ߞߎ߲߬ߠߊ߬ߛߌ߮ ߓߍ߯
ߞߍߞߎߘߊߡߐ߱ ߥߊ߯ ߦߙߌߞߊ߫ ߟߋ߬ ߓߐ߫ ߘߊ߫ ߓߌߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߞߏߘߓߌ ߕߟߋ߬ ߃߀ ߡߊ߬ ߓߡߊ߬ߞߐ߬ ߞߣߐ߫߸ ߞߊ߬ ߛߐ߬ߘߐ߲߬ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߛߊ߯ߖߐ߬ ߞߡߊ߬ߙߊ߬ ߓߊߘߍ߫ ߓߟߋߓߟߋ ߘߐ߫. ߊ߬ߟߋ ߦߋ߫ ߡߊ߬ߟߌ ߘߐ߬ߕߊߡߌ߲ ߣߌߞߎ߲ ߘߏ߫ ߟߋ߬ ߘߌ߫߸ ߊ߬ ߝߊ߰ ߘߊ߫ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߡߙߊ߬ߒ߬ߡߊ߬ߟߌ ߘߏ߫ ߟߋ߬ ߘߐ߫߸ ߞߐ߲߬ߛߏ߬ ߜߛߏߡߊ ߟߊ߫ ߡߙߊ߬ߒ߬ߡߊ߬ߟߌ ߘߐ߫ ߞߊ߬ߕߌ߬߸ ߊ߬ߟߋ ߣߴߊ߬ ߡߏ߬ߛߏ ߣߴߊ߬ ߘߋ߲ߣߍ߲߫ ߡߐ߰ ߝߌ߬ߟߊ߬߸ ߏ߬ ߟߎ߬ ߓߍ߯ ߣߌ ߕߏ߫ ߘߴߊ߬ ߘߐ߫.
ߞߍߞߎߘߊߡߊ߬ߟߌ ߘߐ߬ߕߊߡߌ߲ ߞߊ߲ߕߌ߮ ߞߟߍ߬ߕߌ߰ ߊߛߡߌ߫ ߜ߭ߏ߬ߦߌ߬ߕߊ߬ ߞߎߡߊ߫ ߘߊ߫ ߖߡߊ߬ߣߊ߬ߘߋ߲ ߠߎ߬ ߝߍ߬ ߞߏ߲ߞߏߘߓߌ ߕߋ߬ߟߋ߫ ߂߈ ߣߌ߲߬ ߡߊ߬߸ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߡߙߊ߬ߒ߬ߡߊ߬ߟߌ߬ ߛߌߦߊߡߊ߲ ߞߐ ߘߐ߫ ߖߡߊ߬ߣߊ ߝߊ߲߬ ߛߌߦߊߡߊ߲߫ ߠߎ߫ ߝߍ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߗߍ߬ߘߋ߲ ߠߎ߬ ߓߘߊ߫ ߛߋ߫ ߞߏ ߟߎ߬ ߡߊߣߐ߬ ߟߊ߫.
ߞߍߞߎߘߊߊߛߡߌ߫ ߜ߭ߏ߬ߦߌ߬ߕߊ߫ ߞߊ߬ ߛߙߊ߬ߣߎ߲ ߡߍ߲ ߞߍ߫ ߝߊ߬ߛߏ ߖߌ߬ߦߊ߬ߞߊ߲߬ߛߏ߬ߓߊ ߟߊ߫߸ ߊ߬ ߟߊ߫ ߓߋߟߋ߲ߠߊ ߏ߬ ߕߏ߲ߘߋ߫ ߘߊ߲ߘߐ߫ ߝߟߍ߫߸ ߡߐ߰ ߘߴߊ߬ ߦߟߌߕߏ߫ ߡߍ߲ ߘߐ߫.
ߕߍߓߊ߯ߦߊߡߊ߬ߟߌ ߘߐ߬ߕߊߡߌ߲ ߞߊ߲ߕߌ߮߸ ߞߟߍ߬ߕߌ߰ ߊߛߡߌ߫ ߜ߭ߏ߬ߦߌ߬ߕߊ߬ ߓߘߊ߫ ߦߋ߫ ߓߡߊ߬ߞߐ߬ ߞߣߐ߫ ߞߐ߬ߟߏ߲ ߣߌ߲߬ ߡߊ߬߸ ߊ߬ ߣߌ߫ ߙߎ߬ߛߌ߫ ߟߊ߬ߛߌ߰ߘߋ߲ ߠߊ߫ ߞߎߡߊߢߐ߲߯ߦߊ ߘߏ߫ ߛߋ߲߭ߝߍ߬، ߊߛߡߌ߫ ߖߌ߬ߦߊ߬ߓߍ ߦߋ ߣߌ߲߬ ߢߊ߸ ߏ߬ ߛߋ߲߬ߢߊ߬ ߝߟߐߝߟߐ ߟߋ߬ ߕߋ߲߬ ߞߊ߬ߦߌ߯ ߞߏ߲ߞߏߘߓߌ ߂߅ ߡߙߊ߬ߒ߬ߡߊ߬ߟߌ ߞߍ߫ ߘߊ߫، ߏ߬ ߡߍ߲ ߥߎ߬ߣߎ߲߬ߥߎ߬ߣߎ߲߬ ߞߎߡߊ ߕߎ߲߬ ߓߘߊ߫ ߘߙߎ߬߸ ߞߏ߫ ߊ߬ ߓߘߴߊ߬ ߢߡߊߘߏ߲߰.
ߟߊ߬ߞߊ߲߬ߘߊ߬ߟߌߡߊ߬ߟߌ ߞߎ߲߬ߠߊ߬ߛߌ߮ ߓߘߴߊ߬ ߟߊߛߋ߫߸ ߞߏ߫ ߡߊ߬ߞߊ߲߬ߞߊ߲߬ߠߌ߲ ߞߏߕߌ߮ ߛߊ߯ߖߐ߬ ߞߡߊ߬ߙߊ߬ ߓߘߊ߫ ߕߏ߫ ߞߟߊߘߊ ߘߐ߫߸ ߊ߬ߟߋ ߡߍ߲ ߖߐߞߌ߫ ߘߊ߫ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߡߙߊ߬ߒ߬ߡߊ߬ߟߌ ߛߋ߲߭ߝߍ߬ ߊ߬ ߡߊߞߍ߫ ߦߌߟߊ ߘߐ߫ ߞߊ߬ߕߌ߬، ߊ߬ ߦߋ߫ ߡߊ߬ߟߌ ߘߐ߬ߕߊߡߌ߲ ߡߐ߰ߘߐ߬ߜߍ ߟߋ߬ ߘߌ߫߸ ߏ߬ ߟߋ ߞߏߛߐ߲߬ ߖߡߊ߬ߣߊ ߓߍߣߵߊ߬ ߛߎ߬ߞߏ߬ߦߊ ߞߍ߫ ߖߌ߲ߘߊ߲ߓߊ߫ ߘߐ߫߸ ߏ߬ ߡߍ߲ ߟߏ߲ ߓߍߣߊ߬ ߟߊߕߍ߰ ߊ߬ ߕߊ߫ ߟߊ߬ߛߋ߬ߟߌ߬ ߜߘߍ߫ ߘߐ߫.
ߓߊ߲ߓߋߡߐߣߍ߫ ߞߌߛߍ ߟߋ߬ ߘߏ߲߬ߣߍ߲߫ ߡߊ߬ߟߌ ߘߐ߫ ߝߊ߬ߙߊ߲߬ߛߌ߫ ߝߐ߰ߓߍ߬ߘߊ ߘߏ߫ ߓߟߏ߫ ߞߏ߲ߞߏߘߓߌ ߕߋ߬ߟߋ߫ ߂߅ ߣߌ߲߬ ߡߊ߬߸ ߣߴߏ߬ ߦߴߊ߬ ߝߐ ߘߌ߫ ߞߏ߫ ߊߛߡߌ߫ ߜ߭ߏ߬ߦߌ߬ߕߊ߬ ߞߊ߫ ߞߊ߲߫ ߞߊ߬ ߦߊ߬ߝߊ ߟߋ߬ ߕߙߊ߫ ߝߊ߬ߙߊ߲߬ߛߌ߫ ߝߍ߬، ߓߊߏ߬߸ ߝߊ߬ߙߊ߲߬ߛߌ߬ ߞߋߟߋ߲߫ ߠߋ߬ ߖߡߊ߬ߣߊ߬ ߘߌ߫߸ ߡߍ߲ ߘߌ߫ ߛߋ߫ ߡߊ߬ߟߌ ߕߟߊ߫ ߟߊ߫ ߓߊ߰ߓߊ߰ߟߌ߬ߟߊ ߟߎ߬ ߟߊ߫ ߖߐ߬ߥߏ ߟߊ߫، ߞߎߡߊ ߣߌ߲߬ ߦߋ߫ ߥߙߎߣߍߦߊ ߛߌߟߊ߫ ߞߎߘߊ߫ ߟߋ߬ ߘߌ߫߸ ߡߍ߲ ߦߋ߫ ߝߘߊ߬ߝߌ߲߬ߠߊ߫ ߟߊ߲߬ߓߋ ߟߊߜߊ߬ߛߌ߬ ߞߏ ߘߌ߫.
ߞߍߞߎߘߊߡߊ߬ߟߌ ߓߘߊ߫ ߝߊ߬ߙߊ߲߬ߛߌ߬ߞߊ ߘߏ߫ ߟߎ߫ ߣߌ߫ ߞߟߍ߬ߕߌ߯ ߝߌ߬ߟߊ߫ ߡߌ߬ߘߊ߬ ߞߏ ߝߐ߫߸ ߊ߬ ߣߌ߫ ߣߊ߲߬ߒ߬ߕߊ߲ ߘߏ߫ ߟߎ߫߸ ߡߍ߲ ߠ߬ߎ ߡߊߝߌ߲߬ߣߍ߲߬ ߞߏ߫ ߊ߬ߟߎ߫ ߕߍ߬ߘߍ߫ ߊ߬ ߝߍ߬ ߞߊ߬ ߓߊߛߌ߯ߓߊߟߌߦߊ ߟߊߘߏ߲߬ ߡߊ߬ߟߌ ߟߊ߫.
