ߛߎ߫ ߕߊ߬ߡߌ߲߬ߣߍ߲ ߡߍ߲ ߦߋ߫ ߣߌ߲߬߸ ߞߵߊ߬ ߘߎ߰ߛߊ ߜߍ߫ ߓߌ߬ ߞߊ߯ߙߌ ߢߌ߲߬ ߠߊ߫ ߂߀߂߆ ߞߏ߲ߓߌߕߌ߮ ߕߟߋ߬ ߁߁߸ ߕߊ ߟߋ߬ ߥߟߌ߬ߣߍ߲߫ ߝߎ߲ߞߎ߲ ߘߏ߫߫ ߟߊ߫ ߒߓߊ߯ߟߌߦߊ߫ ߓߍ߲߬ߕߍ ߘߐ߫߸ ߞߊ߲ߞߊ߲߫ ߛߏ ߞߣߐ߫، ߝߎ߲ߞߎ߲ ߣߌ߲߬ ߞߣߐ߫߸ ߟߊ߬ߞߙߐ߬ߛߟߌ߬ ߓߟߏ ߡߊ߬߸ ߊ߲ ߞߵߊ߬ ߦߋ߫ ߞߏ߫ ߡߊ߬ߟߏ ߣߌ߫ ߡߌ߲߬ߕߊ ߟߎ߬ ߟߋ߬ ߦߋ߫ ߝߙߋ߬ ߟߴߊ߬ ߞߣߐ߫ ߞߊ߬ ߛߌߦߊߦߊ߫߸ ߕߊ ߣߐ߬ ߏ߬ ߟߎ߫ ߟߋ߬ ߖߋ߬ߣߌ߲߬ ߠߊ߫، ߝߎ߲ߞߎ߲߫ ߕߌ߮ ߦߋ߫ ߌߓߙߊߤߌߡ ߓߊߟߑߘߋ߬ ߡߍ߲ ߘߌ߫߸ ߏ߬ ߞߊ߬ ߕߊߓߐ ߣߌ߲߬ ߡߊ߲߬ߕߙߐ߫ ߛߐ߬ߘߐ߲߬ߣߍ߲ ߠߎ߬ ߢߊߝߐ߫ ߒ߬ ߧߋ߫ ߞߊ߯ߙߌߟߏ߲ ߢߌ߲߬ ߡߊ߬.

ߗߍ߭ ߦߋ߫ ߢߊ ߘߐ߫߸ ߊ߬ ߛߎ߬ߣߎ߲߲߬ߣߍ߲߬ ߞߏߛߓߍ߫߸ ߞߵߏ߬ ߞߎ߲߭ ߞߍ߫ ߕߊߓߐ ߢߌ߲߬ ߘߌ߫، ߊ߬ ߛߋ߫ ߘߊ߫ ߘߏ߫ ߝߐ߫ ߟߊ߫ ߕߊ ߓߐ߫ ߢߊ ߞߊ߲߬، ߊ߬ ߟߊ߫ ߟߊ߬ߛߙߋ߬ߦߊ߬ߟߌ߬ ߘߐ߫߸ ߕߊ ߣߌ߲߬ ߓߐ߫ ߘߊ߫ ߛߎ߫ ߕߍ ߟߋ߬ ߡߊ߬߸ ߊ߬ߟߋ ߟߊߟߐ߲ߠߌ߲߫ ߘߊ߫ ߜߋߟߋ߲ߜߋߟߋ߲ ߠߋ߬ ߟߊ߫.

<<ߛߎ ߞߋߟߋ߲߫ ߕߎߡߊ ߟߋ߬ ߟߊ߫߸ ߒ ߞߊ߬ ߞߟߌߟߌ ߛߐ߬ߘߐ߲߬߸ ߞߵߊ߬ ߝߐ߫ ߒ ߧߋ߫ ߞߏ ߕߊ ߓߘߊ߫ ߓߐ߫߸ ߞߏ߫ ߢߎߡߍ ߟߊ߫ ߕߊ߬ߡߌ߲߬ ߞߏ߬ ߞߋߟߋ߲ ߓߘߊ߫ ߞߍ߫ ߒ ߠߊ߫ ߡߣߐ߬ߓߏ߲ ߠߊ߫، ߏ߬ ߟߋ ߞߍ߫ ߘߊ ߒ ߥߟߌ߬ ߢߊ ߘߌ߫߸ ߞߊ߬ ߣߊ߬ ߦߙߐ ߘߐ߫ ߦߊ߲߬.>> ߊ߬ ߞߵߏ߬ ߢߊߝߐ߫.

ߌߓߙߊߤߌߡ ߓߊߟߑߘߋ߬ ߞߎߡߊ߫ ߘߊ߫ ߕߊ ߣߌ߲߬ ߛߓߊߓߎ ߞߊ߲߬߸ ߞߵߊ߬ ߦߌ߬ߘߊ߬ ߞߏ߫ ߢߎߡߍ ߟߊ߫ ߕߊ߬ߡߌ߲߬ ߞߏ߬ ߞߋߟߋ߲ ߠߋ߬ ߣߐ߬، ߊ߬ ߞߎߡߊ߫ ߘߊ߫ ߝߣߊ߫߸ ߞߏ߫ ߦߙߌߞߊߟߊ߲߫ ߢߍߛߙߊߟߊ߲ߡߊ ߟߋ߬ ߡߊߞߍ߫ ߘߴߊ߬ ߟߊ߫ ߡߣߐ߬ߓߏ߲ ߞߣߐ߫ ߖߌ߬ߣߍ߬ ߢߎߡߍߞߏ ߓߊ߯ߙߊߞߍߟߊ ߟߎ߬ ߓߟߏ߫.

<<ߊ߲ ߞߊ߬ ߦߙߌߞߊߟߊ߲߫ ߢߍߛߙߊߟߊ߲ߡߊ ߟߋ߬ ߡߊߞߍ߫߸ ߏ߬ ߕߟߋ߬ ߟߏ߯ߟߎ ߟߋ߬ ߕߋ߲߬، ߏ߬ ߓߊ߯ߙߊ ߞߍ߫ ߘߊ߫ ߋ.ߘߋ.ߖ߭ߋ ߓߊ߯ߙߊߞߍߟߊ ߟߎ߫ ߟߋ߬ ߓߟߏ߫،  ߊ߬ߟߎ߫ ߣߊ߬ ߘߴߊ߬ ߡߊߞߍ߫ ߦߊ߲߬߸ ߞߵߊ߬ ߦߌ߬ߘߊ߬ ߞߏ߫ ߞߊ߬ ߥߴߊ߬ ߘߐߞߍ߫، ߒ ߖߍ߬ߘߍ ߞߵߏ߬ ߘߐߞߍ߫ ߖߕ ߅߀ ߀߀߀ ߟߊ߫.>> ߊ߬ ߞߵߏ߬ ߦߌ߬ߘߊ߬.

ߞߊ߬ ߓߍ߲߬ ߕߊߓߐ ߣߌ߲߬ ߡߊ߲߬ߕߙߐ߫ ߛߐ߬ߘߐ߲߬ߣߍ߲ ߠߎ߫ ߡߊ߬߸ ߌߓߙߊߤߌߡ ߓߊߟߑߘߋ߬ ߡߊ߫ ߛߋ߫ ߕߌߢߍߟߌ߫ ߞߍߣߍ߲ ߞߛߊ߬ߓߌ߬ ߝߐ߫ ߟߊ߫، ߓߊߏ߬ ߊ߬ ߦߋ߫ ߛߎ߬ߣߎ߲ ߘߐ߫ ߝߟߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߡߊ߬ߞߏ ߦߋ߫ ߥߊ߯ߕߌߣߍ߲߫ ߠߊ߫ ߡߎߣߎ߲߬߸ ߞߊ߬ ߛߋ߫ ߞߏ ߟߎ߬ ߛߌ߰ ߟߊ߫ ߞߟߊ߬ ߞߋߟߋ߲߫ ߞߊ߲߬ ߖߊ߬ߕߋ߬ ߞߏ ߡߊ߬ߝߊ߲ ߝߍ߬.

<<ߒ ߕߴߛߋ߫ ߞߏ ߟߎ߬ ߖߊ߬ߕߋ߬ ߓߐ߫ ߟߊ߫ ߕߋ߲߬ ߡߎߣߎ߲߬، ߞߏ߬ߣߌ߲߬ ߊ߬ ߛߌߦߊߡߊ߲ ߘߐ߫ ߦߊ߬ߣߌ߫ ߥߊ߯ߕߌߣߍ߲߫߸ ߊߟߎ߫ ߘߌ߫ ߛߋ߫ ߕߊ߬ߡߌ߲߬ ߠߊ߫ ߦߊ߲߬߸ ߒ ߘߌ߫ ߘߏ߫ ߝߐ߫ ߊ߬ ߞߊ߲߬߸ ߣߴߊߟߊ߫ ߛߐ߲߬ ߘߊ߫.>> ߊ߬ ߞߵߏ߬ ߝߙߊ߬ ߞߎߡߊ ߞߊ߲߬.

ߝߋ߲߫ ߛߌߦߊߡߊ߲߫ ߖߋߣߌ߲ ߢߌ߲߬ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߛߌ߰ߢߐ߲߮ ߠߎ߬ ߟߊ߫ ߡߊ߬ߘߍ߬ߡߍ߲߬ߠߌ߲ ߞߊ߬ ߗߍ߭ ߢߊߞߘߐߛߋ߫ ߞߏߛߓߍ߫، ߊ߬ ߡߊ߫ ߛߴߊ߬ ߢߊߖߌ ߟߊ߫߸ ߞߊ߬ ߓߍ߲߬ ߡߐ߱ ߟߎ߬ ߞߍ ߡߊ߬ ߞߵߊ߬ ߡߊߘߍ߬ߡߍ߲߬ ߛߎ߫ ߕߍ ߏ߬ ߡߊ߬.

<<ߒ ߘߌ߫ ߛߋ߫ ߡߍ߲ ߝߐ߫ ߟߊ߫߸ ߒ ߖߛߎ߬ߘߐߡߌ߲߬ߣߍ߲߫ ߠߋ߬ ߝߋߝߋ߫߸ ߞߵߊ߬ ߕߊ߬ ߞߎߣߎ߲߬ ߛߎ ߡߊ߬ ߤߊ߲߯ ߕߋ߲߬߸ ߡߐ߱ ߟߎ߬ ߦߋ߫ ߒ ߠߊߡߌߣߌ߲ ߘߐ߫، ߛߌ߰ߢߐ߲߮ ߠߎ߬ ߓߐ߫ ߘߊ߫ ߞߊ߬ ߣߊ߬ ߒ ߘߍ߬ߡߍ߲߬߸ ߞߵߵߊ߬ߟߎ߬ ߛߋߞߏ ߓߍ߯ ߘߏ߫ ߞߍ߫.>> ߊ߬ ߞߵߏ߬ ߟߊߛߙߋߦߊ߫.

ߕߋ߲߭ߕߋ߲߭ ߣߌ߲߬ ߞߏ߬ߣߌ߲ ߘߐ߫ߟ ߥߊߘߌ߫ ߞߛߊ߬ߓߌ ߡߍ߲ ߕߌߢߍߣߍ߲߫߸ ߓߟߏߝߋ߲߫ ߦߙߌߞߊ ߡߍ߲ ߕߌߢߍߣߍ߲߫߸ ߏ߬ ߟߎ߬ ߟߐ߲ߣߍ߲߫ ߕߍ߫ ߝߟߐ߫، ߡߍ߲ ߘߏ߲߬ ߓߍ߲߬ߣߍ߲߬ ߕߊ ߓߐ߫ ߢߊ ߡߊ߬߸ ߏ߬ ߝߣߊ߫ ߦߋ߫ ߞߏ߫ ߘߐߞߣߍߕߊ ߟߋ߬ ߘߌ߫ ߊ߬ ߢߊߟߐ߲ߓߊ߮ ߟߎ߬ ߓߟߏ߫߸ ߖߐ߲߰ߛߴߊ߬ ߛߓߊߓߎ ߘߌ߫ ߟߐ߲߫.