ߟߊ߬ߞߊ߲߬ߘߊ߬ߟߌ ߞߎߡߊ ߟߎ߬߸ ߛߏ ߟߊߕߊ߯ߡߊ߫ ߢߊ ߞߎߡߊ ߟߎ߬߸ ߕߍߓߍ߲ ߣߌ߫ ߞߊ߲ߓߍ߲ ߞߎߡߊ ߟߎ߬߸ ߏ߬ ߟߎ߫ ߟߋ߬ ߕߘߍ߬ ߖߋߣߊߓߎ߬ ߕߎ߬ߙߋ ߟߊ߫ ߕߊ߯ߡߊ ߣߌ߲߬ ߕߏ߬ ߕߍ߬ߡߊ߬ ߕߏ ߘߌ߫ ߛߌ߯ߙߌ߲߫ ߕߌ߲߬ߞߎ߬ߘߎ߲߬ ߞߎߘߊ ߞߣߐ߫߸ ߊ߬ߟߋ ߡߍ߲ ߦߋ߫ ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮ ߘߌ߫.

ߊ߬ ߟߊ߫ ߓߐߒߡߊߟߌ ߣߌ߲߬ ߝߍ߬߸ ߊ߬ ߣߌ߫ ߛߌ߯ߙߌ߲߫ ߝߊ߰ߡߊ߬ ߓߏ߲߬ߘߊ ߛߌߦߊߡߊ߲߫ ߠߋ߬ ߞߊ߬ ߢߐ߲߯ߦߋ߫߸ ߘߎ߰ߘߋ߲ ߠߎ߬߸ ߞߊ߬ߝߏ߬ߙߋ߲߬ߕߌ߮ ߟߎ߬߸ ߞߌ߲߬ߕߌ߮ ߟߎ߬߸ ߞߵߏ߬ ߟߊ߫ ߡߙߊ߬ߓߊ߰ߘߎ߯ߟߊ ߟߎ߫ ߞߊ߲߬.

ߊ߬ ߟߊ߫ ߕߊ߯ߡߊ ߣߌ߲߬ ߞߍ߫ ߘߊ߫ ߛߊߓߎ߫ ߘߌ߫߸ ߘߊ ߛߋ߫ ߘߊ߫ ߛߌ߯ߙߌ߲߫ ߞߏ߫ ߛߌߦߊߡߊ߲߫ ߡߊ߬.

ߊ߬ ߟߊߛߣߍ ߖߊ߲߬ߖߏ߲ ߛߋ߲߭ߝߍ߬߸ ߛߌ߯ߙߌ߲߫ ߞߊ߬ߝߏ߬ߙߋ߲ ߛߙߍߞߍ߫ ߝߟߐ ߦߋ߫ ߊߓߘߎߟߊߦߌ߬ ߓߊ߰ߦߐ ߡߍ߲ ߘߌ߫߸ߏ߬ ߞߵߊ߬ ߝߏ߬ ߞߵߊ߬ ߞߎߟߎߖߋ߫߸ ߊ߬ ߣߴߊ߬ ߟߊ߫ ߕߊ߯ߡߊ߫ ߛߘߍ ߓߍ߯ ߟߊߘߍ߬ߣߍ߲ ߞߐߘߍ߫.

ߊ߬ ߞߵߊ߬ ߦߌ߬ߘߊ߬ ߞߏ߫ ߞߏߕߌ߮ ߣߊ߭ ߞߊ߬ ߣߵߊ߬ ߢߊ ߟߊ߫ ߛߌ߯ߙߌ߲߫ ߞߊ߲߬߸  ߏ߬ ߦߴߊ߬ ߦߌ߬ߘߊ߬ ߟߊ߫ ߟߋ߬ ߞߏ߫ ߢߌ߬ߣߊ߬ ߞߍߣߍ߲߫ ߕߍ߫ ߊ߬ߟߎ߬ ߞߐ߫، ߊ߬ ߣߌ߫ ߝߣߊ߫߸ ߞߏ߫ ߊ߬ߟߎ߬ ߛߍߥߊߣߍ߲ ߦߋ߫ ߞߏߕߌ߮ ߝߏ߬ ߟߊ߫ ߞߵߊ߬ ߞߎߟߎ߲ߖߋ߫߸ ߛߌ߯ߙߌ߲߫ ߞߍ ߘߐ߫ ߕߌ߲߬ߞߎߘߎ߲ ߘߌ߫߸ ߏ߬ ߡߍ߲ ߠߊߥߟߌ߬ߣߍ߲߫ ߝߊ߰ߡߊ ߟߎ߬ ߡߊߘߏ߲߭ ߡߊ߬ ߘߎ߰ߘߋ߲ ߠߎ߬ ߟߊ߫.

ߓߐ߬ߟߐ߲߬ߞߊ߬ ߖߋߣߊߓߎ߬ ߟߊ߫ ߛߌ߯ߙߌ߲߫ ߕߊ߮ ߣߌ߲߬ ߘߐ߫߸ ߊ߬ ߞߵߊ߬ ߖߊ߬ ߦߙߐ߫ ߞߋߟߋ߲߫ ߞߊ߲߬߸ ߏ߬ ߖߛߎ߬ߛߎߡߊ ߟߊߛߓߊ߬ߕߌ ߘߌ߫߸ ߞߊ߬ ߡߐ߱ ߟߎ߬ ߓߟߏ ߟߊ߫ ߢߐ߲߮ ߞߊ߲߬.

ߊ߬ ߞߎߡߊ߫ ߘߊ߫ ߝߣߊ߫߸ ߞߏ߫ ߞߊ߬ ߝߊ߰ߡߊ ߓߏ߲߬ߧߊ߫߸ ߞߊ ߝߊ߰ߡߊ߬ ߞߊ߲ ߓߏ߲߬ߧߊ߬߸ ߛߊ߬ߙߌ߬ߦߊ ߡߍ߲ ߓߊ߯ ߟߊߛߌ߰߸ ߞߵߏ߬ ߡߊߓߏ߲߬ߧߊ߬߸ ߊ߬ ߞߵߏ߬ ߡߊߜߟߍ߬ߦߊ߬ ߞߏߛߓߍ߫.

ߊ߬ ߞߵߊ߬ ߘߊߣߐ ߕߏ߫ ߦߙߐ ߘߏ߫ ߡߊ߬߸ ߏ߬ ߟߋ ߘߍ߬ߞߙߏ߬ߝߏ߬ ߞߏ ߘߌ߫߸ ߞߎߡߊ ߞߍߢߡߊ ߏ߬ ߞߊ߲߬߸ ߊ߬ ߣߴߊ߬ ߟߊߓߊ߯ߙߊ߫ ߢߊ، ߊ߬ ߞߵߊ߬ ߞߊ߲ߠߊߘߌ߫ ߘߋ߲ߓߊߕߌ߮ ߟߎ߫ ߡߊ߬߸ ߞߏ߫ ߞߊ߬ ߘߋ߲ ߠߎ߬ ߖߏ߯ߘߏ߲߬߸ ߞߵߊ߬ߟߎ߬ ߤߊ߲ߞߟߌ ߟߊߞߊ߬߸ ߛߴߊ߬ߟߎ߬ ߞߊߣߊ߬ ߓߟߐߟߐ߫ ߞߊ߲ߠߊ ߞߍ߫ ߕߌߢߍߟߌ߫ ߦߙߐ ߘߌ߫.

ߣߊ߬ߣߌ߲߬ߠߌ߲ ߛߊ߲ߡߊ߬ ߛߐ߲߬߸ ߜߍߘߐ߫ ߖߓߍߟߌ߸ ߞߊ߬ ߡߐ߱ ߟߎ߬ ߣߊ߬ߣߌ߲߫ ߓߟߐߟߐ ߞߊ߲߬߸ ߞߊ߬ ߘߏ߲߬ ߡߐ߱ ߟߎ߫ ߞߊ߬ߛߌ ߘߐ߫߸ ߞߵߌ ߘߊ ߘߏ߲߬ ߡߐ߱ ߟߎ߫ ߖߘߍ߬ߞߊ߬ߣߌ߲߬ ߞߏ ߘߐ߫ ߡߍ߲ ߕߴߌ ߢߍߛߌߟߊ߫ ߘߐ߫߸ ߊ߬ ߞߵߏ߬ ߞߎߡߊ ߝߐ߫، ߓߊߏ߬߸ ߞߏ߫ ߓߍ߯ ߓߘߊ߫ ߓߟߐߟߐ߫ ߞߊ߲ߠߊ ߞߍ߫ ߛߊ߬ߥߏ߬ ߝߐ߬ ߦߙߐ ߘߌ߫.

ߊ߬ ߣߌ߫ ߞߌ߲߬ߕߌ߮ ߟߎ߬ ߣߌ߫ ߞߎ߲߬ߘߊ߬ߕߌ߮ ߟߎ߬ ߝߣߊ߫ ߟߊ߫ ߞߎߡߊ ߘߐ߫߸ ߏ߬ ߟߎ߬ ߕߊ ߓߎ߲ߓߎ߲߫ ߘߊ߫ ߛߊߣߌ߲ߧߊ߫ ߞߏ ߟߋ߬ ߡߊ߬߸ ߞߌ߲߬ߘߊ ߟߎ߬ ߛߊߣߌ߲ߧߊ߸ ߊ߬ ߣߌ߫ ߦߙߐ ߟߎ߬ ߟߊߞߊ߲ߘߊ߸ ߏ߬ ߡߍ߲ ߦߋ߫ ߘߎ߰ߘߋ߲ ߣߌߘߐߞߏ ߘߌ߫.

ߡߍ߲ ߘߏ߲߬ߟߐ߬ߣߍ߲߫ ߞߊ߬ߝߏ߬ߙߋ߲ ߕߊ߫ ߝߊ߲߭ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߏ߬ ߟߎ߬ ߞߊ߫ ߞߊ߲߫ ߞߵߊ߬ߟߎ߫ ߖߊ߬ ߦߙߐ ߡߍ߲ ߞߊ߲߬߸ ߛߓߍ ߡߍ߲ ߠߎ߬ ߦߋ߫ ߕߊ߬ ߟߊ߫߸ ߏ߬ ߟߎ߬ ߦߋ߫ ߞߍ߫ ߛߊ߬ߙߌ߬ߦߊ߬ ߞߣߐ߫، ߊ߬ߟߎ߬ ߣߌ߫ ߞߏߟߊߕߍ߮ ߟߎ߬ ߦߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߞߎߡߊߕߍ߫ ߡߙߊ߬ߓߊ߮ ߟߎ߬ ߣߌ߫ ߡߙߊ߬ߓߊ߰ߘߎ߯ߟߊ ߟߎ߫ ߡߊ߬߸ ߊ߬ߟߎ߬ ߣߌ߫ ߏ߬ ߟߎ߬ ߦߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬.

ߞߎߡߊ ߡߊ߫ ߘߊ߲߬ ߏ߬ ߘߐߙߐ߲߫ ߡߊ߬ ߘߋ߬߸ ߥߊߘߌ ߘߌ߫ ߛߋ߫ ߟߊߘߏ߲߬ ߠߊ߫ ߞߊ߬ߝߏ߬ߙߋ߲ ߠߎ߬ ߞߣߐ߫ ߘߌ߫߸ ߛߊ߫ ߞߏ ߡߍ߲ ߠߎ߬ ߵߕߍ߫ ߢߊ߬ ߞߍ ߞߐ߫߸ ߏ߬ ߟߎ߬ ߦߋ߫ ߛߋ߫ ߞߍ߫ ߟߊ߫߸ ߞߏ߲߬ߘߏ ߦߋ߫ ߛߋ߫ ߘߐߞߍ߫ ߟߊ߫߸ ߊ߰ ߞߍ߫ ߓߊߛߌ߫ ߡߎ߯ ߞߐ߰ߡߊ ߘߌ߫߸ ߛߏ߫ ߞߣߐ߫ ߡߐ߮ ߟߎ߬ ߦߋ߫ ߡߍ߲ ߝߍ߬߸ ߏ߬ ߦߋ߫ ߞߍ߫߸ ߝߊ߰ߡߊ ߟߎ߬ ߣߌ߫ ߡߍ߲ ߛߐ߬ߘߐ߲ ߞߊ߫ ߞߊ߲߫ ߛߴߊ߬ߟߎ߬ ߘߌ߫ ߛߋ߫ ߞߏ ߏ߬ ߟߎ߬ ߞߍ߫ ߟߊ߫߸ ߏ߬ ߟߎ߬ ߦߴߏ߬ ߛߐ߬ߘߐ߲߬.

ߊ߬ ߟߊ߫ ߞߎߡߊ ߓߏ߬ߙߌ߬ ߘߊ߫ ߟߊ߬ߞߊ߲߬ߘߊ߬ߟߌ ߝߊ߲߬ߝߍ߬ߟߊ ߟߋ߬ ߞߊ߲߬ ߡߙߊ߬ߓߊ߰ߘߎ߯ߟߊ ߟߎ߬ ߦߋ߫، ߊ߬ ߞߵߊ߬ ߦߌ߬ߘߊ߬߸ ߞߏ߫ ߡߍ߲ ߠߎ߬ ߦߋ߫ ߓߐߕߏ߲߫ ߝߊ߲ ߝߍ߬߸ ߏ߬ ߟߎ߬ ߦߴߊ߬ߟߎ߬ ߞߊߘߊ߲߫ ߞߵߊ߬ߟߎ߫ ߖߊ߲߬ߕߏ߫߸ ߞߊ߬ ߟߊ߬ߞߊ߲߬ߘߊ߬ߟߌ ߓߊ߲ߓߊ߲߫.

ߞߏ߫ ߛߌ߯ߙߌ߲߫ ߦߋ߫ ߘߊ߬ߡߊ߲߬ߘߊ߬ ߛߏ ߟߋ߬ ߘߌ߫߸ ߊ߬ߟߋ ߟߋ߬ ߖߌ߬ߣߍ߬ ߣߌ߫ ߡߊ߬ߟߌ ߕߍߟߊ ߘߐ߫، ߏ߬ ߘߐ߫߸ ߞߏ߫ ߝߏ߫ ߞߵߊ߬ߟߋ ߟߊ߬ߞߊ߲߬ߘߊ߬ߟߌ߬ ߞߏ ߘߐߖߊ߬ ߟߋ߬߸ ߊ߬ ߣߌ߫ ߞߣߐ߬ߜߍ߲߬ߠߌ߲،ߏ߬ ߘߐ߫߸ ߞߏ߫ ߡߙߊ߬ߓߊ߰ߘߎ߯ߟߊ ߟߎ߬ ߣߌ߫ ߟߊ߬ߞߊ߲߬ߘߊ߬ߟߌ߬ߟߊ ߟߎ߬ ߦߴߊ߬ߟߎ߬ ߓߟߏ ߘߌ߫ ߢߐ߲߮ ߡߊ߬߸ ߏ߬ ߟߋ ߘߌ߫ ߖߡߊ߬ߣߊ߬ߘߋ߲ ߠߎ߬ ߕߏ߫ ߟߊ߬ߞߊ߲߬ߘߊ߬ߟߌ ߞߣߐ߫߸ ߞߵߊ߬ߟߎ߫ ߖߎ߬ߛߎ ߛߎߡߊ߫.

ߢߐ߲߯ߦߋ ߟߊߓߊ߲ ߘߐ߫߸ ߞߎߡߊ ߞߎ߲߬ߘߏ߲ ߞߍ߫ ߘߊ߫ ߖߛߎ߬ߛߎߡߊ ߟߊߛߓߊ߬ߕߌ ߞߎߡߊ ߟߋ߬ ߘߌ߫߸ ߓߟߏ߫ ߘߌ߫ ߢߐ߲߰ ߡߊ.