ߞߊ߲ߞߊ߲߫: ߒ.ߓ.ߘ ߓߘߴߊ߬ ߟߊ߫ ߞߋ߬ߟߋ߲߬ߧߊ ߦߌ߬ߘߊ߬߸ ߞߊ߬ ߓߊ߲߫ ߞߵߊ߬ ߟߐ߬ ߘߎ߰ ߘߐ߫߸ ߡߍ߲ ߦߋ߫ ߝߘߊ߬ߝߌ߲߬ ߓߊߛߌߦߊ ߝߊ߲߬ߞߊߘߏ߲߭ ߘߎ߱ ߘߌ߫

ߞߊ߲ߞߊ߲߫ ߒߞߏ ߓߊߛߌߦߊ ߣߴߊ߬ ߕߌߙߌ߲ߠߌ߲ ߘߍ߭ (ߒ.ߓ.ߘ) ߣߐ߬ ߢߐ߲߯ߓߍ߲ ߠߋ߬ ߛߌ߰ ߟߊ߫ ߛߋ߲߬ߠߊ߫ ߞߍ߲ߘߍߟߏ߲߸ ߂߀߂߆ ߕߎߟߊߝߌ߲ ߕߟߋ߬ ߅ ߡߊ߬߸ ߞߵߏ߬ ߞߍ߫ ߢߐ߲߯ ߟߐ߲ ߢߐ߲߯ߓߍ߲ ߘߌ߫߸ ߞߊ߬ ߡߙߊ߬ߘߊ߬ߓߊ ߛߓߍߘߊ ߞߏߟߊߕߍ߮ ߟߎ߬ ߟߊߘߍ߬߸ ߞߊ߬ ߞߟߌߟߌ ߟߊߛߋ߫ ߞߊ߲ߞߊ߲߫ ߡߙߊ߬ߘߊ߬ߙߋ߲߬ ߕߊ߲ߣߌߟߏ߯ߟߎ ߛߓߍߘߊ߫ ߟߊߛߌ߰ߣߍ߲ ߠߎ߬ ߡߊ߬߬߬߸ ߓߍ߯ ߣߊ߬ ߘߊ߫ ߛߐ߬ߘߐ߲߫ ߏ߬ ߡߍ߲ ߘߐ߫ ߖߌ߲ߘߊ߲ߓߊ߫ ߘߐ߫ ߖߡߊ߬ ߞߏ ߘߝߊߣߍ߲ ߘߌ߫.

 ߖߊ߲߬ߖߏ߲ ߢߌ߲߬ ߞߍ߫ ߘߊ߫ ߞߊ߲ߞߊ߲߫ ߡߙߊ߬ߓߊ߰ߘߊ ߟߊ߬ߘߍ߬ ߝߏ߮ ߟߋ߬ ߞߣߐ߫߸ ߊ߬ ߞߎ߲߬ߠߊߛߌ߰ ߘߊ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߎ߲߬ߠߊ߬ߛߌ߰ߟߊ ߟߋ߬ ߓߟߏ߫߸ ߝߊߙߌ߲߫ ߊ߬ߟߌ ߓߊߘߊ߬ߙߊ߫ ߞߡߊ߬ߙߊ߬߸ ߏ߬ ߞߍ߬ߙߍߝߍ߬ ߞߏߢߊ߬߸ ߞߊ߲ߞߊ߲߫ ߡߙߊ߬ߓߊ߮ ߝߣߊ߫ ߕߍ߬ߘߍ߫ ߦߋ߲߬߸ ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭.

ߒ.ߓ.ߘ ߟߊ߫ ߡߙߊ߬ߘߊ߬ߙߋ߲߬ ߕߊ߲ߣߌߟߏ߯ߟߎ ߓߍ߯ ߛߓߍߘߊ ߞߐߦߌ߬ߘߊ߬ߣߍ߲߫ ߕߘߍ߬ ߞߣߍ ߞߊ߲߬ ߞߐߘߍ߫، ߞߏߟߊߕߍ߮ ߟߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߢߐ߲߯ߓߍ߲ ߣߌ߲߬ ߞߎ߲߭ ߠߋ߬߸ ߛߊ߫ ߛߌ߲߬ߝߏ߲ ߠߎ߬ ߘߌ߫ ߢߐ߲߮ ߟߐ߲߫߸ ߞߊ߬ ߘߍ߭ ߟߊߕߊ߯ߡߊ߫ ߢߊ ߟߐ߲߫߸ ߥߙߎߞߌ ߛߌߟߊ ߡߍ߲ ߠߎ߬ ߛߊߣߍ߲߫ ߒ.ߓ.ߘ ߓߟߏ߫߸ ߓߍ߯ ߦߋ߫ ߛߋ߫ ߓߌ߬ߟߊ߬ ߟߊ߫ ߖߊ߬ ߞߋߟߋ߲߫ ߠߊ߫ ߏ߬ ߢߊߦߋ ߘߐ߫߸ ߛߊ߫ ߝߘߊ߬ߝߌ߲߬ ߓߊߛߌߦߊ ߘߌ߫ ߦߍ߬ߟߍ߫ ߛߊ߲߬ߞߊ߬ߟߊ߲ ߠߊ߫ ߡߎ߬ߕߎ߲߬.

ߞߏ߲߬ߓߏ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߡߍ߲ ߦߋ߫ ߞߊ߲ߞߊ߲߫ ߒ.ߓ.ߘ ߞߊ߲ߕߌ߮ ߘߌ߫߸ ߏ߬ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߢߐ߲߯ߓߍ߲ ߣߌ߲߬ ߞߍߣߍ߲߫ ߓߍ߲߬ߒ߬ߛߋ߲߬ߡߊ߫ ߟߋ߬ ߘߌ߫߸ ߞߊ߬ ߢߊ ߡߊߖߌ߰ ߘߍ߭ ߟߊ߫ ߓߊ߯ߙߊ߫ ߞߍߣߍ߲ ߠߎ߬ ߞߘߐ߫߸ ߊ߬ߟߎ߬ ߓߘߊ߫ ߕߊ߯ߡߊ ߡߍ߲ ߠߎ߬ ߞߍ߫ ߘߍ߭ ߟߊ߫ ߢߝߍߕߊ߮ ߓߊ߯ߙߊ ߘߐ߫߸ ߊ߬ ߣߌ߫ ߝߊ߰ߡߊ ߟߎ߫ ߕߍ߰ߟߊ ߘߐ߫߸ ߞߵߏ߬ ߟߎ߬ ߟߊ߫ ߢߐ߲߮ ߥߟߍ߫ ߞߊ߲߬، ߊ߬ ߞߵߊ߬ ߦߌ߬ߘߊ߬ ߟߊ߬ߘߌ ߣߌ߲߬ ߞߎ߲߭ ߘߐ߫ ߏ߬ ߟߋ ߘߐ߫ ߞߏ߫ : <<ߡߙߊ߬ߘߊ߬ߙߋ߲߬ ߕߊ߲ߣߌߟߏ߯ߟߎ ߛߓߍߘߊ ߡߍ߲ ߠߎ߬ ߟߊߛߌ߰ߣߍ߲߫߸ ߡߐ߱ ߡߍ߲ ߠߎ߬ ߛߌ߰ߣߍ߲߫ ߛߓߍߘߊ߫ ߞߎߘߊ ߏ߬ ߟߎ߫ ߞߎ߲߬ߠߊ߫߸ ߞߊ߬ ߘߍ߭ ߖߍ߬ߘߍ ߢߊߝߐ߫ ߏ߬ ߟߎ߬ ߢߣߊ߫، ߘߍ߭ ߟߌ߬ߤߟߊ ߖߡߊ߬ߣߊ ߞߣߐ߫߸ ߊ߬ ߢߌߣߌ߲ߞߏ ߟߎ߬߸ ߛߓߍ ߛߐ߬ߘߐ߲߬ ߘߊ߫ ߞߊ߲߫ ߢߌ߬ߡߊ߲߬ ߠߊ߫߸ ߊ߬ ߦߴߊ߬ ߝߍ߬ ߞߊ߬ ߡߎ߲߬ ߢߊ߬ ߖߡߊ߬ߣߊ ߞߣߐ߫ ߞߍ߲ߘߍߦߊ ߕߊ߫ ߓߟߏ ߡߊ߬.>> ߏ߬ ߘߐ߫߸ ߢߐ߲߯ߓߍ߲ ߣߌ߲߬ ߞߎ߲߭ ߘߏ߫ ߟߋ߬ ߞߍߣߍ߲߫ ߏ߬ ߘߌ߫߸ ߞߊ߬ ߛߓߍߘߊ߫ ߞߎߘߊ ߛߌ߲߬ߝߏ߲ ߠߎ߬ ߟߊߞߍ߫ ߏ߬ ߞߊ߬ߟߊߡߊ߬.

ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߢߐ߲߯ߓߍ߲ ߣߌ߲߬ ߞߎ߲߭ ߘߏ߫ ߟߋ߬ ߝߣߊ߫ ߦߋ߫߸ ߛߓߍߘߊ ߖߍ߬ߘߍ ߟߊߕߊ߯ߡߊ߫ ߢߊ ߢߊߝߐ ߘߌ߫، <<ߊ߬ߟߎ߬ ߣߌ߫ ߛߓߍ߫ ߢߌ߬ߡߊ߲߬ ߠߎ߬ ߞߊ߫ ߞߊ߲߫ ߊ߬ߟߎ߬ ߟߊ߫ ߡߙߊ߬ߘߊ߬ߙߋ߲ ߏ߬ ߟߎ߬ ߞߣߐ߫ ߦߋ߲߬߸ ߊ߬ߟߎ߬ ߞߊ߫ ߞߊ߲߫ ߞߊ߬ ߕߊ߯ߡߊ߫ ߡߍ߲ ߠߎ߬ ߟߊ߫߸ ߣߊߟߌ߬ߡߎ߲߫ ߘߍ߭ ߛߌ߰ߞߊ߲ ߣߌ߫ ߛߊ߬ߙߌ߬ߦߊ ߘߏ߲߬ߖߟߎ߬ߡߊ ߘߌ߫.>> ߊ߬ ߞߵߏ߬ ߝߐ߫ ߞߵߊ߬ ߟߴߊ߬ ߞߊ߲߬ ߞߏ߫ ߛߓߍ ߏ߬ ߟߎ߫ ߟߋ߬ ߓߍ߯ ߘߌߣߍ߲߫ ߊ߬ߟߎ߫ ߡߊ߬ ߢߐ߲߯ߓߍ߲ ߣߌ߲߬ ߘߐ߫.

ߢߐ߲߯ߓߍ߲ ߣߌ߲߬ ߕߐ߬ߣߐ ߘߏ߫ ߞߍ߫ ߘߊ߫ ߡߍ߲ ߘߌ߫ ߞߊ߲ߕߌ߮ ߟߊ߫ ߝߐߟߌ߫ ߘߐ߫߸ ߏ߬ ߟߋ ߊ߬ ߦߌ߬ߘߊ ߘߌ߫ ߒ.ߓ.ߘ ߛߌ߲ߝߏ߲ ߠߎ߬ ߟߊ߫߸ ߞߏ߫ ߊ߬ߟߎ߬ ߣߌ߫ ߞߊ߲ߞߊ߲߫ ߝߊ߰ߡߊ ߟߎ߬ ߓߟߏ ߦߋ߫ ߢߐ߲߮ ߓߟߏ߫߸ ߓߍ߯ ߣߌ߫ ߘߐ߬ߖߊ ߞߊ߫ ߞߊ߲߫ ߏ߬ ߡߍ߲ ߘߐ߫߸ ߖߐ߲߰ߛߊ߫ ߢߝߍߟߊ ߘߌ߫ ߛߐ߬ߘߐ߲߬.

ߓߊߛߌߦߊ ߕߍ߫ ߥߊ߫ ߕߎ ߟߊߞߊ߲ߘߊ ߞߐ߫߸ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫߸ ߞߏ߫ <<ߞߊ߬ ߓߊߛߌ ߘߌ߫ ߡߐ߱ ߟߎ߬ ߡߊ߬ ߕߋ߲߬߸ ߏ߬ ߘߐߙߐ߲߫ ߕߍ߫ ߘߋ߬، ߓߊߛߌ ߦߋ߫ ߓߐ߫ ߟߊ߫ ߥߊ߭ ߡߍ߲ ߠߎ߬ ߞߣߐ߫߸ ߥߊ߭ ߏ߬ ߖߍ߬ߘߍ ߝߣߊ߫ ߟߊߞߊ߲ߘߊ߸ ߊ߬ߟߎ߬ ߦߴߊ߬ ߟߐ߲߫ ߞߏ߫ ߊ߬ߟߎ߬ ߟߊߛߌ߰ߣߍ߲߫ ߏ߬ ߟߎ߫ ߟߋ߬ ߓߍ߯ ߟߊߘߍ߬ߣߍ߲ ߞߎ߲߬ߠߊ߫.>> ߊ߬ ߞߵߏ߬ ߦߌ߬ߘߊ߬. ߞߵߊ߬ ߟߴߊ߬ ߞߊ߲߬ ߝߣߊ߫ ߞߏ߫ <<ߣߌ߫ ߕߎ ߕߣߐ߬ ߞߍ߫ ߘߊ߫ ߡߐ߱ ߞߊ߲߬߸ ߣߌ߫ ߥߊ߭ ߕߣߐ߬ ߞߍ߫ ߘߊ߫ ߡߐ߱ ߞߊ߲߬߸ ߊ߬ ߕߐ߬ߣߐ ߦߋ߫ ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߫ ߟߋ߬ ߝߟߐ߫ ߞߊ߲߬، ߞߊ߬ߡߊߛߐ߬ߘߐ߲߬߸ ߏ߬ ߟߎ߫ ߟߋ߬ ߓߊߟߏ ߛߘߌ߬ߣߍ߲߫ ߊ߬ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߞߊ߬ߦߌ߯ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߣߊ߬ ߘߊ߫ ߒ.ߓ.ߘ ߞߎ߲߬ߠߊ߫߸ ߞߊ߲ߞߊ߲߫ ߛߓߍߘߊ ߡߎ߰ߡߍ ߛߋ߫ ߘߊ߫ ߟߊߛߌ߰ ߟߊ߫߸ ߏ߬ ߞߍ߫ ߘߊ߫ ߛߋ߲߬ߕߊ߫ ߟߋ߬ ߘߌ߫߸ ߡߍ߲ ߘߌߦߊ߫ ߘߊ߫ ߒ.ߓ.ߘ ߛߌ߲߬ߝߏ߲ ߠߎ߬ ߦߋ߫ ߞߏߛߓߍ߫.

ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߬ ߟߊ߫ ߢߐ߲߯ߓߍ ߢߌ߲߬ ߘߐ߫߸ ߞߊ߲ߞߊ߲߫ ߡߙߊ߬ߓߊ߮ ߞߊ߬ ߛߙߊ߬ߣߎ߲ ߕߊ߬߸ ߞߊ߬ ߒ.ߓ.ߘ ߛߌ߲߬ߝߏ߲ ߠߎ߬ ߞߟߊߓߎߘߏ߲߬߸ ߞߏ߫ ߊ߬ߟߎ߬ ߦߋ߫ ߥߴߊ߬ ߡߊ߬، ߊ߬ ߞߵߊ߬ߟߎ߬ ߟߊ߫ ߞߏ ߕߐ߬ߣߐ ߝߐ߫ ߖߡߊ߬ߣߊ߬ߘߋ߲ ߠߎ߫ ߞߊ߲߬߸ ߊ߬ ߣߌ߫ ߟߊߒߡߊ߫ ߛߌߦߊߡߊ߲߫߸ ߡߍ߲ ߓߍ߯ ߦߴߊ߬ ߦߌ߬ߘߊ߬ ߟߊ߫ ߞߏ߫ ߝߘߊ߬ߝߌ߲߬ ߓߊ߬ߛߌ߬ߓߐ ߕߍ߫ ߞߏߣߍ߲߫ ߘߌ߫، ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ <<ߊ߲ ߓߘߊ߫ ߘߎ߰ߘߋ߲ ߠߎ߫ ߞߊ߬ߙߌ߬ߝߵߊߟߎ߫ ߟߊ߫߸ ߊ߲ ߓߘߊ߫ ߞߊ߲ߞߊ߲߫ ߞߊ߬ߙߌ߬ߝߵߊߟߎ߫ ߟߊ߫.>> ߊ߬ ߞߵߏ߬ ߟߊߛߋ߫.

ߝߊߙߌ߲߫ ߡߏ߬ߤߊ߬ߡߍ߬ߘ ߢߊ߲ߜ߭ ߞߵߊ߬ ߞߊ߲ߠߊߘߌ߫ ߓߊߛߌߓߐߟߊ ߟߎ߫ ߡߊ߬ ߝߣߊ߫߸ ߞߏ߫ ߊ߬ߟߎ߬ ߦߋ߫ ߡߐ߱ ߟߎ߬ ߘߊ߲ߘߊ ߟߋ߬ ߤߊߡߌ߲ ߛߌ߰ ߊ߬ߟߎ߬ ߟߊ߫ ߥߊߘߌ߫ ߞߏ ߘߌ߫، ߊ߬ ߞߊ߲߫ ߞߏ߫ ߝߘߊ߬ߝߌ߲߬ ߓߊ߬ߛߌ߬ߓߐ ߞߊ߫ ߞߊ߲߫ ߞߊ߬ ߟߊߘߏ߲߬ ߖߡߊ߬ߣߊ ߘߊ߲ߘߊߛߏ ߟߎ߬ ߟߊ߫߸ ߞߊ߬ ߢߊ ߟߐ߬ ߊ߬ߟߎ߬ ߝߣߊ߫ ߘߐ߫ ߞߵߊ߬ߟߎ߬ ߘߊ߲ߞߎ߲߫ ߊ߬ ߢߌ߬ߡߊ ߟߊ߫.

ߞߎ߲߬ߠߊ߬ߛߌ߰ߟߊ ߝߊߙߌ߲߫ ߊ߬ߟߌ ߓߊߘߊ߬ߙߊ ߞߡߊ߬ߙߊ߫ ߝߣߊ߫ ߞߵߏ߬ ߢߐ߲߰ ߕߊ߲߬ߘߏ߬ߟߌ߬ ߞߊ߲߫ ߠߋ߬ ߝߐ߫߸ ߞߊ߬ ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߬ ߟߊ߫ ߟߐ߲ߠߌ߲ ߟߊ߫ ߞߣߍ ߞߊ߲߬߸ ߞߊ߬ ߓߊ߲߫ ߞߵߊ߬ߟߎ߫ ߝߏ߬ ߞߏߛߓߍ߫.

ߢߐ߲߯ߓߍ߲ ߣߌ߲߬ ߕߎ߬ߡߊ߫ ߞߘߎ߬ߜߍߟߍ߲ ߘߏ߫ ߞߍ߫ ߘߊ߫ ߡߋ߬ߘߋ ߘߌ߫߸ ߏ߬ ߟߋ ߞߍ߫ ߘߊ߫ ߛߙߋߓߍ ߘߏ߫ ߟߊߕߊ߬ߡߌ߲ ߘߌ߫ ߞߊ߲ߞߊ߲߫ ߒ.ߓ.ߘ ߞߊ߲ߕߌ߮ ߡߊ߬.

ߞߊ߬ߕߎ߲߯߸ ߘߌ߬ ߛߌ߲ߝߏ߲ ߠߎ߬ ߟߊ߫ ߝߐߟߌ߫ ߘߐ߫߸ ߞߏ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߣߐ߬ ߓߊ߯ߙߊ ߡߍ߲ ߞߍ߫ ߟߴߊ߬ ߛߌ߱ ߣߌ߫ ߛߌߛߍ߲߬ ߕߍ߫߸ ߘߍ߭ ߛߌ߲߬ߝߏ߲߬ߧߊ ߘߐ߫߸ ߊ߬ ߞߏ ߟߎ߬ ߘߊߘߐߓߍ߲߭ ߘߐ߫߸ ߛߓߍߘߊ߫ ߟߊߛߌ߮ ߘߐ߫ ߞߊ߲ߞߊ߲߫ ߡߙߊ߬ߘߊ߬ߙߋ߲߬ ߕߊ߲ߣߌߟߏ߯ߟߎ ߞߣߐ߫߸ ߏ߬ ߓߏ߲߬ߓߊ߬ ߞߏߛߓߍ߫، ߏ߬ ߘߐ߫߸ ߞߏ߫ ߊ߬ߟߎ߬ ߝߣߊ߫ ߦߴߏ߬ ߥߊߟߢߌߡߊߟߐ߲ ߠߋ߬ ߞߍ߫ ߟߊ߫.

ߏ߬ ߟߋ ߞߏߛߐ߲߬߸ ߥߛߊ߬ߛߙߋ߬ ߞߟߊߒߞߋ߫ ߘߏ߲߬ ߘߊ߫ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ ߓߟߏ߫߸ ߊ߬ߟߌ ߓߊߘߊ߬ߙߊ ߞߡߊ߬ߙߊ߬߸ ߞߵߊ߬ ߘߏ߲߬ ߞߊ߲ߕߌ߯ ߡߊ߬ߡߊ߬ߘߌ߬ ߖߐ߲ߖߐ߲ ߓߟߏ߫ ߞߎ߲߬ߠߊ߬ߦߋߙߋ߲ ߘߝߊߣߍ߲ ߘߐ߫ ߢߐ߲߯ߓߍ߲ ߢߣߊߓߊ߮ ߟߎ߬ ߢߊߞߘߐ߫، ߞߊ߬ ߓߊ߲߫ ߞߵߊ߬ ߝߐ߫ ߞߵߊ߬ ߟߴߊ߬ ߞߊ߲߬߸ ߞߏ߫: <<ߡߊ߲߬ߘߋ߲߬ ߡߊ߲ߛߊ߸ ߒ߬ߓߊ߬߸ ߌ ߟߊ߫ ߓߊ߯ߙߊ߫ ߓߘߍ ߣߴߌ ߟߊ߫ ߘߐ߬ߖߊ ߞߏߛߐ߲߬߸ ߊ߲ ߓߘߊ߫ ߛߓߍ ߣߌ߲߬ ߕߊ߬ ߞߵߊ߬ ߘߴߌ ߡߊ߬.>> ߞߎ߲߬ߠߊ߬ߛߌ߰ߟߊ ߟߋ߬ ߞߵߏ߬ ߝߐ߫، ߞߊ߬ߕߎ߲߯߸ ߝߊ߰ߡߊ ߢߌ߲߬ ߠߎ߬ ߓߍ߯ ߞߎߡߊ߫ ߘߊ߫ ߖߡߊ߬ߣߊ߬ߘߋ߲ ߟߐ߲߫ ߞߊ߲ ߠߋ߬ ߘߐ߫.

ߡߊ߲߱ߖߎ߬ ߞߐ߲ߘߍ߫ ߡߍ߲ ߦߋ߫ ߒ.ߓ.ߘ ߞߏߟߊߕߍ߮ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߖߐ߲ߖߐ߲ ߠߊ߫ ߛߌ߲߬ߝߏ߲߬ߧߊ߬ߟߌ ߛߋ߲߬ ߞߎߘߊ ߣߌ߲߬ ߓߘߊ߫ ߞߍ߫ ߕߙߎ߬ ߘߌ߫ ߞߊ߬ ߝߘߊ߬ߝߌ߲߬ ߓߊ߬ߛߌ߬ߓߐߟߊ ߟߎ߬ ߛߋ߫ ߘߊߞߎ߲߫ ߘߐ߫߸ ߊ߬ ߕߎ߲߬ ߕߍ߫ ߦߙߐ ߡߍ߲ ߘߐ߫، <<ߞߊ߲ߞߊ߲߫ ߒ.ߓ.ߘ ߛߊ߬ߣߍ߲ ߠߊߞߎߣߎ߲ߓߊ߮ ߝߊߦߌߘߊ߫߸ ߏ߬ ߟߋ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߘߌ߫.>> ߏ߬ ߟߋ ߞߍ߫ ߘߊ߫ ߛߙߋߓߍ ߟߊߕߊ߬ߡߌ߲ ߘߌ߫ ߒ.ߓ.ߘ ߝߘߏ߬ߓߊ߬ ߟߊ߬ߟߌ߬ߟߌ߬ߟߊ ߡߊ߬߸ ߞߵߊ߬ ߘߏ߲߬ ߝߊ߰ߡߊ ߟߎ߬ ߓߟߏ߫.

ߒ.ߓ.ߘ ߛߌ߲ߝߏ߲ ߡߎߛߊ߫ ߞߐ߲ߘߍ߫ ߕߘߍ߬ ߢߐ߲߯ߓߍ߲߫ ߘߊߞߎ߲ ߢߌ߲߬ ߘߐ߫߸ ߏ߬ ߛߍߥߊߣߍ߲ ߞߵߊ߬ ߦߌ߬ߘߊ߬ ߞߏ߫ <<ߊ߲ ߛߍߥߊߣߍ߲߫ ߓߌ߬، ߞߵߊ߬ ߛߊߓߎ ߞߍ߫ ߊ߲ ߠߊ߫ ߞߊ߲ߕߌ߮ ߘߌ߫߸ ߣߴߊ߬ ߦߋ߫ ߡߊ߬ߡߊ߬ߘߌ߬ ߖߐ߲ߖߐ߲ ߞߋߕߊ߬ ߘߌ߫، ߊ߲ߠߎ߬ ߕߘߍ߬ ߦߋ߫ ߓߏߟߏ߲߫ ߜߘߍ߫ ߟߋ߬ ߞߣߐ߫߸ ߊ߲ ߕߘߍ߬ ߦߋ߫ ߛߓߍߘߊ߫ ߜߘߍ߫ ߟߎ߫ ߟߋ߬ ߞߣߐ߫، ߓߊ߬ߙߌ߫߸ ߊ߲ ߣߐ߬ ߊ߬ ߦߋ߫ ߟߊ߸ ߖߐ߲ߖߐ߲ ߓߘߴߊ߬ ߓߌ߬ߟߊ߬ ߛߌߟߊ ߢߍ߫߸ ߊ߬ ߘߏ߲߬ ߦߋ߫ ߡߐ߰ ߟߊ߬ߛߓߊ߬ߕߌ߬ߟߊ߫ ߟߋ߬ ߘߌ߫߸ ߊ߬ ߣߌ߫ ߖߡߊ߬ߣߊ߬ ߟߊ߬ߛߓߊ߬ߕߌ߬ߟߊ ߟߋ߬߸ ߏ߬ ߘߌߦߊߒߢߍ ߟߋ߬ ߣߐ߬ ߊ߬ ߞߍ߫ ߟߊ߫ ߊ߲ ߣߐ߬ ߊ߲ ߕߎ߲߰ ߠߴߊ߬ ߞߐ߫.>> ߡߎߛߊ߫ ߞߐ߲ߘߍ߫ ߞߵߏ߬ ߦߌ߬ߘߊ߬.

ߊߡߙߊ߫ ߖߘߍ߬ߟߐ߲߫ ߛߘߌ߬ߓߋ߬ ߡߍ߲ ߦߋ߫ ߝߏߟߏ߲ߣߌ߲߬ߜߍ߬ ߓߎ߯ߟߊ߫ ߒ.ߓ.ߘ ߛߌ߲߬ߝߏ߲ ߘߏ߫ ߘߌ߫߸ ߏ߬ ߝߣߊ߫ ߞߊ߲߫ ߞߏ߫ <<ߒߠߋ ߘߴߊ߬ ߝߐ߫ ߓߌ߬ ߒ ߞߏ߫ ߊߟߊ߫ ߕߊ߲ߘߏ߫، ߒ ߞߊ߬ ߤߊ߲ߞߟߌ߫ ߛߌߦߊߡߊ߲߫ ߠߋ߬ ߛߐ߬ߘߐ߲߫ ߣߌ߲߬ ߞߣߍ ߞߊ߲߬، ߊ߲ ߣߌ߫ ߡߐ߰ ߛߌߦߊߡߊ߲߫ ߓߘߊ߫ ߢߐ߲߮ ߦߋ߫߸ ߞߵߊ߲ ߕߍ߮ ߟߊ߫ ߢߐ߲߮ ߕߍ߯߸ ߒ ߕߎ߲߬ ߡߊ߫ ߘߏ߫ ߟߎ߫ ߟߐ߲߫߸ ߘߏ߫ ߟߎ߫ ߝߣߊ߫ ߕߎ߲߬ ߡߊ߫ ߒ ߟߐ߲߫.>>

ߢߐ߲߯ߓߍ߲ ߣߌ߲߬ ߞߎ߲߬ߝߊ߮ ߘߐ߫߸ ߒ.ߓ.ߘ ߞߏߟߊߕߍ߮ ߟߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߢߌߣߌ߲ߣߍ߲߫ ߞߏߟߊߘߍߢߐ߲߮ ߠߎ߬ ߣߌ߫ ߝߊ߰ߡߊ ߟߎ߬ ߟߊ߫ ߘߍ߬ߡߍ߲߬ߠߌ߲ ߡߊ߬߸ ߛߴߊ߬ߟߎ߬ ߟߊ߫ ߛߓߍߘߊ߫ ߟߊߛߌ߰ߣߍ߲ ߠߎ߬ ߘߌ߫ ߛߋ߫ ߡߊߘߍ߬ߡߍ߲߬ ߠߊ߫ ߢߊ ߡߍ߲ ߡߊ߬߸ ߞߵߊ߬ߟߎ߬ ߟߊ߫ ߓߊ߯ߙߊ ߟߊߣߐ߰ߦߴߊ߬ߟߎ߬ ߓߟߏ߫߸ ߊ߬ ߣߌ߫ ߞߵߊ߬ ߟߊߓߘߍ߬ߦߴߊ߬ߟߎ߬ ߓߟߏ߫، ߝߣߊ߫߸ ߞߏ߫ ߝߏ߫ ߞߊ߬ ߓߊ߯ߙߊߢߐ߲߯ߦߊ ߟߋ߬ ߟߊߘߏ߲߬ ߝߘߊ߬ߝߌ߲߬ ߓߊ߬ߛߌ߬ߓߐ߬ߟߊ ߟߎ߬ ߣߌ߫ ߞߎ߲߬ߠߊ߬ߛߌ߮ ߟߊ߫ ߘߊ߲ߘߊߟߌߟߊ ߟߎ߬ ߕߍ߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬.

ߒ.ߓ.ߘ ߞߊ߲߫ ߞߏ߫ ߊ߬ߟߎ߬ ߘߛߌ ߓߍ߲߬ߣߍ߲߬ ߡߍ߲ ߞߋߟߋ߲߫ ߡߊ߬ ߡߎ߬ߕߎ߲߬߸ ߏ߬ ߟߋ ߛߓߍߘߊ߫ ߕߊ߲ߣߌߟߏ߯ߟߎ߫ ߟߊߛߌ߰ߣߍ߲ ߢߌ߲߬ ߠߎ߬ ߟߊߛߌ߲ ߘߌ߫߸ ߓߍ߯ ߦߋ߫ ߛߋ߫ ߘߍ߭ ߟߊ߫ ߘߊ ߟߊߓߐ߫ ߟߴߊ߬ ߘߌ߲߬ߞߌ߬ߙߊ߬ ߘߐ߫߸ ߞߵߊ߬ߟߎ߬ ߟߊ߫ ߟߊ߬ߤߘߌ߫ ߕߊ߬ߣߍ߲ ߠߎ߬ ߣߴߊ߬ߟߎ߬ ߟߊ߫ ߢߍߥߟߊ߫ ߕߋ߬ߣߍ߲ ߠߎ߬ ߓߐ߫ ߜߍߟߊ߫.