ߞߎߣߎ߲߬ ߞߍ߲ߘߍߟߏ߲ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߁߇߸ ߝߊ߬ߙߊ߲߬ߛߌ߫ ߞߊ߬ ߜߟߍ߬ߦߊ߫ ߟߋ߬ ߦߴߊ߬ ߢߊ ߟߊ߫߸ ߝߊߦߌߘߊ߫߸ ߊ߬ ߓߘߊ߫ ߛߊ߲߬ ߥߐ߯ߙߐ߫ ߓߐ߫߸ ߡߍ߲ ߢߐ߲߰ ߕߎ߲߬ ߡߊ߫ ߞߍ߫ ߦߋ߲߬، ߝߊ߰ߡߊ ߟߎ߬ ߟߊ߫ ߝߐߟߌ߫ ߘߐ߫߸ ߡߐ߰ ߅߅߀ ߀߀߀ ߟߋ߬ ߓߐ߫ ߘߊ߫ ߔߊߞߌߛߦߊ ߘߐ߫߸ ߛߌ߲߬ߝߏ߲߬ߧߊ߬ߟߌ߬ߟߊ ߟߎ߫ ߞߏ߬ߣߌ߲ ߞߊ߲߫ ߞߏ߫ ߡߐ߰ ߈߀߀ ߀߀߀ ߠߋ߬، ߣߴߌ ߞߵߊ߬ ߡߊߝߟߍ߫߸ ߕߍ߮ ߓߘߊ߫ ߞߍ߫ ߡߐ߰ ߂ ߃߉߇ ߟߋ߬ ߘߐ߫߸ ߕߐ߲ߓߟߏߡߊ ߟߎ߬ ߣߌ߫ ߞߟߍ߬ߡߐ߯ ߡߐ߰ ߉߉߇ ߓߘߊ߫ ߡߊߘߌߡߌ߲߫߸ ߥߐߙߐ߲ߝߌ߬ߟߊ߬ ߦߴߏ߬ ߘߐ߫߸ ߡߍ߲ ߠߎ߬ ߟߊ߫ ߖߐߞߟߌ߫ ߘߊ ߖߎ߯ߡߊ߲߫ ߞߏߛߓߍ߫.

ߔߊ߬ߙߌ߬ ߞߣߐ߫߸ ߔߊߞߌߛߦߊߟߊ߫ ߞߋߟߋ߲߫ ߠߋ߬ ߝߊ߰ ߘߊ߫ ߦߋ߲߬، ߞߊ߬ߕߎ߲߯߸ ߛߍ߱ ߘߊ߲߬ߠߊߕߊ߬ߡߌ߲߬ߣߍ߲ ߠߋ߬ ߞߊ߬ ߣߌߟߊߞߟߌߖߊߒߘߐ ߟߊߛߴߊ߬ ߡߊ߬߸ ߞߵߏ߬ ߞߍ߫ ߊ߬ ߟߊ߫ ߛߊ߬ߦߊ ߕߎ߬ߙߎ ߘߌ߫.

ߕߌߢߍߟߌ߫ ߛߌߦߊߡߊ߲߫ ߠߋ߬ ߞߍߣߍ߲߫، ߣߴߌ ߞߊ ߟߌߡߏߖ߭ ߡߊߝߟߍ߫߸ ߕߎ ߛߎ߫ ߘߊ߫ ߟߋ߬ ߦߋ߲߬ ߞߊ߬ߝߏ߬ߙߋ߲߬ߘߊ ߟߊ߫، ߟߌߦߐ߲߫ ߞߣߐ߫߸ ߞߎ߲ߝߊ߲ߓߐߟߌߟߊ ߟߎ߬ ߟߊ߫ ߛߓߍߘߊ ߟߋ߬ ߖߋ߬ߣߌ߲߬ ߘߊ߫، ߖߊ߬ߥߏߔ߬ߞߍ߬ ߦߙߐ ߛߌߦߊߡߊ߲߫ ߠߋ߬ ߕߋ߬ ߘߊ߫ ߛߏ߫ ߛߌߦߊߡߊ߲߫ ߞߣߐ߫.

ߊߟߎ߫ ߘߏ߲߬ ߦߴߊ߬ ߟߐ߲߫߸ ߡߐߣߌ ߣߌ߲߬ ߡߊ߫ ߘߊߡߌ߬ߣߊ߬ ߞߎߣߎ߲߬ ߘߐߙߐ߲߫ ߘߐ߫ ߘߋ߬، ߞߊ߬ߦߌ߯ ߕߎߟߊߝߌ߲ ߠߊ߫߸ ߞߊ߬ߙߊ߲߬ߘߋ߲ ߠߎ߬ ߣߌ߫ ߞߊ߬ߙߊ߲߬ߠߊ߬ߘߋ߲ ߠߎ߬ ߟߋ߬ ߝߟߐ߫ ߞߊ߬ ߛߌߟߊ߫ ߞߊ߲ߠߊ ߟߎ߬ ߟߊߝߌ߲߬߸ ߞߏ߫ ߊ߬ߟߎ߬ ߟߊ߫ ߞߊ߬ߙߊ߲ ߟߌ߬ߤߟߊ ߡߊ߫ ߢߌ߲߬، ߏ߬ ߟߋ ߕߏߣߴߌ ߘߐ߫߸ ߞߙߎ߫ ߜߘߍ߫ ߝߣߊ߫ ߥߟߌ߬ ߘߊ߫߸ ߞߏ߫ ߖߡߊ߬ߣߊ ߓߘߊ߫ ߜߟߍ߬ߦߊ߬߸ ߝߋ߲ ߠߎ߬ ߛߐ߲߬ߞߐ ߓߘߊ߫ ߦߟߍ߬߸ ߝߊ߬ߙߊ߲߬ߛߌ߫ ߛߌ߱ ߓߘߊ߫ ߞߍ߫ ߥߊߦߌߞߏ߲߬ߓߊ ߘߌ߫، ߏ߬ ߟߋ ߘߐ߫߸ ߖߡߊ߬ߓߊ ߓߐ߫ ߘߊ߫ ߞߏ߲ߓߌߕߌ߮ ߕߟߋ߬ ߁߃ ߡߊ߬.

ߜߟߍ߬ߦߊ ߢߌ߲߬ ߠߋ߬ ߓߍ߯ ߞߏߛߐ߲߬߸ ߋߡߊߣߎ߳ߍߟ ߡߊߞߐߙߐ߲߫ ߞߊ߬ ߞߎߡߊ ߕߊ߬ ߓߌ߬ ߞߊ߯ߙߌ߸ ߞߏ߲ߓߌߕߌ߮ ߕߟߋ߬ ߁߈߸ ߞߊ߬ ߞߎߡߊ߫ ߝߊ߬ߙߊ߲߬ߛߌ߬ߞߊ ߟߎ߫ ߝߍ߬، ߊ߬ ߞߊ߬ ߡߌ߬ߛߍ߲߬ ߕߊ߲߫ ߖߊ߬ߕߋ߫ ߟߋ߬ ߞߍ߫ ߞߎߡߊ ߟߊ߫ ߋߟߌߖ߭ߋ߫ ߞߣߐ߫.

ߊ߬ ߞߵߊ߬ ߝߐ߫ ߊ߬ ߟߊ߫ ߞߎߡߊ ߢߌ߲߬ ߠߋ߬ ߘߐ߫߸ ߞߏ߫: <<ߓߌ߬ ߢߐ߲߰ ߟߏ߲߫߸ ߊ߲ ߓߍ߯ ߟߋ߬ ߡߐߣߍߣߍ߲߫߸ ߡߊ߬ߟߏ ߦߴߊ߲ ߓߍ߯ ߟߋ߬ ߕߊ߫ ߘߌ߫.>> ߊ߬ ߞߵߏ߬ ߝߐ߫. ߞߊ߲ߕߌ߮ ߞߵߊ߬ ߝߐ߫ ߞߏ߫ ߕߎ߬ߢߊ ߟߋ߬ ߝߛߊߦߌ߫߸ <<ߤߊߞߍ߫ ߡߞߊߣߌ߲ ߦߋ߫ ߞߍߕߊ ߟߋ߬ ߘߌ߫.>> ߊ߬ ߕ߯ߕߌ߯ ߖߍ߬ߘߍ ߡߍ߲ ߓߍ߲߬ߣߍ߲߫ ߛߊ߲߬ߠߌ߲ ߟߌ߬ߤߟߊ ߡߊ߬߸ ߊ߬ ߣߌ߫ ߘߋ߲ߡߌߛߍ߲ ߠߎ߬ ߟߊ߫ ߛߌߣߌ߲߫ ߢߍߛߌ߮ ߡߊ߬߸ ߏ߬ ߓߐߟߌ ߞߊ߫ ߢߌ߲߬، ߓߊ߬ߙߌ߬߸ ߣߴߊ߬ ߘߌ߫ ߞߍ߫ ߜߊ߬ߟߏ ߟߋ߬ ߘߌ߫߸ ߕߌߢߍߟߌ ߟߋ߬ ߘߌ߫߸ ߏ߬ ߟߋ ߕߍ߫ ߓߍ߲߬ ߝߋߎ߫.

ߛߊ߬ߙߌ߬ߦߊ߬ ߓߟߏ ߡߊ߬߸ ߡߊߞߐߙߐ߲߫ ߞߵߊ߬ ߦߌ߬ߘߊ߬ ߞߏ߫: <<ߡߍ߲ ߠߎ߬ ߣߐ߬ ߕߌߢߍߟߌ ߞߍ߫ ߟߊ߫߸ ߏ߬ ߟߎ߬ ߞߊ߫ ߞߊ߲߫ ߞߵߏ߬ ߛߊ߬ߣߊ߲ ߛߊ߫، ߡߍ߲ ߠߎ߬ ߣߐ߬ ߕߊ߬ߟߌ ߞߍ߫ ߟߊ߫߸ ߏ߬ ߟߎ߬ ߞߊ߫ ߞߊ߲߫ ߞߵߏ߬ ߟߊߛߊ߬ߦߌ߲߬.>>

ߡߊߞߐߙߐ߲߫ ߞߵߊ߬ ߝߐ߫ ߞߏ߫ ߢߊߢߌߣߌ߲ߠߌ߲߫ ߠߋ߬ ߞߊ߫ ߞߊ߲߫ ߞߊ߬ ߞߍ߫ ߞߊߟߌߦߊ߫ ߓߟߏ ߡߊ߬߸ ߕߐ߲ߓߟߏߡߊ ߟߎ߫ ߣߐ߬ ߕߌߢߍߟߌ ߡߍ߲ ߞߍ߫ ߟߊ߫߸ ߞߵߏ߬ ߟߎ߬ ߟߐ߲߫ ߖߏߣߊ߫.

ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߡߙߊ߬ߓߊ߮ ߟߎ߬ ߣߌ߫ ߞߊ߬ߝߏ߬ߙߋ߲߬ߕߌ߮ ߟߎ߬ ߘߌ߫ ߛߴߊ߬ߟߎ߬ ߓߟߏ ߘߌ߫ ߟߊ߫ ߢߐ߲߮ ߡߊ߬߸ ߞߊ߬ ߛߋ߫ ߖߍ߬ߘߍ ߞߊ߬ <<ߔߊߞߌߛߦߊ ߘߏ߫ ߟߎ߫ ߟߊߕߐ߲߫.>>

ߞߊ߯ߙߌ ߣߌ߲߬ ߡߊ߬߸ ߔߊ߬ߙߌ߬ ߞߟߊߦߊ߫ ߘߊ߫ ߟߋ߬ ߞߏߛߓߍ߫߸ ߏ߬ ߡߍ߲ ߞߍ߫ ߘߍ߫ ߔߊߞߌߛߦߊߓߊ ߘߎ߰ߛߊ߬ߜߍ ߘߌ߫.

ߘߎߢߊ߫ ߕߋ߲߬ ߠߋ߬ ߖߐ߫߸ ߝߊ߬ߙߊ߲߬ߛߌ߬ ߡߍ߲ ߗߋ ߦߴߊ߬ ߝߐ ߘߌ߫ ߛߐ߲߬߸ ߞߏ߫ ߝߘߊ߬ߝߌ߲߬ߠߊ߫ ߦߋ߫ ߓߍ߯ߦߊ ߟߊߓߊ߬ߕߏ߬߸ ߞߊ߬ ߛߊ߬ߙߌ߬ߦߊ ߡߊߓߏ߲߬ߧߊ߬߸ ߏ߬ ߟߋ ߝߣߊ߫ ߞߟߊߡߊ߲߫ ߣߌ߲߬ ߓߌ߬߸ ߝߏ߫ ߔߊߞߌߛߦߊߟߊ ߟߎ߬ ߓߘߊ߫ ߕߌߢߍߟߌ߫ ߞߟߊ߬ߥߟߎ ߞߍ߫.

ߔߊߞߌߛߦߊ ߣߌ߲߬ ߦߋ߫ ߞߏ ߘߏ߫ ߟߋ߬ ߦߌ߬ߘߊ߬ ߟߊ߫߸ ߝߘߊ߬ߝߌ߲߬ߠߊ߬ ߞߋߟߋ߲߫ ߞߟߊߡߊ߲߫ ߕߍ߫߸ ߝߘߊ߬ߝߌ߲߬ߠߊ߫ ߞߋߟߋ߲߫ ߕߍ߫ ߕߌߢߍߟߌ߫ ߦߙߐ߫ ߘߌ߫، ߦߙߐ ߓߍ߯ ߦߋ߫ ߛߎߡߊ߫ ߟߊ߫߸ ߦߙߐ ߓߍ߯ ߦߋ߫ ߞߟߊߦߊ߫ ߟߊ߫، ߖߡߊ߬ߣߊ ߟߎ߬ ߦߋ߫ ߓߐ߫ ߟߊ߫ ߢߐ߲߮ ߡߊ߬ ߢߊ ߡߍ߲߸ ߓߍ߯ߦߊ ߟߊߕߊ߯ߡߊ߫ ߢߊ ߟߎ߬ ߝߣߊ߫ ߓߐ߫ ߟߊ߫ ߢߐ߲߮ ߡߊ߬ ߕߋ߲߬ ߠߋ߬.