ߞߎߣߎ߲߬ ߞߊ߯ߙߌ ߡߊ߬ ߂߀߂߆ ߣߍߣߍߓߊ ߕߟߋ߬ ߇߸ ߟߎߕߌ߯ ߗߍ ߘߏ߫ ߟߋ߬ ߛߎ߭ ߦߋ߫ ߘߴߊ߬ ߖߍ߬ߘߍ ߟߊ߫ ߟߎ ߡߊ߬߸ ߡߍ߲ ߕߎ߬ߙߎ ߞߍߣߍ߲߫ ߊ߬ ߖߘߍ߬ߞߊߣߌ߲ ߠߊ߫ ߡߏ߬ߙߌ߬ߝߊ߬ ߞߌ߬ߛߍ߬ ߟߊ߬ߓߏ߲߬ߠߌ߲ ߘߴߊ߬ ߖߍ߬ߘߍ ߓߟߏ߫، ߊ߬ ߞߏ߬ߣߌ߲ ߡߊ߫ ߟߐ߲߫ ߝߟߐ߫ ߊ߬ ߞߎ߲߭ ߞߍߣߍ߲߫ ߡߍ߲ ߘߌ߫.


ߡߊ߬ߡߊ߬ߘߌ߫ ߣߊ߬ߓߋ ߟߊ߫ ߝߐߟߌ߫ ߘߐ߫߸ ߏ߬ ߡߍ߲ ߦߴߊ߬ ߟߊ߫ ߞߐߙߍ߫ ߞߣߐ߫ ߡߐ߮ ߘߏ߫ ߘߌ߫߸ ߞߏ߫ ߞߏߢߊ ߣߌ߲߬ ߕߊ߬ߡߌ߲߬ ߘߊ߫ ߛߐ߰ߡߊ߬ߘߊ߬ ߖߏߣߊ ߟߋ߬ ߟߊ߫، ߞߏ߫ ߊ߬ ߟߊߟߐ߲߫ ߘߊ߫ ߟߋ߬ ߝߊ߰ߓߊ߰ߕߐ ߡߏ߬ߛߏ ߓߟߏ߫߸ ߏ߬ ߞߐ߫ ߊ߬ ߞߊ߬ ߡߏ߬ߙߌ߬ߝߊ߬ ߜߊ߬ߛߌ߬ ߞߊ߲ ߡߍ߲߫:<< ߛߐ߱ ߣߌ߲߬ ߡߊ߬߸ ߊ߬ ߞߵߊ߬ ߡߏ߬ߛߏ ߟߊߞߎߣߎ߲߫ ߞߏ߫ ߊ߬ ߦߋ߫ ߥߟߌ߫ ߞߊ߬ ߛߊߟߌ߫߸ ߏ߬ ߥߌ߬ߟߌ ߡߍ߲ ߞߍ߫ ߘߊ߫߸ ߏ߬ ߞߊ߬ ߡߏ߬ߙߌ߬ߝߊ ߦߴߊ߬ ߓߟߏ߫، ߏ߬ ߝߣߊ߫ ߞߵߊ߬ ߓߏ߬ߙߌ߬ ߞߊ߬ ߣߊ߬ ߘߊ ߡߊߞߐ߲ߞߐ߲߫ ߒ ߡߊ߬ ߞߊ߬ ߒ ߠߊߞߎߣߎ߲߫߸ ߒ ߧߋ߫ ߘߊ ߟߊߞߊ߬ ߟߊ߫ ߕߎ߬ߡߊ ߡߍ߲߸ ߒ ߞߊ߬ ߡߏ߬ߙߌ߬ߝߊ߬ ߕߋ߬ ߞߊ߲ ߡߍ߲߫، ߊ߲ ߕߊ߯ ߘߴߊ߬ ߟߊߣߍ߲߫ ߛߐ߬ߘߐ߲߬ ߊ߬ ߡߊߘߌߡߌ߲ߣߍ߲߫ ߊ߬ ߛߌߛߌ ߘߐ߫߸ ߖߋ߬ߟߌ ߦߋ߫ ߥߦߏ߬ ߟߊ߫߸ ߞߊ߬ߛߐ߬ߘߐ߲߬ ߊ߬ ߓߘߊ߫ ߛߊ߬، ߊ߲ ߝߣߊ߫ ߞߊ߬ ߝߊ߰ߡߊ ߟߎ߬ ߟߊߟߐ߲ߠߌ߲߫. ߊ߬ ߞߏ߬ߣߌ߲ ߖߊ߲߬ߞߊ߬ߙߏ߬ߕߐ߫ ߕߎ߲߬ ߕߍ߫߸ ߤߊߞߟߌ߫ ߟߊ߫ ߓߣߊ߫ ߝߣߊ߫ ߕߎ߲߬ ߕߴߊ߬ ߟߊ߫>> ߊ߬ ߞߵߏ߬ ߢߊߝߐ߫.


ߡߊ߰ߛߎߓߊ ߣߌ߲߬ ߞߐߝߍ߬߸ ߊ߬ߙߊ߬ߦߌ߬ߞߐ-ߡߊ߬ ߞߌ߲߬ߕߌ߮ ߛߎ߬ߟߋ߬ߡߊ߯ߣ ߞߐ߲ߘߍ߫ ߞߊ߬ ߡߏ߬ߙߌ߬ߝߊ߬ ߟߊ߬ߡߙߊ ߡߊ߲߬ߕߙߐ ߢߊߝߐ߫ ߡߐ߱ ߟߎ߬ ߦߋ߫ ߓߏ߲ ߞߣߐ߫:<< ߊ߲ ߧߴߊ߬ ߢߌߣߌ߲߫ ߠߊ߫ ߒ ߠߊ߫ ߞߌ߲߬ ߞߣߐ߬ ߡߐ߱ ߟߎ߫ ߝߍ߬߸ ߓߍ߯ ߦߴߌ ߡߊߕߊ߯ ߡߏ߬ߙߌ߬ߝߊ ߣߌ߫ ߡߙߊ߬ߡߊ߬ߝߋ߲ ߠߎ߫ ߟߊ߫߸ ߡߍ߲ ߠߎ߬ ߘߌ߫ ߞߍ߫ ߛߊߓߎ߫ ߘߌ߫ ߞߊ߬ ߡߐ߰ ߡߊߘߌߡߌ߲߫߸ ߤߊߡߊ߲߫ ߞߊ߬ ߡߐ߰ ߝߊ߰. ߓߊߏ߬߸ ߣߌ߫ ߡߐ߰ ߣߌ߫ ߝߋ߲߫ ߛߎ߮ ߣߌ߲߬ ߓߟߏߡߊߞߊ߬ ߘߊ߫߸ ߌ ߘߌ߫ ߞߍߓߊߟߌ߫ ߡߊߝߌ߬ߟߊ߬ߓߊߟߌ ߞߴߌ ߖߍ߬ߘߍ ߟߊ߫>>. ߊ߬ ߞߊ߬ ߡߐ߱ ߟߎ߬ ߟߊߛߏ߬ߓߌ߫ ߏ߬ ߡߊ߬.


ߊߓߎߓߞߊߙ ߓߙߋߕߋ߫ ߡߍ߲ ߦߋ߫ ߞߘߏ߬ߛߊ߫ ߖߐ ߞߕߌߟߊߟߊ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߢߊߢߌߣߌ߲ ߓߘߊ߫ ߛߌ߰ ߛߋ߲߬ߠߊ߫، ߛߊ߫ ߜߊ߬ߟߏ ߣߌ߲߬ ߞߎ߲߬ ߖߐ߲ߖߐ߲ ߘߌ߫ ߟߐ߲߫ ߢߊ ߡߍ߲.


ߗߍ߭ ߣߌ߲߬ ߝߊ߰ߣߍ߲߫ ߞߊ߬ ߡߏ߬ߛߏ߫ ߝߌ߬ߟߊ߬ ߘߋ߲߫ ߛߋߦߌ߲߫ ߠߋ߬ ߕߏ߫߸ ߞߣߐ߬ߘߐ߬ߝߟߌ ߣߌ߫ ߦߌߟߊ߲ߦߌߟߊ߲ ߘߍ߬ߜߍ ߟߋ߬ ߕߍߡߊ߬، ߞߊ߬ ߓߍ߯ ߓߌ߬ߟߊ߬ ߢߊߖߌ ߘߐ߫.


ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ߟߐ ߓߟߏ߫߸ ߛߌߟߊߓߐߛߐ߯ߣߊ߫ ߞߐߦߌߘߊ ߛߌ߯ߙߌ߲߫.