ߖߌ߬ߣߍ߬ ߞߐߞߊ߲ߞߏ ߟߎ߬ ߞߏߕߌ߮߸ ߞߏ߲߬ߓߏ߫ ߡߏ߬ߙߌ߬ߛߊ߲߬ߘߊ߬ ߞߎߦߊߕߍ߫ ߕߍ߬ߘߍ߫ ߟߊ߬ߘߍ ߟߋ߬ ߞߊ߲߬ ߞߎߣߎ߲߬ ߓߌߟߏ߲߸ ߣߍߣߍߓߊ ߕߟߋ߬ ߅ ߡߊ߬߸ ߊ߬ ߣߌ߫ ߕߍߓߊ߯ߦߟߊ߫ ߟߊߘߌ߬ߢߍ߬ߣߍ߲ ߡߍ߲ ߠߎ߬ ߦߋ߫ ߖߌ߬ߣߍ߬ ߞߣߐ߫، ߞߊ߬ ߞߎߡߊ߫ ߛߌ߯ߙߌ߲߫ ߘߊ߬ߡߊ߲߬ߛߋ߲ ߠߊߟߐ߬ ߞߏ ߞߊ߲߬، ߏ߬ ߟߋ ߘߊߞߎ߲ ߘߐ߫߸ ߊ߬ ߞߵߊ߬ ߝߐ߫ ߞߏ߫: <<ߊ߲ ߕߍ߫ ߛߐ߲߬ ߝߋߎ߫߸ ߖߌ߬ߣߍ߬ ߦߋ߫ ߘߐߕߌߢߍ߫.>>

ߞߊ߬ߦߌ߯ ߣߍߣߍߓߊ ߕߋ߬ߟߋ߫ ߂ ߟߋ߬ ߡߊ߬߸ ߟߊ߬ߛߋ߬ߟߌ߬ ߛߓߍ ߘߏ߫ ߟߊߓߐ߫ ߘߊ߫߸ ߡߍ߲ ߞߟߊ߬ߣߐ߬ߦߊ߬ ߘߊ߫ ߞߏߕߌ߯ ߡߐ߰ ߟߏ߯ߟߎ߫ ߢߐ߲߰ ߓߟߏ߫߸ ߞߊ߬ ߛߊߣߌ߲߫ ߢߌߣߌ߲ ߠߊߕߐ߲߫ ߜߘߋߜߘߋ ߞߍ߫ ߛߊ߬ߙߌ߬ߦߊ߬ ߛߐߛߐ ߞߊ߲߬ ߛߌ߯ߙߌ߲߫ ߕߌ߲߬ߞߎߘߎ߲ ߘߐ߫، ߒ߬ߓߊ߬߸ ߞߎߣߎ߲߬ ߠߋ߬ ߏ߬ ߘߐ߫ ߛߊ߫߸ ߡߏߙߌ߬ߛߊ߲߬ߘߊ߬ ߣߌ߫ ߕߍߓߊ߯ߦߟߊ ߟߎ߫ ߕߍ߬ߘߍ߫ ߟߊ߬ߘߍ ߞߊ߲߬، ߏ߬ ߡߍ߲ ߟߊ߬ߘߍ߬ ߘߊߞߎ߲ ߘߐ߫߸ ߊ߬ ߝߐ߫ ߘߊ߫ ߞߏ߫ ߘߎ߲߬ߘߎ߬ߡߊ߬ ߞߌߓߊߙߏߘߊ ߓߍ߯ ߦߋ߫ ߓߐ߫ ߝߏ߮ ߞߣߐ߫߸ ߝߏ߫ ߝߊ߬ߛߏ ߖߌ߬ߦߊ߬ߞߊ߲߬ߛߏ߬ߓߊ ߘߐߙߐ߲߫.

ߞߏߕߌ߮ ߟߊ߫ ߝߐߟߌ߫ ߘߐ߫߸ ߡߌ߬ߣߊ߬ߟߌ߫ ߞߎ߲߬ߝߟߐ ߡߍ߲ ߠߎ߬ ߓߘߊ߫ ߞߍ߫ ߛߊߣߌ߲߫ ߞߏ ߣߌ߲߬ ߘߐ߫߸ ߕߍ߮ ߞߍ߫ ߘߊ߫ ߛߌ߯ߣߌ߲ߞߊ߫ ߡߐ߰ ߂߄߉ ߟߋ߬ ߘߐ߫߸ ߓߙߎߞߌߣߞߊ߫ ߡߐ߰ ߄߀߉߸ ߊ߬ ߣߌ߫ ߡߊ߬ߟߌ߬ߞߊ߫ ߡߐ߰ ߆߆߸ ߞߵߏ߬ ߟߊ߫ ߜߋ߲ߞߐ߯ߖߌߘߟߊߞߊ ߘߏ߫ ߟߎ߫ ߣߌ߫ ߕߜ߭ߏߞߊ ߘߏ߫ ߟߎ߫ ߣߌ߫ ߖߋ߬ߟߌ߬ߓߟߊ߬ߞߊ ߘߏ߫ ߣߌ߫ ߖߡߊ߬ߣߊ߬ ߜߘߍ߫ ߡߐ߱ ߟߎ߫ ߞߊ߲߬، ߓߌ߬ߟߊ߬ ߞߍ߫ ߘߊ߫ ߏ߬ ߟߎ߬ ߞߐ߫ ߛߊ߬ߙߌ߬ߦߊ߬ ߓߟߏ߫߸ ߞߊ߬ ߓߊ߲߫ ߞߊ߬ ߓߟߏߓߐ߫ ߊ߬ߟߎ߬ ߘߐ߫ ߞߵߊ߬ߟߎ߬ ߘߌ߫ ߊ߬ߟߎ߬ ߟߊ߫ ߖߡߊ߬ߣߊ ߟߊ߬ߛߌ߰ߘߋ߲ ߠߎ߫ ߡߊ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߖߊ߬ߡߊߙߌ ߞߣߐߡߊ߬.

ߞߏ߬ߣߌ߲߬߸ ߏ߬ ߛߌߦߊߡߊ߲߫ ߞߵߊ߬ ߞߐߛߊ߬ߦߌ߲߫ ߠߋ߬ ߝߣߊ߫߸ ߊ߬ߟߎ߬ ߣߌߌ߫ ߡߐ߰ ߜߘߍ߫ ߟߎ߫ ߖߍ߬ߘߍ ߘߋ߬߸ ߞߊ߬ ߣߊ߬ ߛߌ߯ߙߌ߲߫ ߞߣߐ߫߸ ߊ߬ ߣߌ߫ ߖߌ߬ߣߍ߬ ߜߍߞߊ߲ߠߊ ߛߏ߫ ߜߘߍ߫ ߟߎ߫ ߞߣߐ߫، ߡߏ߬ߙߌ߬ߛߊ߲߬ߘߊ߬ ߞߎߦߊߕߍ߫ ߞߊ߲߫ ߏ߬ ߟߋ ߘߐ߫߸ ߞߏ߫ ߤߌߣߊ ߣߌ߫ ߞߌ߬ߣߌ߲߬ߞߌߣߌ߲ ߡߍ߲ ߖߌ߬ߣߍ߬ ߟߊ߫߸ ߊ߬ߟߎ߫ ߞߵߏ߬ ߟߋ ߖߊ߬ߕߋ߫ ߝߎ߬ߥߊ߬ߙߋ߬ߦߊ ߘߐ߫، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫ <<ߊ߬ߟߎ߫ ߞߵߊ߲ ߖߊ߬ߕߋ߫ ߖߡߊ߬ߣߊ߬ ߝߎ ߟߋ߬ ߘߌ߫.>>

ߞߏߕߌ߮ ߞߵߊ߬ ߝߐ߫ ߝߣߊ߫߸ ߞߏ߫ ߘߊ߬ߡߊ߲߬ߛߋ߲߬ߠߊ ߡߍ߲ ߠߎ߬ ߦߋ߫ ߣߌ߲߬߸ ߞߐ߰ߖߎ߮ ߦߋ߫ ߕߊ߬ ߟߴߊ߬ߟߎ߬ ߓߟߏ߫ ߞߵߊ߬ ߞߍ߫ ߞߐ߭ ߟߎ߬ ߣߌ߫ ߓߊ ߟߎ߬ ߘߐ߫߸ ߊ߬ߟߎ߬ ߓߘߊ߫ ߞߐ߭ ߟߎ߬ ߕߌߢߍ߫߸ ߞߊ ߕߌߢߍߟߌ߫ ߛߌߦߊߡߊ߲߫ ߠߊߛߋ߫ ߖߡߊ߬ߣߊ ߓߐ߰ߝߍ ߡߊ߬، ߊ߬ ߘߏ߲߬߸ ߞߏ߫ ߛߌߡߊ߲ߘߎ߯ ߂߀߄߀ ߖߊ߬ߕߋ߬ߘߐ߬ߛߌ߮ ߦߋ߫ ߓߐ߰ߝߍ ߟߊߕߊ߲߬ߞߊ ߡߊߜߟߍ߬ߦߊ߬ ߟߊ߫ ߟߋ߬ ߜߘߋߜߘߋ߫، ߊ߬ ߕߏ߫ ߘߊ߫ ߏ߬ ߟߋ ߞߎߡߊ ߟߊ߫߸ ߞߊ߬ ߛߊߣߌ߲ ߢߌߣߌ߲߫ ߞߏߖߎ߯ߦߊ ߞߟߐ߬ߟߐ ߟߎ߬ ߝߐ߫، ߊ߬ ߡߊ߫ ߓߙߎߞߌߣߊ߫ ߞߊ߲ߕߌ߮ ߢߍߡߌߘߊ߫ ߌߓߙߊߤߌߡ ߕߙߊߥߟߋ߫ ߕߐ߯ ߝߐ߫ ߛߊ߫، ߞߏ߬ߣߵߊ߬ ߟߊ߫ ߞߎߡߊ ߞߵߊ߬ ߦߌ߬ߘߊ߬߸ ߞߏ߫ ߏ߬ ߕߎ߲߬ ߓߘߊ߫ ߏ߬ ߢߐ߲߰ ߝߐ߫ ߞߘߐ߬ߡߊ߲߬.

ߡߏ߬ߙߌ߬ߛߊ߲߬ߘߊ߬ ߟߊ߫ ߞߎߡߊ ߣߌ߲߬ ߞߍߣߍ߲߫ ߠߋ߬߸ ߞߵߊ߬ ߛߐ߬ߘߐ߲߬ ߖߌ߬ߣߍ߬ ߣߌ߫ ߞߞߢ ߖߡߊߣߊ ߟߎ߬ ߦߋ߫ ߢߐ߲߯ ߞߌߙߌ߲ߞߌߙߌ߲߫ ߡߊ߬ ߝߊߦߌߘߊ߫، ߣߍߣߍߓߊ ߕߟߋ߬ ߄ ߠߋ߬ ߡߊ߬߸ ߓߙߎߞߌߣߊ߫ ߝߊ߬ߛߏ߬ ߞߏߕߌ߮ ߡߍ߲ ߘߐ߱ߘߏ߲߬ߣߍ߲߫ ߟߊ߬ߞߊ߲߬ߘߊ߬ߟߌ ߟߊ߫߸ ߡߤߊ߬ߡߊߘߎ߬ ߛߊ߬ߣߊ߫߸ ߏ߬ ߕߊ߯ ߘߊ߫ ߟߋ߬ ߓߡߊ߬ߞߐ߬، ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߡߐ߱ ߘߏ߫ ߟߎ߫ ߡߊߘߌߡߌ߲ߣߍ߲߫߸ ߘߏ߫ ߟߎ߫ ߖߍ߬ߘߍ ߡߊߘߌߡߌ߲ߣߍ߲߫ ߞߌ߬ߛߍ ߟߋ߬ ߟߊ߫߸ ߞߏ߫ ߊ߬ߟߎ߬ ߡߊ߫ ߡߌ߬ߣߊ߬ ߞߏߢߌ߬ߡߊ߬ ߝߋߝߋ߫߸ ߞߏ߫ ߥߊ߬ߥߟߏ߬ߦߊ ߖߍ߬ߘߍߖߍ߬ߘߍ ߟߋ߬ ߟߊߣߴߊ߬ߟߎ߫ ߞߊ߲߬߸ ߊ߬ ߣߌ߫ ߡߌ߬ߣߊ߬ߞߏ߬ߖߎ߰ߦߊ، ߊ߬ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߡߐ߰ ߣߊ߯ߣߌ߲߫ ߠߋ߬ ߓߘߊ߫ ߛߵߊ߬ߟߎ߬ ߘߐ߫ ߞߎ߬ߙߋߡߊ߬ߟߋ߬ ߞߍ߲ߘߍߦߊ߫ ߕߊ߲ߓߊ߲ ߘߏ߫ ߟߊ߫߸ ߊ߬ߟߎ߬ ߟߊ߫ ߡߐ߱ ߣߊ߬ߣߍ߲ ߘߏ߫ ߟߎ߫ ߟߋ߬ ߏ߬ ߟߎ߬ ߘߌ߫ ߞߊ߬ ߓߐ߫ ߛߌ߯ߙߌ߲߫.

ߊ߲ ߧߴߊߟߎ߫ ߦߟߌߓߌ߬ߟߊ߬߸ ߛߘߋߦߊߥߏ ߞߊ߬ ߓߌ߲߬ߓߊߥߏ ߓߋ߬ ߡߍ߲ߞߍ߬ ߡߊ߬ߟߌ ߞߊ߲߬߸ ߖߌ߬ߣߍ߬ ߡߊ߫ ߛߐ߲߬ ߏ߬ ߞߏ ߓߐ߫ ߟߴߊ߬ ߛߌߟߊ ߝߍ߬، ߡߏ߬ߙߌ߬ߛߊ߲߬ߘߊ߬ ߞߎߦߊߕߍ߫ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ ߟߊ߬ߛߌ߰ߘߋ߲ ߓߍ߯ ߦߴߊ߬ ߘߐߖߊ߬߸ ߖߌ߬ߣߍ߫ ߞߎ߲߬ߠߊ߬ߛߌ߮ ߣߐ߬ ߞߊ߲ ߡߍ߲ ߝߐ߫ ߟߊ߫߸ ߓߍ߯ ߦߋ߫ ߥߴߊ߬ ߝߐ߫ ߊ߬ ߟߊ߫ ߖߡߊ߬ߣߊ߬ ߞߣߐ߫ ߢߊ ߏ߬ ߡߊ߬߸ ߝߋ߲߫ ߞߊ߫ ߓߐ߫ ߊ߬ ߟߊ߫߸ ߝߋ߲߫ ߘߏ߲߬ ߞߊ߫ ߟߴߊ߬ ߞߊ߲߬.