߫ ߊߟߎ߫ ߦߴߊ߬ ߞߊ߬ߟߊߡߊ߬ ߢߊ ߡߍ߲ ߞߊ߬ ߓߍ߲߬ ߊ߲ ߠߊ߫ ߟߌ߬ߤߟߊ߬ ߕߊ߬ߡߌ߲߬ߣߍ߲ ߠߎ߫ ߡߊ߬߸ ߞߎߟߎ߲ ߠߋ߬ ߝߘߌ߫ ߘߊ߫ ߡߊ߬ߞߏߣߊ߬ ߓߊߖߌ ߞߊ߲߬ ߞߎߣߎ߲߬ ߞߐ߬ߟߏ߲ ߂߀߂߆ ߕߎߟߊߝߌ߲ ߕߟߋ߬ ߁߅ ߡߊ߬، ߒ߬ߓߊ߬߸ ߏߏ߬ ߡߐ߰ ߢߌߣߌ߲ ߠߎ߬ ߦߋ߫ ߛߋ߲߬ߠߊ߫ ߡߎߣߎ߲߬ ߖߐ߫.

ߛߎ߬ ߞߎߘߊ߫ ߟߋ߬ ߦߋߣߍ߲߫ ߓߌ߬ ߞߎߣߎ߲ߟߏ߲ ߣߌ߲߬ ߡߊ߬߸ ߕߎߟߊߝߌ߲ ߕߟߋ߬ ߁߆، ߏ߬ ߦߋ߫ ߣߊ߲߬ߕߌ߮ ߘߏ߫ ߟߋ߬ ߘߌ߫߸ ߦߌߟߡߊ߫ ߝߌߟߊߣߊ߲ ߠߋ߬߸ ߞߏߏ߫ ߌߓߙߊߤߌߡߊ߬ ߖߓߊ߬ߕߍ߫߸ ߡߐ߰ ߕߎߣߎ߲ߣߍ߲ ߡߍ߲ ߠߎ߬ ߢߌߣߌ߲ ߦߴߌߘߐ߫߸ ߊ߬ߟߋ ߦߴߏ߬ ߟߋ ߦߙߌߞߊ ߘߐ߫.

ߗߋߘߋ߲ ߓߐ߫ ߘߊ߫ ߟߋ߬ ߕߌ߲߬ߞߎߘߎ߲ ߠߊ߫ ߞߎ߲߬ߠߊ߫߸ ߊ߬ ߣߌ߫ ߡߙߊ߬ߘߊ߬ߓߊ ߟߊ߫ ߞߎ߲߬ߠߊ߫߸ ߞߵߊ߬ߟߎߎ߫ ߞߎ߲߬ߛߌ߲߫ ߣߐ߲߬ߜ߭ߐ߬ߥߊ߫ ߘߊ߲ߘߊߟߌ߫ ߕߊ߲ߓߊ߲ ߠߊ߫߸ ߞߊ߬ ߕߊ߯ ߞߛߌߓߊ߯ߕߐ ߟߎ߬ ߡߊ߬ߤߌ߬ߣߊ߬ ߟߊߡߌ߬ߣߊ߬߸  ߊ߬ ߣߌ߫ ߞߵߊ߬ߟߎ߬ ߡߊߘߍ߬ߡߍ߲߬، ߗߋߘߋ߲ ߏ߬ ߟߎ߬ ߡߍ߲ ߠߎ߬ ߟߊߓߍ߲߬ ߘߊ߫ ߣߐ߲߬ߜ߭ߐ߬ߥߊ߫ ߣߊ߲߬ߕߌ߰ ߘߊ߮ ߘߏ߲߬ߞߏ ߟߎ߬ ߓߟߏ߫.

ߝߊ߰ߡߊ ߟߎ߫ ߞߊ߬ ߖߊ߬ߡߊߙߌ ߘߌ߫߸ ߞߏ߫ ߞߊ߬ ߛߎ߬ ߦߋߣߍ߲ ߠߎ߬ ߕߊ߬ ߞߊ߬ ߥߴߊ߬ߟߎ߫ ߘߌ߬ ߛߎ߬ߘߏߏ߲߬ ߦߌߟߊ ߘߐ߫، ߞߊ߬ߕߎ߲߯߸ ߡߐ߰ ߛߊ߬ߓߊ ߡߍ߲ ߛߊ߬ߣߍ߲߫߸ ߡߐ߰ ߞߋߟߋ߲ ߦߋ߫ ߖߌ߬ߣߍ߬ߞߊ ߟߋ߬ ߘߌ߫߸ ߏ߬ ߟߋ ߣߊ߲߬ߕߌ߮ ߏ߬ ߘߌ߫، ߊ߬ ߕߐ߬ ߡߐ߰ ߝߌ߬ߟߊ ߛߊ߫߸ ߏ߬ ߟߎ߬ ߦߋ߫ ߓߐ߫ ߟߊ߫ ߛߙߊ߬ߟߏ߲߫ ߠߋ߬.

ߛߎ߬ ߛߊ߬ߓߊ ߏ߬ ߟߎ߬ ߓߍ߯ ߛߎ߭ߘߏ߲߬ ߘߊ߫ ߓߌ߬ ߞߎߣߎ߲ߟߏ߲ ߢߌ߲߬ ߠߋ߬ ߡߊ߬߸ ߕߎߟߊߝߌ߲ ߕߟߋ߬ ߁߆߸ ߞߵߊ߬ ߛߐ߬ߘߐ߲߬ ߝߊ߰ߡߊ ߟߎ߬ ߦߋ߫ ߜߍ ߘߐ߫ ߦߋ߲߬߸ ߊ߬ ߣߌ߫ ߣߊ߲߬ߕߌ߮ ߟߎ߬ ߣߌ߫ ߛߏ߫ ߞߣߐ߫ ߡߐ߮ ߟߎ߬.

ߊ߲ ߧߋ߫ ߦߙߐ ߡߍ߲߲ ߘߐ߫ ߕߋ߲߬߸ ߖߊ߬ߕߋ߫ ߘߍ߲߬ߞߍ߬ߕߎ߬ߣߍ߲ ߦߋ߫ ߡߐ߰ ߛߊ߬ߓߊ߫ ߟߋ߬ ߛߊ߬ ߞߏ ߘߌ߫ ߡߎߣߎ߲߬߸ ߛߙߎߓߊ߲ߣߍ߲߫ ߞߋߟߋ߲߫߸ ߏ߬ ߡߍ߲ ߛߌ߬ߞߛߊߓߌ ߘߌ߫ ߞߍ߫ ߛߊ߲߬ ߞߋߟߋ߲߫ ߣߌ߫ ߞߊߙߏ߫ ߥߐ߯ߙߐ߫ ߖߊ߬ߕߋ߬ ߘߐ߫߸ ߊ߬ ߣߌ߫ ߡߏ߬ߛߏ ߘߏ߫߸ ߡߍ߲ ߛߌ߬ߞߛߊߓߌ ߦߋ߫ ߛߊ߲߬ ߓߌߥߐ߯ߙߐ߫ ߖߊ߬ߕߋ߬ ߘߐ߫߸ ߞߵߏ߬ ߟߊ߫ ߣߊ߲߬ߕߌ߰ ߞߋߟߋ߲߫ ߞߊ߲߬߸ ߞߏ߫ ߌߓߙߊߤߌߡߊ߬ ߖߓߊ߬ߕߍ߫߸ ߏ߬ ߛߌ߭ ߦߋ߫ ߛߊ߲߬ ߃߄ ߠߋ߬ ߘߐ߫.

ߏ߬ ߘߐ߫߸ ߖߊ߬ߕߋ߫ ߘߍ߲߬ߞߍ߬ߕߎ߬ߣߍ߲ ߘߐ߫߸ ߡߍ߲ ߠߊߛߋ߫ ߘߊ߫ ߓߍ߯ ߡߊ߬߸ ߡߐߐ߰ ߄߇ ߟߋ߬ ߕߎ߲߬ ߘߌ߫ ߞߍ߫ ߞߎߟߎ߲ ߢߌ߲߬ ߞߣߐ߫߸ ߃߅ ߦߋ߫ ߡߏ߬ߛߏ ߘߌ߫߸ ߉ ߦߋ߫ ߗߍ߭ ߘߌ߫߸ ߣߊ߲߬ߕߌ߰ ߣߊ߯ߣߌ߲߫߸ ߊ߬ ߣߌ߫ ߘߋ߲ߣߍ߲߫ ߡߐ߰ ߃.

ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߡߐ߰ ߞߋߟߋ߲߫ ߠߋ߬ ߦߋߣߍ߲߫ ߕߍ߫ ߡߎߣߎ߲߬.

ߝߊ߰ߡߊ ߟߎ߬ ߕߊ߬ߣߍ߲ ߞߵߊ߬ ߟߊ߫ ߣߊ߲߬ߕߌ߮ ߟߎ߫ ߞߊ߲߬߸ ߊ߬ ߣߌ߫ ߘߎ߰ߘߋ߲ ߠߎ߬߸ ߓߍ߯ ߦߋ߫ ߢߌߣߌ߲ߠߌ߲ ߞߊ߲߬ ߓߊ ߘߐ߫߸ ߖߐ߲߰ߛߊ߫ ߡߐ߰ ߕߎߣߎ߲ߣߍ߲ ߏ߬ ߘߌ߫ ߦߋ߫ ߢߊ ߡߍ߲ ߡߊ߬.