ߞߊ߲ߡߋߙߋ߲ ߘߏ߫ ߟߋ߬ ߞߕߌߣߍ߲߫߸ ߞߏ߫ ߊ߬ ߓߘߊ߫ ߛߋ߫ ߘߋ߲ߡߛߏߣߍ߲߫ ߛߊ߲߬ ߁߇ ߘߏ߫ ߡߊ߬ ߗߍ߬ߣߌ߬ߡߛߏ߬ߦߊ ߘߐ߫، ߏ߬ ߞߕߌ ߟߊ߫ ߘߊ߫ ߞߐ߬ߓߊ߬ߟߏ߲߫ ߕߊ߬ߡߌ߲߬ߣߍ߲ ߠߋ߬ ߡߊ߬ߝߊ߲߬ߞߏ߫ ߖߏ߯ߘߏ߲ߠߌ߲ ߞߕߌߘߊ ߟߊ߫߸ ߊ߬ߟߋ߬ ߞߊ߲ߡߋߙߋ߲ ߕߐ߯ ߞߏ߫ ߗ߭ߎ߳ߟ ߛߣߏߡߌ߫߸ ߊ߬ ߞߵߊ߬ ߟߐ߬ ߟߴߊ߬ ߛߐ߲߭ ߠߊ߫߸ ߦߊ߬ߣߴߊ߬ ߖߊ߲߬ߞߌ߲ ߕߍ߫ ߛߊ߬ߙߌ߬ߦߊ߬ ߓߟߏ߫.
ߓߌ߬ߟߊ߬ ߞߍߣߍ߲߫ ߕߘߍ߬ ߗ߭ߎ߳ߟ ߛߣߏߡߏ߫ ߞߐ߫ ߞߊ߬ߦߌ߯ ߥߊ߬ߛߌߥߊ߬ߙߊ ߕߟߋ߬ ߁߅/ ߂߀߂߅߸ ߏ߬ ߡߍ߲ ߞߎ߲߭ ߕߎ߲߬ ߕߍ߫ ߘߏ߫ ߜߘߍ߫ ߘߌ߫، ߞߏ߫ ߊ߬ ߓߘߊ߫ ߛߋ߫ ߘߋ߲ߡߛߏߣߍ߲߫ ߛߊ߲߬ ߁߇ ߘߏ߫ ߡߊ߬ ߗߍ߬ߣߌ߬ߡߛߏ߬ߦߊ ߘߐ߫߸ ߞߵߏ߬ ߟߊߓߊ߲߫ ߞߣߐ ߡߊ߬. ߊ߬ ߘߏ߲߬ ߡߴߊ߬ ߛߐ߬ߛߐ߫ ߣߌ߲߬ ߘߐ߫ ߝߋߎ߫، ߊ߬ ߞߊ߲߫ ߞߏ߫ ߊ߬ ߣߌ߫ ߘߋ߲ߡߛߏ ߕߘߍ߬ ߢߐ߲߮ ߝߍ߬ ߞߊ߬ߣߌ߲߬ ߓߟߏߡߊ߬ ߞߘߐ߬ߡߊ߲߬:<<ߒ ߣߌ߫ ߢߌ߲߬ ߓߍ߯ ߟߋ߬ ߕߘߍ߬ ߘߊ߬ߓߏ߲߬ߘߌ، ߊ߲ ߠߊ߫ ߢߐ߲߯ ߟߐ߲ ߓߘߊ߫ ߛߊ߲߬ ߛߌߦߊߡߊ߲߫ ߓߐ߫߸ ߡߍ߲ ߘߏ߲߬ ߕߊ߬ߡߌ߲߬ ߘߊ߫ ߒ߬ ߣߌ߫ ߢߐ߲߮ ߕߍ߫، ߊ߬ ߟߊ߫ ߡߐ߱ ߓߍ߯ ߦߴߏ߬ ߞߊ߬ߟߊߡߊ߬ >>، ߊ߬ ߞߵߏ߬ ߦߌ߬ߘߊ߫.
ߊ߲ ߓߊ߲ ߞߐ߫ ߞߎߡߊ ߏ߬ ߝߐ߫ ߟߊ߫߸ ߣߊ߬ߒ߬ߕߊ߲߬ ߞߎ߲ߘߊ߫ ߞߵߊ߬ ߡߊߢߌ߬ߣߌ߲߬ߞߊ߫ ߞߏ߫ ߡߎ߲߬ߠߊ߫ ߏ߬ ߘߐ߫ ߘߋ߲ߡߛߏ ߟߊ߫ ߡߐ߱ ߟߎ߬ ߞߵߊ߬ߟߎ߬ ߡߊߞߊ߬ߛߴߊ߬ ߞߊ߲߬߸ ߞߊ߬ߕߘߍ߬ ߞߏ ߡߍ߲ ߦߴߊ߬ ߣߌ߫ ߘߋ߲ߡߛߏ ߕߍ߫߸ ߞߐߙߍ ߦߴߏ߬ ߞߊ߬ߟߊߡߊ߬.
ߞߊ߲ߡߋߙߋ߲ ߞߵߊ߬ ߦߌ߬ߘߴߊ߬ ߟߊ߫ ߞߎߡߊ ߘߐ߫ ߝߣߊ߫ ߞߏ߫:<< ߘߋ߲ߡߛߏ ߣߊ߫ ߞߋߟߋ߲߫ ߔߋ߫ ߕߎ߲߬ ߦߴߊ߬ ߞߏ ߞߊ߬ߟߊߡߊ߬߸ ߊ߬ ߝߊ߬ ߡߍ߲ ߕߎ߲߬ ߕߴߊ߬ ߞߊ߬ߟߊߡߊ߬، ߏ߬ ߟߋ߬ ߞߵߊ߬ ߡߊߞߊ߬ߛߌ߫ ߒ ߞߊ߲߬߸ ߊ߬ ߟߐ߲ ߞߐ ߘߐ߫ ߊ߬ ߓߟߏ߫ ߞߏ߫ ߊ߬ ߘߋ߲ߡߛߏ߫ ߞߣߐߡߊ ߟߋ߬ >>، ߊ߬ ߞߵߏ߬ ߦߌ߬ߘߊ߫.
ߗ߭ߎ߳ߟ ߛߣߏߡߌ߫ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߊ߬ ߘߌ߫ ߛߊ߲߬ ߝߌ߬ߟߊ߫ ߖߊ߬ߣߍ߫ ߓߐ߫߸ ߊ߬ ߣߌ߫ ߘߋ߲ߡߛߏ ߦߋ߫ ߢߐ߲߮ ߝߍ߬، ߓߊ߬ߙߌ߬߸ ߞߏ߫ ߞߏ ߕߊ߬ߡߌ߲߬ ߘߴߊ߬ ߣߌ߫ ߘߋ߲ߡߛߏ ߕߍ߫ ߛߋ߲߬ߧߊ߬ ߞߋߟߋ߲߫ ߔߋ߫ ߟߋ߬ ߏ߬ ߞߎ߲߬ߕߊ߮ ߡߎ߰ߡߍ ߞߘߐ߫.
ߞߕߌ ߣߌ߲߬ ߛߋ߲߭ߝߍ߬߸ ߞߕߌߞߊ߲ߘߊ ߞߊ߬ ߞߊ߬ ߛߊ߲߬ ߝߌ߬ߟߊ߬ ߥߛߎ߫ ߓߊߟߊ߲ߣߍ߲ ߣߌ߫ ߢߍ߬ߢߌ߲߬ߘߐ߬ߓߍ߲ ߠߋ߬ ߝߐ߫ ߊ߬ ߟߊ߫ ߡߌ߬ߣߊ߲߬ߞߊ߲߬ߝߐ ߘߐ߫، ߓߊ߬ߙߌ߬߸ ߊ߬ ߟߊߓߊ߲߫ ߘߊ߫ ߛߊ߲߬ ߞߋߟߋ߲߫ ߥߛߎ߫ ߟߊߘߏ߲ ߣߌ߫ ߖߕ ߅߀߀ ߀߀߀ ߢߍ߬ߢߌ߲߬ߘߐ߬ߓߍ߲ ߠߋ߬ ߡߊ߬߸ ߗ߭ߎ߳ߟ ߛߣߏߡߏ߫ ߦߋ߫ ߞߐ ߘߐ߫ ߛߐ߲߬ߒ߬ߡߊ߬ ߘߌ߫ ߣߌ߲߬ ߞߏߢߊ ߘߐ߫.
ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ߟߐ ߓߟߏ߫߸ ߛߌߟߊߓߐߛߐ߯ߣߊ߫ ߞߐߦߌߘߊ ߛߌ߯ߙߌ߲߫.




