ߡߊ߬ߡߊߘߌ߫ ߛߊ߬ߞߐ߫ ߟߋ߬ ߣߐ߬ ߓߌ߬ߟߊ߬ߒ߬ߘߐ߬ߖߎ߮ ߞߍ߫ ߟߊ߫ ߓߊ߲߬ߓߊ߬ߟߊ ߣߌ߫ ߓߎ߬ߙߋ߫ ߞߐ߬ߟߋ߲߬ߘߊ ߕߍߟߊ ߘߐ߫ ߞߎߣߎ߲߬߸ ߞߵߏ߬ ߞߍ߫ ߊ߬ ߓߣߐ߬ߣߍ߲ ߠߴߊ߬ ߣߌ ߘߐ߫، ߞߎߣߎ߲߬ ߞߍ߲ߘߍߟߏ߲ ߂߀߂߆ ߞߏ߲ߓߌߕߌ߯ ߕߋ߬ߟߋ߫ ߃߁، ߟߊ߲߬ߛߙߊ߬ ߛߊߟߌ ߥߊ߯ߕߌ߸ ߡߕߏߕߌ߮ ߝߌ߬ߟߊ ߟߋ߬ ߣߐ߬ ߢߐ߲߯ ߓߍ߲߬ ߠߊ߫߸ ߓߎ߬ߙߋ߫ ߞߐ߬ߟߋ߲߬ߘߊ ߣߌ߫ ߓߊ߲߬ߓߊ߬ߟߊ ߕߍߟߊ ߘߐ߫߸ ߏ߬ ߟߋ߬ ߞߍ߫ ߘߊ߫ ߞߟߌߟߌ ߞߍ߫ ߢߊ ߘߌ߫ ߞߏ߫ ߓߌ߬ߟߊ߬ߒߘߐ ߓߘߊ߫ ߞߍ߫߸ ߝߙߍ߬ߞߍ߫ ߘߊ߫ ߞߊ߬ ߓߌ߬ߟߊ߬ߒ߬ߘߐ߬ߓߊ߰ߕߐ ߝߌ߬ߟߊ ߕߊ߬ ߞߊ߬ ߥߊ߫ ߊ߬ߟߎ߬ ߘߌ߫߸ ߊ߬ߟߎ߫ ߞߊ߬ ߓߌ߬ߟߊ߬ߒ߬ߘߐ ߞߍ߫ ߢߊ߫ ߡߍ߲ ߡߊ߬.
ߊ߬ ߞߍ߫ ߘߊ߫ ߓߌ߬ߟߊ߬ߒ߬ߘߐ߬ߖߎ߮ ߟߋ߬ ߘߌ߫߸ ߓߊߏ߬߸ ߊ߬ ߦߌߘߊߞߊ߬ ߘߴߊ߲ ߠߊ߫߸ ߞߏ߫ ߡߕߏߕߌ߮ ߝߌ߬ߟߊ ߟߋ߬ ߣߐ߬ ߢߐ߲߯ ߓߍ߲߬ ߠߊ߫߸ ߞߊ߬ ߘߏ߲߬ ߢߐ߲߮ ߘߐ߫߸ ߞߋߟߋ߲߸ ߊ߬ ߡߊ߫ ߘߌ߯ ߏ߬ ߟߊ߫، ߞߋߟߋ߲ ߕߊ߬ ߘߊ߫ ߞߊ߬ ߟߊߝߟߌ߬ ߞߋ߬ߡߎ߲߬ߓߏ ߞߊ߲߬߸ ߏ߬ ߟߋ߬ ߓߍ߲߬ ߝߊ߯ߞߊ߲ߓߋ߲ ߘߏ߫ ߣߊ߬ߕߐ߬ߟߊ ߡߊ߬߸ ߏ߬ ߘߴߊ߬ߟߋ ߦߋ߫ ߟߋ߬ ߓߊ߬ ߥߟߊ߫ ߍ߲߬ߍ߲߹ ߏ߬ ߟߋ߬ ߣߊ߬ ߘߊ߫ ߕߊ߬ߡߌ߲߫ ߊ߬ߟߋ ߗߍ߬ߟߍ߲߬ߞߟߏ ߝߌ߬ߟߊ ߞߊ߲߬߸ ߞߵߊ߬ ߘߐߖߐ߯ߛߐ߯، ߘߊ߲ߘߊߟߌߟߊ ߟߎ߬ ߞߵߊ߬ߟߎ߬ ߛߋߞߏ ߞߍ߫߸ ߞߊ߬ ߘߊ߲ߘߊߟߌ ߞߎ߲߬ߝߟߐ ߟߎ߬ ߜߵߊ߬ ߟߊ߫ ߞߏߛߓߍ߫.
ߘߊ߲ߘߊߟߌߟߊ ߟߎ߬ ߞߵߊ߬ ߦߌ߬ߘߊ߬ ߞߏߕߐ ߟߊ߫ ߡߐ߱ ߟߎ߬ ߟߊ߫߸ ߞߏ߫ ߓߊ߯ߙߊ ߡߍ߲ ߦߴߊ߬ ߘߌ߫߸ ߊ߬ ߞߊ߫ ߜߍ߬ߟߍ߲߬߸ ߏ߬ ߘߐ߫߸ ߊ߬ ߘߌߡߊ߲߫ ߊ߬ߟߎ߬ ߦߋ߫ ߞߊ߬ ߞߏ ߕߐ߭ ߞߎ߲߭ߘߏ߲߬ ߞߊ߲ߞߊ߲߫، ߓߊߏ߬߸ ߞߊ߲ߞߊ߲ ߥߊߘߌߓߐ ߘߌ߫ ߣߐ߰ߦߊ߫ ߊ߬ߟߎ߫ ߡߊ߬ ߝߣߊ߫߸ ߞߊ߬ ߕߊ߬ߡߌ߲߫ ߓߡߊ߬ߞߐ߫ ߞߊ߲߬߸ ߞߏߕߐ ߟߊ߫ ߡߐ߱ ߟߎ߬ ߞߵߊ߬ ߝߐ߫߸ ߞߏ߫ ߊ߬ߟߎ߬ ߓߘߊ߫ ߝߐߟߌ ߡߍ߲߫߸ ߏ߬ ߕߍ߫ ߖߎ߯ߡߊ߲߫ ߘߌ߫߸ ߞߏ߫ ߊ߬ߟߎ߬ ߦߋ߫ ߓߟߏߘߐߓߍ߲ ߞߊ߲߬߸ ߏ߬ ߟߋ߬ ߞߍ߫ ߘߊ߫ ߘߊ߲ߘߊߟߌߟߊ ߟߎ߬ ߝߣߊ߫ ߞߍߢߊ ߘߌ߫ ߞߊ߬ ߞߏߕߐ ߟߊ߫ ߓߊߛߌ ߟߎ߬ ߞߣߐ߬ߜߍ߲߫ ߘߊߡߌ߬ߣߊ߬߸ ߣߴߊ߬ ߡߊ߫ ߢߊ߬ ߞߏ߫ ߊ߬ ߟߊ߫ ߡߐ߰ ߟߎ߬ ߦߋ߫ ߓߟߏߘߐߓߍ߲ ߠߊ߫ ߞߊ߬ߣߌ߲߬.
ߕߏ߫ ߞߍ߫ ߘߊ߫ ߏ߬ ߟߋ߬ ߘߐ߫߸ ߞߊ߲ߓߋߙߋ߲ ߦߋߝߊߘߌ ߓߘߊ߫ ߡߊߝߊ߬ߟߋ߲߬߸ ߊ߬ ߦߌߘߊߞߊ߬ ߘߴߊ߬ ߟߊ߫ ߡߐ߱ ߟߎ߬ ߟߊ߫ ߘߊ߲ߘߊߟߌߟߊ ߟߎ߬ ߓߟߏ߫߸ ߞߏ߫ ߦߟߍ߬ߡߊ߲ ߓߊ߲߫ ߞߐ ߘߏ߲߬ ߠߊ߫ ߖߊ߲߬ߞߊ߬ߙߏ߬ߕߐ ߦߋߝߊߘߌ ߘߐ߫߸ ߊ߬ ߕߴߛߋ߫ ߟߊߕߊ߯ ߟߊ߫ ߘߌ߲߬ߞߌ߬ߙߊ߬ ߜߘߍ߫ ߘߐ߫ ߏ߬ ߞߐ߫߸ ߓߊߏ߬߸ ߣߴߊ߬ ߡߊ߫ ߢߊ߬ ߞߏ߫ ߌ ߥߊߕߐ߫ ߦߙߐ߫ ߜߘߍ߫ ߟߋ߬ ߘߐ߫߸ ߌ ߥߊߕߐ߫ ߓߏ߬ߙߌ߬ߝߋ߲ ߡߍ߲ ߞߣߐ߫߸ ߏ߬ ߓߍ߯ ߛߍ߱ ߞߍߕߐ߫ ߟߋ߬ ߌ ߞߊ߲߬߸ ߌ ߘߏ߲߬ ߠߊ߫ ߞߍ߲ߘߍߦߊ ߕߍ߫ ߏ߬ ߞߊߓߋ ߟߊ߫، ߕߏ߫ ߞߍ߫ ߘߊ߫ ߏ߬ ߞߏ ߟߎ߬ ߟߋ߬ ߟߊ߫߸ ߊߟߊ߫ ߞߊ߬ ߞߊ߲ߓߋߙߋ߲ ߠߊ߫ ߞߊ߬ߙߌ߬ߝߊ ߡߌ߬ߣߵߊ߬ ߟߊ߫، ߊ߬ߟߋ ߡߍ߲ ߣߌ ߕߏ߫ ߘߊ߫ ߓߌ߬ߟߊ߬ߒ߬ߘߐ߬ ߜߍߟߍ߲ ߘߐ߫ ߣߌ߲߬߸ ߊ߬ ߕߐ߯ ߦߋ߫ <<ߡߊ߬ߡߊߘߌ߫ ߛߊ߬ߞߐ߬>> ߘߌ߫.
ߊ߬ ߛߌ߬ߞߛߊ߬ߓߌ ߦߋ߫ ߛߊ߲߬ ߂߆ ߢߐ߲߰ ߠߋ߬ ߘߐ߫߸ ߡߊ߲ߞߊߣߌ߲ߛߍ߲ ߠߋ߬ ߕߘߍ߬ ߦߴߊ߬ ߘߌ߫߸ ߊ߬ ߡߊߖߌ߰ߣߍ߲߫ ߕߘߍ߬ ߦߋ߫ ߓߎ߬ߙߋ߫ ߕߌ߲߬ߕߌ߲߬߬ߧߊ߫ ߟߋ߬، ߓߌ߬ߟߊ߬ߒ߬ߘߐ߬ߖߎ߮ ߣߌ߲߬ ߞߍ߫ ߘߊ߫ ߞߎߣߎ߲߬ ߞߍ߲ߘߍߟߏ߲ ߂߀߂߆ ߞߏ߲ߓߌߕߌ߯ ߕߋ߬ߟߋ߫ ߃߁ ߠߋ߬ ߡߊ߬߸ ߓߊ߲߬ߓߊ߬ߟߊ ߣߌ߫ ߓߎ߬ߙߋ߫ ߞߐ߬ߟߋ߲߬ߘߊ ߕߍߟߊ ߟߋ߬ ߘߐ߫.
