ߖߋ߬ߟߌ߬ߓߊߘߎ߯ ߞߣߐ߫߸ ߡߤߊߡߌߘ ߛߌ߯ߦߊ߫ ߣߏߡߊߘߍߛ ߡߍ߲ ߠߎ߬ ߦߋ߫ ߛߌ߱ ߘߐ߫ ߖߡߊ߬ߣߊ ߣߌ߲߬ ߞߐߘߐ߲ ߣߴߊ߬ ߥߙߏ߬ߘߎ߮ ߘߐ߫߸ ߞߎ߲߬ߠߊ߬ߛߌ߮ ߣߐ߬ ߥߊ߯ߕߌ߫ ߞߎ߲߬ߞߎߘߎ߲߫ ߠߋ߬ ߘߌ߫ ߏ߬ ߟߎ߫ ߡߊ߬߸ ߊ߬ߟߎ߬ ߦߋ߫ ߖߡߊ߬ߣߊ ߣߌ߲߬ ߓߌ߬ߟߊ߬ ߦߊ߬ߣߌ߫ ߞߏߟߌ߲ߞߏߟߌ߲߫ ߕߟߋ߬ ߃߁ ߕߍ߫، ߞߎߣߎ߲߬ ߞߊ߯ߙߌ ߂߀߂߆ ߣߍߣߍߓߊ ߕߟߋ߬ ߁߅߸ ߟߌ߬ߤߟߊ ߣߌ߲߬ ߠߊߛߋ߫ ߘߊ߫ ߖߋ߬ߟߌ߬ߓߊ߬ߘߎ߯ ߞߎ߲߬ߠߊ߬ߛߌ߮ ߟߎ߬ ߟߋ߬ ߓߟߏ߫߸ ߛߌ߯ߦߊ ߡߍ߲߬ ߠߎ߬ ߡߊߝߌ߲߬ߣߍ߲߫ ߠߋ߬ ߖߋ߬ߟߌ߬ߓߊߘߎ߯ ߞߎ߲߬ߠߊ߬ߛߌ߮ ߟߎ߬ ߓߟߏ߫ ߟߋ߬߸ ߓߊߏ߬߸ ߞߏ߫ ߊ߬ߟߎ߬ ߦߋ߫ ߓߞߏ߫ ߤߙߊߡߎ߲߬ ߓߊ߰ߓߊ߰ߟߌ߬ߟߊ ߟߎ߬ ߘߍ߬ߡߍ߲߬ ߠߊ߫ ߟߋ߬ ߞߟߍ߬ ߖߐ߯ߙߊ߲ ߠߎ߬ ߛߐ߬ߘߐ߲߬. 
ߊ߬ ߢߌߣߌ߲ߣߍ߲߫ ߠߋ߬ ߛߌ߯ߦߊ ߡߍ߲߬ ߠߎ߫ ߝߍ߬߸ ߊ߬ߟߎ߬ ߦߋ߫ ߝߙߍ߬ߞߍ߫ ߞߊ߬ ߖߋ߬ߟߌ߬ߓߊߘߎ߯ ߞߐߘߐ߲ ߣߴߊ߬ ߥߙߏ߬ߘߎ߮ ߘߐߞߊ߬߸ ߦߊ߬ߣߌ߫ ߛߊ߲߬ ߟߊߓߊ߲߫ ߢߌ߲߬ ߦߋ߫ ߞߎ߲߭ߝߊ߰، ߘߌߝߊ߫ ߡߙߊ߬ ߢߍߡߐ߮ ߘߏ߫ ߟߊ߫ ߟߊ߬ߛߋ߬ߟߌ߫ ߘߐ߫ ߞߎߣߎ߲߬߸ ߞߏ߫ ߟߊ߬ߕߍ߰ߦߊ߫ ߜߍߟߍ߲ ߠߋ߬߸ ߡߍ߲ ߕߊ߬ ߘߊ߫ ߞߎ߲߬ߠߊ߬ߛߌ߮ ߟߎ߬ ߓߟߏ߫. 
ߟߌ߬ߤߟߊ ߞߐ߲߰ ߘߊ߫ ߘߌ߫ ߡߊ߬ ߡߤߊߡߌߘ ߛߌ߯ߦߊ ߟߎ߬ ߟߊ߫ ߟߊ߬ߛߌ߰ߘߋ߲ ߠߋ߬ ߡߊ߬߸ ߞߊ߬ߦߌ߯ ߣߍߣߍߓߊ ߕߟߋ߬ ߈ ߕߊ߬ߡߌ߲߬ߣߍ߲ ߠߋ߬ ߡߊ߬߸ ߘߌߝߊ߫ ߡߙߊ߬ ߢߍߡߐ߮ ߞߟߍ߬ߕߌ߰ ߡߊߡߊߘߎ߫ ߌߓߙߊߤߌߡ ߓߊߜ߭ߊߘߏߡߊ߫ ߓߟߏ߫. 
ߊ߬ ߕߎ߲߬ ߞߵߊ߬ ߟߊߢߌߣߌ߲߫ ߡߊ߬ߙߊ ߣߌ߲߬ ߢߍߡߐ߮ ߟߎ߬ ߝߍ߬ ߟߋ߬߸ ߞߊ߬ ߛߌ߯ߦߊ ߡߍ߲߬ ߠߎ߬ ߟߊ߫ ߛߓߍ ߘߏ߫ ߟߎ߫ ߓߐ߫ ߊ߬ߟߎ߬ ߓߟߏ߫߸ ߕߊ߯ߡߊ ߛߓߍ ߦߴߏ߬ ߘߏ߫ ߟߋ߬ ߘߌ߫ ߊ߬ ߣߌ߫ ߘߏ߫ ߜߘߍ߫ ߝߣߊ߫ ߟߎ߫، ߏ߬ ߓߊ߯ߙߊ ߟߎ߬ ߛߋ߲߭ߝߍ߬߸ ߞߏ߫ ߛߓߍ߫ ߜߘߍ߫ ߞߣߊ߫ ߘߐߓߍ߲߬ ߞߵߊ߬ ߘߌ߫ ߊ߬ߟߎ߫ ߡߊ߬ ߏ߬ ߞߐ߫، ߊ߬ ߣߌ߫ ߞߊ߬ ߛߌߟߊ ߕߍ߰ ߊ߬ߟߎ߬ ߢߍ߫߸ ߞߵߊ߬ߟߎ߬ ߘߛߍ߫ ߛߋ߬ߦߌ߲߬ߠߌ߲ ߠߊ߫ ߖߋ߬ߟߌ߬ߓߊߘߎ߯ ߞߣߐ߫. 
ߡߐ߰ ߡߍ߲߬ ߠߎ߬ ߡߊߝߌ߲߬ߣߍ߲߫ ߠߋ߬߸ ߓߊߏ߬߸ ߞߏ߫ ߊ߬ߟߎ߬ ߦߋ߫ ߓߞߏ߫ ߤߙߊߡߎ߲߬ ߓߊ߰ߓߊ߰ߟߌ߬ߟߊ ߟߎ߬ ߘߍ߬ߡߍ߲߬ ߠߊ߫ ߟߋ߬ ߞߟߍ߬ ߖߐ߯ߙߊ߲ ߠߎ߬ ߛߐ߬ߘߐ߲߬ ߠߊ߫߸ ߝߣߊ߫ ߘߓߊ߬ߓߌߟߊ ߕߊ߬ߡߌ߲߬ߣߍ߲ ߠߊ߫߸ ߘߌߝߊ߫ ߡߙߊ߬ ߢߍߡߐ߮߸ ߞߟߍ߬ߕߌ߰ ߌߓߙߊߤߌߡ ߓߊߜ߭ߊߘߏߡߊ߫ ߕߎ߲߬ ߞߊ߬ ߟߊ߬ߛߋ߬ߟߌ ߘߏ߫ ߞߍ߫߸ ߞߏ߫ ߂߀߂߃ ߣߌ߫ ߂߀߂߆ ߕߍ߫߸ ߊ߬ߟߎ߫ ߞߊ߬ ߞߟߍ߬ ߖߐ߯ߙߊ߲߫ ߛߌߦߊߡߊ߲߫ ߠߋ߬ ߡߌ߬ߣߊ߬߸ ߏ߬ ߞߐ߫߸ ߞߊ߬ ߘߎ߲߬ߘߎ߬ߡߊ߬ ߟߌ߬ߤߟߊ߬ ߛߌߦߊߡߊ߲߫ ߝߣߊ߫ ߟߊߛߐ߬ߘߐ߲߬߸ ߏ߬ ߘߐ߫߸ ߞߴߏ߬ ߘߴߊ߬ ߦߌ߬ߘߊ߬ ߞߵߊ߬ ߝߐ߫ ߞߏ߫ ߡߤߊߡߌߘ ߛߌ߯ߦߊ ߡߐ߰ ߟߎ߬ ߦߋ߫ ߞߟߍ߬ ߖߐ߯ߙߊ߲ ߠߎ߬ ߘߌ߫ ߟߊ߫ ߟߋ߬ ߓߊ߰ߓߊ߰ߟߌ߬ ߞߙߎ ߟߎ߫ ߡߊ߬.
ߡߤߊߡߌߘ ߛߌ߯ߦߊ߫ ߝߟߐ ߟߎ߬ ߛߋ߫ ߘߊ߫ ߖߋ߬ߟߌ߬ߓߊ߬ߘߎ߯ ߖߡߊ߬ߣߊ ߞߊ߲߬ ߞߊ߬ߦߌ߯ ߁߉߇߀ ߟߋ߬ ߟߊ߫߸ ߏ߬ ߟߎ߫ ߓߏ߬ߙߌ߫ ߘߊ߫ ߏ߬ ߛߊ߲߭ ߖߌ߬ߦߊ߬ ߖߎ߮ ߟߎ߬ ߢߍ߫߸ ߊߓߛߋ߫ ߡߊ߬ߙߊ ߘߐ߫߸ ߗߊߘߌ߬ ߞߐߘߐ߲ ߘߐ߫، ߏ߬ ߞߐ߫߸ ߗߊߘߌ߬ ߣߌ߫ ߛߎߘߊ߲߫ ߡߐ߰ ߝߏߣߍ߲ ߠߎ߬ ߕߊ߯ ߘߊ߫ ߝߊ߬ߙߊ߫ ߏ߬ ߞߊ߲߲߬߸ ߦߋ߲߬ ߘߎ߰ߘߋ߲ ߘߏ߫ ߟߎ߫ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬.