ߕߎ߬ߡߊ߬ߙߋ߲߬ ߘߊ߲ߘߐ߫ ߟߋ߬ ߕߏ߫ ߘߊ߫ ߞߏ߲ߓߌߕߌ߮ ߕߋ߬ߟߋ߫ ߂ ߢߊ߰ߢߊ߮ ߟߊ߫߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߟߐ߬ ߡߌ߬ߙߌ߲߬ߘߌ ߢߊߞߘߐ߫ ߂߀ߙߋ߲ ߡߊ߬߸ ߞߊ߬ ߞߎߟߎ߲ߖߋߟߌ ߝߏ߬ߟߌ ߟߊߛߋ߫ ߘߍ߲ߒߖߘߍߟߦߊ ߛߐ߬ߘߐ߲ ߛߍ߬ߘߏ߲߬ߠߊ ߟߎ߫ ߡߊ߬߸ ߡߍ߲ ߠߎ߬ ߞߵߊ߬ߟߎ߫ ߖߘߍ߬ ߛߘߊߞߊ߫ ߝߊ߬ߛߏ ߦߋ߫.

ߊ߬ ߞߵߊ߬ ߟߊߛߋ߫ ߏ߬ ߟߋ ߘߐ߫ ߞߏ߫: <<߁߉߅߈ ߞߏ߲ߓߌߕߌ߮ ߕߋ߬ߟߋ߫ ߂ ߟߋ߬ ߡߊ߬߸ ߖߌ߬ߣߍ߫ ߞߊ߬ ߞߊ߲ߠߊߓߌߟߊ ߛߎߥߊ߲ߘߌ߫߸ ߞߊ߬ ߓߊ߲߫ ߞߵߊ߬ ߖߍ߬ߘߍ߫ ߓߌ߬ߟߊ߫ ߝߘߊ߬ߝߌ߲߬ߠߊ߫ ߡߎ߰ߡߍ ߛߊ߬ߥߏ߬ ߘߐ߫ ߖߘߍ߬ߕߌ߰ߦߊ ߛߌߟߊ ߕߊ߯ߡߊ ߘߐ߫߸ ߊ߬ ߣߌ߫ ߛߐ߬ߘߐ߲ ߝߏ߲߬ߘߏ߬ ߞߎߥߊߞߎߥߊ ߞߊ߲߬ ߣߌ߬ ߕߡߊ߬ߖߌ߬ ߕߍ߫.>> ߊ߬ ߞߵߏ߬ ߝߐ߫.

ߊ߬ ߞߊ߬ ߊ߬ߟߌ߬ߡߊߡߌ߲߫ ߛߊ߬ߡߘߎ߬ߜߍ߫ ߕߎ߬ߙߋ߬ ߕߐ߮ ߝߐ߫߸ ߊ߬ ߣߌ߫ ߊߟߌߝߊ߫ ߦߊߦߊ߫ ߖߊߟߏ߫ ߣߌ߫ ߖ߭ߓߋߟߊ߫ ߕߏ߬ߜߊ ߔߌ߯ߝ߭ߌ߫ ߣߌ߫ ߘߌߣߊ߫ ߛߊߟߌߝߎ߬، ߞߊ߲ߕߌ߮ ߞߵߊ߬ ߦߌ߬ߘߊ߬߸ ߞߏ߫ ߏ߬ ߟߎ߫ ߞߊ߬ ߗߍ ߡߍ߲ ߕߏ߫߸ ߏ߬ ߡߊ߲߫ ߞߊ߲߫ ߟߊߓߌ߬ߟߊ߬߸ ߝߏ߫ ߞߊ߬ ߖߊ߲߬ߕߏ߬ ߞߍ߫ ߏ߬ ߘߐ߫ ߟߋ߬.

<<ߖߘߍ߬ߕߌ߰ߦߊ ߓߊ߯ ߛߐ߬ߘߐ߲߬߸ ߏ߬ ߕߴߊ߬ ߓߊ߲ߣߍ߲߫ ߘߌ߫ ߘߋ߬߸ ߝߏ߫ ߞߵߊ߬ ߡߊߞߊ߲ߞߊ߲߫ ߠߋ߬߸ ߞߵߊ߬ ߘߐߓߍ߲߬߸ ߞߊ߬ ߖߊ߲߬ߕߏ߬ ߞߍ߫ ߊ߬ ߘߐ߫ ߛߎ ߣߌ߫ ߕߋ߬ߟߋ.>> ߊ߬ ߞߵߏ߬ ߝߐ߫ ߞߵߊ߬ ߟߊߕߍ߰.

ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߣߴߊ߬ ߟߊ߫ ߓߊ߬ߛߊ߲߬ߜߍ ߟߐ߬ߣߍ߲ ߓߊ߲ߓߋ ߟߊ߫߸ ߊ߬ ߞߵߊ߬ ߞߊ߲ߕߏ߫ ߊ߬ ߟߊ߫ ߓߋߟߋ߲ߠߊ ߦߙߐ߫ ߕߣߐ߬ߡߊ߬ ߜߘߍ߫ ߞߊ߲߬߸ ߡߍ߲ ߟߐ߬ߣߍ߲߬ ߘߋ߲ߡߌߛߍ߲ ߠߎ߫ ߡߊ߬، ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߡߐ߱ ߟߎ߬ ߦߟߌߓߌ߬ߟߊ߬߸ ߞߏ߫ ߌ ߓߊ߯ ߖߌ߬ߣߍ߬ߞߊ ߓߍ߯ ߟߊߞߊ߬ߝߏ߬߸ ߌ ߘߴߊ߬ ߦߋ߫ ߞߏ߫ ߘߋ߲ߡߌߛߍ߲ ߠߎ߫ ߟߋ߬ ߞߊ߫ ߛߌߦߊ߫، ߓߊߏ߬߸ ߛߌ߰ߓߊ߰ ߓߙߍ߬ߟߐ߲ ߖߊ߬ߕߋ߬ߛߎ߬ߓߐ ߡߍ߲ ߞߍ߫ ߘߊ߫߸ ߊ߬ ߦߋ߫ ߘߴߏ߬ ߞߐߝߟߌ ߘߐ߫ ߞߏ߫ ߖߌ߬ߣߍ߬ߞߊ %߇߀ ߓߍ߯ ߦߋ߫ ߛߊ߲߬ ߃߅ ߘߎ߰ߟߊ߫ ߟߋ߬. ߏ߬ ߟߵߊ߬ ߦߌ߬ߘߊ߬ ߟߊ߫ ߞߏ߫ ߖߡߊ߬ߣߊ ߦߴߊ߬ ߕߊ߲ߣߝߌߟߊߝߟߌ ߟߋ߬ ߘߐ߫ ߕߋ߲߬.

ߞߊ߲ߕߌ߮ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫: <<ߒ ߞߵߊ߬ ߟߐ߲߫ ߌ ߕߴߛߋ߫ ߌ ߡߎ߬ߢߎ߲߬ ߠߊ߫، ߒ ߧߴߊ߬ ߞߊ߬ߟߊߡߊ߬ ߕߊߦߌ߫߸ ߞߏ߫ ߊ߬ ߦߋ߫ ߖߌ߬ߣߍ߬ߞߊ߬ ߘߋ߲ߡߌߛߍ߲ ߝߊ߲߬ߓߊ ߞߎ߲߭ ߘߐ߫ ߟߋ߬߸ ߞߏ߫ ߊ߬ߟߎ߬ ߕߴߛߋ߫ ߞߍ߫ ߟߴߊ߬ߟߎ߬ ߘߌߦߊ߫ ߝߏ߫ ߊ߬ߟߎ߬ ߓߊ߯ ߥߊ߫ ߞߐ߰ߖߌ ߞߐߝߍ߬، ߣߴߊ߬ ߡߊ߫ ߢߊ߬ ߞߏ߫ ߒߠߋ ߟߋ߬ ߞߊ߲ߕߌ߮ ߘߌ߫߸ ߒ ߧߋ߫ ߞߏߡߊ ߣߌ߲߬ ߛߓߍ߬ ߞߘߐ߬ ߝߐ ߞߍ߫ ߌ ߦߋ߫ ߓߌ߬ ߥߛߊߞߙߊ߫: ߌ ߟߊ߫ ߛߌߣߌ߲ߢߍߛߌ߮ ߦߋ߫ ߦߊ߲߬ ߠߋ߬، ߌ ߜߎ ߛߌ߰ ߦߙߐ ߦߋ߫ ߦߊ߲߬ ߠߋ߬.>> ߞߊ߲ߕߌ߮ ߞߵߏ߬ ߝߐ߫.

ߘߎߢߊ߫ ߦߋ߫ ߕߟߋ߬ ߞߎߘߊ ߡߍ߲ ߘߐ߫ ߣߌ߲߫߸ ߝߊ߲߬ߞߊ߬ߡߊ ߟߎ߬ ߦߴߊ߬ߟߎ߫ ߛߊ߬ߥߏ߬ ߞߍ߬ ߕߟߋ ߟߋ߬ ߘߐ߫، ߒ߬ߓߊ߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߕߡߊ߬ߖߌ ߓߐ߫ ߓߍ߯ ߘߐ߫߸ ߞߏ߫ ߖߌ߬ߣߍ߬ ߕߴߊ߬ ߕߏ߲ߞߊ߲߫ ߠߴߊ߬ ߛߋ߲߭ ߠߊ߫ ߡߐ߰ ߜߘߍ߫ ߟߊ߫ ߖߋߟߌ߫ ߞߏߛߐ߲߬߸ ߝߊ߲߬ߞߡߊ߬ ߛߌ߫ ߘߏ߲߬ ߕߍ߫ ߖߌ߬ߣߍ߬ ߞߏ߫ ߟߊߕߍ߰ ߊ߬ ߖߍ߬ߘߍ߫ ߛߊ߬ߥߏ߬ ߟߊ߫߸ ߖߌ߬ߣߍ߫ ߖߡߊ߬ߣߊ ߖߍ߬ߘߍ ߦߴߊ߬ ߝߍ߬ ߞߵߊ߬ ߟߊ߫ ߞߏ ߟߎ߬ ߞߍ߫ ߢߊ ߡߍ߲ ߡߊ߬߸ ߊ߬ ߞߍߕߐ߫ ߕߋ߲߬ ߠߋ߬.

ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߎߡߊ߫ ߘߊ߫ ߛߌ߬ߡߊ߲߬ߘߎ߯ ߂߀߄߀ ߢߍߥߟߊ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߛߌߡߊ߲ߘߎ߯ ߘߊ߲߬ ߕߍ߫ ߘߊ߬ߡߊ߲߬ߛߋ߲ ߣߌ߫ ߦߙߐ߫ ߟߐ ߞߋߟߋ߲߫ ߘߌ߫ ߘߋ߬.

<<ߊ߬ ߞߍߕߐ߫ ߟߋ߬߸ ߘߊ߬ߡߊ߲߬ ߢߍ ߞߕߌߙߌ ߡߍ߲ ߺ ߍ ߺ ߡߍ߲߫ ߓߊ߯ ߓߐ߫ ߊ߲ ߠߊ߫ ߘߎ߱ ߘߐ߫߸ ߏ߬ ߞߋ߬ߟߋ߲߬ߞߋ߬ߟߋ߲߬ߠߊ ߞߍߕߐ߫ ߊ߲ ߘߋ߲ ߠߎ߬ ߟߊ߫ ߛߌߣߌ߲ߢߍߛߌ߯ ߖߐ߲ߖߐ߲ ߠߋ߬ ߕߏ߫ ߟߴߊ߬ ߞߐ߫.>> ߊ߬ ߞߵߏ߬ ߢߊߝߐ߫߸ ߞߵߊ߬ ߦߌ߬ߘߊ߬ ߞߏ߫ ߛߌߡߊ߲ߘߎ߯ ߛߘߊ߫ ߘߐ߫߸ ߟߊ߬ߞߐ߰ߟߌ߬ ߓߟߋߓߟߋ ߟߎ߬ ߘߌ߫ ߛߌ߰ ߛߋ߲߬ߠߊ߫߸ ߗߋ߬ߥߎ߬ߣߍ߲߬ߗߋ߬ߥߎ߬ߦߊ ߟߊ߬ߞߐ߰ߟߌ߸ ߛߋߒߞߏߟߊ ߟߎ߬ ߣߌ߫ ߥߊߟߌߝߊ ߟߎ߬߸ ߏ߬ ߟߎ߬ ߘߌ߫ ߟߊߞߐ߯، ߞߊ߬ߙߊ߲߬ߓߏ߲ ߠߎ߬ ߘߌ߫ ߟߐ߬߸ ߘߊ߲ߘߊߛߏ ߟߎ߬ ߣߌ߫ ߛߌߟߊ߫ ߞߏ ߟߎ߫ ߕߊ߬ߣߍ߲ ߞߵߊ߬ ߟߊ߫ ߘߍ߲߰ߘߊ ߟߎ߫ ߞߊ߲߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߦߋ߫ ߓߍ߯ ߡߊߞߟߌ߫ ߟߊ߫ ߓߍ߲߭ ߠߋ߬ ߡߊ߬߸ ߞߊ߬ ߛߋ߫ ߝߊ߬ ߓߘߊ ߟߊߥߙߎߞߌ߫ ߟߊ߫. ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫ : <<ߖߌ߬ߣߍ߫ ߖߡߊ߬ߣߊ ߕߍ߫ ߓߊߓߏ߲߫ ߞߋߟߋ߲߫ ߝߏߦߌ߬ ߟߋ߬ ߕߊ߫ ߘߌ߫: ߊ߬ ߦߋ߫ ߖߌ߬ߣߍ߬ߞߊ ߟߎ߫ ߖߘߍ߬ߓߊ߬ߞߎ߲ ߠߋ߬ ߕߊ߫ ߘߌ߫.>> ߞߵߊ߬ ߦߌ߬ߘߊ߫ ߏ߬ ߘߐ߫ ߞߏ߫ ߖߡߊ߬ߣߊ ߟߊ߫ ߞߏ ߦߋ߫ ߓߍ߯ ߟߊ߫ ߞߏ ߟߋ߬ ߘߌ߫.

ߞߊ߲ߕߌ߯ ߘߎ߲߬ߓߎߦߊ߬ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߫ ߛߌ߰ߣߍ߲߬ ߞߏ߫ ߛߊ߬ߓߊ߫ ߟߋ߬ ߡߊ߬߸ ߓߊ߯ߙߊ߸ ߕߋߟߋ߲߸ ߢߐ߲߯ߘߍߡߍ߲. ߏ߬ ߘߐ߫߸ ߊ߬ ߞߵߊ߬ ߞߊ߲ߠߊߘߌ߫߸ ߞߏ߫ ߓߍ߯ ߦߋ߫ ߓߊ߯ߙߊ߫ ߞߏ߫ ߛߊ߬ߓߊ ߏ߬ ߛߌߟߊ ߟߋ߬ ߞߊ߲߬.

ߊ߬ ߟߊ߫ ߓߋߟߋ߲ߠߊ ߟߊߓߊ߲߫ ߝߊ߲ ߝߍ߬߸ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߞߏ ߓߍ߯ ߘߐ߫ ߛߊ߲ߘߐߕߊ ߦߋ߫ ߡߍ߲ ߘߌ߫߸ ߏ߬ ߟߋ ߖߡߊ߬ߣߊ ߘߎ߰ߞߟߏ ߣߴߊ߬ ߘߎ߰ߘߐ߬ߝߋ߲ ߠߎ߬ ߡߊߞߊ߲ߞߊ߲ ߘߌ߫.

ߊ߬ ߞߵߊ߬ ߝߐ ߏ߬ ߟߋ ߘߐ߫ ߝߣߊ߫߸ ߞߏ߫: <<ߖߌ߬ߣߍ߫ ߡߌ߬ߙߌ߲߬ߘߌ߫ ߖߘߍ߬ߕߌ߮ ߕߊ ߦߋ߫ ߊ߬ ߛߎ߯ ߺ ߎ ߺ ߛߎ߯ ߘߌ߫߸ ߒ ߕߴߏ߬ ߕߏ߫ ߡߐ߰ ߓߟߏ߫، ߊ߬ ߞߍ߫ ߘߊ߫ ߘߎ߰ߞߟߏ߫ ߘߌ߫߸ ߓߟߏߝߋ߲߫ ߘߌ߫߸ ߟߊ߲߬ߓߋ߬ ߘߌ߫. ߒ ߕߍ߫ ߒ ߓߟߏߓߐ߫ ߟߴߏ߬ ߘߐ߫ ߡߎ߰ߡߍ߫.>>

ߊ߬ ߞߵߊ߬ ߟߊ߫ ߓߋߟߋ߲ߠߊ ߞߎ߲߭ߝߊ߰ ߡߍ߲ ߠߊ߫߸ ߏ߬ ߟߋ ߘߋ߲ߡߌߛߍ߲ ߠߎ߬ ߞߟߌ ߘߌ߫߸ ߞߏ߫ ߊ߬ߟߎ߬ ߦߋ߫ ߁߉߅߈ ߕߎߟߊߝߌ߲ <<ߞߊ߯ߙߌ>> ߦߟߍ߬ߡߊ߲߫ ߞߵߊ߬ ߞߍ߫ <<ߤߊ߯ߟߌ߫>> ߘߌ߫ ߘߋ߲ߡߌߛߍ߲ ߠߎ߬ ߞߐ߲߬ߞߐ߲߬ ߘߐ߫߸ ߡߍ߲ ߘߌ߫ ߖߡߊ߬ߣߊ ߟߊߥߙߎߞߌ߫. <<ߞߵߊ߬ ߞߍ߫ ߤߊ߯ߟߌ ߘߌ߫ ߞߍߢߐ߯ߝߍ ߤߊ߯ߟߌ ߟߊ߫߸ ߛߌߣߌ߲ߢߍߛߌ߮ ߤߊ߯ߟߌ ߘߌ߫߸ ߓߏ߲߬ߧߊ ߤߊ߯ߟߌ.>>