ߖߌ߬ߣߍ߬: ߊߟߑߜ߭ߊߛߌߡߎ߬ ߖߊߟߏ߫ ߡߊߞߊ߲ߓߊ߮ ߟߎ߬ ߞߊ߲߫ ߞߏ߫ ߊ߬ߟߎ߬ ߡߴߊ߬ ߦߙߐ߫ ߟߐ߲߫ ߘߋ߬߸ ߏ߬ ߘߐ߫ ߞߏ߫ ߞߵߊ߬ ߥߊ߫ ߦߙߐ߫ ߞߋߟߋ߲߫ ߝߐ߫ ߊ߬ߟߎ߬ ߦߋ߫

ߟߊ߬ߝߛߊ߬ߟߌ߬ߟߊ߫ ߊߟߑߜ߭ߊߛߌߡߎ߬ ߖߊߟߏ߫ ߡߍ߲ ߠߊ߫ ߥߛߎ߫ ߟߊߘߏ߲߫ ߞߏ ߢߊߝߐ߫ ߘߴߊ߲ ߠߊ߫ ߟߌ߬ߤߟߊ߫ ߕߊ߬ߡߌ߲߬ߣߍ߲ ߘߏ߫ ߘߐ߫ ߞߐ߰ߦߊ߬ ߥߛߎߖߌ߲ߓߊ ߟߊ߫، ߒ߬ߓߊ߬߸ ߏ߬ ߟߋ ߟߊ߫ ߟߊ߬ߝߛߊ߬ߟߌ߬ߟߊ ߟߎ߫ ߣߐ߬ ߟߊ߬ߛߋ߬ߟߌ߬ ߞߟߊߒߞߋ߫ ߞߍ߫ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߓߘߊ߫ ߞߣߐ߬ߘߐߝߟߌ߬ ߞߵߊ߬ߟߎ߬ ߦߌߟߊ߲ߦߌߟߊ߲߫ ߞߊ߬ ߓߍ߲߬ ߊߟߑߜ߭ߊߛߌߡߎ߲߬ ߠߊ߫ ߞߏ ߡߊ߬، ߓߊߏ߬߸ <<ߞߊ߬ߦߌ߯ ߛߐ߱ߡߊ߬߸ ߊ߬ ߡߊ߫ ߦߴߊ߬ ߟߊ߫ ߥߛߎߓߏ߲ߣߍ߲ ߞߣߐ߫.>> ߊ߬ ߘߏ߲߬ ߥߊߣߍ߲߫ ߦߙߐ߫ ߟߋ߬ ߘߐ߫߸ ߡߍ߲ ߟߐ߲ߣߍ߲߫ ߕߍ߫ ߊ߬ߟߎ߬ ߛߌ߫ ߓߟߏ߫߸ ߊ߬ ߟߊ߫ ߘߋ߲ߓߦߊ ߡߴߊ߬ ߦߙߐ߫ ߟߐ߲߫߸ ߊ߬ߟߎ ߟߊ߬ߝߛߊ߬ߟߌ߬ߟߊ ߟߎ߬ ߝߣߊ߫ ߦߋ߫ ߕߋ߲߬.

ߟߊ߬ߝߛߊ߬ߟߌ߬ߟߊ߬ ߞߙߎ ߢߌ߲߬ ߠߎ߬ ߟߊ߫ ߝߐߟߌ߫ ߘߐ߫߸ ߟߊ߬ߓߐ߬ߟߌ߬ ߞߏ ߟߊ߬ߛߊ߬ߟߌ߬ ߝߏߦߌ߬ ߡߊ߫ ߞߍ߫، ߊ߬ߟߋ߬ ߟߊ߬ߝߛߊ߬ߟߌ߬ߟߊ ߟߎ߬ ߞߊ߲߫ ߌߞߐ߫߸ ߞߏ߫ ߊ߬ߟߎ߫ ߞߊ߬ ߛߊ߬ߙߌ߬ߦߊ߬ ߞߏߟߊߕߍ߮ ߟߎ߬ ߞߏߟߊߒߞߘߐߢߐ߲߯ߦߊ߫߸ ߏ߬ ߟߎ߫ ߞߵߊ߬ ߝߐ߫ ߊ߬ߟߎ߬ ߦߋ߫ ߟߋ߬ ߘߐߙߐ߲߫ ߞߏ߫ ߊ߬ߟߎ߬ ߡߊ߫ <<ߝߏߦߌ߬ ߟߐ߲߫ ߊ߬ ߞߏ ߘߐ߫>>߸ ߊ߬ߟߎ߫ ߞߊ߬ ߞߋߟߊ ߡߍ߲ ߠߊߕߊ߯ ߥߛߎ ߡߊߡߙߊ߬ߓߊ߮ ߟߎ߫ ߡߊ߬߸ ߊ߬ߟߎ߬ ߡߊ߫ ߖߋ߬ߓߌ߬ ߝߏߦߌ߬ ߛߐ߬ߘߐ߲߫ ߏ߬ ߞߏ ߟߊ߫.

ߊߟߑߜ߭ߊߛߌߡߎ߲߬ ߕߎߣߎ߲ߣߍ߲߫ ߠߋ߬ ߕߋ߲߬߸ ߞߵߊ߬ ߛߐ߬ߘߐ߲߬ ߊ߬ ߟߊ߫ ߞߏ ߦߋ߫ ߛߋ߲߬ߠߊ߫ ߞߕߌߖߌ߲ ߛߊ߲ߘߐߕߊ ߟߊ߫، ߟߊ߬ߝߛߊ߬ߟߌ߬ߟߊ ߟߎ߬ ߞߊ߲߫ ߞߏ߫ ߕߎߟߊߝߌ߲ ߕߋ߬ߟߋ߫ ߂ ߡߊ߬߸ ߊ߬ߟߎ߫ ߞߊ߬ ߛߓߍ߫ ߞߍ߫ ߞߵߊ߬ ߟߊߢߌߣߌ߲߫ ߞߕߌߝߘߋ ߟߎ߫ ߝߍ߬߸ ߞߏ߫ ߞߵߊ߬ ߟߊ߫ ߞߏ ߛߍ߲ߛߍ߲߫߸ ߞߊ߬ ߡߐ߰ ߟߎ߬ ߢߌߣߌ߲߫߸ ߡߍ߲ ߠߎ߬ ߦߋ߫ ߡߍ߲ߞߊ߲߫ ߞߏ ߞߟߊ߬ߡߊ߬ߓߊ߮ ߘߌ߫߸ ߊ߬ ߡߊߝߌ߲߬ߣߍ߲߫ ߡߍ߲ߞߊ߲ ߡߍ߲ ߝߍ߬߸ ߞߵߏ߬ ߛߍ߲ߛߍ߲߫ ߓߘߍߞߍ߭߸ <<ߏ߬ ߡߍ߲ߞߋߟߋ߲߫ ߔߋ߫ ߦߴߊ߬ ߡߊߝߌ߲߬ ߞߎ߲ߧߊ ߘߌ߫>> ߞߊ߬ߣߌ߲߬، ߏ߬ ߟߎ߬ ߟߊ߫ ߘߌ߬ߢߍ߬ߟߊ߬ߢߌ߬ߣߌ߲߬ ߛߓߍ ߏ߬ ߝߣߊ߫ ߟߊߛߊ߬ߦߌ߲߬ ߘߊ߫ ߟߋ߬߸ ߓߟߏ ߡߊ߫ ߛߌ߰ ߊ߬ ߞߘߐ߫.

ߊߟߑߜ߭ߊߛߌߡߎ߲߬ ߠߊ߫ ߞߕߌ ߡߍ߲ ߞߍ߫ ߘߊ߫ ߕߎߟߊߝߌ߲ ߕߟߋ߬ ߄ ߡߊ߬߸ ߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߬ ߞߊ߲߫ ߞߏ߫ ߝߏߦߌ߬ ߕߎ߲߬ ߕߴߊ߬ ߟߊ߫ ߦߋ߲߬߸ <<ߊ߬ ߦߋ߫ ߢߊ ߘߐ߫߸ ߊ߬ ߞߍ߲ߘߍ߫ ߕߘߍ߬.>> ߊ߬ ߘߏ߲߬ ߡߴߊ߬ ߘߡߊߞߊ߬ߛߌ߫ ߖߊ߲߬ߞߊ߬ߙߏ߬ ߞߏ߫ ߛߌ߫ ߟߊ߫، ߊ߬ ߦߌ߬ߘߊ߬ ߘߊ߫ ߞߏ߫ ߊ߬ ߟߊ߫ ߞߕߌ ߞߕߐߙߐ߲ߘߓߐ߫ ߘߊ߫ ߞߵߊ߬ ߕߏ߫ ߕߎߟߊߝߌ߲ ߕߟߋ߬ ߈ ߠߊ߫߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߟߊ߬ߝߛߊ߬ߟߌ߬ߟߊ ߟߎ߫ ߕߎ߲߬ ߞߊ߬ ߞߏ߲ߓߌߕߌ߮ ߟߋ߬ ߝߐ߫.

ߐ߲߬ߤߐ߲߫߸ ߌߞߏߡߌ߲߬ ߊ߬ ߦߙߐ߫ ߟߐ߲ߣߍ߲߫ ߕߍ߫߸ ߟߊ߬ߝߛߊ߬ߟߌ߬ߟߊ ߟߎ߬ ߞߊ߲߫ ߞߏ߫ <<ߘߊ߲ߘߊߟߌ߫ ߛߓߍ߫ ߝߏߦߌ߬ ߘߏ߲߬ ߡߊ߫ ߛߐ߬ߘߐ߲߬߸ ߡߍ߲ ߘߌ߫ ߓߐߟߌ߫ ߢߊ߫ ߛߎ߮ ߣߌ߲߬ ߢߊߝߐ߫ ߥߛߎߖߌ߲ ߠߊ߫.>> ߏ߬ ߘߐ߫߸ ߞߏ߫ ߊ߬ߟߎ߫ <<ߞߣߐ߬ߘߐ߬ߝߟߌ߬ߣߍ߲߫ ߦߌߟߊ߲ߦߌߟߊ߲ߕߐ ߟߋ߬ ߣߌ߲߬ ߞߏ ߘߐ߫߸ ߊ߬ ߟߊ߫ ߢߣߊߡߦߊ ߤߊߡߌ߲ ߘߌ߫߸ ߊ߬ ߣߴߊ߬ ߟߊ߫ ߟߊ߬ߞߊ߲߬ߘߊ߬ߟߌ ߣߴߊ߬ ߝߊ߬ߘߌ߬ ߜߎ߲ ߖߍ߬ߘߍ.>>

ߟߊ߬ߝߛߊ߬ߟߌ߬ߟߊ ߟߎ߬ ߞߊ߲߫ ߞߏ߫ ߊ߬ߟߎ߬ ߦߋ߫ ߡߍ߲ ߢߌߣߌ߲߫ ߠߊ߫߸ ߊߟߑߜ߭ߊߛߌߡߎ߲߬ ߓߊ߯ ߞߍ߫ ߦߙߐ ߡߍ߲ ߘߐ߫߸ ߏ߬ ߦߋ߫ ߟߊߛߋ߫ ߌߞߘߐߞߘߐߣߌ߲߬߸ ߊ߬ ߟߊ߫ ߘߋ߲ߓߦߊ ߡߊ߬߸ ߊ߬ ߣߴߊ߬ ߟߊ߫ ߟߊ߬ߝߛߊ߬ߟߌ߬ߟߊ ߟߎ߫ ߡߊ߬߸ ߛߴߊ߬ߟߎ߬ ߘߴߊ߬ ߦߋ߫ ߊ߬ߟߎ߬ ߢߊ ߟߊ߫، ߣߴߏ߬ ߘߏ߲߬ ߡߊ߫ ߞߍ߫߸ ߊ߬ߟߎ߬ ߘߴߊ߬ߟߎ߬ ߡߊߞߊ߬ߛߌ߫ ߖߡߊ߬ߣߊ ߛߊ߬ߙߌ߬ߦߊ߬ ߓߏ߲ߘߊ ߟߎ߬ ߣߌ߫ ߡߊ߲߬ߕߏ߲߬ߕߍ߬ ߛߊߙߌߦߊ߫ ߓߏ߲ߘߊ ߟߎ߬ ߟߊ߫߸ ߡߍ߲ ߠߠߎ߬ ߘߌ߫ ߛߴߊ߬ ߞߏ ߢߊߓߐ߫ ߟߊ߫.