ߓߌ߬ ߂߀߂߆ ߣߍߣߍߓߊ ߕߋ߬ߟߋ߫ ߂߁߸ ߊ߲ ߞߊ߬ ߛߋ߲߬ߠߊ߬ߓߐߟߌ ߘߏ߫ ߞߍ߫، ߞߊ߬ ߕߊ߯ ߛߋ߫ ߖߡߊ߬ߣߊ߬ ߞߣߐ߬ߘߋ߲ ߠߎ߫ ߡߊ߬߸ ߞߵߊ߬ߟߎ߬ ߡߙߌߣߊ߲ ߟߐ߲߫ ߖߌ߬ߣߍ߬ ߟߊ߫ ߞߎߓߋߘߊ߫ ߝߌߟߊߣߊ߲ߞߏ ߞߊ߲߬߸ ߡߍ߲ ߠߊߛߋ߫ ߘߊ߫ ߞߏߕߌ߯ߝߟߐߘߊ ߓߟߏ߫߸ ߞߏ߫ ߖߌ߬ߣߍ߬ ߓߘߊ߫ ߞߎߓߋߘߊ߫߫ ߞߎߘߊߞߏ ߣߕߊ߬߸ ߡߍ߲ ߘߌ߫ ߞߍ߫ ߡߊ߬ߡߙߊ߬ߟߌ ߞߎߓߋߘߊ ߘߌ߫، ߛߊ߫ ߞߐߣߊߞߙߌ߫ ߦߋ߫ ߕߏ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߎߓߋߘߦߊ ߟߊ߫߸ ߞߊ߬ ߖߡߊ߬ߣߊ ߛߌ߲߬ߝߏ߲߬ߘߊ߬ߓߊ ߟߎ߬ ߣߴߊ߬ ߡߊ߬ߡߙߊ߬ߟߌ߬ߘߊ߬ߓߊ ߟߎ߬ ߟߊߕߊ߯ ߛߏ߫ ߞߎߘߊ ߏ߬ ߟߊ߫߸ ߛߏ ߏ߬ ߘߏ߲߬ ߕߐ߮ ߕߏߣߍ߲߫ ߊ߬ߟߎ߬ ߓߟߏ߫ ߜߎ߬ߕߙߎ߬ ߞߣߐ߬ߝߋ߲߬ߦߊ ߟߋ߬ ߟߊ߫، ߓߊߏ߬߸ ߊ߬ߟߎ߬ ߡߴߊ߬ ߦߌ߬ߘߊ߬ ߝߋߎ߫ ߞߏ߫ ߊ߲ ߞߍߕߐ߫ ߛߏ߫ ߛߌ߬ߣߊ߫ ߢߌ߲߬ ߠߋ߬ ߞߍ߫ ߟߊ߫ ߞߎߓߋߘߊ߫ ߝߌߟߊߣߊ߲ ߘߌ߫߸ ߡߍ߲ ߞߏ ߦߋ߫ ߛߋ߲߬ߠߊ߫. ߒ߬ߓߊ߬߸ ߊ߲ ߞߊ߬ ߡߐ߰ ߘߊ߲ߘߐ߫ ߘߟߊߛߎ߲ߓߎ߫߸ ߞߵߊ߬ ߟߐ߲߫ ߊ߬ߟߎ߬ ߝߣߊ߫ ߣߊ߬ߕߊ ߦߋ߫ ߛߏ ߡߍ߲ ߠߊ߫ ߞߎߓߋߘߊ߫ ߝߌߟߊߣߊ߲ߦߊ ߟߊ߫ ߕߋ߲߭ߕߋ߲߭ ߣߌ߲߬ ߘߐ߫، ߦߊ߬ߣߌ߫ ߞߎ߲߬ߠߊ߬ߛߌ߮ ߦߴߊ߬ ߦߙߐ ߞߏߝߐ߫. ߊ߬ ߡߐ߱ ߓߍ߯ ߞߏ߬ߣߌ߲ ߦߴߊ߬ ߝߍ߬߸ ߊ߬ ߦߋ߫ ߛߌ߰ ߜߍߞߊ߲ߠߊ ߟߋ߬ ߘߐ߫߸ ߤߊߟߌ߬ ߣߴߏ߬ ߞߵߊ߬ ߛߐ߬ߘߐ߲߬ ߞߏ߫ ߊ߬ߟߎ߬ ߡߊ߫ ߓߍ߲߬ ߛߏ߫ ߞߋߟߋ߲߫ ߡߊ߬߸ ߏ߬ ߟߋ߬ ߘߐ߫߸ ߡߊ߲߬ߓߌ߫ ߞߊ߬ߡߙߊ߬ ߞߵߊ߬ ߡߙߌߦߊ ߦߌ߬ߘߊ߬:

<< ߞߎߓߋߘߊ߫ ߝߌߟߊߣߊ߲ ߛߌ߰ߞߏ ߡߍ߲ ߝߐߣߍ߲߫ ߖߌ߬ߣߍ߬ ߞߣߐ߫߸ ߏ߬ ߦߋ߫ ߒ ߛߍߥߊߣߊ߲ߞߏ ߣߌ߫ ߒ ߘߌߦߊߣߊ߲ߞߏ ߟߋ߬ ߘߌ߫، ߓߊ߬ߙߌ߬߸ ߣߌ߫ ߦߙߐ߫ ߡߊ߫ ߢߊ߬ ߞߍ߫ ߞߐ߫ ߊ߬ ߘߌ߫߸ ߊ߬ ߦߋ߫ ߞߍ߫ ߞߊ߲ߞߊ߲߫ ߠߋ߬ ߘߌ߫. ߞߊ߬ߕߎ߲߯߸ ߒߠߋ ߞߊ߬ ߒ ߠߊ߫ ߖߊ߯ߓߘߊ ߞߍ߫ ߞߊ߲ߞߊ߲߫ ߠߋ߬߸ ߒ ߘߏ߲߬ ߞߵߊ߬ ߓߊ߯ߙߊ߫ ߛߌߦߊߡߊ߲߫ ߢߊߟߐ߲߫߸ ߏ߬ ߘߐ߫߸ ߞߊ߲ߞߊ߲߫ ߓߊ߯ ߞߍ߫ ߊ߬ ߘߌ߫߸ ߏ߬ ߟߋ߬ ߦߋ߫ ߒ ߢߣߊߕߊ>>، ߊ߬ ߞߵߏ߬ ߦߌ߬ߘߊ߫.
ߒ߬ߓߊ߬߸ ߝߊߕߎߡߊߕߊ߬ ߞߎ߬ߙߎߡߊ߬ ߝߣߊ߫ ߞߵߊ߬ ߡߙߌߣߊ߲ ߦߌ߬ߘߊ߬߸ ߞߏ߫ ߊ߬ߟߋ ߦߋ߫ ߞߊ߲ߞߊ߲߫ ߛߎߥߊ߲ߘߌ߫ ߟߊ߫، ߏ߬ ߡߍ߲ ߦߋ߫ ߛߏ߫ ߞߘߐߞߘߐ ߘߏ߫ ߘߌ߫߸ ߡߍ߲ ߣߌ߫ ߞߎߓߋߘߦߊ ߞߊ߫ ߞߊ߲߫ ߓߌ߬߸ ߞߊ߬ ߓߍ߲߬ ߊ߬ ߟߐ߬ߢߊ ߣߴߊ߬ ߕߐ߮ ߓߐߢߊ ߡߊ߬:

<< ߞߊ߲ߞߊ߫ ߓߊ߯ ߞߍ߫ ߞߎߓߋߘߊ߫ ߝߌߟߊߣߊ߲ ߘߌ߫ ߖߌ߬ߣߍ߬ ߞߣߐ߫߸ ߏ߬ ߟߋ߬ ߘߎߡߊ߲߫ ߒߠߋ ߦߋ߫، ߓߊߏ߬߸ ߞߐߣߊߞߙߌ߫ ߓߊ߯ ߓߐ߫ ߦߋ߲߬߸ ߞߊ߲ߞߊ߲߫ ߠߋ߬ ߡߊߛߎ߬ߘߎ߲߬ߡߊ߲߫ ߊ߬ ߟߊ߫ >>، ߊ߬ ߞߵߏ߬ ߣߊ߬ߕߊ߫.
ߓߙߋߡߊ߬ ߡߜ߭ߊ߬ߛߎߓߊ߫ ߝߣߊ߫ ߡߊ߫ ߕߎ߲߬ߞߎߙߎ߲߫ ߊ߬ ߡߙߌߦߊ ߦߌ߬ߘߊ ߘߐ߫߸ ߞߏ߫ ߊ߬ߟߋ ߖߍ߬ߘߍ ߦߋ߫ ߤߙߍ ߣߌ߫ ߝߟߐߦߊ ߘߌ߫ ߟߴߊ߬ ߝߊ߬ߛߏ ߟߋ߬ ߡߊ߬:
<< ߊ߬ ߘߎߡߊ߲߫ ߒߠߋ ߦߋ߫ ߞߊ߬ ߛߌ߯ߙߌ߲߫ ߠߋ߬ ߞߍ߫ ߞߎߓߋߘߊ߫ ߝߌߟߊߣߊ߲ ߘߌ߫، ߓߊߏ߬߸ ߛߌ߯ߙߌ߲ߞߊ ߟߋ߬ ߒ ߘߌ߫߸ ߏ߬ ߘߐ߫߸ ߒ ߧߋ߫ ߤߙߍ ߡߍ߲ ߢߌߣߌ߲߫ ߠߊ߫߸ ߒ ߧߴߊ߬ ߢߌߣߌ߲߫ ߠߊ߫ ߒ ߝߊ߬ߛߏ ߟߋ߬ ߝߟߐ߫ ߦߋ߫ >>،ߓߙߋߡߊ߬ ߡߜ߭ߊ߬ߛߎߓߊ ߞߊ߲߫ ߠߴߏ߬ ߘߌ߫.

ߒ߬ߓߊ߬߸ ߘߎ߰ߘߋ߲ ߠߎ߫ ߡߙߌߦߊ ߟߴߏ߬ ߘߌ߫߸ ߞߊ߬ ߓߍ߲߬ ߞߎߓߋߘߊ߫ ߝߌߟߊߣߊ߲ߞߏ ߡߊ߫ ߖߌ߬ߣߍ߬ ߞߣߐ߫، ߡߍ߲ ߞߏ ߦߋ߫ ߛߋ߲߬ߠߊ߫ ߞߊ߲ߕߌ߮ ߣߴߊ߬ ߣߐ߬ߟߊ ߓߟߏ߫߸ ߛߏ ߡߍ߲ ߞߏ߬ߣߌ߲ ߞߍߕߐ߫ ߊ߬ ߘߌ߫߸ ߊ߬ߟߎ ߟߋ߬ ߞߵߏ߬ ߟߐ߲߫ ߡߎߣߎ߲߬ ߝߟߐ߫، ߖߡߊ߬ߣߊ߬ ߞߣߐ߬ߘߋ߲߬ ߛߌߦߊߡߊ߲߫ ߛߌ߰ߣߍ߲߫ ߡߍ߲ ߞߎ߲ߝߊ߲ ߣߴߊ߬ ߞߍ߫ ߦߙߐ ߟߐ߲ ߣߊ߬ߕߊ ߘߌ߫ ߕߋ߲߬.
ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ߟߐ ߓߟߏ߫߸ ߛߌߟߊߓߐߛߐ߯ߣߊ߫ ߞߐߦߌߘߊ ߛߌ߯ߙߌ߲߫.






