ߕߐ߲߫ ߓߟߏߡߊ ߟߎ߫ ߟߋ߬ ߥߊߣߍ߲߫ ߖߌ߰ ߟߊ߫ ߞߎ߬ߙߋߡߊ߬ߟߋ߲߬ ߛߊߣߌ߲߫ ߘߊߡߊ߲ߘߊ ߘߏ߫ ߞߣߐ߫߸ ߛߌ߯ߙߌ߲߫ ߕߌ߲߬ߞߎߘߎ߲ ߘߐ߫ ߞߍ߲ߘߍߟߏ߲߫ ߕߊ߬ߡߌ߬ߣߍ߲ ߂߀߂߆ ߞߏ߲ߓߌߕߌ߱ ߕߋ߬ߟߋ߫ ߂߈ ߡߊ߬، ߛߙߋߦߊ߫ ߛߌߦߊߡߊ߲߫ ߠߊ߫ ߝߐߟߌ߫ ߘߐ߫߸ ߡߍ߲ ߠߎ߬ ߢߊ ߕߘߍ߬ ߜߍ ߘߐ߫ ߦߋ߲߬߸ ߞߏ߫ ߡߐ߰ ߝߌ߬ߟߊ߫ ߟߋ߬ ߝߊ߰ߣߍ߲߫߸ ߘߋ߲ߣߍ߲߫ ߞߋߟߋ߲߫ ߣߌ߫ ߡߛߏ߬ ߞߋߟߋ߲߫߸ ߞߵߏ߬ ߟߊ߫ ߓߟߏߝߋ߲߫ ߛߌߦߊߡߊ߲߫ ߘߐߕߌߢߍ ߞߊ߲߬.
ߊߐ ߛߙߋ ߘߏ߫ ߟߊߛߐ߬ߘߐ߲߬߸ ߡߍ߲ ߞߵߊ߬ ߣߕߊ߬ ߞߏ߫ ߞߵߊ߬ ߕߐ߮ ߕߏ߫ ߜߎ߬ߕߙߎ ߞߣߐ߫߸ ߣߊ߲߬ߕߌ߮ ߢߌ߲߬ ߠߎ߫ ߕߊ߬ ߘߊ߫ ߓߊ߬ߙߊ߫ ߡߐ߱ ߟߎ߬ ߘߐ߫ ߟߋ߬߸ ߛߊߣߌ߲߫ ߓߊ߯ߙߟߊ ߡߍ߲ ߠߎ߬ ߕߍ߬ߘߍ߫ ߦߋ߲߬߸ ߊ߬ߟߎ߫ ߣߊ߬ ߘߊ߫ ߟߋ߬ ߞߵߊ߬ ߛߐ߬ߘߐ߲߬ ߏ߬ ߟߎ߬ ߝߏߦߌ߬ ߡߊ߫ ߟߊߟߐ߲ߠߌ߲߫.
ߏ߬ ߟߋ ߞߍ߫ ߘߊ߫ ߛߊߓߎ߫ ߘߌ߫ ߞߊ߬ ߕߊ߬ߘߌ߬ߓߊ߬ߕߊߘߌߓߊ ߟߊߘߏ߲߬ ߦߙߐ ߏ߬ ߘߐ߫ ߦߋ߲߬ ߞߣߐ߬ߘߐ߬ߝߟߌ ߘߝߊߣߍ߲ ߘߌ߫.
ߛߙߋ ߏ߬ ߞߵߊ߬ ߝߐ߫ ߒ߬ ߧߋ߫ ߏ߬ ߟߋ ߘߐ߫ ߞߏ߫ : <<ߣߊ߲߬ߕߌ߮ ߟߎ߫ ߟߋ߬ ߣߊ߬ߣߍ߲߫ ߖߌ߰ ߟߊ߫ ߘߊ߬ߡߊ߲ ߞߣߐ߫߸ ߞߵߊ߬ ߛߐ߬ߘߐ߲߬ ߡߐ߰ ߛߌ߫ ߡߊ ߟߊߛߏ߬ߓߌ߫ ߊ߬ ߞߏ ߟߊ߫، ߕߊ߬ߘߌ߬ߓߊ߬ߕߊߘߌߓߊ ߏ߬ ߟߋ ߕߍߡߊ߬ ߡߎ߬ߕߎ߲߬ ߛߊ߫߸ ߞߊ߬ ߟߊ߬ߡߊ߮ ߘߏ߲߬ ߓߍ߯ ߘߐ߫߸ ߓߍ߯ ߓߏ߬ߙߌ߬ ߢߊ ߟߋ߬ ߞߍߣߴߏ߬ ߘߌ߫߸ ߝߏ߫ ߛߋ߲߭ ߟߐ߬ ߘߊ߫ ߘߋ߲ߣߍ߲ ߘߏ߫ ߞߊ߲߬، ߓߊߏ߬߸ ߡߏ߬ߛߏ ߘߏ߫ ߟߎ߫ ߞߵߊ߬ߟߎ߬ ߘߋ߲ ߠߎ߬ ߟߊߝߟߌ߬ߣߍ߲ ߕߏ߫ ߊ߬ߟߎ߬ ߞߐ߫ ߟߋ߬ ߞߵߊ߬ߟߎ߫ ߓߏ߬ߙߌ߬.>> ߛߙߋ ߣߌ߲߬ ߞߵߏ߬ ߝߐ߫ ߜߎ߬ߕߙߎ ߞߣߐ߫.
ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߡߐ߰ ߛߌߦߊߡߊ߲߫ ߠߋ߬ ߖߊ߬ ߘߊ߫ ߝߎ߯ߘߌ ߞߘߐ߫߸ ߘߊ߬ߡߊ߲߬ߛߋ߲߬ ߕߙߏߞߏ ߟߎ߬ ߟߊ߫ ߝߎ߯ߘߌ߫ ߕߏ߲߫ ߠߊߘߍ߬ߣߍ߲ ߏ߬ ߟߎ߫ ߞߊ߬ߣߌ߲߬، ߓߊߙߊ߲ߕߏ߲߫ ߥߎߟߋ߲ ߓߊ߯ߙߊߞߍߟߊ ߟߎ߫ ߟߋ߬ ߣߊ߬ ߘߊ߫ ߡߐ߱ ߟߎ߬ ߡߊߘߍ߬ߡߍ߲߬، ߡߞߊ߬ߘߊ߲߬ߓߊ߰ߕߐ ߟߎ߬ ߘߐ߫߸ ߓߌ߲ߕߎ߬ ߕߙߊߥߟߋ߫ ߞߎ߲߭ ߕߏ߫ ߘߴߊ߬ ߘߐ߫ ߟߋ߬߸ ߊ߬ߟߋ ߛߊ߲߬ ߃߂ ߟߋ߬ ߕߋ߲߬߸ ߊ߬ ߝߘߎߣߍ߲߫߸ ߘߋ߲߫ ߡߐ߰ ߟߏ߯ߟߎ߫ ߦߴߊ߬ ߓߟߏ߫.
ߛߊ߬ߦߊ ߏ߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߣߊ߲߬ߕߌ߮ ߟߎ߬ ߟߊ߫ ߖߌ߰ߟߌ ߣߌ߲߬ ߞߊ߬ ߓߟߏߝߋ߲߫ ߛߌߦߊߡߊ߲߫ ߠߋ߬ ߞߊ߬ߛߙߊ߬، ߊ߬ߟߎ߫ ߞߊ߬ ߕߊ ߛߎ߫ ߘߊ߬ߡߊ߲߬ߓߊ߰ߙߊ߬ߟߊ ߟߎ߬ ߟߊ߫ ߦߙߐ߫ ߛߌߦߊߡߊ߲߫ ߠߋ߬ ߟߊ߫.
ߊ߲ ߞߊ߬ ߞߎ߬ߙߋߡߊ߬ߟߋ߲߬ ߡߙߊ߬ߘߊ߬ߙߋ߲ ߞߏߟߊߕߍ߮ ߘߏ߫ ߞߟߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߝߣߊ߫ ߟߊߞߍ߫ ߘߊ߫ ߛߦߊ߬ ߞߏ ߣߌ߲߬ ߞߊ߬ߟߊߡߊ߬߸ ߓߊ߬ߙߌ߬ ߞߏ߫ ߡߍ߲ ߜߟߍ߬ߦߊ߬ߣߍ߲߫߸ ߏ߬ ߟߋ ߞߍ߫ ߘߴߊ߬ߟߎ ߝߣߊ߫ ߟߊߟߐ߲ߠߌ߲ߓߊߟߌߦߊ ߘߌ߫.
ߊ߬ߟߋ ߞߵߊ߬ ߝߐ߫ ߊ߲ ߧߋ߫ ߞߏ߫: <<ߡߍ߲ ߝߐ߫ ߘߊ߫ ߒ ߧߋ߫߸ ߞߏ߫ ߡߐ߰ ߞߋߟߋ߲߫ ߠߋ߬ ߛߊ߬ߣߍ߲߬، ߤߊߟߵߊ߲ߠߎ߬ ߡߍ߲ ߠߎ߬ ߝߣߊ߫ ߦߋ߫ ߦߊ߲߬ ߝߊ߰ߡߊ ߘߌ߫߸ ߊ߲ ߡߊ߫ ߟߊߟߐ߲ߠߌ߲߫ ߊ߬ ߞߏ ߟߊ߫، ߊ߬ߟߎ߫ ߣߊ߬ ߘߊ߫ ߟߋ߬ ߕߋ߲߬߸ ߞߊ߬ ߣߊ߬ ߡߊ߬ߙߌ߬ߝߊ ߕߋ߬߸ ߞߊ߬ ߕߊ ߛߎ߫ ߦߙߐ ߟߎ߬ ߟߊ߫ ߘߊ߬ߡߊ߲ ߞߣߐ߫߸ ߞߊ߬ ߓߍ߯ ߓߌ߬ߟߊ߫ ߞߣߐ߬ߘߐ߬ߝߟߌ ߘߐ߫.>> ߊ߬ ߞߵߏ߬ ߝߐ߫.
ߏ߬ ߘߐ߫߸ ߝߊ߰ߡߊ ߟߎ߬ ߟߊ߫ ߞߎߡߊ ߟߋ߬ ߡߊߞߐ߬ߣߐ߲߬ߣߍ߲߫ ߣߌ߲߬ ߞߊ߲߬ ߕߋ߲߬߸ ߞߵߊ߬ ߢߊߝߐ߫ ߖߊ߬ߡߊ ߦߋ߫߸ ߣߊ߲߬ߕߌ߮ ߟߎ߫ ߣߊ߬ߣߍ߲߫ ߢߊ ߡߍ߲ ߡߊ߬߸ ߊ߬ ߣߌ߫ ߡߐ߰ ߖߊ߬ߕߋ ߡߍ߲ ߝߊ߰ߣߍ߲߫߸ ߊ߬ ߣߴߊ߬ ߕߌߢߍߟߌ߫ ߞߍߣߍ߲ ߠߎ߬، ߛߙߋߦߊ ߟߎ߫ ߞߏ߬ߣߌ߲ ߓߘߊ߫ ߓߊ߲߫ ߡߐ߰ ߝߌ߬ߟߊ߫ ߟߊ߬ ߞߏ ߝߐ߫ ߟߊ߫.
ߖߡߊ߬ߣߊ߬ߘߋ߲ ߠߎ߫ ߞߐ߬ߣߌ߲ ߦߴߊ߬ߟߎ߫ ߖߘߍ߬ ߡߊߢߌ߬ߣߌ߲߬ߞߊ ߟߋ߬ ߞߊ߲߬߸ ߣߊ߲߬ߕߌ߮ ߢߌ߲߬ ߠߎ߬ ߥߊߣߍ߲߫ ߡߎ߲߬ ߞߋߟߋ߲߫ ߠߊ߫ ߞߎ߬ߙߋߡߊ߬ߟߋ߲߬߸ ߤߊ߲߯ ߞߊ߬ ߥߊ߫ ߣߌ߲߬ ߞߏ߫ ߛߎ߮ ߞߍ߫ ߘߊ߬ߡߊ߲ ߞߣߐ߫.
