ߒߞߏ ߞߊ߲ߓߏߟߏ߲ ߠߎ߬ ߓߊ߲ߓߊ߲ ߠߋ߬ ߞߏߛߐ߲߬߸ ߡߐ߰ ߛߌߦߊߡߊ߲߫ ߓߘߊ߫ ߞߊ߲ߓߏߟߏ߲ ߏ߬ ߟߎ߫ ߖߌ߰ ߊ߬ߟߎ߬ ߕߊ߫ ߞߊ߲߫ ߘߌ߫، ߞߵߊ߬ ߕߘߍ߬ ߛߎߋ߫ ߒߞߏ ߞߊ߲ߓߏߟߏ߲ ߠߎ߫ ߟߋ߬ ߖߐ߫، ߒ߬ߞߊ߬ ߝߋߎ߫ ߊ߬ߟߎ߬ ߕߍ߫߫߫ ߞߊ߲߫ ߓߟߏߡߊߞߊ߬ߣߍ߲߬ ߘߴߊ߬ߟߎ߫ ߘߊ߲߬ߠߊ߫، ߞߊ߲ߓߏߟߏ߫ ߞߎ߲ߓߊߓߊ߫ ߣߊ߯ߣߌ߲ ߢߌ߲߬ ߠߎ߬ ߟߋ߬ ߒߞߏ ߟߊ߫߸ ߡߊ߬ߣߌ߬ߞߊ߬ߞߊ߲߸ ߓߡߊߙߊ߲ߞߊ߲߸ ߖߎ߬ߟߊ߬ߞߊ߲߸ ߡߊ߲߬ߘߋ߲߬ߞߏ߬ߞߊ߲، ߏ߬ ߓߍ߯ ߦߋ߫ ߒߞߏ ߟߋ߬ ߝߐ߫ ߟߊ߫، ߊ߬ ߣߌ߫ ߓߏߟߏ߲߫ ߡߌߛߍ߲߫ ߜߘߍ߫ ߟߎ߫߸ ߦߏ߫ ߞߐ߬ߣߌ߲߬ߧߊ߬ߞߊ߲ ߣߌ߫ ߞߎ߬ߙߊ߲߬ߞߐ߬ߞߊ߲ ߣߌ߫ ߛߊ߲ߞߊߙߊ߲ߞߊ߲ ߣߴߊ߬ ߢߐ߲߰ߘߐ ߟߎ߬.
ߊ߲ ߞߊ߬ ߞߊ߲ ߡߍ߲ ߠߎ߬ ߟߊߞߏߟߐ߲߫ ߊߝߙߌߞߌ߬ ߦߊ߲߬߸ ߊ߬ ߝߘߊ߬ߜߍ߬ ߞߊ߲ ߣߵߊ߬ ߝߘߊ߬ߝߌ߲߬ ߞߊ߲، ߒߞߏ ߟߋ߬ ߦߋ߫ ߗߍ߭ ߘߴߊ߬ߟߎ߬ ߘߐ߫߸ ߒߞߏ ߦߋ߫ ߗߍ߬ ߘߌ߫ ߞߊ߬ ߕߊ߬ߡߌ߲߬ ߊ߲߬ߜߌ߬ߟߋ߬ߞߊ߲ ߠߊ߫߸ ߊ߰ ߗߍ߬ ߘߌ߫ ߊߙߊߓߎ ߘߌ߫߸ ߝߊ߬ߙߊ߲߬ߛߌ߬ߞߊ߲ ߦߴߊ߬ ߞߍ߬ߙߍߝߍ߬ ߡߛߏ߬ ߘߌ߫، ߒ ߘߊ߬ߟߎ ߞߊ߫ ߛߌߦߊ߫ ߥߊ߮ ߘߌ߫، ߌ ߕߟߏߡߊߟߐ߬ ߦߋ߫ ߟߊ߬ߡߍ߲߬ߠߌ߲ ߞߍ߫ ߦߟߌ ߟߊ߫.
ߒߞߏ ߞߎߡߊߘߋ߲ ߖߍ߬ߘߍ ߛߏ߯ߙߏߣߍ߲߫ ߛߓߍߘߋ߲߫ ߛߊ߬ߓߊ߫ ߟߋ߬ ߟߊ߫߸ ߡߊ߲߬ߘߋ߲ ߠߎ߬ ߞߊ߲߫ ߞߏ߫ ߗߍ߭ ߓߍ߬ߙߍ ߟߋ߬ ߛߓߊ߬، ߌ ߞߊ߬ ߞߊ߲߫ ߜߘߍ߫ ߖߐ߲߫ ߟߐ߲߫ ߝߘߊ߬ߝߌ߲߬ߠߊ߫ ߜߙߋ ߣߌ߲߬ ߞߊ߲߬߸ ߡߍ߲ ߕߐ߮ ߦߋ߫ ߓߍ߲߬ ߠߊ߫ ߞߟߏߘߋ߲߫ ߛߊ߬ߓߊ߫ ߡߊ߬؟
ߊ߬ ߦߋ߫ ߝߐ ߡߍ߲ ߞߍ߫ ߟߊ߫ ߞߏ߫ ߒߞߏ ߦߋ߫ ߘߎߢߊ߫ ߞߊ߲ ߓߍ߯ ߛߓߍ߫ ߟߊ߫߸ ߏ߬ ߘߊ߬ߟߎ ߦߋ߫ ߒߞߏ ߞߎߡߊߘߋ߲ ߖߍ߬ߘߍ ߟߋ߬ ߘߌ߫ ߛߎߋ߫.
ߓߊߏ߬߸ ߞߊ߲ ߡߍ߲ ߠߎ߬ ߛߓߍ߫ ߟߊ߫ ߘߎߢߊ߫ ߣߌ߲߬ ߡߊ߬߸ ߏ߬ ߓߍ߯ ߛߓߍ߫ ߟߊ߫ ߢߍ߲߰ ߛߎ߯ߦߊ߫ ߣߊ߯ߣߌ߲߲߫ ߠߋ߬ ߘߐ߫ ߥߟߊ߫ ߛߓߊ߬، ߟߊ߬ߞߎ߬ߡߊ߬ߟߊ߲߸ ߟߊ߬ߞߎ߬ߡߊ߬ߕߊ߸ ߕߍߘߐ، ߊ߬ ߣߌ߫ ߞߊ߲ߡߊߛߙߋ ߟߎ߬. ߊߙߊߓߎߞߊ߲ ߝߊ߲߬ ߘߴߛߋ߫ ߊ߬ ߥߛߊ߬ߞߎ߲߫ ߠߊ߫ ߟߊ߬ߞߎ߬ߡߊ߬ߕߊ ߘߐߙߐ߫ ߘߐ߫ ߕߎ߬ߡߊ ߘߏ߫ ߟߊ߫ ߝߋߎ߫، ߞߊ߲ߡߊߛߙߋ߫ ߞߏ ߡߊߓߌ߬ߟߊ߬ߣߍ߲߫ ߞߊ߲߫ ߛߌߦߊߡߊ߲߫ ߓߟߏ߫ ߓߊߟߋ߬. ߝߘߊ߬ߝߌ߲߬ ߞߊ߲ ߞߏ߬ߣߌ߲ ߕߴߛߋ߫ ߢߊ߬ ߟߊ߫ ߞߊ߲ߡߊߛߙߋ ߣߌ߫ ߟߊ߬ߞߎ߬ߡߊ߬ߕߊ ߣߌ߫ ߟߊ߬ߞߎ߬ߡߊ߬ߟߊ߲ ߞߐ߫ ߟߋ߬ ߘߍ߯.
ߒ߬ߓߊ߬߸ ߌ ߓߊ߯ ߒߞߏ ߞߎߡߊߘߋ߲ ߖߍ߬ߘߍ ߘߐߜߍ߫ ߥߊߘߏ ߟߊ߫߸ ߌ ߘߴߊ߬ ߕߘߍ߬ ߞߎߡߊߘߋ߲߫ ߘߌ߫߸ ߟߊ߬ߞߎ߬ߡߊ߬ߟߊ߲ ߣߌ߫ ߟߊ߬ߞߎ߬ߡߊ߬ߕߊ ߣߌ߫ ߕߍߘߐ ߘߝߊߣߍ߲߫ ߡߍ߲ ߘߐ߫ ߞߐ߲ߞߐ߲߫، ߊ߬ ߣߌ߫ ߞߊ߲ߡߊߛߙߋ ߣߌ߫ ߞߊ߲ߠߊߘߌߦߊߟߊ߲، *ߒ* ߡߍ߲ ߦߴߊ߬ ߘߊߡߌߣߊ ߟߊ߫߸ ߏ߬ ߦߋ߫ ߕߍߘߐ ߟߋ߬ ߘߌ߫، *ߞ* ߡߍ߲ ߦߴߊ߬ ߕߍߡߊ߬ ߏ߬ ߦߋ߫ ߟߊ߬ߞߎ߬ߡߊ߬ߕߊ ߟߋ߬ ߘߌ߫، *ߏ* ߡߍ߲ ߦߴߊ߬ ߛߓߍߘߋ߲߫ ߠߊߓߊ߲ ߘߌ߫߸ ߏ߬ ߦߋ߫ ߟߊ߬ߞߎ߬ߡߊ߬ߟߊ߲ ߠߋ߬ ߘߌ߫، ߒ߬ߓߊ߬ ߢߌ߲߬ ߠߎ߫ ߟߋ߬ ߓߍ߯ ߞߏߛߐ߲߬߸ ߘߏ߫ ߟߎ߫ ߛߋ߫ ߘߊ߫ ߒߞߏ ߞߎߡߊߘߋ߲ ߛߓߍߘߋ߲߫ ߛߊ߬ߓߊ ߓߍ߯ ߘߍ߬ߡߍ߲߬ߘߌ߫ ߟߴߊ߬ ߕߊ߫ ߞߎߡߊ߫ ߟߊ߫ ߞߏ߫ *ߒߞߏ* ߞߘߐ ߟߋ߬߸ ߞߏ߫ ߒ= ߒ߬ߤߎ߲߮߹ ߒ ߓߘߊ߫ ߛߓߍߟߌ߫ ߛߐ߬ߘߐ߲߬، ߞ= ߞߊ߲ߡߊߛߙߋߡߊ ߟߋ߬، ߏ= ߏ߬ ߡߍ߲ ߦߋ߫ ߛߋ߫ ߟߊ߫ ߞߊ߲ ߓߍ߯ ߛߓߍ߫ ߟߊ߫ ߞߐߘߍ߫.
ߊ߬ ߘߏ߲߬ ߦߋ߫ ߢߊ ߏ߬ ߞߊ߲߬ ߤߊ߯ߟߌ߫، ߒ߬ߓߊ߬߸ ߒߞߏ ߦߋ߫ ߡߊ߲߬ߘߋ߲߬ ߡߌߙߌ߲ߘߌ ߣߴߊ߬ ߛߓߍߟߌ ߣߴߊ߬ ߞߊ߲ ߠߋ߬ ߕߐ߯ ߘߌ߫߸ ߦߏ߫ ߊߙߊߓߎ ߦߋ߫ ߊߙߊߓߎߞߊ߲ ߣߌ߫ ߊߙߊߓߎ߫ ߛߓߍߟߌ ߣߌ߫ ߊߙߊߓߎ ߟߎ߫ ߖߍ߬ߘߍ ߕߐ߮ ߘߌ߫ ߢߊ ߡߍ߲ ߡߊ߬، ߒߞߏ ߦߋ߫ ߞߊ߲ ߣߌ߫ ߛߓߍߟߌ ߣߌ߫ ߡߌ߬ߙߌ߲߬ߘߌ ߕߐ߮ ߟߋ߬ ߘߌ߫ ߞߋߟߋ߲ߘߌ߫߸ ߦߏ߫ ߝߊ߬ߙߊ߲߬ߛߌ ߦߋ߫ ߊ߬ ߞߊ߲ ߣߴߊ߬ ߛߓߍߟߌ ߣߴߊ߬ ߡߌ߬ߙߌ߲߬ߘߌ ߓߍ߯ ߕߐ߮ ߘߌ߫ ߞߋߟߋ߲ߘߌ߫ ߢߊ ߡߍ߲ ߡߊ߬ ߖߐ߲.
ߞߙߊ߬ߞߐ߬ߞߊ߫ ߞߊ߬ߟߐ
ߒߞߏ ߞߊߙߊ߲ߘߋ߲


