ߞߊ߯ߙߌ߫ ߕߊ߬ߡߌ߲߬ߣߍ߲ ߡߍ߲ ߓߍ߲߬ ߘߊ߫ ߕߎߟߊߝߌ߲ ߕߟߋ߬ ߁߃ ߡߊ߬߸ ߛߌ߯ߙߌ߲߫ ߘߋ߲ߡߌߛߍ߲߫ ߓߏ߲ߓߊ ߡߍ߲ ߦߋ߫ ߞߟߌ߫ ߟߊ߫ ߞߏ߫ ߛߊ߲ߕߙߌߘߊ߸ ߏ߬ ߝߊ߫ ߘߊ߫ ߟߋ߬ ߏ߬ ߟߏ߲߸ ߞߵߊ߬ ߘߡߊߛߙߊߓߊ ߟߊ߫، ߟߏ߲߫ ߞߋߟߋ߲ ߏ߬ ߞߙߍߞߙߍ߫ ߘߊ߫ ߞߵߊ߬ ߞߍ߫ ߒߞߏ ߛߓߍߟߌ ߣߴߊ߬ ߞߣߐ߫ ߟߐ߲ߠߌ߲ ߠߎ߬ ߕߊ ߟߋ߬ ߘߌ߫، ߝߏ߮ ߝߊ߫ ߖߡߊ ߢߊߞߘߐ߫߸ ߡߏߙߌ߫ ߞߡߊ߬ߙߊ߫ ߖߐ߲߬ߡߊ߬ߛߌߣߌ߲ߟߐ߲߫ ߞߵߊ߬ ߟߊ߫ ߞߝߊ߬ ߕߊ߲߫ ߞߎ߲߬ߠߊ߬ߓߐ߫߸ ߞߵߊ߬ߟߎ߬ ߢߊߝߐ߫ ߖߊ߬ߡߊ ߢߊߞߘߐ߫߸ ߡߍ߲ ߠߎ߬ ߓߐ߫ ߘߊ߫ ߡߊ߬ߟߌ ߣߌ߫ ߖߌ߬ߣߍ߬ ߞߊ߲ߓߍ߲ ߛߏ߫ ߛߌߦߊߡߊ߲߫ ߠߊ߫.
ߞߵߊ߬ ߕߊ߬ ߞߐߣߊߞߙߌ߫ ߡߊ߬߸ ߞߊ߲ߞߊ߲߫߸ ߓߋߦߌߟߊ߫߸ ߞߎ߬ߙߋߡߊ߬ߟߋ߲߬߸ ߞߎߡߊߕߍ߫ ߛߌ߯ߙߌ߲߫ ߣߌ߫ ߓߡߊ߬ߞߐ߫ ߡߊ߬߸ ߣߊ߬ߓߊ߮ ߟߎ߬ ߓߐ߫ ߘߊ߫ ߦߋ߲߬ ߠߎ߬ ߓߍ߯ ߟߋ߬ ߘߐ߫߸ ߞߊ߬ ߣߊ߬ ߞߝߊ߬ ߞߎ߲߬ߠߊ߬ߓߐ ߢߌ߲߬ ߢߣߊߓߊ߯ߦߊ߫، ߝߏ߮ ߞߣߐ߫ ߦߋ߲߬߸ ߖߐ߲߬ߡߊߛߌߣߌ߲ߟߐ߲߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߦߋ߫ ߞߟߌ߫ ߟߊ߫ ߟߋ߬ ߦߋ߲߬ ߞߏ߫ <<ߛߓߍߟߌ߫ ߡߏߙߌ߫>> ߊ߬ ߟߊ߫ ߞߝߊ߬ ߛߓߍߣߍ߲ ߦߙߌߞߊ ߦߋ߫ ߞߊ߬ߝߊ߫ ߂߄߃ ߟߋ߬ ߘߐ߫ ߓߌ߬ ߢߐ߲߰ ߟߏ߲߫߸ ߡߍ߲ ߠߎ߬ ߛߓߍߟߌ ߓߘߊ߫ ߞߎ߲߭ߘߏ߲߬߸ ߊ߬ ߝߊ߲߬ߓߊ ߘߏ߲߬ ߓߘߊ߫ ߜߌ߬ߙߌ߲߬ߘߌ߫ ߞߊ߬ ߖߊ߬ߡߊ ߓߟߏߟߊߛߐ߬ߘߐ߲߬.
ߒ߬ߓߊ߬߸ ߞߊ߯ߙߌߟߏ߲ ߡߊ߬߸ ߞߊ߬ߝߊ߫ ߗߡߍ߬ ߦߙߌߞߊ ߏ߬ ߟߎ߫ ߕߎ߲߬ ߕߍ߫ ߘߊ߫ ߘߐ߫ ߘߋ߬، ߕߊ߲߫ ߠߋ߬ ߕߐ߬ߡߐ߲߬ ߘߴߊ߬ߟߎ߬ ߘߐ߫߸ ߞߵߏ߬ ߟߎ߬ ߟߊ߫ ߖߊ߬ߡߊ ߢߊߞߘߐ߫، ߛߎߞߏ ߣߌ߫ ߞߣߍߓߐ ߞߊ߬ߝߊ ߟߋ߬ ߞߍ߫ ߘߴߏ߬ ߟߎ߬ ߘߐ߫ ߞߎ߲߭ ߘߌ߫߸ ߏ߬ ߡߍ߲ ߦߋ߫ ߞߎߘߎ߲߫ ߕߊ߲߫ ߖߊ߬ߕߋ߬ ߘߌ߫߸ ߊ߬ ߟߊߘߍ߬ߣߍ߲ ߘߌ߫ ߞߐߜߍ߫ ߥߊ߯ ߝߌ߬ߟߊ߬ ߣߌ߫ ߞߐ߫ ߓߐ߫.
ߡߌ߬ߛߍ߲߬ ߕߊ߲߫ ߣߌ߫ ߞߐ߫ ߞߣߐ߫ ߕߋ߲߬߸ ߞߊ߬ߙߊ߲߬ߝߊ ߖߐ߲߬ߡߊ߬ߛߌߣߌ߲ߟߐ߲߫ ߣߊ߬ ߘߊ߫ ߞߝߊ߬ ߢߌ߲߬ ߓߛߊߞߟߌߕߋ߫ ߖߊ߬ߡߊ ߦߋ߫، ߞߵߊ߬ ߦߌ߬ߘߊ߬ ߞߏ߫ ߞߝߊ߬ ߛߓߍ ߕߍ߫ ߓߊ߲߫ ߠߊ߫߸ ߞߏ߫ ߤߊߟߌ߬ ߞߊ߬ߝߊ ߞߎ߲߬ߠߊ߬ߓߐ߬ ߟߏ߲߸ ߘߏ߫ ߓߊ߲߫ ߘߊ߫ ߜߌ߬ߙߌ߲߬ߘߌ߬ ߟߊ߫ ߛߌ߯ߣߌ߲߬، ߏ߬ ߘߐ߫߸ ߞߏ߫ ߊ߬ ߣߐ߬ ߘߋ߲߫ ߕߊ߲ ߏ߬ ߟߋ ߕߐ߬ߡߐ߲߬ ߠߴߊ߬ ߘߐ߫ ߘߐߙߐ߲߫߸ ߞߵߏ߬ ߦߌ߬ߘߊ߬.
<<ߞߝߊ߬ ߕߊ߲ ߢߌ߲߬ ߞߘߐ ߟߋ߬ ߘߐߙߐ߲߫߸ ߡߍ߲ ߦߴߊ߲ ߓߟߏߞߘߐ߫ ߓߌ߬߸ ߊ߲ ߘߌ߫ ߛߋ߫ ߞߊ߬ ߡߍ߲ ߞߎ߲߬ߠߊ߬ߓߐ߫ ߓߌ߬߸ ߏ߰ ߊ߬ ߘߌ߫.>> ߊ߬ ߞߵߏ߬ ߢߊߝߐ߫.
ߛߌ߲߬ߝߏ߲߬ߧߊ߬ߟߌ ߘߏ߲߬ ߘߊ߫ ߛߌ߯ߙߌ߲߫ ߒߞߏ ߡߐ߮ ߟߎ߫ ߟߋ߬ ߓߟߏ߫߸ ߏ߬ ߟߎ߬ ߛߋ߫ ߘߊ߫ ߞߏ ߟߎ߬ ߟߊߕߊ߯ߡߊ߫ ߢߊ ߟߊ߫߸ ߞߊ߬ ߝߏ߮ ߞߐߞߊ߲ߠߊ ߣߴߊ߬ ߞߣߐߟߊ ߓߍ߯ ߛߌ߲߬ߝߏ߲߬ߧߊ߫ ߞߊ߬ ߢߊ߬، ߤߊߟߌ߬ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߊ߬ߟߎ߬ ߡߊ߫ ߢߊߝߐߟߌ߫ ߞߍ߫ ߛߌ߲߬ߝߏ߲߬ߧߊ߬ߟߌ ߞߊ߲߬ ߝߐ߰ߓߍ߬ߦߊ߬ߟߊ ߟߎ߬ ߦߋ߫.
ߝߏ߮ ߝߊ߫ ߘߊ߫ ߞߵߊ߬ ߘߡߊߛߙߊߓߊ ߟߊ߫، ߖߐ߲߬ߡߊߛߌߣߌ߲ߟߐ߲߫ ߞߊ߬ߝߊ ߞߊ߬ߙߊ߲߬ߓߊ߮ ߟߎ߬߸ ߒߞߏ ߞߊߙߊ߲ߡߐ߮ ߟߎ߬߸ ߒߞߏ ߛߍ߬ߘߏ߲߬ߠߊ ߟߎ߬߸ ߛߎߞߏ ߣߌ߫ ߞߣߍߓߐ ߛߊ߲߬ߓߊ߮ ߟߎ߬ ߣߌ߫ ߖߐ߲߬ߡߊߛߌߣߌ߲ߟߐ߲߫ ߞߊ߬ߣߌ߲߬ߓߊ߮ ߟߎ߫ ߖߍ߬ߘߍ، ߘߏ߫ ߟߎ߫ ߞߊ߬ ߞߎߘߍ߫ ߗߡߍ߬ ߦߙߌߞߊ߫ ߟߋ߬ ߓߏ߬ߙߌ߫ ߞߊ߬ ߣߊ߬ ߖߊ߲߬ߖߏ߲߬ ߘߊߞߎ߲ ߢߌ߲߬ ߘߐ߫.
ߞߊ߬ߕߎ߲߯߸ ߖߊ߬ߡߊ ߓߐ߫ ߘߊ߫ ߡߊ߬ߟߌ ߖߡߊ߬ߣߊ ߞߊ߲߬߸ ߡߎߛߊ߫ ߞߐ߲ߘߍ߫ ߦߴߏ߬ ߘߏ߫ ߟߋ߬ ߘߌ߫. ߏ߬ ߞߵߊ߬ ߦߌ߬ߘߊ߬ ߞߏ߫ : <<ߞߊ߬ߙߊ߲߬ߝߊ߬ ߡߏߙߌ߸ ߊ߲ ߠߊ߫ ߢߐ߲߯ ߟߐ߲ ߣߌ߫ ߛߌߛߍ߲߬ ߕߍ߫߸ ߒ ߞߊ߬ ߤߙߍ ߟߋ߬ ߦߴߊ߬ ߞߣߐ߫، ߞߵߊ߬ ߟߐ߬ ߡߊ߲߬ߘߋ߲߫ ߡߊ߬߸ ߞߵߊ߬ ߟߐ߬ ߜߟߏ߬ߝߌ߲߬ߠߊ߫ ߡߊ߬. [...] ߊ߬ ߟߊ߫ ߞߊ߬ߝߊ ߟߎ߬ ߟߐ߲ߣߍ߫ ߡߊ߬ߟߌ ߞߣߐ߫߸ ߊ߬ ߟߐ߲ߣߍ߲߫ ߜߟߏ߬ߝߌ߲߬ߠߊ߬ ߞߣߐ߫، [...] ߊ߲ ߧߋ߫ ߒߞߏߞߏ ߞߍ߫ ߊ߲ ߛߍ߬ߓߍ ߘߌ߫߸ ߒߞߏ ߦߋ߫ ߢߍߕߊ߮ ߛߌߟߊ߫ ߛߎߘߎ߲ ߠߋ߬ ߘߌ߫.>> ߊ߬ ߞߵߏ߬ ߟߊߛߙߋߦߊ߫.
ߡߏ߬ߤߊ߬ߡߍ߬ߘ ߡߊߘߍߛ ߖߊߟߏ߫ ߝߣߊ߫ ߕߘߍ߬ ߞߣߍ߫ ߞߋߟߋ߲ ߢߌ߲߬ ߞߊ߲߬߸ ߏ߬ ߞߊ߬ ߟߊ߬ߛߙߋ߬ߦߊ߬ߟߌ߬ ߞߟߊߒߞߋ߫ ߞߍ߫ ߛߎߞߏ ߣߌ߫ ߞߣߍߓߐ ߞߊ߬ߝߊ ߞߊ߲߬.
<<ߛߎߞߏ ߣߌ߫ ߞߣߍߓߐ ߢߌ߲߬ ߠߋ߬ ߘߌߦߊߣߍ߲߫ ߒߠߋ ߦߋ߫ ߖߐ߲߬ߡߊߛߌߣߌ߲ߟߐ߲߫ ߠߊ߫ ߞߊ߬ߝߊ ߓߍ߯ ߘߌ߫، ߊ߬ ߣߊ߬ߣߍ߲߫ ߦߟߍ߬ߡߊ߲߬ ߛߌߦߊߡߊ߲߫ ߠߋ߬ ߘߏ߲߬ ߠߊ߫ ߒߠߋ ߖߍ߬ߘߍ ߟߊ߫ ߢߣߊߡߦߊ ߘߐ߫߸ ߒ ߛߐ߬ߘߐ߲ ߛߊ߲ߖߌ߫ ߦߙߌߞߊ߫ ߖߊ߲ ߠߋ߬ ߕߋ߲߬߸ ߒ ߕߎ߲߬ ߡߊ߫ ߛߋ߫ ߡߍ߲ ߢߐ߲߰ ߞߍ߫ ߟߊ߫، ߛߎߞߏ ߣߌ߫ ߞߣߍߓߐ ߞߊ߬ߝߊ ߓߐ ߣߌ߫ ߓߌ߬ ߕߍ߸ ߊ߬ ߓߘߊ߫ ߦߟߍ߬ߡߊ߲ ߡߍ߲ ߘߏ߲߬ ߒ ߠߊ߫ ߢߣߊߡߦߊ ߘߐ߫߸ ߊ߬ ߓߘߊ߫ ߣߊ߬ߝߊ ߡߍ߲ ߠߊߘߏ߲߬ ߒ ߣߌ߫ ߒ ߝߍ߬ ߡߐ߮ ߟߎ߫ ߡߊ߬߸ ߏ߬ ߕߍ߫ ߓߊ߲߫ ߝߐ߫ ߟߊ߫.>> ߊ߬ ߞߵߏ߬ ߦߌ߬ߘߊ߬.
ߞߝߊ߬ ߞߎ߲߬ߠߊ߬ߓߐ ߢߌ߲߬ ߞߣߍ ߞߊ߲߬߸ ߞߝߊ߬ ߕߊ߲߫ ߞߎ߲߬ߠߊ߬ߓߐ߬ߕߊ ߓߍ߯ ߕߐ߬ߝߍ߬ߦߊ߬ ߘߊ߫ ߞߊ߬ߙߊ߲߬ߝߊ߬ ߡߏߙߌ ߞߡߊ߬ߙߊ߬ ߓߟߏ߫߸ ߞߵߊ߬ߟߎ߬ ߞߣߐߘߐ ߟߎ߬ ߞߐߣߐ߲ߞߎ߲ߓߊߘߏ߲߫، ߏ߬ ߘߊߞߎ߲ ߛߋ ߛߎߞߏ ߣߌ߫ ߞߣߍߓߐ ߞߎߘߎ߲߫ ߕߊ߲ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߡߊ߲߬ߕߊ߬ߣߌ߲߬ ߕߊ߲߫ ߠߋ߬ ߦߋ߫ ߛߎߞߏ ߣߌ߫ ߞߣߍߓߐ ߟߊ߫، ߏ߬ ߢߊߝߐߟߌ ߞߍ߫ ߘߴߊ߬ ߓߟߏ߫ ߢߊߞߘߐߛߋ ߘߝߊߣߍ߲ ߘߐ߫، ߓߊߏ߬߸ ߊ߬ ߟߊ߫ ߛߙߊ߬ߣߎ߲ ߞߵߊ߬ ߦߌ߬ߘߊ߬ ߞߏ߫ ߞߵߊ߬ ߕߊ߬ ߓߊߛߌߦߊ ߣߌ߫ ߘߊ߲ߘߊߟߌ ߡߊ߬߸ ߞߵߊ߬ ߛߌ߰ ߖߊ߲߬ߞߊߙߏ ߟߎ߬ ߟߐ߲ߘߐߦߊ ߟߊ߫߸ ߖߊ߲߬ߞߊߙߏ߬ ߄߀߀߀ ߦߴߊ߬ ߞߣߐ߫߸ ߡߍ߲ ߠߎ߬ ߘߊ߲ߘߊ߫ ߢߊ ߝߘߊ߬ߝߌ߲߬ ߕߊ ߣߴߊ߬ ߕߎ߬ߓߊ߬ߓߎ߬ ߕߊ ߦߋ߫ ߞߝߊ߬ ߞߋߟߋ߲ ߣߌ߲߬ ߞߣߐ߫، ߝߊ߬ߘߌ߬ ߘߐ߬ ߖߊ߲ߞߊߙߏ ߣߌ߫ ߛߟߐߡߌ߲߫ ߖߊ߲ߞߊߙߏ ߡߍ߲ ߠߎ߬ ߦߋ߫ ߖߊ߲߬ߞߊߙߏ ߟߎ߬ ߛߎ߲ߓߊ߫ ߝߌ߬ߟߊ ߘߌ߫߸ ߏ߬ ߢߊߝߐߣߴߊ߬ ߞߣߐ߫߸ ߡߊ߬ߞߏ߬ ߢߊ߬ ߝߙߍ ߟߎ߬ ߣߌ߫ ߡߐ߰ߦߊ ߕߊ߬ߣߊ ߟߎ߬ ߣߌ߫ ߢߣߊߡߦߊ ߘߐߕߌߡߌ߲ߧߊߟߊ߲ ߠߎ߬ ߦߴߊ߬ ߞߣߐ߫. ߏ߬ ߟߋ ߞߵߊ߬ߟߋ߬ ߞߊ߬ߝߊ ߛߋ߫ ߞߎߘߎ߲߫ ߕߊ߲߫ ߖߊ߬ߕߋ߬ ߘߐ߫.
ߊ߬ ߟߊ߫ ߞߊ߬ߝߊ ߢߌ߲߬ ߠߎ߬ ߡߍ߲ ߠߎ߬ ߦߋ߫ ߖߊ߬ߡߊ ߓߟߏߟߊ߫ ߣߌ߲߬ ߣߴߊ߬ ߓߘߊ߫ ߓߍ߯ ߢߊߞߘߐߛߋ߫߸ ߏ߬ ߟߎ߬ ߦߋ߫ ߜߌ߬ߙߌ߲߬ߘߌ߬ ߟߊ߫ ߞߵߊ߬ߟߎ߫ ߣߊ߲߬ߝߟߏ߬ߦߊ߬ ߞߵߊ߬ ߟߊߛߋ߫ ߓߍ߯ ߡߊ߬ ߘߊߞߎ߲߫ ߛߌߦߊߡߊ߲߫ ߣߌ߫ ߢߊ߫ ߛߌߦߊߡߊ߲߫ ߠߋ߬ ߡߊ߬، ߓߊ߬ߙߌ߬߸ ߊ߬ ߝߊ߲߬ߓߊ ߦߋ߫ ߞߍ߫ ߟߊ߫ ߡߍ߲ ߓߟߏ߫߸ ߏ߬ ߕߘߍ߬ ߞߣߍ ߞߊ߲߬، ߣߊߟߌ߬ߡߎ߲߫ ߛߊ߲ߞߊߙߊ߲߫ ߖߟߊߡߊ߲߫ ߣߝߊ߬ߖߌ߫ ߛߍ߬ߓߍ߫ ߡߊ߰ߙߊ ߘߌ߫߸ ߟߍߙߘߊ߫ ߓߍ߲߬ߞߊߘߌ߫ ߜߙߋ߬ߡߊߕߍ߰ߓߊ߮، ߏ߬ ߞߵߊ߬ ߦߌ߬ߘߊ߬ ߞߏ߫ : <<ߞߊ߬ߙߊ߲߬ߝߊ߬ ߡߏߙߌ߫ ߞߡߊ߬ߙߊ߬߸ ߊ߲ ߞߊ߬ ߓߊ߯ߙߊ ߘߊߡߌ߬ߣߊ߬ ߞߊ߬ߓߌ߯ ߛߊ߲߭ ߂߀߁߅، ߊ߬ ߟߊ߫ ߣߊ߬ߟߌ ߘߏ߫ ߟߋ߬ ߞߍ߫ ߘߊ߫ ߞߐߣߊߞߙߌ߫߸ ߏ߬ ߞߵߊ߬ ߛߐ߬ߘߐ߲߬ ߊ߬ ߟߊ߫ ߞߝߊ߬ ߞߋߟߋ߲ߞߋߟߋ߲ ߠߎ߬ ߓߘߊ߫ ߟߊߞߏߟߐ߲ ߘߊߡߌ߬ߣߊ߫ ߡߊ߬ߟߌ ߟߊ߫، ߓߊ߬ߙߌ߬߸ ߖߌ߬ߣߍ߬ ߡߍ߲ ߦߴߊ߬ ߝߊ߬ߛߏ ߘߌ߫߸ ߊ߬ ߡߊߟߐ߲ߣߍ߲ߓߊ߫ ߕߍ߫ ߏ߬ ߞߣߐ߫، ߏ߬ ߘߐ߫߸ ߊ߲ ߞߵߊ߬ ߟߊߢߌߣߌ߲߫ ߊ߬ ߝߍ߬߸ ߒ ߞߏ߫ ߊ߬ ߦߋ߫ ߝߙߍ߬ ߞߍ߫߸ ߊ߬ ߦߴߊ߬ ߟߊ߫ ߞߊ߬ߝߊ ߘߏ߫ ߟߎ߫ ߟߊߣߵߊ߲ ߡߊ߬߸ ߛߊ߫ ߏ߬ ߘߌ߫ ߛߋ߫ ߟߊߓߐ߫ ߟߊ߫ ߖߌ߬ߣߍ߬ ߞߣߐ߫ ߦߊ߲߬߸ ߏ߬ ߦߋ߫ ߖߌ߬ߣߍ߬ߞߊ ߟߎ߬ ߟߊߛߐ߬ߘߐ߲߬߸ ߓߍ߯ ߦߋ߫ ߛߴߊ߬ ߞߎ߬ߘߋ߲ߜߊ߬ߛߌ߬ ߟߴߊ߬ ߟߊ߫ ߞߊ߬ߝߊ ߟߎ߬ ߘߐ߫ ߢߊ ߡߍ߲ ߡߊ߬، ߊߟߊ߫ ߝߣߊ߫ ߞߵߊ߬ ߞߍ߫߸ ߊ߬ ߟߊ߫ ߕߊ߯ߡߊ ߏ߬ ߟߊߘߏ߲߭ ߞߐ ߘߐ߫ ߡߊ߬ߟߌ ߟߊ߫߸ ߊ߬ ߞߊ߬ ߞߝߊ߬ ߓߟߏߟߊߛߓߍߟߌ߫ ߕߊ߲߫ ߠߊߣߵߊ߲ ߡߊ߬߸ ߞߏ߫ ߞߵߏ߬ ߟߊߕߟߋ߬ߓߊ߰ߦߊ߫߸ ߞߵߏ߬ ߓߌ߬ߟߊ߫ ߖߊ߬ߡߊ ߛߊ߬ߥߏ ߘߐ߫، ߏ߬ ߟߋ ߞߍ߫ ߘߴߊ߲ ߠߊ߫ ߓߊ߯ߙߊ ߘߊߡߌ߬ߣߊ߬ ߢߊ ߘߌ߫.>> ߛߍ߬ߓߍ߫ ߡߊ߰ߙߊ ߞߵߏ߬ ߦߌ߬ߘߊ߬.
ߊ߬ߟߋ ߟߋ߬ ߞߊ߬ߝߊ ߟߎ߫ ߣߊ߲߬ߝߟߏ߬ߦߊ߬ ߟߊ߫ ߞߵߊ߬ߟߎ߫ ߓߌ߬ߟߊ߬ ߟߐ߮ ߘߐ߫ ߖߊ߬ߡߊ ߛߊ߬ߥߏ߬ ߘߐ߫، ߞߊ߬ ߓߍ߲߬ ߓߊ߯ߙߊ ߞߍߢߊ ߡߊ߬߸ ߊ߬ ߞߵߊ߬ ߦߌ߬ߘߊ߬ ߞߏ߫ <<ߢߌߣߌ߲ߞߏ߫ ߘߐߞߣߍߣߍ߲߫ ߕߌ߯ ߝߌ߬ߟߊ ߓߊ߯ ߢߐ߲߯ߓߍ߲߬߸ ߊߟߎ߫ ߦߴߊߟߎ߫ ߟߊ߫ ߟߊ߬ߢߌߣߌ߲ ߠߊ߫ ߛߓߊ߬ߕߌ ߟߋ߬ ߝߟߐ߫ ߓߌ߬ߟߊ߬ ߟߊ߫ ߢߐ߲߯ ߝߍ߬ ߞߊ߬ ߕߊ߬ߡߌ߲߬ ߊ߬ ߣߕߊ߬ ߡߊ߬ߝߊ߲ ߞߊ߲߬. [...] ߊ߲ ߞߊ߬ ߟߊ߬ߢߌߣߌ߲ ߠߊ߫ ߛߓߊ߬ߕߌ ߟߋ߬ ߓߌ߬ߟߊ߬ ߢߍߝߍ߬.>> ߊ߬ ߞߵߏ߬ ߢߊߝߐ߫.
ߛߍ߬ߓߍ߫ ߡߊ߰ߙߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߟߊ߬ߢߌߣߌ߲ ߝߟߐߡߊ ߦߋ߫ ߡߍ߲ ߘߌ߫߸ ߏ߬ ߟߋ ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ߝߊ ߞߍ ߘߌ߫ <<ߞߊ߬ ߖߊ߬ߡߊ ߓߟߏߟߊߛߐ߬ߘߐ߲߬>> ߏ߬ ߟߋ ߖߍ߬ߘߍ ߞߵߊ߬ߟߎ߫ ߟߐ߬ ߛߎߞߏ ߣߌ߫ ߞߣߍߓߐ ߜߌ߬ߙߌ߲߬ߘߌ߬ ߞߏ߬ ߝߟߐ ߣߴߊ߬ ߝߌߟߊߣߊ߲ ߣߊ߲߬ߝߟߏ߬ߦߊ߬ ߟߊ߫߸ ߡߍ߲ ߥߊߣߍ߲߫ ߝߏ߯ ߘߟߊ߫ ߥߊ߯ ߓߌ߫ ߦߙߌߞߊ߫، ߞߊ߬ߕߎ߲߯߸ ߞߊ߬ߝߊ ߞߣߐߘߐ ߟߊߛߋ ߖߊ߬ߡߊ ߡߊ߬߸ ߏ߬ ߟߋ ߊ߬ߟߋ ߢߌߣߌ߲ߞߏ ߘߌ߫.
ߞߝߊ߬ ߦߙߌ߬ߞߊ߬ ߛߓߍ߬ ߞߏ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߖߐ߲߬ߡߊߛߌߣߌ߲ߟߐ߲߫ ߓߘߊ߫ ߘߏ߲߬ ߒߞߏߞߏ ߘߐ߬ߝߐ ߞߣߐ߫߸ ߞߊ߬ߞߎߘߊ ߗߍ߬ߓߊ߬ ߞߋߟߋ߲ ߠߎ߬ ߛߙߍߘߍ ߘߐ߫.
ߞߊ߬ߕߎ߲߯߸ ߓߊߛߓߊ߬ߕߌ߫ ߛߘߌ߬ߓߋ߬ ߡߍ߲ ߦߋ߫ ߒߞߏ ߘߏ߲߬ߖߟߎ߬ߡߊ߬ߘߊ ߛߍ߲ߓߊ߫ ߞߊ߲ߕߌ߮ ߘߌ߫߸ ߏ߬ ߞߊ߬ ߖߐ߲߬ߡߊߛߌߣߌ߲ߟߐ߲߫ ߠߊ߫ ߓߊ߯ߙߊ ߕߊ߲߬ߘߏ߫ ߟߋ߬߸ ߒߞߏ ߞߣߐ߫ ߟߐ߲ߠߌ߲ ߠߎ߬ ߝߊ߲߬ߞߊߘߏ߲߭ ߞߏߛߐ߲߬ ߊ߬ ߓߟߏ߫ ߞߝߊ߬ ߞߟߊߒߞߋ ߟߎ߬ ߟߊ߫߸ ߡߍ߲ ߠߎ߬ ߦߋ߫ ߓߍ߲߬ ߠߊ߫ ߞߝߊ߬ ߞߊ߬ߙߊ߲߬ߠߊ ߟߎ߫ ߞߎ߲߬ߕߋߟߋ߲ ߡߊ߬.
ߊ߬ ߓߊ߲߫ ߘߊ߫ ߞߵߊ߬ ߦߌ߬ߘߊ߬ ߞߏ߫ ߓߐ߲ߛߐ߲߫ ߣߊ߬ߕߐ ߟߎ߬ ߘߌ߫ ߕߣߐ߬ ߜߘߍ߫ ߦߋ߫ ߖߐ߲߬ߡߊߛߌߣߌ߲ߟߐ߲߫ ߠߊ߫ ߓߌ߬ ߛߓߍߟߌ ߟߊ߫߸ ߓߌ߬ ߕߟߋ ߘߏ߲߬ߞߏ ߟߎ߬ ߡߊ߫ ߡߍ߲ ߢߐ߲߰ ߦߴߊ߬ ߟߊ߫، ߊ߬ ߞߊ߬ ߞߏߓߊ ߘߏ߫ ߝߐ߫ ߖߐ߲߬ߡߊߛߌߣߌ߲ߟߐ߲߫ ߠߊ߫ ߞߝߊ߬ ߛߓߍ ߞߊ߲߬: <<ߊ߬ ߟߊ߫ ߞߝߊ߬ ߛߓߍߣߍ߲ ߠߎ߬ ߦߋ߫ ߢߊߦߋ߫ ߟߊ߫ ߣߐ߰ߦߊ ߘߐ߫، ߌ ߞߵߊ߬ ߟߐ߲߫߸ ߞߝߊ߬ ߛߓߍ ߝߣߊ߫ ߕߴߊ߬ ߟߊ߫߸ ߓߊ߬ߙߌ߬ ߣߴߌ ߦߋ߫ ߞߊ߬ߝߊ ߛߓߍ߫ ߟߊ߫ ߞߊ߬ ߓߍ߲߬ ߡߐ߱ ߟߎ߫ ߟߌ߬ߤߟߊ ߡߊ߬߸ ߊ߬ ߛߌߦߊߡߊ߲ ߘߐ߫߸ ߊ߬ߟߎ߬ ߘߌ߫ ߛߋ߫ ߞߵߌ ߟߊ߫ ߟߊ߬ߢߌߣߌ߲ ߢߊߦߋ߫ ߊ߬ ߘߐ߫.>> ߊ߬ ߞߵߊ߬ ߦߌ߬ߘߊ߬ ߞߏ߫ ߓߏ߲߬ߓߊ߫ ߟߵߏ߬ ߘߌ߫ ߖߐ߲߬ߡߊߛߌߣߌ߲ߟߐ߲߫ ߠߊ߫ ߞߏ ߘߐ߫.
ߊ߬ ߓߊ߲߫ ߘߊ߫ ߞߵߊ߬ ߟߴߊ߬ ߞߊ߲߬߸ ߞߏ߫ <<ߞߊ߬ߙߊ߲߬ߝߊ ߟߊ߫ ߓߊ߯ߙߊ ߕߐ߬ߣߐ ߓߏ߲߬ߓߊ߬ ߒߞߏ ߞߊ߲߬ ߞߏߛߓߍ߫، [...] ߞߊ߬ߙߊ߲߬ߝߊ ߦߴߊ߬ ߕߏ߫ ߟߴߊ߬ ߓߘߊ߸ ߞߊ߬ ߡߐ߱ ߥߊ߯ ߦߙߌߞߊ߫ ߟߋ߬ ߞߊ߬ߙߊ߲߬ ߊ߬ߟߎ߫ ߘߌ߲߬ߞߌߙߊ ߟߎ߬ ߘߐ߫، ߏ߬ ߞߏߛߐ߲߬߸ ߊ߬ ߦߋ߫ ߛߓߍߟߌ ߡߍ߲ ߞߍ߫ ߟߊ߫ ߏ߬ ߘߌ߫߸ ߏ߬ ߦߋ߫ ߞߏߓߊ߫ ߟߋ߬ ߢߊ߬ ߟߊ߫ ߒߞߏ ߞߏ ߡߊ߬߸ ߡߍ߲ ߕߐ߬ߣߐ ߞߊ߫ ߓߏ߲߬ߓߊ ߦߋ߫.>> ߊ߬ ߞߵߏ߬ ߝߣߊ߫ ߦߌ߬ߘߊ߬، ߞߵߊ߬ ߟߴߊ߬ ߞߊ߲߬ ߞߏ߫ <<ߌ ߓߊ߯ ߓߊ߯ߙߊ߫ ߛߌ߫ ߥߓߊ߬ߞߏ߬ ߞߍ߫߸ ߏ߬ ߓߍ߯ ߕߍ߫ ߞߍ߫ ߟߊ߫ ߝߏ߬ߝߏ߬ ߘߌ߫.>>
ߞߏ߫ ߕߍ߫ ߞߍ߫ ߣߌ߫ ߞߎ߲߬ ߕߴߊ߬ ߟߊ߫߸ ߞߊ߬ߙߊ߲߬ߝߊ ߟߊ߫ ߞߝߊ߬ ߛߌ߬ߦߊ߬ߡߊ߲߬ ߛߓߍ ߡߍ߲ ߓߍ߯ ߦߋ߫ ߕߋ߲߬߸ ߊ߬ ߟߊ߫ ߘߋ߲ߓߦߊ ߝߣߊ߫ ߕߊ߫ ߦߴߊ߬ ߘߐ߫.
ߞߊ߬ߕߎ߲߯߸ ߊ߬ ߟߊ߫ ߓߐ߬ߟߐ߲߬ߞߊ߬ ߛߓߊߣߊ߲ ߛߌߙߋ߬ ߓߊߥߊ߬ߞߊߟߌ߫ ߞߊ߬ߓߊ ߦߴߊ߬ ߟߊ߫ ߓߊ߯ߙߓߊ ߟߎ߫ ߞߊ߬ߟߊߡߊ߬߸ ߊ߬ ߣߴߊ߬ ߟߊ߫ ߕߌߙߌ߲ߠߌ߲ ߣߴߊ߬ ߟߊ߫ ߛߓߍߟߌߓߊ.
ߊ߬ߟߋ ߖߍ߬ߘߍ ߦߋ߫ ߞߏߟߐ߲ߠߊ߫ ߘߌ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߘߎ߰ߙߋ߲ ߠߎ߬ ߞߵߊ߬ ߟߐ߲߫، ߞߊ߬ߕߎ߲߯߸ ߝߟߐ߫ ߣߌ߫ ߓߌ߬ ߘߐ߫߸ ߊ߬ߟߎ߬ ߦߴߊ߬ߟߎ߬ ߛߋߞߏ ߞߍ߫ ߟߴߊ߬ߟߎ߬ ߝߘߎߡߊ ߟߊ߫ ߢߍߥߟߊ ߟߎ߬ ߟߊ߫ ߛߎߘߊ߲ ߘߐ߫، ߤߊߟߌ߬ ߣߴߊ߬ ߛߐ߬ߘߐ߲߬ ߘߊ߫ ߞߏ ߟߎ߬ ߕߴߏ߬ ߓߍ߯ ߦߋ߫ ߟߊ߫، ߊ߬ ߟߊ߫ ߞߎߡߊ߫ ߞߋߟߋ߲߫ ߠߋ߬ ߞߊ߬ ߓߍ߯ ߢߊߞߘߐߛߋ߫߸ ߏ߬ ߟߋ ߖߊ߬ߡߊ ߤߊߡߌ߲ ߦߊ߬ߙߊ ߘߌ߫، ߓߊߏ߬߸ ߊ߬ ߦߋ߫ ߡߐ߱ ߝߊ߲߬ߓߊ ߢߣߊ߫ ߟߋ߬ ߞߏ߫ ߞߊ߬ߙߊ߲߬ߝߊ ߟߊ߫ ߕߌߙߌ߲ߠߌ߲ ߞߏߛߐ߲߬߸ ߊ߬ ߕߍ߫ ߛߋ߫ ߟߴߊ߬ ߟߊ߫ ߞߐߙߍ ߡߝߊ߫ ߟߊ߫، ߓߊߥߊ߬ߞߊߟߌ߫ ߞߵߏ߬ ߖߋ߬ߓߌ߬ ߦߟߌߡߊߟߐ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߡߐ߱ ߟߎ߫ ߟߌ߬ߤߟߊ ߕߍ߫ ߞߋߟߋ߲߫ ߘߌ߫، ߏ߬ ߞߏߛߐ߲߬߸ ߊ߬ߟߋ ߕߊ߫ ߖߊ߬ߕߋ߬ ߘߐ߫߸ <<ߞߊ߬ߣߍ߲ ߖߍ߬ߘߍ ߞߣߐ߫߸ ߡߛߏ߬ ߞߏߟߐ߲ߠߊ ߟߎ߫ ߡߊ߬ߞߏ߬ ߕߍ߫߸ ߞߵߊ߬ ߝߐ߫ ߞߏ߫ ߘߌߦߊߜߏߦߊ ߟߋ߬߸ ߌ ߣߴߊ߲ ߧߋ߫ ߞߍ߫ ߢߐ߲߮ ߝߍ߬ ߕߎ߬ߡߊ ߓߍ߯، ߞߏ߬ߣߌ߲߬߸ ߞߊ߬ߣߎ߲ ߡߊ߬ߞߏ ߦߋ߫ ߦߟߌߟߊߕߍ߮ ߟߋ߬ ߟߊ߫ ߞߊ߬ ߕߊ߬ߡߌ߲߬ ߘߎߢߊ߫ ߞߏ߫ ߛߌߦߊߡߊ߲߫ ߞߊ߲߬، [...] ߣߌ߫ ߦߟߌߟߊߕߍ߮ ߏ߬ ߓߊ߲߫ ߘߊ߫ ߛߐ߬ߘߐ߲߬ ߠߊ߫߸ ߞߊ߬ ߓߊ߲߫ ߞߵߊ߬ ߞߊ߬ߣߎ߲ ߣߴߊ߬ ߘߌߦߊߢߍ ߦߴߌ ߓߟߏ߫߸ ߤߊߟߵߌ ߓߊ߯ ߡߌ߬ߛߍ߲߬ ߞߋߟߋ߲߫ ߠߋ߬ ߘߴߏ߬ ߡߊ߬߸ ߊ߬ ߘߴߊ߬ ߓߐ߫، ߏ߬ ߘߌ߫ ߞߍ߫ ߊ߬ ߓߟߏ߫ ߡߐ߰ ߜߘߍ ߟߎ߬ ߟߊ߫ ߕߎ߬ߡߊ߬ߙߋ߲߬ ߥߊ߯ ߞߋߟߋ߲߫ ߘߌ߫.>> ߊ߬ ߞߵߏ߬ ߝߐ߫.
ߛߎߞߏ ߣߌ߫ ߞߣߍߓߐ ߞߎ߲߬ߠߊ߬ߓߐ ߞߍ߫ ߘߊ߫ ߥߎ߬ߘߊ߲ ߠߋ߬ ߘߌ߫߸ ߓߐߒߝߘߎߘߐ߫ ߛߌߦߊߡߊ߲߫ ߞߍ߫ ߘߊ߫ ߡߍ߲ ߘߐ߫، ߞߊ߬ߕߎ߲߯߸ ߡߏ߬ߤߊ߬ߡߍߘ ߘߎ߲ߓߎߦߊ߫ ߡߍ߲ ߞߊ߲߬ߕߐ߮ ߦߋ߫ ߥߊߙߊ߲߫ ߖߌߣߊ ߘߌ߫߸ ߏ߬ ߞߊ߬ ߞߐ߲߬ߛߏ߬ ߞߋߟߋ߲߫ ߞߙߍߞߙߍ߫ ߞߵߊ߬ ߘߌ߫ ߘߐ߬ߝߐ ߞߣߐ߫ ߞߟߊ߬ߘߏ߲ߛߏ ߟߎ߬ ߘߐ߫ ߓߏ߲߬ߓߊ ߡߊ߬߸ ߞߏ߫ ߥߙߎߘߎ߫ ߡߏߙߌ߫ ߦߴߊ߬ ߟߊ߫ ߓߊߛߌ ߟߎ߬ ߡߊߘߏ߬ߣߌ߲߫ ߏ߬ ߞߣߐ߫، ߏ߬ ߞߐ߲߬ߛߏ߬ ߢߌ߲ ߠߊߕߊ߬ߡߌ߲߬ ߘߊ߫ ߝߏ߮ ߞߣߐ߫ ߓߏ߲߬ߧߊ ߣߌ߫ ߜߟߌߦߊ ߞߣߐ߫.
ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߋ ߟߊ߫߸ ߗߍ߬ߣߌ߬ߡߛߏ߬ߦߊ ߢߊߟߐ߲߫ ߖߏߣߊ ߛߌ߲ߘߌߓߊ߮ ߡߎߛߊ߫ ߝߊ߬ߞߏߟߌ߫ ߞߙߏ߬ߡߊ߬ ߝߣߊ߫ ߞߊ߬ ߛߙߋߓߍ߫ ߞߟߊߒߞߋ߫ ߘߌ߫ ߞߊ߬ߙߊ߲߬ߝߊ ߡߊ߬ ߜߙߊ߬ ߘߊߞߎ߲ ߢߌ߲߬ ߘߐ߫߸ ߞߵߏ߬ ߞߍ߫ ߊ߬ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߞߐ߲ߘߐ߲ ߘߌ߫ ߘߍ߭ ߟߊߥߙߎߞߌ ߟߐ߲ߠߌ߲ ߘߐ߫.
ߘߍ߬ߡߍ߲߬ߠߌ߲߬ ߜߘߍ߫ ߝߣߊ߫ ߞߎ߲߬ߛߌ߲߬ ߘߊ߫ ߞߊ߬ߙߊ߲߬ߝߊ ߟߊ߫ ߞߣߍ߫ ߞߋߟߋ߲ ߢߌ߲߬ ߞߊ߲߬߸ ߘߊ߲߬ߞߊ߬ ߡߎߛߊ߫ ߡߊ߰ߛߎߓߊ߫ ߡߍ߲ ߞߍ߫ ߘߊ߫ ߖߊ߲߬ߖߏ߲ ߝߊ߬ ߘߌ߫߸ ߏ߬ ߓߊ߲ ߞߐ ߣߛߌ߬ ߞߋߟߋ߲߫ ߣߌ߫ ߞߋ߲߬ߥߟߎ߫ ߉ ߞߍ߫ ߟߊ߫ ߛߌ߲߬ߝߏ߲߬ߧߊ߬ߟߌ ߟߊ߫ ߛߎߘߊ߲ ߘߌ߫߸ ߊ߬ ߞߊ߬ ߘߎ߰ߕߍ߬ߟߍ߲߬ ߞߋߟߋ߲߫ ߘߌ߫ ߛߓߍߟߌ߫ ߡߏߙߌ߫ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߵߊ߬ߟߋ ߞߐߡߊߓߌ߲ߓߌ߲߫ ߠߋ߬߸ ߓߊߏ߬ ߊ߬ ߦߋ߫ ߖߊ߬ߡߊ ߟߊ߫ ߓߊ߯ߙߊ ߟߋ߬ ߞߊ߲߬.
ߞߣߍ ߣߌ߲߬ ߞߊ߲߬߸ ߞߝߊ߬ ߕߊ߲ ߞߎ߲߬ߠߊ߬ߓߐ ߞߍ߫ ߘߊ߫ ߞߎ߲߬ߠߊ߬ߦߋߙߋ߲ ߠߋ߬ ߘߌ߫߸ ߓߍ߯ ߟߊߘߍ߬ߣߍ߲ ߞߊ߬ ߖߊ߲߬ߖߏ߲ ߘߊߡߌ߬ߣߊ߬ ߝߏ߫ ߞߵߊ߬ ߓߊ߲߫߸ ߝߏ߮ ߝߊߣߍ߲߫ ߞߵߊ߬ ߘߡߊߛߙߊߓߊ ߟߊ߫߸ ߥߐ߬ߦߐ߫ ߘߏ߲߬ ߡߊ߫ ߞߍ߫߸ ߞߎߡߊߕߍ߫ ߓߌ߬ߟߊ߬ߒ߬ߘߐ߬ ߜߘߍ߫ ߡߊ߬.
ߞߵߊ߬ ߕߊ߬ ߛߌ߯ߙߌ߲߫ ߘߋ߲ߡߌߛߍ߲ ߓߏ߲ߓߊ ߞߎ߲߭ ߡߊ߬ ߝߏ߫ ߊ߬ ߖߎ߬ߕߏ߲߸ ߊ߬ ߓߍ߯ ߟߋ߬ ߝߊ߫ ߘߊ߫߸ ߛߌ߲߬ߝߏ߲߬ߧߊ߬ߟߌ ߛߎߘߊ߲߫ ߘߊ߫ ߢߊ߫ ߡߊ߬߸ ߡߍ߲ ߢߐ߲߰ ߕߎ߲߬ ߓߘߊ߫ ߝߡߊ߬ ߞߍ߫ ߟߊ߫ ߛߌ߯ߙߌ߲߫، ߤߊߟߌ߬ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߊ߬ ߛߌ߲߬ߝߏ߲߬ߧߊ߬ߟߌ߬ߟߊ ߟߎ߬ ߡߊ߫ ߝߋ߲߫ ߝߐ߫ ߊ߲ ߠߊ߫ ߞߎߡߊߓߘߎ ߟߊ߫߸ ߛߴߊ߲ ߕߎ߲߬ ߘߴߊ߬ߟߎ߬ ߡߙߌߦߊ ߛߐ߬ߘߐ߲߬.
ߝߊ߯ߘߐߞߍ ߞߝߊ߬ ߞߎ߲߬ߠߊ߬ߓߐ ߟߋ߬ ߞߍ߫ ߘߊ߫ ߛߌ߯ߙߌ߲߫، ߓߊߏ߬߸ ߞߏ ߡߍ߲ ߢߐ߲߰ ߕߎ߲߬ ߡߊ߫ ߡߍ߲߫ ߡߎߣߎ߲߬ ߛߓߍߟߌߟߊ ߟߎ߫ ߣߐ߬ ߘߐ߫߸ ߏ߬ ߟߋ ߡߍ߲߫ ߘߊ߫ ߣߌ߲߬ ߟߏ߲߸ ߣߴߏ߬ ߦߋ߫ ߞߟߊ߬ߘߏ߲ߛߏ ߞߍ ߘߌ߫ ߞߵߊ߬ ߟߊ߫ ߞߊ߬ߝߊ ߟߎ߬ ߖߞߊ ߓߐ߫߸ ߦߏ߫ ߛߌ߬ߟߡߊ߬ߦߊ ߞߊ߬ ߖߞߊ߫ ߞߏ ߝߐ߫ ߢߊ ߡߍ߲ ߡߊ߬، ߊ߬ ߞߵߏ߬ ߞߍ߫ ߞߝߊ߬ ߛߓߍߦߊߣߍ߲߫ ߞߋߟߋ߲߫ ߠߋ߬ ߘߌ߫߸ ߞߏ߫ ߊߟߊ߫ ߕߐ߮ ߓߊߛߌߦߊ߸ ߞߵߏ߬ ߘߐߕߟߊ߫ ߕߘߍ߬ߒ߬ߘߐ߬ߓߊ߮ ߛߌߦߊߡߊ߲߫ ߕߍ߫، ߏ߬ ߘߐ߫߸ ߘߐ߬ߝߐ ߞߵߏ߬ ߟߊߞߊ߬ߟߌ߫ ߣߌ߲߬ ߟߏ߲߸ ߞߏ߫ ߞߊ߬ߝߊ ߖߞߊ ߓߐ߫ ߞߏ߫ ߝߟߐ ߞߍ߫ ߘߊ߫ ߛߌ߯ߙߌ߲߫ ߠߋ߬߸ ߞߝߊ߬ ߕߊ߲ ߞߎ߲߬ߠߊ߬ߓߐ ߝߍ߬ ߛߓߍߟߌ߫ ߡߏߙߌ߫ ߓߟߏ߫.
ߊ߬ ߘߏ߲߬ ߞߊ߫ ߥߊ߬ߙߊ߫ ߡߐ߰ ߡߊ߬߸ ߞߊ߬ߝߊ߫ ߂߄߃ ߟߋ߬ ߛߓߍߦߊߣߍ߲߫ ߞߟߊ߬ߘߏ߲ߛߏ ߓߟߏ߫߸ ߞߊ߬ ߓߊ߲߫ ߞߊ߬ ߞߝߊ߬ ߕߊ߲߫ ߞߎ߲߬ߠߊ߬ߓߐ߬ ߟߏ߲߫ ߞߋߟߋ߲߫، ߞߊ߬ߝߊ ߘߏ߫ ߦߴߊ߬ ߟߊ߫ ߞߊ߬ߝߊ ߟߎ߬ ߘߐ߫߸ ߏ߬ ߦߋ߫ ߞߐߜߍ߫ ߥߊ߯ ߝߌ߬ߟߊ߬ ߣߌ߫ ߞߐ߫ ߟߋ߬ ߘߌ߫.
ߞߊ߬ߙߊ߲߬ߝߊ߬ ߡߏߙߌ ߞߵߊ߬ ߦߌ߬ߘߊ߬ ߞߏ߫ ߊ߬ ߛߍߥߊߣߍ߲߫ ߠߋ߬ ߞߊ߬ ߢߊ߯ߟߋ߲߫߸ ߞߵߏ߬ ߞߎ߲߭ ߞߍ߫ ߞߝߊ߬ ߞߎ߲߬ߠߊ߬ߓߐ ߞߍ ߘߴߊ߬ ߓߟߏ߫ ߦߏ߫ ߤߖߌ߫߸ ߥߟߊ߫ ߛߊߟߌߞߣߍ߫، ߊ߬ ߟߊ߫ ߞߎߡߊ߫ ߟߊߓߊ߲ ߞߍ߫ ߘߊ߫ ߡߍ߲ ߘߌ߫ ߘߐߙߐ߲߫߸ <<ߞߏ߫ ߜߘߍ߫ ߟߎ߫ ߦߋ߫ ߛߋ߲߬ߠߊ߫߸ ߞߏ ߓߍ߯ ߟߋ߬ ߘߏ߲߬ ߝߣߊ߫ ߦߋ߫ ߛߋ߲߬ߠߊ߫.>>
