߮ ߟߊߓߊ߯ߙߊ߫߸ ߏ߬ ߓߘߊ߫ ߞߍ߫ ߞߍ߫ ߞߏ߫ ߟߊߕߐ߲ߣߍ߲ ߘߌ߫߸ ߊ߬ ߣߌ߫ ߖߎ߲߯ߛߊ߫ ߥߟߏߒߘߐ߫ ߡߊߛߌߟߊ߲ߣߍ߲ ߓߍ߯ ߞߐߘߍ߫، ߊ߬ ߘߊ߲߬ ߕߍ߫ ߏ߬ ߘߌ߫ ߘߋ߬߸ ߛߊߣߌ߲ ߢߌߣߌ߲ ߛߣߍ߬ߘߎ߮ ߟߎ߬ ߞߊ߲߬߸ ߖߍߥߎߟߍ ߟߎ߬ ߘߐ߫߸ ߦߙߐ߫ ߟߊߕߏߣߍ߲ ߠߎ߬߸ ߕߎ߫ ߟߊߕߊ߲߬ߞߊ߬ߣߍ߲ ߠߎ߬߸ ߏ߬ ߓߍ߯ ߦߋ߫ ߞߏ߫ ߟߊߕߐ߲ߣߍ߲ ߠߋ߬ ߘߌ߫ ߡߎ߬ߕߎ߲߬.

ߊ߬ߟߎ߬ ߓߊ߲߫ ߘߊ߫ ߞߵߊ߬ ߝߐ߫ ߞߵߊ߬ ߟߴߊ߬ ߞߊ߲߬߸ ߞߏ߫ ߞߟߍ߬ߡߐ߮ ߟߎ߬߸ ߣߊ߲߬ߕߌ߮ ߟߎ߬߸ ߕߐ߲ߓߟߏߡߊ ߟߎ߬߸ ߕߊ߬ߡߌ߲߬ߘߊ߬ߕߌ߮ ߟߎ߬߸ ߛߎ߲ߞߎ߲ ߠߊߕߊ߲߬ߞߊ߬ߓߊ߮ ߟߎ߬߸ ߏ߬ ߟߎ߬ ߓߍ߯ ߟߋ߬ ߟߐ߬ߣߍ߲߫ ߞߣߐ߬ߜߍ߲߬ߠߌ߲ ߠߊ߫ ߡߎ߬ߕߎ߲߬، ߞߏ߫ ߊ߬ߟߎ߬ ߘߌ߫ ߞߣߐ߬ߜߍ߲߬ߠߌ߲߬ߠߊ ߏ߬ ߟߎ߬ ߟߊߟߐ߬ ߛߌߟߊ ߟߎ߫ ߝߍ߬߸ ߖߌߘߊ ߟߎ߬ ߟߊ߫߸ ߛߌ߯ߙߌ߲߫ ߕߌ߲߬ߞߎߘߎ߲ ߘߏ߲߬ߘߊ ߣߴߊ߬ ߓߐߘߊ ߟߎ߬ ߟߊ߫، ߟߏ߲ߟߊ߲߫ ߛߌ߫ ߝߣߊ߫ ߓߊ߯ ߦߋ߫ ߞߵߊ߬ ߛߐ߬ߘߐ߲߬ ߌ ߕߍ߫ ߛߊ߬ߙߌ߬ߦߊ߬ ߞߣߐ߫߸ ߛߊ߬ߙߌ߬ߦߊ߫ ߞߊ߬ ߡߍ߲ ߝߐ߫ ߏ߬ ߡߐ߰ ߛߎ߮ ߟߎ߬ ߟߊ߫ ߞߏ ߞߊ߲߬߸ ߏ߬ ߘߌ߫ ߟߊ߫ ߌ ߞߊ߲߬.

ߊ߬ ߦߌ߬ߘߊ߬ߣߍ߲߫ ߛߓߍ߫ ߞߋߟߋ߲ ߢߌ߲߬ ߞߣߐ߫߸ ߞߏ߫ ߛߏ ߝߊ߰ߡߊ ߘߐ߰ߡߊ߲ ߣߴߊ߬ ߓߏ߲߬ߓߊ߸ ߊ߬ ߓߍ߯ ߘߏ߬ߣߌ߲ ߠߋ߬ ߣߌ߲߬ ߞߏ ߘߌ߫߸ ߊ߬ ߕߍ߫ ߟߊ߫ ߟߊ߫ ߘߏ߫ ߞߎ߲߬߸ ߝߏ߫ ߞߵߊ߬ ߡߊߓߏ߲߬ߧߊ߫ ߟߋ߬، ߊ߬ߟߎ߫ ߞߵߊ߬ߟߎ߫ ߕߣߊ߬ ߜߍߟߍ߲ ߟߊ߫ ߘߊ߱ ߘߐ߫ ߏ߬ ߟߋ ߘߐ߫߸ ߞߏ߫: <<ߣߌ߫ ߡߍ߲ ߞߊ߬ ߞߏߘߐߣߐ߯ߦߊ ߞߍ߫߸ ߤߊ߲߯ ߛߊߣߌ߲߫ ߓߊ߯ߙߊ ߞߍ߫ ߘߊ߫߸ ߥߟߊ߫ ߌߟߋ ߞߊ߬ ߘߏߣߍ߲߫ ߡߌ߬ߣߴߊ߬ ߞߏ ߘߐ߫߸ ߞߏ߫ ߘߌ߫ ߟߊߕߐ߲߫ ߌ ߟߊ߫.>> ߞߎ߲߬ߠߊ߬ߛߌ߮ ߞߵߏ߬ ߖߊ߬ߛߙߋ߫ ߞߊ߬ߛߙߋ ߞߍ߫، ߊ߬ߟߎ߫ ߞߵߊ߬ ߝߐ߫ ߝߣߊ߫߸ ߞߏ߫ ߛߊߣߌ߲߫ ߛߊ߲߸ ߛߊߣߌ߲߫ ߝߙߋ߸ ߞߏ߫ ߛߓߍ ߦߋ߫ ߡߍ߲ ߠߎ߬ ߓߟߏ߫߸ ߏ߬ ߟߎ߫ ߟߋ߬ ߘߐߙߐ߲߫ ߘߌ߫ ߛߴߏ߬ ߞߍ߫ ߟߊ߫.

ߌߞߏߡߌ߲߬ ߖߌ߬ߦߊ߬ߖߟߎ ߣߌ߫ ߖߌ߬ߦߊ߬ߓߍ ߘߏ߫ ߟߎ߫ ߦߋ߫ ߝߌߙߌ߲ߝߌߙߌ߲߫ ߠߊ߫ ߡߐ߱ ߟߎ߬ ߓߟߏ߫ ߓߟߐߟߐ ߞߊ߲߬߸ ߖߌ߬ߣߍ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߋ߫ ߕߡߊ߬ߖߌ ߓߐ߫ ߓߍ߯ ߓߐ߫߸ ߊ߬ ߞߏ ߦߋ߫ ߞߍ߫ ߟߊ߫߸ <<ߛߊ߬ߙߌ߬ߦߊ ߣߌ߫ ߕߐ߲>> ߡߍ߲ ߞߣߐ߫߸ ߖߡߊ߬ߣߊ ߞߵߊ߬ ߝߐ߫ ߕߋ߲߬ ߠߋ߬ ߝߛߊߦߌ߫، ߊ߬ ߘߏ߲߬߸ ߞߏ߫ ߊ߬ߟߎ߬ ߘߴߊ߬ ߞߏ ߓߐ߫ ߊ߬ ߛߌߟߊ ߝߍ߬ ߢߊ߫ ߡߊ߬߸ ߛߊ߬ߙߌ߬ߦߊ߫ ߞߊ߬ ߡߍ߲ ߝߐ߫߸ ߞߵߊ߬ ߞߍ߫ ߢߊߟߐ߲ ߝߣߊ߫ ߟߊ߫߸ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊ߫ ߖߌ߰ߣߌ߬ߦߟߍ ߕߍ߫ ߘߐߞߛߐ߫.

ߞߏߕߌ߯ ߡߐ߰ ߟߏ߯ߟߎ߫ ߟߋ߬ ߞߊ߬ ߛߓߍ ߣߌ߲߬ ߞߟߊ߬ߣߐ߬ߦߊ߫: ߌߓߙߊߤߌߡߊ߫ ߞߊߟߌߟ ߞߐ߲ߘߍ߫߸ ߖߋߣߊߓߎ߬ ߕߎ߬ߙߋ߸ ߊߤߑߡߍߘ ߡߏߤߊߡߍߘ ߎ߯ߙߌ߬ ߖߊߟߏ߫߸ ߝߊߛߎ߫ ߕߋ߬ߦߊ߬߸ ߊ߬ ߣߌ߫ ߓߎߣߊ߬ ߛߌ߬ߟߊ.