ߌߓߙߊߤߌߡߊ߫ ߛߏߙߌ߬ ߂߲ ߕߎ߲߬ߞߙߊ ߡߍ߲ ߦߋ߫ ߖߌ߬ߣߍ߬ ߕߋߟߋ߲ߓߊ߯ߦߊ ߞߏߕߌ߮ ߘߌ߫߸ ߏ߬ ߞߊ߬ ߞߎߡߊ߫ ߝߊߘߌ߲ߓߊ߫ ߟߋ߬ ߝߐ߫ ߓߌ߬ ߛߌ߬ߣߌ߲߬ߟߏ߲ ߣߌ߲߬ ߡߊ߬ ߂߀߂߆ ߞߏ߲ߓߌߕߌ߮ ߕߋ߬ߟߋ߫ ߉߸ ߊ߬ ߣߌ߫ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߛߊ߬ߙߌ߬ߦߊ߬ ߓߊ߰ߙߊ߬ߟߊ ߟߎ߬ ߟߊ߫ ߢߐ߲߯ߦߋ ߛߋ߲߭ߝߍ߬، ߊ߬ ߟߊ߫ ߛߙߊ߬ߣߎ߲ ߘߐ߫߸ ߊ߬ ߞߎߡߊ߫ ߘߊ߫ ߞߕߌ ߟߊߛߎߡߦߊ ߞߊ߲߬߸ ߊ߬ ߣߌ߫ ߞߕߌ ߕߍ߰ߣߍ߲ ߞߐ߫ ߡߙߌߘߐ ߛߐ߬ߘߐ߲߬ߓߊߟߌߦߴߊ߬ ߕߎ߬ߡߊ ߟߊ߫߸ ߞߵߏ߬ ߟߊ߫ ߞߕߌ߫ ߖߐ߯ߣߍ ߟߎ߬ ߘߊ߲߬ߠߕߊ߬ߡߌ߲߬ ߛߐ߲ߞߐ ߞߊ߲߬.

ߊߟߎ߫ ߦߴߊ߬ ߟߐ߲߫߸ ߊ߬ ߕߟߋ߬ ߘߊ߲ߘߐ ߟߋ߬ ߕߋ߲߬߸ ߕߋߟߋ߲ߓߊ߯ߦߊ ߞߏߕߌ߮ ߦߋ߫ ߓߐߒߡߊߟߌ߫ ߞߟߊߒߞߋ߫ ߞߊ߲߬߸ ߊ߬ ߓߘߊ߫ ߛߌ߯ߙߌ߲߫ ߞߍ߫߸ ߞߊ߬ ߡߊ߲߬ߖߊ߲߬ߠߊ߫ ߞߍ߫، ߒ߬ߓߊ߬߸ ߊ߬ ߟߊ߫ ߕߊ߯ߡߊ ߛߋ߲߭ߝߍ߬ ߞߊ߲ߞߊ߲߫ ߞߣߐ߫߸ ߞߏߕߌ߮ ߛߐ߰ ߘߊ߫ ߥߛߎߖߌ߲ ߠߋ߬ ߡߊ߬ ߡߎߣߎ߲߬߸ ߞߊ߬ ߥߊ߫ ߓߐ߫ ߦߋ߲߬، ߞߣߊ߬ߕߏ߫ ߊ߬ ߛߋ߲߬ߝߊ߫ ߟߊ߫ ߞߊ߬ ߥߊ߫ ߛߋ߫ ߞߕߌߘߊ ߦߌߟߡߊ߫ ߝߟߐ ߟߊ߫߸ ߞߵߊ߬ ߞߎ߲߬ߘߏ߲ ߞߍ߫ ߞߕߌ߫ ߡߛߊߦߌ߲ߘߊ ߘߌ߫.

ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߎ߬ ߢߊߞߘߐ߫ ߦߋ߲߬߸ ߞߏߕߌ߮ ߞߊ߬ ߞߎߡߊ߫ ߛߌߦߊߡߊ߲߫ ߝߐ߫߸ ߡߍ߲ ߠߎ߬ ߦߋ߫ ߓߛߌ߬ߞߌ߬ ߟߊ߫ ߘߊ߲߬ߠߊ߬ߕߊߡߌߣߌ߲ ߘߌ߫߸ ߣߴߊ߬ߟߎ߬ ߣߌ߫ ߞߍߟߌ ߡߊ߲߫ ߞߊ߲߫. ߏ߬ ߘߏ߫ ߟߋ߬߸ ߡߐ߱ ߟߎ߬ ߟߊ߫ ߞߕߌ ߓߊ߯ ߓߊ߲߫ ߕߍ߰ ߟߊ߫߸ ߛߓߍ ߡߍ߲ ߞߊ߫ ߞߊ߲߫ ߞߊ߬ ߘߏ߲߬ ߊ߬ߟߎ߬ ߓߟߏ߫߸ ߊ߬ߟߎ߬ ߟߊ߫ ߞߕߌ ߕߍ߰ߣߍ߲ ߞߎߡߊ ߟߎ߬ ߦߋ߫ ߡߍ߲ ߞߣߐ߫ ߓߍ߲߬ߡߊ߬ߞߊ߲߫ ߘߐ߫߸ ߏ߬ ߕߍ߫ ߛߓߍ߫ ߖߏߣߊ߫߸ ߊ߬ ߘߏ߲߬ ߕߴߊ߬ ߕߌ߱ ߟߎ߬ ߓߟߏߟߊߛߐ߬ߘߐ߲߬ ߖߏߣߊ߫.

ߞߏߕߌ߮ ߡߐߣߍߣߍ߲ ߞߊ߲߫ ߏ߬ ߟߋ ߘߐ߫ ߞߏ߫: <<ߞߕߌߕߍ߯ߟߊ ߓߘߴߊ߬ ߟߊ߫ ߞߕߌߕߍ߰߸ ߊ߬ ߡߊ߫ ߛߓߍߟߌ߫ ߞߍ߫߸ ߞߏ ߦߋ߫ ߡߍ߲ ߠߎ߬ ߞߎ߲߭ ߞߊ߲߬߸ ߏ߬ ߘߴߊ߬ߟߎ߫ ߘߐ߲߭ ߘߊߡߌ߬ߣߊ߬ ߞߕߌ߫ ߕߍ߯ ߞߊ߲ ߏ߬ ߛߓߍߣߍ߲ ߞߐ߫߸ ߞߊ߬ ߞߊߙߏ ߞߍ߫߸ ߊ߬ ߕߍ߫ ߛߐ߬ߘߐ߲߬، ߐ߲߬ߤߐ߲߫߸ ߕߐ߬ߣߐ߫ ߢߌ߬ߡߊ߲߫ ߠߋ߬ ߞߍߣߍ߲߫ ߡߙߌߘߐ ߕߊ߬ߟߌ ߟߊ߫ ߏ߬ ߘߐ߫؟ ߊ߲ ߘߴߊ߬ ߝߐ߫ ߏ߬ ߘߐ߫ ߞߏ߫ ߝߏߦߌ߬ ߞߍ߰.>> ߊ߬ ߞߵߏ߬ ߝߐ߫.

ߏ߬ ߟߋ ߞߏߛߐ߲߬߸ ߞߏߕߌ߮ ߞߊ߬ ߦߟߌߓߌߟߊߟߌ߫ ߞߍ߫ ߞߊ߬ ߓߍ߲߬ ߞߕߌ ߞߏߢߊ ߟߎ߬ ߛߓߍ ߡߊ߬، ߌߓߙߊߤߌߡߊ߫ ߛߏߙߌ߬ ߂߲ ߕߎ߲߬ߞߙߊ ߞߵߊ߬ ߦߌ߬ߘߊ߬ ߞߏ߫ ߣߴߊ߬ ߞߏ߫ ߛߎ߮ ߡߍ߲ ߞߏ߬ߣߌ߲ ߞߍ߫ ߘߊ߫ ߡߎ߬ߕߎ߲߬߸ ߏ߬ ߕߍ߫ ߕߏ߫ ߕߋ߲߬ ߝߋߎ߫߸ ߣߌ߫ ߞߏߟߊߕߐ߲߫ ߡߊ߫ ߞߍ߫.

<<ߊ߲ ߞߍߕߐ߫ ߟߵߏ߬ ߞߏ ߟߊߕߐ߲ ߘߊߡߌ߬ߣߊ߬ ߟߊ߫ ߣߌ߲߬، ߝߏ߫ ߞߊ߬ ߓߌ߲߬ߓߊߥߏ ߟߋ߬ ߟߴߊ߬ ߘߊ ߝߍ߬߸ ߒ ߜߎ ߣߴߏ߬ ߟߋ ߞߍߟߌ ߦߊ߫ ߞߊ߲߫ ߛߊ߬ߙߌ߬ߦߊ߬ ߞߣߐ߫، ߝߏߦߌ߬ ߘߏ߲߬ ߕߍ߫ ߦߋ߲߬߸ ߡߍ߲ ߘߌ߫ ߛߌߟߊ ߕߍ߰ ߒ ߧߋ߫ ߏ߬ ߞߍߟߌ ߘߐ߫.>> ߊ߬ ߞߵߏ߬ ߞߊ߬ߛߙߋ߬ߡߊ߬ߟߊ ߞߍ߫.

ߞߊ߬ߕߎ߲߯߸ ߊ߬ ߞߵߊ߬ ߦߌ߬ߘߊ߬ ߞߏ߫ ߞߕߌ ߘߏ߫ ߟߎ߫ ߓߍ߫߸ ߏ߬ ߟߎ߬ ߓߊ߯ ߕߍ߰ ߟߏ߲ ߡߍ߲߸ ߛߊ߬ߙߌ߬ߦߊ߬ ߓߟߏ ߡߊ߬߸ ߏ߬ ߕߌ߱ ߟߎ߬ ߞߊ߫ ߞߊ߲߫ ߞߵߊ߬ߟߎ߬ ߟߊ߫ ߡߙߌߘߐ ߡߊߛߐ߬ߘߐ߲߫ ߏ߬ ߟߏ߲ ߠߋ߬، ߘߏ߫ ߟߎ߫ ߝߣߊ߫ ߓߍ߫߸ ߏ߬ ߕߍ߱ ߕߋ߬ߟߋ ߛߊ߬ߓߊ߸ ߊ߬ ߕߌ߱ ߟߎ߬ ߞߊ߫ ߞߊ߲߫ ߞߵߊ߬ ߟߊߛߐ߬ߘߐ߲߬، ߏ߬ ߘߐ߫߸ ߞߏ߫ ߝߏ߫ ߞߊ߬ ߞߊߘߊ߲߫ ߞߍ߫ ߞߵߏ߬ ߟߋ ߓߐ߫ ߊ߬ ߛߌߟߊ ߝߍ߬.

ߊ߬ ߞߊ߬ ߞߎߡߊ߫ ߜߘߍ߫ ߝߣߊ߫ ߝߐ߫߸ ߏ߬ ߦߋ߫ ߡߎ߲߬ ߘߌ߫، ߏ߬ ߟߋ ߞߕߌ ߡߊ߬ߘߏ߬ߣߌ߲߬ߠߌ߲ ߖߐ߰ߣߍ߬ ߞߏ ߘߌ߫߸ ߡߍ߲ ߥߊߘߌ ߦߋ߫ ߘߊ߲߬ߠߕߊ߬ߡߌ߲߬ ߝߐ߫ ߟߊ߫ ߕߎ߬ߡߊ߬ ߛߌߦߊߡߊ߲߫ ߛߐ߲߬߸ ߣߌ߫ ߘߊ߬ߟߎ߫ ߞߟߊ߬ߟߡߊ߬ ߕߍ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߊ߲ ߕߍ߫ ߛߴߊ߬ ߝߐ߫ ߟߊ߫ ߞߏ߫ ߜߟߊ߬ߜߟߊ߫ ߅߀߀ ߖߐ߰ߣߍ߸ ߏ߬ ߘߌ߫ ߥߊ߫ ߤߊ߲߯ ߞߋ߲߬ߥߟߎ߬ ߟߏ߯ߟߎ߫߸ ߞߵߏ߬ ߘߏ߬ߣߌ߲ ߟߊ߫ ߛߋߒߕߊ߲ ߠߎ߬ ߞߎ߲߬ ߦߋ߲߬ ߕߋ߲߬.>> ߊ߬ ߞߵߊ߬ ߘߊߣߐ ߕߏ߫ ߦߋ߲߬ ߡߊ߬.

ߒ߬ߓߊ߬߸ ߞߏߕߌ߮ ߞߵߊ߬ ߞߊ߲ߠߊߘߌ߫ ߞߕߌߘߊ ߞߏߟߊߕߍ߮ ߟߎ߫ ߡߊ߬߸ ߞߏ߫ ߊ߬ߟߎ߬ ߦߴߊ߬ߟߎ߬ ߛߋߞߏ ߞߍ߫߸ ߞߵߊ߬ߟߎ߬ ߞߊߘߊ߲߫߸ ߞߊ߬ ߛߋ߫ ߞߕߌ ߞߏ ߟߎ߬ ߓߐ߫ ߟߴߊ߬ ߛߌߟߊ ߝߍ߬، ߓߊߏ߬߸ ߞߏ߫ ߣߴߌ ߞߊ߬ ߡߐ߱ ߥߊߕߐ ߦߋ߫ ߛߊ߬ߙߌ߬ߦߊ߬ ߟߊ߫߸ ߊ߬ ߕߌߢߍ ߞߐ ߝߋߎ߫߸ ߊ߬ ߡߊ߫ ߓߍ߲߬ ߡߐ߰ߓߊ ߟߎ߬ ߟߊ߫ ߓߏ߬ߟߏ߲ ߞߣߐ߫߸ ߊ߬ ߡߊ߫ ߓߍ߲߬ ߓߊߘߋ߲߫ ߞߎ߲ߘߊ߫߸ ߥߊ߫ ߞߍ߫ ߟߊ߫ ߛߊ߬ߙߌ߬ߦߊ߬ ߟߊ߫ ߏ߬ ߟߋ ߘߐ߫، ߣߴߏ߬ ߞߏ ߟߎ߬ ߝߣߊ߫ ߥߊ߫ ߘߊ߫ ߛߋ߲߬ߠߊ߬ߛߎߡߦߊ߫ ߥߟߊ߫ ߞߵߊ߬ ߞߍ߫ ߡߌ߬ߙߌ߲߬ߘߌ߬ ߞߋߟߋ߲ ߏ߬ ߕߙߐ߫ ߞߏ ߘߌ߫߸ ߊ߬ ߜߟߍ߬ߦߊ߬ߣߍ߲߫ ߠߵߏ߬ ߘߌ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ ߓߊ߯ߙߊ ߞߊ߫ ߞߊ߲߫ ߞߊ߬ ߞߍ߫ ߟߋ߬߸ ߡߊ߬ߘߍ߬ߡߍ߲߬ߠߌ߲ ߦߋ߫ ߞߍ߫ ߏ߬ ߞߐߝߍ߬، ߓߊ߬ߙߌ߬߸ ߓߊ߯ߙߊ ߡߊ߲߫ ߞߊ߲߫ ߞߊ߬ ߛߌ߰߸ ߞߏ߫ ߝߏ߫ ߘߍ߬ߡߍ߲ ߦߋ߫ ߞߍ߫. ߏ߬ ߟߋ ߘߐ߫߸ ߞߏ߫ ߞߎ߲߬ߞߏ߬ߓߊ ߟߎ߬ ߡߊ߲߫ ߞߊ߲߫ ߞߊ߬ ߡߊ߬ߞߐ߬ߣߐ߲߬ߠߌ߲߬ ߞߍ߫߸ ߞߏ߫ ߊ߬ߟߋ߫ ߞߊ߬ ߛߊ߲߭ ߝߌ߬ߟߊ߬ ߣߌ߫ ߞߊߙߏ߫ ߛߊ߬ߓߊ ߡߍ߲ ߞߍ߫ ߡߊ߯ߡߎ߲߫߸ ߊ߬ ߕߘߍ߬ ߞߎ߲߬ߞߏ߬ߓߊ߬ߕߐ ߟߎ߬ ߟߊ߫ ߞߕߌ ߕߍ߰ ߟߊ߫ ߞߎߣߎ߲ߟߏ߲ ߓߍ߯ ߟߋ߬ ߡߊ߬߸ ߊ߬ ߘߏ߲߬ ߛߋ߫ ߘߊ߫.

ߏ߬ ߘߐ߫߸ ߞߏ߫ ߓߍ߯ ߦߴߊ߬ ߞߊߘߊ߲߫߸ ߞߵߊ߬ߟߎ߬ ߛߋߞߏ ߞߍ߫ ߞߕߌߘߊ ߟߊߓߘߍ߬ߦߊ ߘߐ߫߸ ߏ߬ ߟߋ ߘߌ߫ ߞߏ ߕߐ߭ ߓߍ߯ ߓߍ߲߬.

ߊ߬ ߞߵߊ߬ ߦߌ߬ߘߊ߬ ߞߎߡߊ ߟߊߓߊ߲ ߘߐ߫߸ ߞߏ߫ <<ߖߡߊ߬ߣߊ߬ߘߋ߲ ߠߎ߬ ߡߊ߬ߞߏ ߦߋ߫ ߞߕߌ ߕߍ߰ ߞߏ߬ ߢߌߡߊ ߟߊ߫߸ ߊ߬ߟߎ߫ ߘߏ߲߬ ߣߴߊ߬ ߛߐ߬ߘߐ߲ ߦߊ߫ ߞߊ߲߫.>>