ߦߏ߫ ߓߍ߯ ߞߵߊ߬ ߟߐ߲߫ ߢߊ ߡߍ߲ ߡߊ߬߸ ߡߊߞߌ߫ ߛߊߟ ߡߍ߲ ߦߋ߫ ߛߣߍ߬ߜ߭ߊߟߌ߫ ߞߊ߲ߕߌ߯ ߞߘߐ ߘߌ߫߸ ߏ߬ ߟߋ ߕߎ߲߬ ߞߵߊ߬ ߝߐ߫ ߞߏ߫ ߊ߬ ߦߴߊ߬ ߝߍ߬ ߞߊ߬ ߓߐ߫ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߝߘߏ߬ߓߊ߬ ߞߟߊ߬ߕߌ߰ߦߊ ߞߐ߫، ߒ߬ߓߊ߬߸ ߊ߬ ߓߘߴߏ߬ ߞߏߢߊ ߘߐߛߊ߬ ߓߌ߬ ߘߋ߬. ߞߊ߬ߕߎ߲߯߸ ߊ߬ ߣߐ߬ ߟߊ߬ߛߋ߬ߟߌ߫ ߟߋ߬ ߞߍ߫ ߟߊ߫ ߞߍ߲ߘߍߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߁߇߸ ߞߏ߫ ߊ߬ ߓߘߴߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߛߓߍ ߟߊߓߐ߫ ߡߟߛ ߝߘߏ߬ߓߊ߬ ߞߟߊ߬ߕߌ߰ߦߊ߬ ߢߌߣߌ߲ ߘߐ߫. ߓߊߏ߬߸ ߞߏߟߊߒߞߘߐߢߐ߯ߦߊ ߛߌߦߊߡߊ߲ ߡߍ߲ ߠߎ߬ ߞߍߣߍ߲߫ ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߝߍ߬߸ ߊ߬ ߦߋ߫ ߘߊ߫ ߞߏ߫ ߊߡߙߌߞߌ߬ ߟߊ߬ߕߍ߲߬ߘߎ߯ ߓߊ߬߸ ߊ߬ ߣߌ߫ ߞߊ߯ߙߊߦߌߓ߸ ߏ߬ ߟߎ߬ ߛߌ߫ ߡߊ߫ ߛߐ߲߬ ߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߡߊ߬߸ ߏ߬ ߟߋ ߞߐ ߞߍߣߍ߲߫ ߊ߬ ߛߋ߲߬ߓߐ ߘߌ߫ ߣߌ߲߬.
ߊߟߎ߫ ߦߴߊ߬ ߟߐ߲߫߸ ߞߎߣߎ߲߬ ߛߌ߬ߣߌ߲߬ߟߏ߲ ߠߋ߬ ߡߊ߬߸ ߞߏ߲ߓߌߕߌ߮ ߕߟߋ߬ ߁߆߸ ߖߡߊ߬ߣߊ߬ ߕߊ߲߫ ߞߵߊ߬ ߡߙߌߦߊ ߘߌ߫ ߡߊߞߌ߫ ߛߊߟ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߞߊ߲߬߸ ߟߏ߯ߟߎ߫ ߛߐ߲߬ ߘߊ߫߸ ߞߏ߫ ߊ߬ ߞߊ߫ ߢߌ߲߬، ߊ߬ ߣߐ߬ ߟߏ߯ߟߎ ߛߊ߫߸ ߏ߬ ߟߎ߬ ߡߊ߫ ߛߐ߲߬، ߒ߬ߓߊ߬߸ ߟߏ߯ߟߎ ߏ߬ ߘߐ߫߸ ߛߓߊ߬ ߦߋ߫ ߡߟߛ ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߛߌ߲߬ߝߏ߲ ߠߋ߬ ߘߌ߫، ߞߊ߬ߕߎ߲߯߸ ߢߣߊߕߊߟߌ ߘߐ߫߸ ߖߡߊ߬ߣߊ߫ ߞߐ߬ߣߐ߲߬ߘߐ߫ ߞߊ߬ ߙߓߋߞߊ ߜ߭ߑߙߌ߲ߛߑߔߊ߲߫ ߠߋ߬ ߛߎߥߊ߲ߘߌ߫߸ ߏ߬ ߟߋ ߦߟߍ߬ ߘߊ߫ ߢߍߝߍ߬ ߝߙߋߟߋ߲߫߸ ߊ߬ߟߋ ߦߋ߫ ߓߐ߬ߟߐ߲߬ߞߊ߫ ߟߋ߬ ߘߌ߫߸ ߞߊ߬ ߓߐ߫ ߞߐߛߑߙߌߞߊ߬.
ߒ߬ߓߊ߬߸ ߛߣߍ߬ߜ߭ߊߟߌ߫ ߞߊ߲ߕߌ߯ ߞߘߐ ߡߊߞߌ߫ ߛߊߟ ߞߊ߲߫ ߏ߬ ߟߋ ߘߐ߫ ߛߊ߫߸ ߞߏ߫ ߊ߬ ߣߌ߫ ߓߎߙߎ߲ߘߌ߫ ߞߊ߲ߕߌ߮ ߋߝ߭ߊߙߌߛ ߒߘߊߦߛ߭ߌߡߌߦߋ߫ ߟߊ߫ ߞߎߡߊ ߞߐߝߍ߬߸ ߏ߬ ߡߍ߲ ߦߋ߫ ߝߘߊ߬ߝߌ߲߬ߠߊ߫ ߞߋ߬ߟߋ߲߬ߧߊ ߞߊ߲ߕߌ߮ ߘߌ߫ ߕߋ߲߬߸ ߊ߬ ߣߌ߫ ߛߣߍ߬ߜ߭ߊߟߌ߫ ߞߊ߲ߕߌ߯ ߓߊ߬ߛߌߙߎ߬ ߖߏ߬ߡߊߦߌ߬ ߝߊߦߌ߬ ߟߊ߫ ߞߎߡߊ ߞߐߝߍ߬߸ ߏ߬ ߡߍ߲ ߝߣߊ߫ ߦߋ߫ ߛߘߋߦߊߥߏ ߞߊ߲ߕߌ߮ ߘߌ߫ ߕߋ߲߬߸ ߞߏ߫ ߊ߬ ߓߘߴߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߓߐ߫ ߊ߬ ߡߊ߬.
ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫ : <<ߒ ߓߘߴߊ߬ ߡߙߌߘߐߕߊ߬ ߞߊ߬ ߒ ߠߊ߫ ߡߊ߬ߡߌ߬ߘߊ߬ߟߌ ߟߊߓߐ߫>> ߊ߬ ߞߵߏ߬ ߝߐ߫ ߓ߸ ߞߏ߫ ߖߐ߲߰ߛߊ߫ ߟߊ߬ߘߊ߲߬ߞߊ߬ߟߌ ߞߏߟߊߕߍ߯ߘߊ ߟߊ߫ ߓߊ߯ߙߊ ߘߌ߫ ߣߐ߰ߦߴߊ߬ ߡߊ߬، ߓߊߏ߬߸ ߌߞߏߡߌ߲߬ ߏ߬ ߟߎ߬ ߛߌߦߊߡߊ߲߫ ߡߊ߫ ߓߍ߲߬ ߊ߬ߟߋ ߕߊ ߡߊ߬߸ ߛߊ߫ ߜߟߍ߬ߦߊ߬ ߜߘߍ߫ ߣߌ߫ ߞߣߐ߬ߘߐ߬ߝߟߌ߬ ߜߘߍ߫ ߞߊߣߊ߬ ߣߊ߬ ߡߎ߬ߕߎ߲߬. ߊ߬ ߟߐ߲ ߞߐ ߊ߬ ߓߟߏ߫ ߘߏ߫ ߟߊ߬ߞߊ߲߬ߘߊ߬ߟߌ ߞߏߟߊߕߍ߯ߘߊ ߝߊ߲߬ߓߊ ߕߴߊ߬ ߝߍ߬߬߸ ߞߏ߫ ߊ߬ ߓߊ߯ ߛߌߟߊ ߟߊߣߐ߰ߦߊ߫ ߕߐ߭ ߟߎ߬ ߦߋ߫߸ ߏ߬ ߟߋ ߜߍߣߍ߲߫.
ߡߊߞߌ߫ ߛߊߟ ߞߊ߲߫ ߞߏ߫ ߊ߬ ߟߐ߯ ߕߍ߬ߘߍ߫ ߊ߬ ߟߊ߫ ߞߵߊ߬ ߟߊ߫ ߛߊ߲߬ ߓߌߣߊ߯ߣߌ߲߫ ߓߘߍ߬ߓߘߍ߬ߟߌ ߤߊ߲ߞߟߌ߫ ߛߐ߬ߘߐ߲߬ߣߍ߲ ߠߋ߬ ߓߌ߬ߟߊ߫ ߡߊ߲߬ߕߏ߲߬ ߠߊߘߍ߬ߣߍ߲ ߛߊ߬ߥߏ߬ ߘߐ߫، ߊ߬ ߞߊ߬ ߝߘߊ߬ߝߌ߲߬ߠߊ߫ ߞߊ߲ߕߌ߮ ߘߏ߫ ߟߎ߫ ߝߏ߫߸ ߡߍ߲ ߠߎ߬ ߞߵߊ߬ߟߎ߬ ߛߋߞߏ ߞߍ߫ ߊ߬ ߟߊ߫ ߡߊ߬ߡߌ߬ߘߊ߬ߟߌ߬ ߞߏ ߢߌ߲߬ ߘߐ߫߸ ߞߵߊ߬ ߞߐߡߊߓߌ߲ߓߌ߲߫.
ߡߊߞߌ߫߫ ߛߊߟ ߓߘߴߊ߬ ߟߊ߫ ߡߊ߬ߡߌ߬ߘߊ߬ߟߌ ߟߊߓߐ߫ ߝߛߊߦߌ߫߸ ߞߏ߬ߣߵߊ߬ ߞߊ߲߫ ߞߏ߫ ߊ߬ ߘߌߡߊ߲߫ ߊ߬ ߦߋ߫ ߤߊߟߌ߬ߛߊ߫߸ ߡߟߛ ߦߴߊ߬ ߛߋߞߏ ߖߍ߬ߘߍߖߍ߬ߘߍ ߞߍ߫ ߘߎߢߊ߫ ߝߐߢߐ߲߯ߞߐ ߟߎ߬ ߟߊߛߊ߭ ߘߐ߫߸ ߓߘߍ߬ߓߘߍ߬ߟߌ ߢߐ߲߯ ߡߊߓߏ߲ ߣߌ߫ ߓߘߊ߫ ߡߞߊߘߊ߲ ߠߎ߬ ߘߐ߫، ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ ߣߊ߬ߕߊ ߖߍ߬ߘߍߖߍ߬ߘߍ ߟߋ߬߸ ߝߘߊ߬ߝߌ߲߬ߠߊ߫ ߦߋ߫ ߛߋ߫ ߟߐ߬ߘߎ߰ ߓߊ߲ߓߊ߲ߣߍ߲߫ ߛߐ߬ߘߐ߲߬ ߠߊ߫ ߡߟߛ ߘߐ߫߸ ߘߎߢߊ߫ ߡߊ߬ߡߙߊ߬ߟߌ ߞߊߡߊ߲ ߞߣߐ߫.
