ߝߘߊ߬ߝߌ߲߬ߠߊ߫ ߛߊ߲߭ ߂߀ ߘߎ߰ߟߊ߬ ߘߋ߲ߣߍ߲ ߠߎ߬ ߟߊ߫ ߡߊ߲߬ߕߏ߲߬ ߖߌߟߊߝߍ ߕߊ߲ߠߌ߲ ߡߍ߲ ߛߌ߰ߣߍ߲߫ ߛߋ߲߬ߠߊ߫ ߂߀߂߆ ߢߌ߲߬ ߠߊ߫ ߡߊ߬ߟߌ ߖߡߊ߬ߣߊ ߞߊ߲߬߸ ߖߌ߬ߣߍ߫ ߟߋ߬ ߣߐ߬ ߏ߬ ߖߌߟߊߝߍ ߕߊ߬ ߟߊ߫ ߞߊ߬ ߞߍ߫ ߛߏ߬ߘߊ߲߬ߛߏ ߘߌ߫ ߞߟߏߞߕߏߦߊ ߘߐ߫، ߞߊ߬ߕߎ߲߯߸ ߊ߬ ߛߋ߫ ߘߊ߫ ߜ߭ߊ߲ߓߌ߫ ߡߊߣߐ߬ ߟߊ߫ ߞߵߊ߬ ߓߌ߬ߟߴߊ߬ ߞߘߐ߫ ߕߎ߬ ߣߊߡߙߊߕߐߣߍ߲߫ ߞߋߟߋ߲߫ ߠߊ߫߸ ߡߍ߲ ߘߏ߲߬ ߘߊ߫ ߓߡߊ߬ߞߐ߫ ߕߏ߬ߟߊ߲߬ߕߊ߲߬ ߓߙߊ߫ ߡߊ߬ߡߊߘߎ߬ ߞߏ߬ߣߊ߬ߕߍ߫ ߞߊ߲߬ ߞߎߣߎ߲߬ ߛߌ߬ߣߌ߲߬ߟߏ߲ ߡߊ߬.

ߊߓߎߓߞߊߙ ߞߋߕߊ߬ ߟߋ߬ ߞߊ߬ ߛߟߌ߫ ߛߏ߭ ߟߊߓߐ߫߸ ߞߊ߬ ߖߐ߭ ߘߐߝߎ߬ߙߊ߲߫ ߡߌ߬ߛߍ߲ ߃߈߲ ߡߊ߬، ߊ߬ ߟߊ߫ ߕߎ߬ ߁ ߏ߬ ߟߋ ߞߊ߬ ߖߌ߬ߣߍ߬ ߞߍ߫ ߞߟߏߞߏ߬ߕߏ ߘߌ߫߸ ߜ߭ߊ߲ߓߌ߫ ߡߊ߫ ߛߋ߫ ߡߍ߲ ߛߙߊ߬ ߟߊ߫ ߜߘߍߞߍ߫ ߡߎ߬ߕߎ߲߬، ߊ߬ߟߎ߬ ߟߊ߫ ߟߞߊ߬ߙߊ߲߬ߧߊ߬ߟߌ߬ߟߊ ߦߋ߫ ߡߏ߬ߤߊ߬ߡߍ߬ߘ ߟߊ߬ߡߌߣ ߛߌ߬ߟߊ ߡߍ߲ ߘߌ߫߸ ߏ߬ ߣߴߊ߬ ߟߊ߫ ߛߘߍߘߋ߲ ߠߎ߬ ߓߘߊ߫ ߖߌߟߊߝߍ ߢߌ߲߬ ߕߊ߬ ߞߎ߲߬ߠߊ߬ߦߋ߬ߙߋ߲߬ߓߊ߫ ߘߐ߫.

ߏ߬ ߟߋ ߞߏߛߐ߲߬߸ ߖߌ߬ߣߍ߫ ߕߏ߬ߟߊ߲߬ߕߊ߲߬ ߞߙߎߝߊ ߞߊ߬ ߝߏ߬ߟߌ ߟߊߛߋ߫ ߕߏ߬ߟߊ߲߬ߕߊ߲߬ߠߊ ߟߎ߫ ߡߊ߬߸ ߞߏ߫ ߊ߬ߟߎ߬ ߓߊߙߌߞߊ߫߸ ߞߵߏ߬ ߢߐ߲߰ ߝߏ߬ߟߌ߬ ߞߋߟߋ߲ ߏ߬ ߟߊߛߋ߫ ߟߞߊ߬ߙߊ߲߬ߧߊ߬ߟߌ߬ߟߊ߫ ߡߏ߬ߤߊ߬ߡߍ߬ߘ ߟߊ߬ߡߌߣ ߛߌ߬ߟߊ ߡߊ߬.

ߛߟߌ߫ ߘߋ߲ߣߍ߲ ߢߌ߲߬ ߠߎ߫ ߞߊ߬ ߢߌ߬ߣߊ߲߬ ߢߐ߲߯ߓߍ߲ ߣߌ߲߬ ߘߊߡߌ߬ߣߊ߬ ߞߟߊߓߎ ߡߍ߲ ߘߐ߫߸ ߊ߬ ߕߊ߬ߣߍ߲߫ ߏ߬ ߞߟߊߓߎ߫ ߞߋߟߋ߲ ߠߋ߬ ߘߐ߫߸ ߞߵߊ߬ ߕߊ߬ ߞߙߎ ߟߎ߬ ߟߊ߫ ߢߐ߲߯ߓߍ߲ ߡߊ߬ ߤߊ߲߯ ߕߋ߲߬، ߞߊ߬ߕߎ߲߯߸ ߊ߬ߟߎ ߟߋ߬ ߞߊ߬ ߡߊ߬ߟߌ ߘߊ߬ߘߌ߫ ߕߎ߬ ߁-߀ ߞߊ߲߬߸ ߞߊ߬ ߟߌߓߋߙߌߦߊ߫ ߘߊ߬ߘߌ߬ ߢߊ߫ ߞߋߟߋ߲ ߏ߬ ߡߊ߬، ߊ߬ߟߎ߬ ߡߊ߫ ߛߋ߫ ߜ߭ߊ߲ߓߌ߫ ߟߋ߬ ߟߊ߫ ߛߋ߲߬ߢߊ߬ ߝߟߐ ߘߐ߫߸ ߏ߬ ߞߵߊ߬ߟߎ߫ ߘߊ߬ߘߌ߫ ߟߋ߬ ߕߎ߬ ߁-߂ ߞߊ߲߬ ߟߏ߲ ߃߲ ߡߊ߬.

ߟߊ߬ߓߊ߲ ߢߍߕߊ ߕߊ߲ߠߌ߲ ߝߍ߬ ߏ߬ ߘߐ߫߸ ߖߌ߬ߣߍ߫ ߞߵߊ߬ ߛߎ߮ ߦߌ߬ߘߊ߫ ߛߣߍ߬ߜ߭ߊߟߌ߫ ߟߋ߬ ߟߊ߫ ߦߋ߲߬ ߞߵߏ߬ ߟߊߓߐ߫߸ ߞߊ߬ ߥߴߊ߬ ߟߐ߬ ߟߊ߬ߓߊ߲ ߕߊ߲߫ ߞߣߍ ߞߊ߲߬، ߏ߬ ߟߋ ߖߍ߬ߘߍ ߞߍ߫ ߘߊ߫ ߕߙߎ߬ ߘߌ߫߸ ߛߌߟߊ ߟߊߞߊ߬ ߘߴߊ߬ߟߎ߬ ߦߋ߫߸ ߘߋ߲ߣߍ߲ ߠߎ߬ ߟߊ߫ ߖߌߟߊߝߍ߫ ߕߊ߲ߠߌ߲߫ ߣߊ߬ߕߐ ߡߍ߲ ߞߍߕߐ߫ ߜ߭ߊ߯ߣߊ߬߸ ߊ߬ߟߎ ߛߎߘߊ߲ߣߍ߲ ߓߍ߯ ߟߵߏ߬ ߘߌ߫ ߞߊ߬ ߥߊ߫ ߦߋ߲߬߸ ߞߊ߬ ߛߐ߬ߘߐ߲߬ ߜߙߋ ߡߎ߰ߡߍ ߟߊ߫ ߕߊ߲ߠߌ߲߫ ߓߟߋ߬ߓߟߋ ߘߐ߫.