ߣߍߣߍߓߊ ߕߟߋ߬ ߁߂ ߡߊ߬߸ ߞߊ߲ߞߊ߲߫ ߓߌ߬ߟߊ߬ߢߐ߲߰ߡߊ ߣߌ߫ ߞߌ߬ߓߊ߬ߙߏ߬ߦߊ߬ߟߌ ߗߋߕߌ߮߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎߦߊ߬ ߞߊ߬ ߘߊߘߐߝߙߊߢߐ߲߯ߦߊ ߘߏ߫ ߟߋ߬ ߛߌ߲߬ߝߏ߲߬ߧߊ߫ ߞߊ߬ߙߊ߲߬ߘߊ߬ߓߊ߫ ߡߏ߬ߙߌ߬ߝߌ߲߬ߖߊ߲߫ ߖߓߊ߬ߕߍ߫ ߟߊ߫، ߏ߬ ߡߍ߲ ߞߎ߲߬ߕߐ߮ ߕߘߍ߬ ߞߏ߫:<< ߘߍ߬ߞߙߏߝߏ ߞߊ߬ߙߊ߲߬ߛߏ ߟߎ߫ ߟߊ߫: ߓߍ߲߬ߛߋ߲߬ߡߊ، ߖߐ߬ߘߐ، ߊ߬ ߣߌ߫ ߞߊ߬ߙߊ߲߬ߘߋ߲ ߠߎ߬ ߟߊ߫ ߖߋ߬ߓߌ߬ߦߊ߬ߟߌ >>. 
ߝߐߢߊ߫ ߜߘߍ߫ ߘߐ߫߸ ߘߍ߬ߞߙߏߝߏ ߞߊ߫ ߞߊ߲߫ ߞߊ߬ ߟߊߓߊ߯ߙߊ߫ ߞߊ߬ߙߊ߲߬ߘߋ߲ ߠߎ߬ ߓߟߏ߫ ߘߌ߬߸ ߞߵߊ߬ߟߎ߫ ߕߊ߲߬ߞߴߊ߬ ߡߊ߲߬ߕߙߐ߬ ߡߊ߬ߝߊ߲ ߣߴߊ߬ ߖߐ߬ߘߐ ߡߊ߬߸ ߞߵߊ߬ ߢߊ߬ߕߣߐ߬ ߡߊ߬ߦߙߐ ߣߴߊ߬ ߓߍ߲߬ߛߋ߲߬ߡߊ߬ߝߊ߲ ߕߣߐ߬ߓߐ߫. ߓߊߏ߬߸ ߣߴߌ ߞߵߊ߬ ߟߊߞߙߐ߬ߛߌ߫ ߓߌ߬߸ ߘߍ߬ߞߙߏߝߏ ߓߘߊ߫ ߞߍ߫ ߦߙߐ߫ ߢߊ߬ߒ߬ߞߐ߬ߓߊߟߌ ߘߏ߫ ߟߎ߫ ߘߴߊ߲ ߘߍ߬ ߞߣߐ߫: ߡߐ߱ ߟߎ߫ ߦߋ߫ ߢߐ߲߯ߞߟߌ߫ ߟߊ߫ ߦߙߐ ߡߍ߲߸ ߞߊ߬ ߞߊ߬ߙߊ߲ ߞߍ߫߸ ߊ߬ ߣߌ߫ ߟߌ߬ߤߟߊ߬ ߟߊ߬ߛߐ߬ߘߐ߲߬ ߦߙߐ. 
ߒ߬ߓߊ߬߸ ߓߌ߬ߟߊ߬ߢߐ߲߰ߡߊ ߣߌ߫ ߞߌ߬ߓߊ߬ߙߏ߬ߦߊ߬ߟߌ ߗߋߕߌ߮߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎߦߊ߬ ߞߊ߬ ߞߎߡߊ ߕߊ߬، ߞߊ߬ ߢߊߝߐߟߌ߫ ߖߐ߲ߖߐ߲߫ ߞߍ߫ ߓߙߊߡߊߖߊ߲ߓߊ߲ ߛߏ߬ߓߌ߬ߟߊ߬ߞߎ߬ߣߎ߲߲߬ߠߌ߲ ߞߍߞߏ߫ ߝߌߟߊߣߊ߲ ߣߌ߲߬ ߞߊ߲߬ ߞߊ߬ߙߊ߲߬ߘߊ߬ߓߊ߫ ߊ߬ߟߌ߬ߡߊߡߌ߲߫ ߛߊ߭ߡߏ߬ߙߌ߬ ߕߊ ߞߐߝߍ߬. ߊ߬ ߞߵߊ߬ ߘߊߣߐ ߕߏ߫ ߊ߬ ߝߣߊ߫߸ ߞߏ߫ ߓߙߊߡߊߖߊ߲ߓߊ߲ ߣߌ߲߬ ߡߎ߰ߡߍ ߣߊ߲߬ߝߟߏ߬ ߡߎ߮ ߓߐߣߍ߲߫ ߊ߬ ߖߍ߬ߘߍ ߟߋ߬ ߞߎ߲߬:<<ߊ߲ ߠߊ߫ ߛߏ߬ߓߌ߬ߟߊ߬ߞߎ߬ߣߎ߲߲߬ߠߌ߲ ߛߋ߲߬ߧߊ߬ ߝߌߟߊߣߊ߲ ߠߋ߬ ߓߌ߬߸ ߞߊ߬ߙߊ߲߬ߘߊ߬ߓߊ߫ ߊ߬ߟߌ߬ߡߊߡߌ߲߫ ߛߊ߭ߡߏ߬ߙߌ߬ ߕߎ߬ߙߋ߬ ߕߊ ߞߍ߫ ߞߐߝߍ߬، ߏ߬ ߡߍ߲ ߕߊ߲߬ߘߏ߫ ߘߊ߫ ߡߐ߰ ߛߌߦߊߡߊ߲߫ ߓߟߏ߫. ߏ߬ ߟߋ ߞߏߛߐ߲߬߸ ߒ ߞߵߊ߬ ߣߊ߬ߕߊ߫ ߞߏ߫ ߒ ߧߋ߫ ߕߊ߯ ߓߙߊߡߊߖߊ߲ߓߊ߲ ߣߌ߲߬ ߡߊ߬߸ ߞߊ߬ ߘߍ߬ߞߙߏߝߏ ߣߊ߬ߝߊ ߣߴߊ߬ ߡߊ߲߬ߕߙߐ ߢߊߝߐ߫ ߞߊ߬ߙߊ߲߬ߘߋ߲ ߠߎ߫ ߢߍ߫، ߏ߬ ߛߋ߲߭ߝߍ߬߸ ߊ߲ ߞߊ߬ ߞߊ߬ߙߊ߲߬ߘߋ߲߫ ߁߀߀ ߀߀߀ ߠߋ߬ ߛߏ߬ߓߌ߬ߟߊ߬ߞߎ߬ߣߎ߲߲߬ߠߌ߲߬ ߞߏ ߝߐ߫߸ ߓߊ߬ߙߌ߬߸ ߏ߬ ߓߘߊ߫ ߥߊ߬ߙߊ߫ ߏ߬ ߡߊ߬ ߓߌ߬߸ ߞߊ߬ߙߊ߲߬ߕߊ߬ ߜߘߍ߫ ߖߍ߬ߘߍ ߦߋ߫ ߒ ߓߟߏ߫ ߢߍߥߟߊ ߘߐ߫ ߟߏ߲߫ ߣߊ߬ߕߐ ߟߎ߬ ߘߐ߫ >>، ߊ߬ ߞߵߏ߬ ߦߌ߬ߘߊ߫. 
ߊ߬ ߞߎߡߊ߫ ߘߴߊ߬ߟߎ߬ ߟߊ߫ ߛߍ߬ߘߏ߲߫ ߕߊ߬ߡߌ߲߬ߣߍ߲ ߝߣߊ߫ ߕߐ߬ߣߐ ߞߊ߲߬߸ ߞߊ߬ ߓߍ߲߬ ߛߏ߬ߓߌ߬ߟߊ߬ߞߎ߬ߣߎ߲߲߬ߓߊ߰ߕߐ ߟߎ߬ ߢߊߦߋߟߌ ߡߊ߬ ߘߍ߬ߞߙߏߝߏ ߟߎ߬ ߟߊߓߊ߯ߙߊ ߘߐ߫. ߏ߬ ߟߋ ߘߐ߫߸ ߞߊ߬ߙߊ߲߬ߘߋ߲߫ ߒߡߊ߬ߤߊߥߊ߬ ߡߊ߰ߙߊ ߞߵߊ߬ ߛߍߥߊߣߊ߲߲߫ ߞߊ߲ ߦߌ߬ߘߊ߫߸ ߞߊ߬ ߓߊ߲߫ ߞߊ߬ ߛߌ߲߬ߝߏ߲߬ߧߊ߬ߟߌ߬ߟߊ ߞߎߟߎ߲ߖߋ߫، ߞߵߏ߬ ߞߎ߲߭ ߞߍ߫ ߊ߬ߟߎ߬ ߟߊߟߐ߲ߠߌ߲ ߘߌ߫:<< ߊ߲ ߛߍߥߊߣߍ߲߫ ߊ߬ߟߎ߬ ߟߊ߫ ߢߣߊߓߊ߯ߦߊ ߘߐ߫ ߦߊ߲߬߸ ߊ߬ ߣߴߊ߲ ߠߊߟߐ߲ߠߌ߲߫ ߞߏߢߌߡߊ ߘߍ߬ߞߙߏߝߏ ߡߊ߲߬ߕߙߐ ߣߴߊ߬ ߡߊ߲߬ߤߙߍ ߟߊ߫߸ ߒ ߘߏ߲߬ ߘߴߊ߬ ߓߐ߫ ߊ߬ ߛߌߟߊ ߝߍ߬߸ ߦߏ߫ ߊ߬ ߝߐߣߍ߲߫ ߢߊ ߡߍ߲، ߓߊߏ߬߸ ߣߊ߬ߝߊ ߦߴߊ߲ߠߎ߬ ߞߊ߬ߙߊ߲߬ߘߋ߲ ߠߎ߫ ߞߊ߲߬>>، ߊ߬ ߞߵߏ߬ ߦߌ߬ߘߊ߫. 
ߊ߬ߟߋ߬ ߦߙߐ߫ ߞߋߟߋ߲ ߘߐ߫߸ ߞߊ߬ߙߊ߲߬ߘߊ߬ߓߊ߫ ߡߏ߬ߙߌ߬ߝߌ߲߬ߖߊ߲߫ ߖߓߊ߬ߕߍ߫ ߞߌ߬ߣߊ " proviseur" ߝߣߊ߫ ߞߊ߬ ߓߊ߯ߙߊ߫ ߓߘߍ ߣߌ߲߬ ߕߊ߲߬ߘߏ߫߸ ߞߵߊ߬ ߖߌ߰ ߞߏ߫ ߓߘߍ߫ ߘߌ߫߸ ߡߍ߲ ߘߌ߫ ߛߊߓߎ߫ ߘߌ߫߸ ߞߊ߬ ߘߍ߬ߞߙߏߝߏ ߟߊߓߊ߯ߙߢߊ߫ ߖߎ߮ ߡߊߕߊ߲߬ߞߊ߫ ߞߊ߬ߙߊ߲߬ߛߏ ߟߎ߫ ߟߊ߫. 
ߒ߬ߓߊ߬߸ ߡߊ߬ߡߊ߬ߘߌ߬ ߞߊ߲ߛߊ߲߫ ߘߎ߲߬ߓߎߦߊ߬ ߟߊ߫ ߟߊ߬ߢߌߣߌ߲ ߦߋ߫ ߞߊ߬ߙߊ߲߬ߕߊ߬ ߛߌߦߊߡߊ߲߫ ߞߊ߬ߙߊ߲߬ߘߋ߲ ߠߎ߫ ߛߏ߬ߓߌ߬ߟߊ߬ߞߎߣߎ߲ ߠߋ߬ ߘߌ߫ ߞߊ߲ߞߊ߲߫ ߛߏ ߞߣߐ߫، ߛߊ߫ ߏ߬ ߘߌ߫ ߓߍ߲߬ߛߋ߲߬ߡߊ߬ ߘߌ߫߸ ߞߊ߬ ߘߍ߬ߞߙߏߝߏ ߟߊ߫ ߔߊߟߊ߲ߞߊ ߡߊߕߊ߲߬ߞߊ߫ ߞߊ߬ߙߊ߲߬ߛߏ ߟߎ߫ ߟߊ߫߸ ߞߊ߬ ߖߏ߯ߦߊߟߌ ߟߊߘߏ߲߬ ߊ߬ ߘߐ߫.