ߖߌߖߊ߲ߝߙߊ߫ ߦߋ߫ ߝߌߝߊ߫ ߡߊ߬ߙߊ ߟߋ߬ ߘߐ߫߸ ߘߌ߬ߘߌ߫ ߡߙߊ߬ߘߊ߬ߙߋ߲ ߘߐ߫߸ ߞߌ߲߬ߕߌ߬ߢߊ߲߫ ߡߙߊ߬ߘߊ߬ߓߊ ߘߐ߫، ߒ߬ߓߊ߬߸ ߛߌߟߊ ߡߍ߲ ߦߋ߫ ߛߏ ߏ߬ ߣߌ߫ ߛߌ߯ߙߌ߲߫ ߓߌ߬ߟߊ߬ ߟߊ߫ ߢߐ߲߮ ߡߊ߬߸ ߏ߬ ߞߏ ߓߘߊ߫ ߞߍ߫ ߞߎ߬ߘߎ ߘߌ߫ ߦߋ߲߬ ߡߐ߮ ߟߎ߬ ߞߊ߲ߠߊ߫ ߕߋ߲߬ ߞߏߛߓߍ߫߸ ߞߊ߬ ߓߍ߲߬ ߛߌߟߊ ߟߊ߫ ߖߎ߯ߦߊ ߡߊ߬، ߞߊ߬ ߓߐ߫ ߖߌߖߊ߲ߝߙߊ߫ ߞߵߌ ߞߎ߲߬ߛߌ߲߫ ߛߌ߯ߙߌ߲߫ ߠߊ߫߸ ߞߎߘߍ߫ ߁߀߅ ߖߊ߬ߕߋ߫ ߟߋ߬߸ ߊ߬ ߓߏ߬ߙߌ ߓߘߊ߫ ߜߟߍ߬ߦߊ߬߸ ߝߏ߫ ߛߌߟߊ ߘߌ߫ ߞߍ߫ ߦߏ߫ ߊ߬ ߦߋ߫ ߕߍ߰ ߛߊ߬ߡߊ ߕߎ߬ߡߊ ߟߊ߫.

ߡߊ߲߬ߕߙߐ ߡߍ߲ ߦߋ߫ ߖߌߖߊ߲ߝߙߊ߫ ߞߊ߲߬߸ ߊ߬ ߦߋ߫ ߘߊߞߎ߲߫ ߛߌߦߊߡߊ߲߫ ߠߋ߬ ߘߐ߫، ߓߊ߬ߙߌ߬߸ ߛߌߟߊ߫ ߞߏ ߢߌ߲߬ ߠߋ߬ ߤߊߡߌ߲ ߦߴߊ߬ߟߎ߬ ߟߊ߫ ߕߋ߲߬ ߞߏߛߓߍ߫، ߊ߬ ߛߌ߰ߓߊ߮ ߟߎ߬ ߟߊ߫ ߝߐߟߌ߫ ߘߐ߫߸ ߛߌߟߊ߫ ߞߏ ߣߌ߲߬ ߦߴߊ߬ߟߎ߬ ߟߊ߫ ߓߐߒߣߘߐ ߟߊߜߟߍ߬ߦߊ߬ ߟߊ߫߸ߊ߬ߟߎ߬ ߟߊ߫ ߖߊ߲߬ߞߊ߬ߙߏ߬ߕߐ ߟߎ߫ ߕߊ߭ ߞߊ߬ ߥߴߊ߬ ߘߌ߫ ߢߝߍߟߊ ߘߐ߫߸ߊ߬ ߦߴߏ߬ ߜߟߍ߬ߦߊ߬ ߟߊ߫߸ ߤߊߟߵߊ߬ߟߎ߬ ߕߴߛߋ߫ ߢߊ߬ ߟߊ߫ ߝߋ߲ ߡߍ߲ ߠߎ߬ ߞߐ߫߸ ߏ߬ ߓߍ߯߸ ߡߊߛߐ߬ߘߐ߲ ߜߍ߬ߟߍ߲߬ߡߊ߲߬ ߛߌߟߊ ߢߌ߲߬ ߠߊ߫ ߕߌߢߍ ߞߏߛߐ߲߬.

ߡߊ߬ߡߊ߬ߘߌ߬ ߞߋߕߊ߬ ߡߍ߲ ߦߋ߫ ߖߌߖߊ߲ߝߙߊ߫ ߞߎ߲߬ߘߊ ߛߓߍߘߊ ߞߏ߲߬ߘߏ߬ߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߛߊ߬ߡߊ ߝߣߊ߫ ߦߋ߫ ߕߊ߬ߡߌ߲߬ ߠߊ߫ ߛߌߟߊ ߢߌ߲߬ ߠߊ߫ ߞߏ ߣߐߣߌ߲߫ ߠߊ߫ ߟߋ߬.

<<ߛߌߟߊ߫ ߕߴߊ߲ ߓߟߏ߫، ߛߊ߲ߖߌߓߊ ߓߊ߯ ߣߊ߬߸ ߖߌߖߊ߲ߝߙߊ߫ ߣߌ߫ ߛߌ߯ߙߌ߲߫ ߦߋ߫ ߓߟߏߓߐ߫ ߟߊ߫ ߟߋ߬ ߢߐ߲߯ ߓߟߏ߫، ߞߎߘߍ߫ ߁߀߅ ߟߋ߬ ߖߌߖߊ߲ߝߙߊ߫ ߣߌ߫ ߛߌ߯ߙߌ߲߫ ߕߍ߫߸ ߊ߬ ߛߌߟߊ߫ ߓߘߍ ߘߊ߲߭ ߠߋ߬ ߞߡߊ߬ߕߞߌ߬ߦߊ߬ ߘߌ߫߸ ߏ߬ ߦߋ߫ ߞߎߘߍ߫ ߓߌߛߓߊ߬ ߘߐߙߐ߲߫ ߠߋ߬ ߘߌ߫، ߊ߬ ߕߐ߭ ߛߌ߫ ߕߍ߫ ߛߐ߲߬، ߊ߬ ߖߍ߬ߘߍ߸ ߞߊ߬ ߓߐ߫ ߡߊ߲ߞߕߌ߫ ߡߊ߬ ߞߊ߬ ߛߋ߫ ߖߌߖߊ߲ߝߙߊ߫߸ ߏ ߕߍ߫ ߛߐ߲߬ ߠߋ߬ ߝߋߎ߫، ߣߌ߫ ߞߎ߲߬ߠߊ߬ߛߌ߮ ߟߎ߬ ߕߎ߲߬ ߘߌ߫ ߛߴߊ߬ߟߎ߬ ߢߊ ߟߐ߬ ߟߊ߫ ߛߌߟߊ ߢߌ߲߬ ߘߐ߫߸ ߏ߬ ߕߎ߲߬ ߘߌ߫ ߞߍ߫ ߘߤߊ ߘߌ߫ ߡߐ߰ ߥߊ߯ ߦߙߌߞߊ߫ ߟߋ߬ ߞߊ߲߬، ߊߟߎ߫ ߖߍ߬ߘߍ ߣߊ߬ߕߐ߬ߟߊ ߞߊ߬ ߛߌߟߊ ߦߋ߫ ߥߍ߫߸ ߊ߬ ߦߋ߫ ߛߌ߰ߝߊߘߌ ߡߍ߲ ߘߐ߫.>> ߊ߬ ߞߵߏ߬ ߢߊߝߐ߫.

ߛߌߟߊ ߟߊ߫ ߕߌߢߍ ߡߍ߲ ߘߏ߲߬ ߦߋ߫ ߣߌ߲߬߸ ߊ߬ ߕߙߐߦߊ ߦߴߊ߬ ߣߐ߭ ߟߊ߫ ߟߊ߫ ߖߎ߬ߟߦߊ߬ ߘߊߞߎ߲ ߠߎ߫ ߞߊ߲߬߸ ߞߍ߲ߘߍߦߊ ߟߊߛߐ߬ߘߐ߲ ߞߊ߲߬، ߖߌߖߊ߲ߝߙߊߞߊ ߟߎ߬ ߞߊ߲߫ ߠߋ߬߸ ߞߏ߫ ߖߊ߲߬ߞߊ߬ߙߏ߬ߕߐ ߕߊ߭ ߓߊ߯ ߟߐ߬ ߌ ߡߊ߬ ߞߊ߬ ߥߴߊ߬ ߘߌ߫ ߛߌ߯ߙߌ߲߫߸ ߊ߬ ߓߘߊ߫ ߕߏ߫ ߕߙߐߦߊ ߟߋ߬ ߡߊ߬ ߏ߬ ߘߌ߫.

ߢߊ߰ߟߋ߲߫ ߞߙߎ߬ߡߊ߬ ߡߍ߲ ߦߋ߫ ߖߌߖߊ߲ߝߙߊ߫ ߛߌ߰ߓߊ߮ ߘߏ߫ ߘߌ߫߸ ߏ߬ ߝߣߊ߫ ߞߵߊ߬ ߟߊߛߙߋߦߊ߫ ߞߏ߫ ߕߙߐߦߓߊ߫ ߟߋ߬ ߖߌߖߊ߲ߝߙߊߞߊ ߟߎ߫ ߞߊ߲߬߸ ߊ߬ ߕ߯ߕߌ߮ ߘߐ߫ ߡߛߏ߬ ߞߣߐߡߊ ߟߎ߬.

<<ߡߛߏ߬ ߞߣߐߡߊ ߟߊ߫ ߓߊ߯ߙߊ ߓߊ߯ ߘߊߡߌ߬ߣߊ߫ ߦߊ߲߬߸ ߣߴߌ ߦߴߊ߬ ߝߍ߬ ߞߵߊ߬ ߟߊߕߊ߯ ߝߌߝߊ߫ ߥߟߊ߫ ߛߌ߯ߙߌ߲߫߸ ߏ߬ ߡߊ߲߫ ߣߐ߲߰ ߘߋ߬، ߌ ߓߊ߯ ߖߎ߬ߟߦߊ߬ ߝߋ߲ ߠߎ߬ ߛߊ߲߬ ߞߊ߬ ߓߐ߫ ߛߌ߯ߙߌ߲߫ ߞߏ߫ ߌ ߣߊ߬ߕߐ߫ ߊ߬ ߘߌ߫ ߖߌߖߊ߲ߝߙߊ߫߸ ߊ߬ ߘߌ߫ ߞߍ߫ ߦߏ߫ ߊ߬ߟߎ߬ ߦߋ߫ ߕߌߢߍ߫ ߛߌߟߊ ߟߊ߫߸ ߤߊߞߍߕߏ߫ ߛߌߟߊ ߡߊ߫ ߢߌ߲߬.>> ߡߏ߬ߛߏ ߢߌ߲߬ ߡߐߣߍߣߍ߲ ߞߵߏ߬ ߟߊߛߋ߫.

ߢߊ߰ߟߋ߲ ߦߴߊ߬ ߝߐ߫ ߟߊ߫ ߝߣߊ߫߸ ߞߏ߫ ߤߊߟߌ߬ ߓߊߟߏ߫ ߛߎߡߊ߲ ߠߎ߬ ߡߊߛߐ߬ߘߐ߲߬ ߖߌߖߊ߲ߝߙߊ߫ ߓߟߏ߫߸ ߏ߬ ߓߍ߯ ߦߋ߫ ߕߙߐߦߊ ߟߋ߬ ߘߴߊ߬ߟߎ߫ ߞߊ߲߬.

<<ߊ߬ ߛߊ߲߬ ߞߋߟߋ߲ ߠߋ߬ ߕߋ߲߬߸ ߊ߲ ߕߍ߫ ߛߋ߫ ߟߊ߫ ߣߊ߬ ߟߊ߫ ߛߎ߬ߡߊ߲߬ ߘߌ߫ ߦߊ߲߬، ߓߊߏ߬߸ ߘߎ߰ߞߎߟߎ߲ ߠߎ߬ ߕߴߛߋ߫ ߟߊ߫ ߣߊ߬ ߟߊ߫߸ ߊ߲ ߠߊ߫ ߡߊ߬ߟߏ ߟߎ߬ ߦߋ߫ ߣߊ߬ ߟߊ߫ ߞߎߟߎ߲ ߠߋ߬ ߞߣߐ߫.>> ߊ߬ ߞߵߏ߬ ߟߊߛߋ߫.

ߞߊ߬ ߓߍ߲߬ ߕߙߐߦߊ ߏ߬ ߟߋ ߡߊ߬ ߛߊ߫߸ ߖߌߖߊ߲ߝߙߊߞߊ ߟߎ߬ ߣߕߊ߬ߣߍ߲߫ ߓߌ߬ ߞߏߛߓߍ߫߸ ߞߎ߲߬ߠߊ߬ߛߌ߮ ߦߴߊ߬ ߛߋߞߏ ߞߍ߫ ߊ߬ߟߎ߬ ߟߊ߫ ߛߌߟߊ߫ ߞߏ ߢߌ߲߬ ߘߐ߫߸ ߞߊ߬ ߓߐ߫ ߛߌ߯ߙߌ߲߫ ߞߵߌ ߞߎ߲߬ߛߌ߲߫ ߊ߬ߟߎ߬ ߓߘߊ ߟߊ߫، ߏ߬ ߘߐ߫߸ ߊ߬ߟߎ߬ ߞߊ߲߫ ߞߏ߫ ߣߌ߫ ߛߌߟߊ ߢߌ߲߬ ߛߘߋ߫ ߘߊ߫ ߘߐߓߍ߲߬ ߠߊ߫߸ ߏ߬ ߘߌ߫ ߞߍ߫ ߕߙߎ߬ ߘߌ߫߸ ߞߊ߬ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߡߊߘߏ߬ߣߌ߲ ߣߐ߰ߦߊ߫߸ ߞߊ߬ ߓߊ߲߫ ߞߊ߬ ߞߍ߲ߘߍߦߊ ߡߊߛߐ߬ߘߐ߲ ߝߣߊ߫ ߠߊߛߣߐ߬ߦߴߊ߬ߟߎ߫ ߡߊ߬.