ߊ߬ ߞߊ߫ ߛߌߦߴߊߟߎ߫ ߘߐ߫߸ ߡߍ߲ ߠߎ߬ ߞߊ߬ ߖߌ߬ߦߊ߬ߖߟߎ ߣߌ߲߬ ߘߐߜߍ߫߸ ߓߊߟߐ߲߫ ߘߐߙ ߘߋ߬ ߓߊ߲߬ߖߊ߫، ߘߋ߲ߣߍ߲߫ ߛߊ߲߬ ߁߁ ߏ߬ ߡߍ߲ ߕߘߍ߬ ߡߊߞߐߣߐ߲߫߸ ߕߏ߬ߟߊ߲ ߘߐߓߍ߲߬ߣߴߊ߬ ߓߟߏ߫ ߝߊ߰ߣߌ߲߬ ߞߏߙߏ߲ ߘߐ߫߸ ߊ߰ ߡߍ߲ ߕߊ߲߫ ߠߊ߫߸ ߞߵߊ߬ ߛߐ߬ߘߐ߲߬ ߊ߬ ߦߴߊ߬ ߞߎ߲߭ ߘߐ߫ ߞߏ߫ ߝߏ߫ ߊ߬ߟߋ ߦߋ߫ ߞߍ߫ ߕߏ߬ߟߊ߲߬ߕߊ߲߬ߠߊ߬ߓߊ߫ ߟߋ߬ ߘߌ߫، ߒ߬ߓߊ߬߸ ߘߋ߲ߣߍ߲ ߡߍ߲ ߕߍ߬ߘߍ߫ ߓߊ߲߬ߖߊ߲߬ ߘߌ߫ ߦߋ߲߬߸ ߏ߬ ߟߋ ߕߐ߯ ߞߏ߫ ߊߓߎߓߞߊߙ ߛߘߌߞߌ߬ ߛߎߡߊ߬، ߞߏ߬ߣߌ߲߬߸ ߓߍ߯ ߞߵߊ߬ ߟߐ߲߫ ߕߐ߮ ߡߍ߲ ߡߊ߬ ߏ߬ ߞߐ߫߸ ߏ߬ ߟߋ ߓߊ߲߬ߖߊ߲߬ ߘߌ߫.
ߒ߬ߓߊ߬߸ ߒߝߊ߬ ߛߙߊ ߕߍ߬ߘߍ߫ ߖߌ߬ߦߊ߬ߖߟߎ ߡߍ߲ ߘߐ߫ ߏ߬ ߘߌ߫ ߖߐ߫߸ ߏ߬ ߓߊ߲߬ߖߊ߲߫ ߠߋ߬ ߣߐ߬ ߞߝߊ߬ ߞߟߊߒߞߋ ߘߏ߫ ߛߓߍ߫ ߟߊ߫ ߣߌ߲߬߸ ߡߍ߲ ߕߐ߯ߟߊߣߴߊ߬ ߓߟߏ߫ ߞߏ߫ <<ߓߊ߲߬ߖߊ߲߬ ߓߊߟߐ߲߫ ߘߐߙ߸ ߒߠߋ ߟߋ߬ ߕߘߍ߬ ߖߐ߫>> ߊ߬ߟߋ ߦߋ߫ ߖߘߍ߬ߞߊ߲߬ߝߐ ߟߋ߬ ߘߌ߫߸ ߊ߬ ߕߍ߫ ߡߍ߲߫ ߡߎ߬ߕߎ߲߬߸ ߊ߬ ߘߌ߫ ߟߐ߯ߝߍ ߟߎ߬ ߟߊߛߐ߬ߘߐ߲߬߸ ߞߊ߬ ߝߘߊ߫ ߥߊߞߙߊ ߋߘߌߛߌߦߐ߲ ߠߊ߫.
ߊ߬ ߛߓߍߣߍ߲߫ ߊ߬ ߟߊ߫ ߞߊ߬ߝߊ ߣߌ߲߬ ߝߎ߬ߘߎ ߝߍ߬ ߟߋ߬߸ ߞߏ߫ <<ߌ ߡߙߌߦߊ ߦߋ߫ ߓߊ߲߬ߖߊ߲߬ ߞߐ߫ ߞߍ߬߸ ߓߊߟߐ߲߫ ߘߐߙ ߖߌ߬ߦߊ߬ߖߟߎ ߘߐ߫؟ ߒ߬ߓߊ߬ ߣߴߌ ߖߊ߲߬ ߏ߬ ߞߐ߫߸ ߏ߬ ߞߘߐ ߟߋ߬ ߞߏ߫ ߊ߲ ߞߊ߬ ߢߐ߲߮ ߟߐ߲߫ ߝߛߊߦߌ߫...>>
ߛߊ߲߬ ߓߌߛߊ߬ߓߊ߫ ߕߊ߬ߡߌ߲ ߞߐߝߍ߬߸ ߓߊ߲߬ߖߊ߲߬ ߓߘߊ߫ ߛߊ߲߬ ߄߂ ߛߐ߬ߘߐ߲߬߸ ߊ߬ ߞߊ߬ ߥߟߊ߬ߘߊ߬ ߛߌߦߊߡߊ߲߫ ߛߐ߬ߘߐ߲߬ ߡߍ߲ ߞߣߐ߫߸ ߝߏ߫ ߊ߬ ߞߊ߲߫ ߞߏ߫: <<ߘߎߢߊߘߐߕߍ߮ ߜߍ߬ߟߍ߲߬ߡߊ߲߫ ߠߋ߬ ߕߎ߬ߡߊ ߘߏ߫ ߟߎ߫ ߟߊ߫߸ ߟߊ߬ߦߙߊ߬ߓߟߌ߬ ߞߏ ߛߌߦߊߡߊ߲߫ ߠߋ߬ ߦߴߊ߬ ߘߐ߫߸ ߘߊߘߐߖߊ߫ ߞߏ ߟߎ߬ ߕߍ߫ ߓߊ߲߫ ߠߊ߫߸ ߢߐ߲߯ߦߋ ߞߊߦߌߙߊߟߡߊ ߟߎ߬ ߓߍ߯ ߦߴߊ߬ ߘߐ߫.>>
ߊ߬ ߟߊ߫ ߞߊ߬ߝߊ ߣߌ߲߬ ߞߣߐ߫߸ ߊ߬ ߞߊ߲߫ ߠߋ߬ ߞߏ߫ <<ߒ ߞߊ߬ ߞߏ ߺ ߏ ߺ ߞߏ߫ ߦߋ߫߸ ߒ ߞߊ߬ ߞߏ߫ ߛߌ߫ ߟߐ߲߫߸ ߊ߬ ߣߌ߫ ߒ ߞߊ߬ ߞߏ߫ ߛߌ߫ ߢߊߦߋ߫>> ߏ߬ ߓߍ߯ ߟߋ߬ ߢߊߝߐߣߴߊ߬ ߓߟߏ߫ ߞߊ߬ߝߊ ߞߣߐ߫، ߊ߬ ߞߵߏ߬ ߞߍ߫ ߡߎ߲߬ ߞߏߛߐ߲߬߸ ߞߊ߬ ߝߘߊ߬ߝߌ߲߬ߠߊ߫ ߘߋ߲ߡߌߛߍ߲ ߠߎ߫ ߘߍ߬ߡߍ߲߬، ߓߊߏ߬߸ ߞߏ߫ ߣߊ߲߬ߝߟߏ ߓߊ߬߸ ߛߘߊߡߦߊ ߓߊ߬߸ ߞߎߡߊߕߍ߫ ߕߏ߬ߟߊ߲߬ߕߊ߲ ߞߊ߬ߣߎ߲ ߣߴߊ߬ ߛߘߊ ߡߊ߬߸ ߏ߬ ߛߌ߫ ߞߊߣߵߊ߬ ߕߏߟߏ߲߫ ߘߋ߲ߡߌߛߍ߲ ߠߎ߬ ߟߊ߫߸ ߞߵߊ߬ߟߎ߬ ߟߊߓߊ߲߬ ߘߎߢߊߘߐߕߍ߮ ߞߍߢߊ߫ ߓߘߍ ߢߊߢߌߣߌ߲߫ ߠߊ߫.
ߊ߬ ߟߊ߫ ߞߊ߬ߝߊ ߡߍ߲ ߦߋ߫ ߕߋ߲߬߸ ߣߴߌ ߞߵߊ߬ ߡߍ߲߫ ߞߏ߫ ߞߊ߬ߘߌ߬ߛߊ߫ ߘߏ߲߬ ߓߘߊ߫ ߞߍ߫ ߊ߬ ߘߌߦߊ߫߸ ߞߏ߫ ߜߍߟߍ߲ ߡߍ߲ ߠߎ߬ ߦߋ߫ ߕߊ߬ߡߌ߲߬ ߠߊ߫ ߣߴߊ߬ ߕߍ߫ ߝߐ߫ ߟߊ߫߸ ߏ߬ ߢߊߝߐߣߴߊ߬ ߞߣߐ߫.
ߞߊ߬ߝߊ ߣߌ߲߬ ߦߋ߫ ߞߎߡߊ߫ ߟߊ߫ ߘߋ߲ߡߌߛߍ߲ ߠߎ߬ ߦߋ߫߸ ߞߊ߬ ߘߋ߲ߡߌߛߍ߲ ߠߎ߬ ߟߐ߬ ߛߌߣߌ߲߫ ߡߊߝߟߍ߫ ߟߊ߫، ߞߊ߬ߝߊ ߣߌ߲߬ ߕߐ߬ߣߐ ߞߏߛߐ߲߬߸ ߞߟߌߟߌ ߦߋ߫ ߛߋ߫ ߟߊ߫ ߞߎ߲߬ߠߊ߬ߛߌ߮ ߟߎ߫ ߡߊ߬߸ ߕߏ߬ߟߊ߲߬ߕߊ߲߬ ߞߙߎߝߊ ߟߎ߫ ߡߊ߬߸ ߞߊ߬ߙߊ߲߬ߕߊ ߟߎ߫ ߡߊ߬߸ ߟߍߙߊߓߏ߲ ߠߎ߫ ߡߊ߬߸ ߓߍ߯ ߦߋ߫ ߞߊ߬ߝߊ ߣߌ߲߬ ߢߌߣߌ߲߫ ߞߵߊ߬ ߘߌ߫ ߘߋ߲ߡߌߛߍ߲ ߠߎ߬ ߡߊ߬߸ ߞߊ߬ߙߊ߲߬ ߦߙߐ ߟߎ߬ ߘߐ߫߸ ߕߏ߬ߟߊ߲߬ߕߊ߲߬ ߘߊߞߎ߲ ߠߎ߬ ߘߐ߫߸ ߞߊ߬ ߞߊ߬ߝߊ ߣߌ߲߬ ߞߍ߫ ߟߊ߬ߞߐ߰ߟߌ߬ ߝߋ߲ ߘߌ߫.
ߒ߬ߓߊ߬߸ ߊߓߎߓߞߊߙ ߛߘߌߞߌ߬ ߛߎߡߊ߬ ߡߍ߲ ߦߋ߫ ߓߊ߲߬ߖߊ߲߬ ߘߌ߫߸ ߊ߬ߟߋ ߓߘߴߊ߬ ߛߋߞߏ ߞߍ߫ ߘߋ߲ߡߌߛߍ߲ ߠߎ߬ ߟߊߞߎߣߎ߲ ߘߐ߫߸ ߞߎ߲߬ߠߊ߬ߛߌ߮ ߝߣߊ߫ ߦߴߊ߬ ߛߋߞߏ ߞߍ߫ ߊ߬ ߟߊ߫ ߞߊ߬ߝߊ ߞߍ ߘߌ߫ ߞߊ߬ ߘߋ߲ߡߌߛߍ߲ ߠߎ߬ ߓߟߏߟߊߛߐ߬ߘߐ߲߬.
