ߖߌ߬ߣߍ߫ ߞߵߊ߬ ߢߣߊߕߊ߬ ߞߎߣߎ߲߬ ߞߊ߯ߙߌ ߡߊ߬ ߞߊ߲ߕߌ߯ ߞߋߟߋ߲߫ ߛߎߥߊ߲ߘߌ߫ ߞߊ߲ߡߊ߬߸ ߓߍ߯ ߟߊߘߍ߬ߣߍ߲ ߞߊ߬ ߢߣߊߕߊߟߌ ߡߍ߲ ߦߋ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊߛߌ߰ ߢߣߊߕߊߟߌ ߘߌ߫߸ ߊ߬ߟߋ ߡߍ߲ ߣߊ߬ ߘߊ߫ ߖߡߊ߬ߣߊ ߞߎ߲߬ߠߊ߫ ߝߊ߲߬ߞߊ ߟߊ߫ ߞߊ߬ߝߏ߬ ߖߊߛߏ߲ ߛߘߊ߫ ߘߐ߫ ߂߀߂߁ ߠߊ.
ߖߌ߬ߣߍ߬ߞߊ ߟߎ߬ ߕߊ߯ ߘߊ߫ ߢߣߊߕߊߟߌ߫ ߖߛߊ ߟߋ߬ ߞߣߐ߫ ߞߊ߲ߕߌ߮ ߛߎߥߊ߲ߘߌ߫ ߞߊ߲ߡߊ߬ ߞߊ߯ߙߌߟߏ߲߸ ߏ߬ ߡߍ߲ ߞߍߕߐ߫ ߘߐ߬ߕߊ߬ߡߌ߲߬ ߞߏ߬ ߞߎߡߊ ߓߊ߲ߣߍ߲ ߘߌ߫߸ ߞߊ߬ ߖߡߊ߬ߣߊ ߓߌ߬ߟߊ߫ ߣߊ߲߬ߒ߬ߕߊ߲ ߠߎ߬ ߕߊ߫ ߓߟߏ߫ ߞߊ߲߬، ߟߊ߬ߞߙߐ߬ߛߟߌ߬ߟߊ ߟߎ߬ ߟߊ߫ ߝߐߟߌ߫ ߘߐ߫߸ ߊ߬ ߣߌ߫ ߛߙߋ ߡߍ߲ ߠߎ߬ ߛߋ߫ ߘߊ߫ ߢߌ߬ߣߌ߲߬ߞߊ߬ ߟߊ߫ ߒ߬ ߓߟߏ߫߸ ߏ߬ ߟߎ߫ ߞߵߊ߬ ߦߌ߬ߘߊ߫ ߟߋ߬߸ ߞߏ߫ ߛߎߥߊ߲ߘߟߌ ߡߍ߲߬ ߠߊߥߟߌ߬ߣߍ߲߫ ߛߋߓߊ߯ߦߊ ߟߊߕߊ߬ߡߌ߲ ߠߋ߬ ߡߊ߬ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬߸ ߏ߬ ߡߍ߲ ߕߎ߲߬ ߦߋ߫ ߝߊ߲߬ߞߊ߬ ߓߟߏߡߊߞߊ߬ߣߍ߲ ߠߎ߬ ߟߊ߫ ߞߎ߲߬ߕߌ߮ ߘߌ߫، ߊ߬ ߓߍߣߊ߬ ߛߊ߲߬ ߥߐߙߐ߲ߝߌ߬ߟߊ߫ ߟߋ߬ ߞߍ߫ ߟߐ߬ߒ߬ߞߋ߬ߟߊ߬ ߞߋߟߋ߲ ߞߎ߲߬ߠߊ߫.
ߡߊ߬ߡߌ߬ߘߊ߬ߟߌ߬ߟߊ߬ ߛߋߦߌ߲߫ ߜߘߍ߫ ߓߍ߫߸ ߏ߬ ߟߎ߬ ߕߐ߮ ߦߋ߫ ߛߙߍߘߍ ߘߐ߫߸ ߝߊ߲߬ߞߡߊ߬ ߛߌ߫ ߘߏ߲߬ ߕߴߏ߬ ߟߎ߬ ߘߐ߫߸ ߡߍ߲ ߘߌ߫ ߛߋ߫ ߘߎ߲߬ߓߎߦߊ߬ ߜߍ߬ߟߍ߲߬ߞߘߎ ߟߊ߫، ߞߊ߲ߕߌ߯ ߞߘߐ ߊߟߌߝߊ߫ ߞߐ߲ߘߍ߫ ߓߊ߬߸ ߊ߬ ߣߌ߫ ߖߡߊ߬ߣߊ ߝߊ߲߬ߞߊߛߌ߬ߣߊ ߛߋߟߎ߫ ߘߊߟߍ߲߬ ߖߊߟߏ߫߸ ߏ߬ ߟߎ߬ ߓߍ߯ ߦߋ߫ ߢߊߣߌ߲ߡߊߓߏߙߌ ߘߐ߫ ߕߎ߲ߞߊ߲ ߠߊ߫، ߖߌ߬ߣߍ߬ ߞߎߓߋߘߊ ߞߣߐ߫ ߞߐߣߊߞߙߌ߫߸ ߊ߬ ߣߌ߫ ߞߣߐߟߊ ߟߎ߬ ߘߐ߫߸ ߢߣߊߕߊߟߌ߫ ߖߛߊ ߟߎ߬ ߘߊߕߎ߲߯ ߘߊ߫ ߁߈ߙߋ߲ ߠߋ߬ ߡߊ߬߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߊ߬ ߞߕߐߙߐ߲ߘߓߐ߫ ߞߏ ߝߐ߫ ߘߊ߫ ߢߣߊߕߊߟߌ ߛߓߍߘߊ ߓߟߏ߫، ߊ߬ߟߋ߬ ߛߎߥߊ߲ߘߟߌ ߞߏ߬ߣߌ߲ ߞߍ߫ ߘߊ߫ ߟߋ߬߸ ߕߌߢߍߟߌ߫ ߟߊߞߊ߬ߟߌ߬ߕߊ߬ ߛߌ߫ ߡߊ߫ ߟߊߞߏߟߐ߲߫ ߊ߬ ߘߐ߫، ߛߊߛߊߓߐߟߌ ߟߎ߬ ߞߍ߫ ߘߴߊ߬ ߢߌ߬ߡߊ ߟߊ߫߸ ߝߐ߰ߓߍ߬ߦߟߊ߬ ߛߌߦߊߡߊ߲߫ ߞߵߏ߬ ߟߊߛߙߋߦߊ߫ ߞߣߍ ߟߎ߬ ߞߊ߲߬.
ߊ߬ߟߋ߬ ߢߣߊߕߊߟߌ ߕߘߍ߬ߒ߬ߘߐ߬ߟߌ ߞߍ߫ ߘߊ߫ ߛߌ߬ߛߍ߬ߣߍ߲ ߠߊ߫ ߞߓߊ߬ ߞߊߘߌ ߟߋ߬ ߘߌ߫ ߜߊ߲ߠߌ߲ ߘߐ߫، ߓߊ߸ ߘߏ߫ ߟߎ߫ ߞߵߊ߬ ߦߌ߬ߘߊ߬ ߞߏ߫ ߢߣߊߕߊߟߌ ߡߍ߲ ߦߋ߫߸ ߊ߬ ߛߎߘߊ߲ߓߊ߮ ߟߐ߲ߣߍ߲߫ ߞߘߐ ߟߋ߬. <<ߕߐ߬ߣߐ ߦߋ߫ ߡߍ߲ ߠߊ߫߸ ߖߡߊ߬ߣߊ ߦߋ߫ ߓߐ߫ ߘߐ߬ߕߊߡߌ߲ ߘߐ߫߸ ߞߊ߬ ߣߊ߬ ߛߌߟߊ߫ ߓߘߍ ߞߊ߲߬، ߒ ߣߐ߬ ߡߐ߰ ߟߋ߬ ߛߎߥߊ߲ߘߌ߫ ߟߊ߫߸ ߡߍ߲ ߦߋ߫ ߖߡߊ߬ߣߊ ߞߎ߲߬ߠߊ߫ ߕߋ߲߬߸ ߊ߬ ߘߏ߲߬ ߓߘߊ߫ ߞߏ߫ ߟߎ߫ ߘߊߡߌ߬ߣߊ߬߸ ߡߍ߲ ߠߎ߬ ߘߌ߫ ߛߋ߫ ߖߡߊ߬ߣߊ ߟߊߕߊ߯ ߟߊ߫ ߢߍ߫.>> ߡߎߛߊ߫ ߞߊ߬ߓߊ ߟߋ߬ ߞߵߏ߬ ߝߐ߫߸ ߏ߬ ߦߋ߫ ߖߎ߬ߟߊ ߟߋ߬ ߘߌ߫ ߞߐߣߊߞߙߌ߫.
ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߊ߬ ߘߊ߫ ߢߣߊߕߊߟߌ߫ ߖߛߊ ߞߣߐ߫ ߓߊ߬ߛߊ߲߬ ߦߙߌ߬ߞߌ߬ߓߊ߬ ߜߍߡߊ߲ ߠߋ߬ ߘߌ߫߸ ߢߟߊߝߌ߲ ߦߴߊ߬ ߢߊ ߟߊ߫߸ ߊ߬ ߣߴߊ߬ ߟߊ߫ ߓߐ߬ߟߐ߲߬ߞߊ߸ ߞߎ߲߬ߞߊ߬ߓߊ߰ ߛߌߦߊߡߊ߲߫ ߦߴߊ߬ ߞߐ߫.
ߊ߬ ߦߌ߬ߘߊ߬ߣߍ߲߬ ߞߏ߫ ߢߣߊߕߊߟߌ ߞߐߖߋߓߌ ߟߎ߬ ߓߐߣߊ߬ ߘߌ߫ ߕߎ߬ߡߊ߬ߙߋ߲߬ ߄߈ ߢߣߊߕߊߟߌ ߞߐ ߘߐ߫߸ ߘߏ߫ ߟߎ߫ ߖߍ߬ߘߍ ߓߍߣߊ߬ ߟߊߕߊ߬ߡߌ߲ ߘߊߡߌ߬ߣߊ߫ ߓߌ߬ ߞߐ߬ߓߊ߬ߟߏ߲ ߣߌ߲߬ ߡߊ߬.
ߖߌ߬ߣߍ߬ ߦߋ߫ ߖߡߊ߬ߣߊ߫ ߟߋ߬ ߘߌ߫߸ ߝߎߥߊ߲ߢߊߘߊ߲ ߥߙߎߞߌߣߍ߲߫ ߦߙߐ ߡߍ߲ ߘߐ߫߸ ߣߍ߰ ߘߊߡߊ߲ߘߊ ߞߊ߫ ߛߌߦߊ߫߸ ߊ߬ ߣߌ߫ ߘߎߢߊ߫ ߘߎ߰ߞߘߐ߬ ߣߊ߲߬ߝߟߏ߬ ߞߏ ߘߐ߫ ߦߙߐߓߊ߫ ߟߋ߬ ߘߌ߫، ߞߊ߬ߕߎ߲߯߸ ߘߎߢߊ߫ ߝߎߥߊ߲ߢߊߘߊ߲ ߓߟߏߡߊߛߌ߯ ߦߙߐߓߊ߫ ߟߋ߬ ߖߌ߬ߣߍ߫ ߖߡߊ߬ߣߊ ߘߌ߫߸ ߛߌߡߊ߲ߘߎ߯ ߣߍ߰ ߘߊߡߊ߲ ߦߴߏ߬ ߟߊߒߡߊ ߘߏ߫ ߘߌ߫߸ ߏ߬ ߡߍ߲ ߛߌ߰ ߘߊ߫ ߛߋ߲߬ߠߊ߫ ߞߊߙߏ߫ ߛߊ߬ߣߍ߲ ߠߊ߫߸ ߛߊ߲߬ ߦߙߌߞߊ߫ ߟߊ߬ߣߐ߮ ߞߐߝߍ߬، ߒ߬ߓߊ߬߸ ߘߐ߬ߕߊߡߌ߲ ߞߊ߲ߕߌ߮ ߞߊ߲߫ ߞߏ߫ ߖߡߊ߬ߣߊ ߘߌߣߊ߬ ߥߙߎߞߌ߫ ߖߊ߬ߕߋ߬ߘߐ߬ߛߌ߮ ߣߌ߲߬ ߛߊߓߎ߫ ߟߊ߫ ߝߋߝߋ߫، ߝߊߦߌߘߊ߫߸ ߊ߬ߟߋ ߟߋ߬ ߖߌ߬ߣߍ߬ ߟߊ߫ ߥߙߎߞߌ ߣߌߘߐ ߘߌ߫ ߛߐ߬ߘߐ߲ ߛߌߟߊ ߝߍ߬߸ ߛߌߡߊ߲ߘߎ߯ ߞߊ߬ߣߌ߲߬.
ߕߎ߬ߡߊ߬ߣߍ߲߬ ߞߋߟߋ߲ ߏ߬ ߟߊ߫߸ ߞߎ߲߬ߠߊ߬ߛߌ߮ ߓߘߊ߫ ߋߡߌߙߊߕ ߞߌߢߍ߲߫ ߝߎߥߊ߲ ߓߏߟߏ߲ߝߘߊ ߟߊ߫ ߘߌ߬ߢߍ߬ߛߓߍ ߡߌ߬ߣߴߊ߬ ߟߊ߫߸ ߦߏ߫ ߊ߲ ߠߊ߫ ߟߌ߬ߤߟߊ߫ ߕߊ߬ߡߌ߲߬ߣߍ߲ ߘߏ߫ ߞߵߏ߬ ߦߌ߬ߘߊ߬ ߢߊ ߡߍ߲، ߓߊߏ߬߸ ߊ߬ߟߎ߬ ߣߴߏ߬ ߝߏߣߍ߲߫ ߢߐ߲߮ ߞߐ߫ ߘߐ߬ߖߏ߲߬ߘߊ߬ ߞߏ ߟߋ߬ ߘߐ߫، ߊ߬ߟߏ߫ ߞߵߏ߬ ߟߎ߬ ߟߊ߫ ߘߌ߬ߢߍ߬ߛߓߍ ߓߐ߫ ߊ߬ߟߎ߬ ߓߟߏ߫ ߞߵߊ߬ ߘߌ߫ ߖߌ߬ߣߍ߫ ߖߍ߬ߘߍ ߕߊ ߘߏ߫ ߟߋ߬ ߡߊ߬، ߞߊ߬ߕߎ߲߯߸ ߢߍߥߟߊ߫ ߞߋߟߋ߲߫ ߠߋ߬ ߖߌ߬ߣߍ߬ ߣߌ߫ ߡߊ߬ߟߌ ߣߌ߫ ߓߙߎߞߌߣߊ߫ ߝߊ߬ߛߏ߬ ߣߌ߫ ߖߋ߬ߟߌ߬ߓߊ߬ߘߎ߯ ߟߎ߫ ߓߟߏ߫ ߕߋ߲߬߸ ߣߴߏ߬ ߦߴߊ߬ߟߎ߬ ߟߊ߫ ߖߡߊ߬ߣߊ ߘߊ߬ߡߊ߲߬ ߞߏ ߕߏ ߘߌ߫ ߊ߬ߟߎ߬ ߕߊ߫ ߓߟߏ ߡߊ߬، ߏ߬ ߓߘߊ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߲߬ߘߌ߬ߦߊ߬ ߘߊߞߎ߲ ߏ߬ ߘߐ߫߸ ߞߵߊ߬ ߞߏߘߌߦߊ߫ ߡߐ߰ ߛߌߦߊߡߊ߲߫ ߦߋ߫، ߓߊߏ߬߸ ߊ߬ ߦߋ߫ ߖߡߊ߬ߣߊ ߟߊ߫ ߖߘߍ߫߬ߕߌ߰ߦߊ ߓߏߟߏ߲ ߘߏ߫ ߟߋ߬ ߓߊ߲ߓߊ߲ ߞߊ߲߬ ߏ߬ ߘߌ߫ ߛߐ߬ߘߐ߲ ߛߌߟߊ ߝߍ߬، ߘߋ߲ߡߌߛߍ߲߫ ߛߌߦߊߡߊ߲߫ ߓߘߴߊ߬ ߞߊ߬ߣߌ߲߫ ߏ߬ ߞߏߛߐ߲߬.
ߘߋ߲ߡߌߛߍ߲ ߏ߬ ߘߏ߫ ߟߎ߫ ߟߊ߫ ߝߐߟߌ߫ ߘߐ߫߸ ߞߏ߫ ߘߎ߲߬ߓߎߦߊ߬ ߟߊ߫ ߣߊ߬ߟߌ ߞߍߣߍ߲߫ ߞߏߓߊ߫ ߟߋ߬ ߘߌ߫ ߖߌ߬ߣߍ߬ ߞߣߐ߫߸ ߊ߬ ߣߐ߬ ߖߡߊ߬ߣߊ ߓߐ߫ ߟߊ߫ ߞߐ߬ߟߐ߲ ߠߋ߬ ߞߣߐ߫، ߞߏ߫ ߝߙߋߞߋ ߦߋ߫ ߘߊߞߎ߲ ߡߍ߲ ߘߐ߫ ߘߐߙߐ߲߫߸ ߏ߬ ߟߋ ߘߎ߰ߡߟߊ߬ߡߌߘߊ (ߦߙߎ߬ߞߎ߬ߦߙߎߞߎ) ߘߌ߫߸ ߏ߬ ߟߋ ߕߊ߬ߡߌ߲߬ ߠߊ߫ ߥߙߊ߬ ߟߊ߫.
ߘߐ߬ߞߕߌ߬ߟߌ߬ߟߊ ߘߏ߫ ߟߎ߫ ߦߴߊ߬ ߖߊ߬ߕߋ߬ ߟߊ߫ ߟߋ߬߸ ߞߏ߫ ߢߣߊߕߊߟߌ ߢߌ߲߬ ߠߋ߬ ߞߍߕߐ߫ ߣߊ߲߬ߕߌ߮ ߟߎ߬ ߟߊ߫ ߝߊ߲߬ߞߊ ߓߊ߲ߓߊ߲߫ ߠߊ߫، ߣߴߌ ߞߊ߬ ߓߣߋߘߌߞ ߡߊ߲ߖ߭ߍ߲߫ ߕߊ߬߸ ߏ߬ ߡߍ߲ ߦߋ߫ ߝߘߊ߬ߝߌ߲߬ߠߊ߬ ߣߌ߫ ߕߟߋ߬ߓߐ ߕߍߡߞߊߒߞߋ ߘߐ߬ߞߕߌ߬ߟߌ߬ߟߊ ߘߏ߫ ߘߌ߫߸ ߏ߬ ߞߊ߲߫ ߞߏ߫ ߘߎ߲߬ߓߎߦߊ߬ ߓߊ߯ ߛߌ߰߸ ߊ߬ ߞߍߕߐ߫ ߊ߬ ߞߙߍ߬ߝߍ߬ ߡߐ߮ ߟߎ߫ ߟߋ߬ ߘߊ ߓߌ߬ߟߊ߬ ߟߊ߫ ߕߟߎ ߘߐ߫߸ ߞߵߏ߬ ߟߎ߬ ߡߊߘߏ߲߬ ߊ߬ ߟߊ߫، ߛߌߡߊ߲ߘߎ߯ ߘߏ߲߬ ߦߴߏ߬ ߓߍ߲߬ߒ߬ߛߋ߲߬ߡߊ߬ߓߊ߫ ߟߋ߬ ߘߌ߫߸ ߏ߬ ߡߍ߲ ߓߍߣߊ߬ ߥߊߘߌ߫ ߛߌߦߊߡߊ߲߫ ߠߊߘߏ߲߬ ߖߡߊ߬ߣߊ ߞߎ߲߬.
ߞߊ߬ߕߎ߲߯߸ ߘߐ߬ߕߊߡߌ߲ ߓߊߛߌ߰ ߞߊ߲ ߡߍ߲ ߠߊߘߊ߲߫ ߘߊ߫ ߞߊ߬ߝߏ߬ ߖߊߛߏ߲ ߞߐ ߘߐ߫߸ ߊ߬ ߝߐ߫ ߘߴߏ߬ ߞߣߐ߫ ߟߋ߬ ߞߏ߫ ߘߎ߲߬ߓߎߦߊ߬ ߣߴߊ߬ ߟߊ߫ ߡߐ߰ ߛߌ߫ ߕߴߛߋ߫ ߞߍ߫ ߟߊ߫ ߡߊ߬ߡߌ߬ߘߊ߬ߟߌ߬ߟߊ߫ ߘߌ߫، ߓߊ߬ߙߌ߬߸ ߛߌ߰ߞߊ߲ ߡߍ߲ ߠߊߘߊ߲߫ ߘߊ߫߸ ߣߴߏ߬ ߟߊߘߌ߬ߢߍ߬ ߘߊ߫ ߕߎߟߊߝߌ߲ ߞߊ߲ߘߟߌ ߝߍ߬ ߕߘߍ߬ߒ߬ߘߐ߬ߟߌ߬ ߞߐߟߌߞߐߟߌ ߟߊ߫ %߉߂ ߢߐ߲߰ ߠߊ߫߸ ߏ߬ ߞߊ߬ ߞߊ߬ߘߊ߲ ߓߐ߫ ߟߋ߬ ߊ߬ߟߎ߫ ߛߋ߲߭ ߠߊ߫، ߝߣߊ߫߸ ߟߐ߬ߒ߬ߞߋ߬ߟߊ ߓߐ߫ ߘߊ߫ ߛߊ߲߬ ߟߏ߯ߟߎ ߘߐ߫ ߞߵߊ߬ ߞߍ߫ ߥߐߙߐ߲ߝߌ߬ߟߊ߬ ߘߌ߫߸ ߞߊ߲߬ߜߍ߬ߘߊ߬ ߞߏ ߓߘߊ߫ ߟߊߘߏ߲߬.
ߛߌ߰ ߓߘߊ߫ ߞߍ߫ ߡߐ߱ ߟߎ߬ ߘߊ ߞߊ߲߬߸ ߓߍ߯ ߦߴߊ߬ ߞߐ߬ߙߐ߲߬ߜߟߏ ߘߐ߫ ߓߘߍ߬ߓߘߍ߬ߟߌ߬ ߘߊߞߎ߲ ߘߐ߫ ߖߡߊ߬ߣߊ ߞߣߐ߫، ߣߊ߲߬ߒ߬ߕߊ߲߬ ߘߍ ߟߎ߬ ߞߊ߲߫ ߞߏ߫ ߔߊߞߌߛߦߊ߫ ߞߏ ߟߎ߬ ߓߘߊ߫ ߟߊߕߐ߲߫߸ ߝߐ߰ߓߍ߬ߘߊ ߟߎ߬ ߞߊ߲ߠߊߓߌ߬ߟߊ߬ߣߍ߲߬ ߕߍ߫߸ ߡߐ߱ ߟߎ߫ ߛߊ߬ߥߏ߬ ߕߴߊ߬ߟߎ߬ ߘߊ ߘߐ߫ ߡߎ߬ߕߎ߲߬߸ ߝߊ߲߬ߞߊߛߌ߬ߣߊ ߟߎ߬ ߘߐߝߎߟߋ߲ߣߍ߲߫ ߕߴߊ߬ߟߎ߬ ߟߊ߫ ߓߊ߯ߙߊ ߘߐ߫، ߏ߬ ߟߋ ߘߐ߫߸ ߡߊ߲߬ߕߏ߲߬ ߠߊߘߍ߬ߣߍ߲ ߠߎ߬ ߛߌ߲߬ߝߏ߲߬ߧߊ߬ߟߌ ߓߏߟߏ߲ߝߘߊ ߡߍ߲ ߘߐ߱ߘߏ߲߬ߣߍ߲߫ ߡߐ߰ߦߊ ߤߊߞߍ߫ ߞߏ ߟߊ߫߸ ߏ߬ ߕߐ߲ߕߌ߯ ߛߊ߲ߘߐ ߝ߭ߐߟߑߕߍߙ ߕߎ߳ߙߞ ߞߊ߲߫ ߞߏ߫ ߓߙߊߡߊߖߊ߲ߓߊ߲ ߡߍ߲ ߕߊ߬ߡߌ߲߬ߣߍ߲߫ ߖߡߊ߬ߣߊ ߞߣߐ߫߸ ߏ߬ ߞߍ߫ ߘߊ߫ ߡߊ߬ߛߌ߬ߟߊ߲߬ߠߌ߲ ߠߋ߬ ߘߐ߫߸ ߊ߬ ߣߌ߫ ߞߊ߬ ߘߏ߲߬ ߡߐ߱ ߟߎ߫ ߞߊ߬ߛߌ ߘߐ߫ ߞߊ߲ߠߊߓߌߟߊ ߡߊ߬ߘߎ߮ ߘߐ߫، ߞߎ߲߬ߠߊ߬ߛߌ߮ ߞߏ߬ߣߌ߲ ߡߊ߫ ߝߋ߲߫ ߝߐ߫ ߖߙߊ߬ߞߌ߬ߟߌ ߏ߬ ߘߐ߫.
ߓߙߊߡߊߖߊ߲ߓߊ߲ ߞߍ߫ ߘߊ߫ ߟߋ߬ ߖߡߊ߬ߣߊ ߞߣߐ߫߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊߞߎ߲߬ߣߴߊ߬ ߘߊߞߘߎߡߊ߬߸ ߊ߬ ߟߊ߫ ߞߙߎߞߊߘߋ߲ ߠߎ߬ ߣߴߊ߬ ߟߊ߫ ߛߍ߬ߘߏ߲߬ߠߊ߫ ߜߊ߲߬ߛߊ߲ ߠߋ߬ ߕߘߍ߬ ߞߣߍ ߞߊ߲߬، ߓߙߊߡߊߖߊ߲ߓߊ߲ ߞߎ߲߬ߘߏ߲ ߝߍ߬ ߞߐߣߊߞߙߌ߫߸ ߊ߬ ߥߊ߫ ߘߊ߫ ߦߋ߲߬߸ ߓߊ߬ߙߵߊ߬ ߡߊ߫ ߝߋ߲߫ ߝߐ߫߸ ߊ߬ ߣߴߊ߬ ߡߏ߬ߛߏ ߞߏ߬ߣߌ߲ ߞߵߊ߬ ߕߎ߬ߙߎ߲߫ ߠߋ߬ ߏ߬ ߟߏ߲ ߞߏߛߓߍ߫߸ ߞߊ߬ ߘߐ߲߭ ߞߍ߫ ߊ߬ ߡߊ߬ ߞߊ߬ߣߌ߲߬، ߞߵߊ߬ ߛߐ߬ߘߐ߲߬ ߞߏ߲߬ߞߏ߫ ߘߐ߲߬ߞߟߌ߬ߟߊ߬ߟߊ߫ ߞߏ߬ߝߌ ߏߟߏߡߌߘߋ߫ ߦߋ߫ ߘߐ߲߬ߞߟߌ ߞߊ߲߬، ߏ߬ ߟߏ߲߸ ߝߊ߰ߣߌ߲ ߡߍ߲ ߕߍ߬ߘߴߊ߬ ߡߊ߬߸ ߊ߬ ߟߊ߫ ߕߏ߰ߝߏ ߕߐ߮ ߟߋ߬ ߛߓߍߣߴߏ߬ ߞߊ߲߬߸ ߞߏ߫ <<ߥߙߎߞߌ ߣߌ߫ ߞߊ߬ߞߎ߬ߘߦߊ߬ߟߌ ߓߐ߲ߛߐ߲ߘߊ>>.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
