ߓߊ߯ߙߊ ߘߐ߫ ߓߌ߬ߟߊ߬ߒ߬ߘߐ߬ߖߎ߮߸ ߏ߬ ߟߋ ߣߐ߬ ߓߊߘߋ߲ ߘߏ߫ ߟߎ߫ ߛߐ߬ߘߐ߲߬ ߠߊ߫ ߞߊ߲ߞߊ߲߫ ߒߓߊ߯ߟߌߦߊ߫ ߝߊ߬ߙߊ ߺ ߞߣߐ߫ ߂߲ ߞߌ߲߬ߘߊ ߟߊ߫ ߓߌ߬ ߞߐ߬ߟߏ߲ ߣߌ߲߬ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߆߸ ߞߊ߲ߞߊ߲߫ ߛߏ ߞߣߐ߫، ߞߊ߬ߕߎ߲߯߸ ߊ߬ߟߎ߬ ߦߋ߫ ߓߊ߯ߙߊ߫ ߟߊ߫ ߥߊߦߌ߲ ߡߍ߲ ߠߊ߫߸ ߣߴߊ߬ߟߎ߬ ߦߴߊ߬ߟߎ߬ ߟߊ߫ ߕߊߓߘߎ ߟߊߓߊ߯ߙߊ߫ ߟߴߊ߬ ߟߊ߫߸ ߏ߬ ߟߋ ߝߏߘߏ߲ߣߍ߲߫ ߓߊ߯ߙߊ߫ ߦߙߐ ߣߌ߲߬ ߘߐ߫߸ ߞߊ߬ ߡߊ߲߬ߕߙߐ ߟߊߛߋ߫ ߡߐ߰ ߛߌߦߊߡߊ߲߫ ߡߊ߬، ߛߙߋ ߟߎ߫ ߖߍ߬ߘߍ ߞߊ߲߫ ߞߏ߫ ߡߐ߰ ߝߌ߬ߟߊ߫ ߟߋ߬ ߝߊ߰ ߘߊ߫ ߞߏ ߘߊߞߎ߲ ߘߐ߫ ߦߋ߲߬߸ ߞߊ߬ ߡߐ߰ ߛߌߦߊߡߊ߲߫ ߜߘߍ߫ ߟߎ߫ ߖߐߞߌ߫.

ߟߊ߬ߛߙߋ߬ߦߊ߬ߟߌ߬ ߛߊߌߦߊߡߊ߲߫ ߞߍ߫ ߘߊ߫ ߦߙߐ ߘߐ߫ ߦߋ߲߬߸ ߡߍ߲ ߠߎ߬ ߦߴߊ߬ ߦߌ߬ߘߊ߬ ߟߊ߫ ߟߊ߫ ߞߏ߫ ߓߊ߯ߙߟߊ ߢߌ߲߬ ߠߎ߫ ߕߘߍ߬ ߘߋ߲ߠߊߓߐ߫ ߦߙߐ ߘߏ߫ ߟߋ߬ ߘߐ߫ ߊ߬ߟߎ߬ ߟߊ߫ ߓߊ߯ߙߊ߫ ߦߙߐ ߘߊߝߍ߬߸ ߊ߬ߟߎ߬ ߓߐߣߍ߲߫ ߦߋ߲߬ ߠߋ߬ ߞߊ߬ ߣߊ߬ ߓߊ߯ߙߊ ߘߊߡߌ߬ߣߊ߬، ߏ߬ ߟߋ ߞߐ ߞߍߣߍ߲߫ ߥߊߦߌ߲ ߝߏߘߏ߲߫ ߢߊ ߘߌ߫߸ ߞߊ߬ ߕߌߢߍߟߌ ߞߍ߫.

ߛ߭ߍߞ ߎߡߊߙ ߞߋߕߊ߬ ߡߍ߲ ߦߋ߫ ߕߙߏ߬ߞߏ߬ߦߊ߬ߟߊ߫ ߘߌ߫ ߦߙߐ ߣߌ߲߬ ߘߐ߫߸ ߊ߬ ߣߌ߫ ߞߏ ߕߊ߬ߡߌ߲߬ ߘߴߊ߬ ߝߣߊ߫ ߢߣߊ߫ ߟߋ߬߸ ߏ߬ ߞߊ߬ ߘߏ߫ ߢߊߝߐ߫ ߣߌ߲߬ ߞߏ ߘߐ߫:

<<ߊ߬ߟߎ߬ ߕߏ߫ ߘߊ߫ ߓߊ߯ߙߊ ߟߋ߬ ߟߊ߫߸ ߥߙߏ߬ߝߋ߬ߖߟߎ ߔߏߦߌ߫ ߘߊ߫، ߒ߬ߓߊ߬߸ ߖߎ߬ߟߎ ߔߏߦߌ ߡߍ߲ ߞߍߣߴߏ߬ ߘߌ߫߸ ߊ߬ ߡߊ߫ ߛߋ߫ ߡߊߣߐ߬ ߟߊ߫ ߡߎ߬ߕߎ߲߬، ߏ߬ ߟߋ ߞߍ߫ ߘߊ߫ ߝߏߘߏ߲ ߥߟߌ߬ ߢߊ ߘߌ߫.>> ߊ߬ ߞߵߏ߬ ߟߊߛߙߋߦߊ߫.

ߊ߬ߟߋ ߟߊ߫ ߝߐߟߌ߫ ߘߐ߫߸ ߓߊ߯ߙߊ߫ ߦߙߐ ߞߎ߲߬ߕߌ߰ߓߊ߸ ߊ߬ ߣߌ߫ ߘߋ߲ߣߍ߲߫ ߞߋߟߋ߲߫߸ ߏ߬ ߟߎ߫ ߟߋ߬ ߓߣߐ߬ ߘߴߊ߬ߟߎ߬ ߣߌ ߘߐ߫ ߦߋ߲߬، ߞߊ߬ ߡߐ߰ ߛߌߦߊߡߊ߲߫ ߡߊߘߌߡߌ߲߫߸ ߘߏ߫ ߟߎ߫ ߕߊ ߖߎ߯ߡߊ߲߫ ߞߏߛߓߍ߫.

ߡߍ߲ ߠߎ߬ ߕߍ߬ߘߍ߫ ߊ߬ ߘߊߞߎ߲ ߘߐ߫߸ ߏ߬ ߘߏ߫ ߟߎ߫ ߡߊߘߌߡߌ߲߫ ߘߊ߫، ߡߍ߲ ߠߎ߬ ߡߊߕߊ߯ߣߍ߲߫ ߕߍ߬ߘߍ߫ ߊ߬ ߟߊ߫߸ ߏ߬ ߘߏ߫ ߟߎ߫ ߟߋ߬ ߛߊ߬ߣߍ߲߫، ߣߴߏ߬ ߕߍ߫߸ ߡߍ߲ ߠߎ߬ ߕߍ߬ߘߍ߫ ߊ߬ ߘߊߞߎ߲ ߘߐ߫߸ ߘߏ߫ ߟߎ߫ ߓߟߏ ߕߍ߰ ߘߴߊ߬ ߟߊ߫߸ ߘߏ߫ ߟߎ߫ ߛߋ߲߭ ߕߍ߰ ߘߴߊ߬ ߟߊ߫، ߘߏ߫ ߟߎ߫ ߝߣߊ߫ ߡߊߘߌߡߌ߲߫ ߞߏߖߎ߯ߦߊ ߞߍ߫ ߘߊ߫، ߏ߬ ߟߎ߬ ߘߌ߫ ߓߐ߫ ߊ߬ ߘߐ߫߸ ߊ߬ߟߎ߬ ߕߍ߫ ߓߐ߫ ߊ߬ ߘߐ߫߸ ߏ߬ ߟߐ߲ߣߍ߲߫ ߕߍ߫.>> ߊ߬ ߞߵߏ߬ ߦߌ߬ߘߊ߬.

ߊ߬ ߞߵߊ߬ ߦߌ߬ߘߊ߬ ߞߏ߫߸ <<ߞߏ߬ߣߌ߲߬ ߜߍ ߘߐ߫ ߦߊ߲߬ ߌߞߘߐ߫߸ ߡߐ߰ ߝߌ߬ߟߊ߫ ߟߋ߬ ߝߊ߰ߣߍ߲߫، ߓߊߏ߬߸ ߊ߲ ߠߊ߫ ߡߍߕߙߌߓߊ߸ ߏߎ߬ ߛߊ߬ߣߍ߲߫ ߠߋ߬ ߌߞߘߐ߫߸ ߊ߬ ߣߌ߫ ߘߋ߲ߣߍ߲ߣߍ߲ ߘߏ߫ ߝߣߊ߫ ߕߍ߬ߘߍ߫ ߦߊ߲߬߸ ߏ߬ ߝߣߊ߫ ߛߊ߬ ߘߊ߫ ߟߋ߬ ߒߕߟߋߡߊ߬.>> ߊ߬ ߞߵߏ߬ ߟߊ߫ ߞߎߡߊ ߞߊ߲߬.

ߤߊߥߊ߬ ߕߙߊߥߟߋ߫ ߡߍ߲ ߝߣߊ߫ ߦߋ߫ ߝߊ߬ߙߊ ߺ ߞߣߐ߫ ߂߲ ߞߌ߲߬ߘߊ ߛߌ߰ߓߊ߮ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߖߍ߬ߘߍ ߞߵߊ߬ ߖߌ߰ ߟߋ߬ ߡߎߣߎ߲߬ ߞߏ߫ ߊ߬ ߟߊ߫ ߕߟߋ߬ߥߟߊ ߟߋ߬ ߝߏߘߏ߲ߣߍ߲߫.

ߊ߬ߟߋ߫ ߞߵߊ߬ ߦߌ߬ߘߊ߬ ߞߏ߫: <<ߊ߲ ߛߌ߰ߣߍ߲ ߠߋ߬ ߕߏߣߍ߲߫߸ ߊ߲ ߞߊ߬ ߡߊ߲߬ߞߊ߲ ߣߌ߲߬ ߡߍ߲߫߸ ߊ߰ ߒߠߋ ߖߍ߬ߘߍ ߢߣߊ߫ ߒ ߞߏ߫ ߒ ߠߊ߫ ߕߟߋ߬ߥߟߊ ߟߋ߬ ߝߏߘߏ߲ߣߍ߲߫߸ ߡߐ߱ ߟߎ߬ ߞߊ߲߫ ߞߏ߫ ߝߏߘߏ߲ ߠߋ߬ ߘߐߝߏߘߏ߲ߣߍ߲߫، ߊߟߊ߫ ߞߵߊ߬ ߞߍ߫ ߊ߲ ߓߍ߯ ߞߵߊ߲ ߞߎ߲߭ ߡߊߖߌ߰߸ ߣߴߏ߬ ߕߍ߫ ߊ߬ ߕߎ߲߬ ߘߵߊ߲ ߝߊ߰߸ ߊ߲ ߞߵߊ߬ ߞߎߟߎ߲ߠߡߊ ߦߋ߫ ߕߊ߬ߡߌ߲߬ ߠߴߊ߲ ߞߎ߲߬ߠߊ߫.>> ߡߏ߬ߛߏ ߣߌ߲߬ ߞߵߏ߬ ߦߌ߬ߘߊ߬.

ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߡߴߊ߬ ߟߐ߲߫ ߝߋ߲߫ ߞߋߟߋ߲ ߡߍ߲ ߕߋ߬ ߘߊ߫، ߞߏ߫ ߊ߬ߟߋ ߞߵߊ߬ ߞߎߟߎ߲ߠߡߊ ߟߋ߬ ߦߋ߫ ߕߊ߬ߡߌ߲߬ ߠߊ߫ ߕߋ߲߬، ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߓߏ߲ ߛߊ߲ߓߏ߲ ߠߊߥߟߌ߬ ߘߊ߫ ߟߋ߬߸ ߊ߬ ߣߴߊ߬ ߟߊ߫ ߢߍ߲߮ ߞߏߞߏ߸ ߞߵߏ߬ ߟߊߓߋ߬. ߊ߬ ߞߵߊ߬ ߟߴߊ߬ ߞߊ߲߬ ߞߏ߫ ߊ߬ ߟߊ߫ ߡߐ߰ ߛߌ߫ ߞߏ߬ߣߌ߲ ߡߊ߫ ߞߏ߫ ߛߐ߬ߘߐ߲߬.

ߟߊ߬ߡߌߣ ߟߊߓߏ߫ ߞߙߎ߬ߡߊ߬ ߡߍ߲ ߦߋ߫ ߞߊ߲ߞߊ߲߫ ߞߊ߬ߝߏ߬ߙߋ߲߬ߕߌ߮ ߘߌ߫߸ ߏ߬ ߞߵߊ߬ ߛߋ߲߬ߝߊ߫ ߞߊ߬ ߥߊ߫ ߛߋ߫ ߘߌ߲߬ߞߌߙߊ ߢߌ߲߬ ߘߐ߫߸ ߞߊ߬ ߓߐ߫ ߦߋ߲߬ ߝߣߊ߫ ߞߵߊ߬ ߞߎ߲߬ߛߌ߲߫ ߞߊ߲ߞߊ߲߫ ߘߊ߲ߘߊߛߏߓߊ ߟߊ߫.

ߊ߬ߟߋ߫ ߞߵߊ߬ ߦߌ߬ߘߊ߬߸ ߞߏ߫: <<ߕߎ߬ߢߊ ߦߋ߫ ߡߍ߲ ߘߌ߫߸ ߊ߲ ߛߎ߬ߣߍ߲߬ߣߍ߲߫ ߓߌ߬ ߞߏߛߓߍ߫، ߞߎߡߊ߫ ߖߘߍ߬ ߕߴߊ߲ ߞߣߐ߫߸ ߊ߲ ߘߌ߫ ߡߍ߲ ߝߐ߫، ߓߊߏ߬߸ ߊ߲ ߠߊ߫ ߘߎ߰ߘߋ߲ ߘߏ߫ ߟߎ߫ ߟߋ߬ ߓߣߐ߬ߣߴߊ߬ߟߎ߬ ߣߌ ߘߐ߫ ߣߌ߲߬.>> ߞߊ߬ߝߏ߬ߙߋ߲߬ߕߌ߮ ߞߵߏ߬ ߟߊߛߋ߫.

ߊ߬ ߓߊ߲߫ ߘߊ߫ ߞߵߊ߬ ߝߐ߫ ߞߏ߫ ߝߏ߫ ߞߊ߬ ߓߊ߯ߙߟߊ ߟߎ߫ ߛߏ߬ߓߌ߬ߟߊ߬ߞߎߣߎ߲߫ ߠߋ߬߸ ߞߊ߬ ߓߍ߲߬ ߓߊ߯ߙߊ ߓߌ߬ߟߊ߬ߒ߬ߘߐ߬ߖߎ߮ ߟߎ߬ ߟߊ߫ ߞߏ ߡߊ߬.

ߡߍ߲ ߓߍ߲߬ߣߍ߲߫ ߊ߬ ߝߐ ߡߊ߬ ߞߏ߫ ߡߐ߰ ߖߊ߬ߕߋ ߢߌ߲߬ ߠߋ߬ ߝߊ߰ߣߍ߲߫ ߥߟߊ߫ ߞߵߊ߬ ߡߊߘߌߡߌ߲߫߸ ߞߊ߬ߝߏ߬ߙߋ߲߬ߕߌ߮ ߞߵߊ߬ ߦߌ߬ߘߊ߬ ߞߏ߫ ߝߏ߫ ߞߊ߬ ߢߡߊߟߐ߫ ߞߍ߫ ߏ߬ ߞߏ ߝߍ߬، ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߕߋ߲߭ߕߋ߲߭ ߣߌ߲߬ ߘߐ߫߸ ߝߏ߫ ߊ߲ ߧߴߊ߲ ߖߊ߲߬ߕߏ߫߸ ߞߊ߬ ߘߊ߲ߘߊߟߌߟߊ ߟߎ߬ ߡߊߞߐ߬ߣߐ߲߬، ߣߴߏ߬ ߟߎ߫ ߞߊ߬ ߡߍ߲ ߝߐ߫߸ ߏ߬ ߟߋ ߘߌ߫ ߛߋ߫ ߟߊߞߊ߬ߟߌ߬ ߟߊ߫߸ ߛߴߊ߲ ߘߌ߫ ߕߊ߲߬ߞߊ߫ ߞߍߓߊߟߌ ߝߐߟߌ ߡߊ߬.>>

ߊ߲ ߧߋ߫ ߦߙߐ ߡߍ߲ ߘߐ߫ ߕߋ߲߬߸ ߖߐߞߌߓߊ߯ߕߐ ߟߎ߬ ߦߋ߫ ߞߊ߲ߞߊ߲߫ ߘߊ߲ߘߊߛߏ ߟߊ߫߸ ߘߊ߲ߘߊߟߌ ߘߊߞߘߐ߫ ߦߋ߲߬. ߏ߬ ߟߎ߫ ߟߋ߬ ߝߣߊ߫ ߞߊ߫ ߞߊ߲߫ ߞߊ߬ ߞߊ߲߬ߞߎߡߊ ߟߊߦߟߍ߬߸ ߞߵߊ߬ ߡߐ߱ ߟߎ߫ ߟߌ߬ߤߟߊ ߢߊߝߐ߫.