ߛߌ߬ߡߊ߬ߘߎ߯: ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߓߘߊ߫ ߘߏ߲߬ ߛߌ߬ߛߌ߬ߞߎߟߎ߲ ߞߣߐ߫߸ ߞߊ߬ ߕߊ߯ߡߊ߫ ߘߝߐ߬ߡߊ߬ ߞߍ߫߸ ߡߍ߲ ߣߐ߬ ߓߍ߯ ߤߊ߲ߞߟߌ߫ ߟߊߖߌ߰ ߟߊ߫ ߞߐߣߊߞߙߌ߫ ߣߌ߫ ߞߊ߲ߞߊ߲߫ ߣߍ߰ߛߌ߬ߟߊ߬ ߞߏ ߞߐ߫

ߊߟߎ߫ ߦߴߊ߬ ߟߐ߲߫߸ ߞߊ߲ߕߌ߮ ߟߋ߬ ߞߵߊ߬ ߛߓߍ߫ ߊ߬ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫ ߓߌ߬߸ ߞߏ߫: <<߂߀߂߆ ߞߏ߲ߓߌߕߌ߮ ߕߟߋ߬ ߁߂ ߢߌ߲߬ ߡߊ߬߸ ߖߌ߬ߣߍ߬ ߞߊ߲ߓߍ߲ ߓߘߊ߫ ߘߐ߬ߝߐ ߞߐߜߍ ߟߎ߬ ߘߐ߫ ߓߟߋ߬ߓߟߋ ߘߏ߫ ߦߟߍ߬ߡߊ߲߬ ߞߐߜߍ߫ ߗߋ߲߰ߓߊ߫ ߟߊ߫.>>

ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߢߊ ߘߐ߫߸ ߊ߬ ߛߍߥߊߣߍ߲߫ ߕߘߍ߬ ߞߏߛߓߍ߫، ߊ߬ ߞߊ߲߫ ߞߏ߫ ߓߌ߬ ߢߐ߲߰ ߟߏ߲߫߸ ߊ߬ ߡߙߌ ߦߋ߫ ߛߋ߫ ߟߊ߫ ߖߌ߬ߣߍ߬ߞߊ߫ ߟߎ߫ ߟߋ߬ ߡߊ߬߸ ߡߍ߲ ߠߎ߬ ߕߍ߬ߘߍ߫ ߛߌ߬ߓߏ߬ ߟߊ߫ ߣߌ߲߬ ߞߏ߫ ߛߎ߮ ߟߊ߫߸ ߛߴߊ߬ ߘߌ߫ ߞߍ߫ ߊ߬ߟߎ߬ ߢߣߊ߫، ߊ߬ ߞߊ߬ ߝߏ߬ߟߌ ߟߊߛߋ߫ ߊ߬ߟߋ߬ ߣߍ߰ߟߊ ߓߊ߯ߙߊߞߍߟߊ ߟߎ߫ ߡߊ߬߸ ߡߍ߲ ߠߎ߬ ߛߐ߬ߘߐ߲߬ ߘߴߊ߬ ߟߊ ߘߐ߫.

ߊߟߎ߫ ߦߴߊ߬ ߟߐ߲߫߸ ߣߍ߰ߛߌߟߊ ߣߌ߲߬ ߦߋ ߊ߲ ߓߟߏ߫߸ ߊ߲ ߦߟߌ ߥߊ߫ ߘߊ߫ ߞߊ߲ߞߊ߲߫ ߣߌ߫ ߞߐߣߊߞߙߌ߫ ߕߍ ߣߍ߰ߛߌߟߊ ߟߋ߬ ߞߐ߫، ߏ߬ ߡߍ߲ ߘߊߡߌ߬ߣߊ߬ ߘߊ߫ ߁߉߀߀ ߟߊ߫߸ ߞߊ߬ ߞߎߘߍ߫ ߆߆߂ ߓߊ߯ߙߊ߫߸ ߊ߬ ߞߏ ߡߎ߰ߡߍ ߓߊ߲߫ ߘߊ߫ ߞߵߊ߬ ߓߌ߬ߟߊ߬ ߖߊ߬ߡߊ ߛߊ߬ߥߏ߬ ߘߐ߫ ߁߉߁߄ ߘߓߊ߬ߓߌߟߊ ߕߟߋ߬ ߁߄ ߠߋ߬ ߡߊ߬، ߏ߬ ߓߊ߯ߙߊ߫ ߘߊ߫ ߛߊ߲߬ ߦߙߌߞߊ߫ ߞߘߐ߫، ߞߊ߲ߞߊ߲߫ ߣߌ߫ ߞߐߣߊߞߙߌ߫ ߕߍ ߛߌ߬ߛߌ߬ߞߎߟߎ߲ ߡߍ߲ ߕߍ߬ߘߍ߫ ߡߐ߱ ߟߎ߬ ߡߊߘߏ߬ߣߌ߲߬ ߠߊ߫߸ ߝߋ߲߫ ߡߊ߫ ߓߏ߬ߙߌ߬ ߡߍ߲ ߞߐ߫߸ ߏ߬ ߓߐ߫ ߘߊ߫ ߞߊ߲ߞߊ߲߫ ߁߉߉߃ ߥߊ߬ߛߌ߬ߥߙߊ ߕߟߋ߬ ߁߂ ߟߋ߬ ߡߊ߬، ߡߍ߲ ߝߣߊ߫ ߕߍ߬ߘߍ߫ ߘߏ߬ߣߌ߲߬ ߡߊ߬ߘߏߣߌ߲ ߞߍ߫ ߟߊ߫߸ ߝߋ߲߫ ߡߊ߫ ߓߏ߬ߙߌ߬ ߡߍ߲ ߞߐ߫߸ ߏ߬ ߓߐ߫ ߘߊ߫ ߞߊ߲ߞߊ߲߫ ߁߉߉߅ ߘߓߊ߬ߕߊ ߕߋ߬ߟߋ߫ ߂ ߟߋ߬ ߡߊ߬، ߒ߬ߓߊ߬߸ ߛߊ߲߬ ߓߌߛߓߊ߬ ߣߌ߫ ߞߋߟߋ߲߫ ߕߊ߬ߡߌ߲ ߞߐߝߍ߬߸ ߣߍ߰ߛߌߟߊ ߓߘߊ߫ ߣߊ߬ ߡߐ߱ ߟߎ߬ ߟߊߛߍߥߊ߫ ߖߌ߬ߣߍ߬ ߞߣߐ߫߸ ߞߵߊ߬ߟߎ߬ ߤߊ߲ߞߟߌ߫ ߟߊߖߌ߰ ߞߘߐ߬ߡߊ߲ ߞߐ߫.

ߞߏ߬ߣߌ߲߬߸ ߣߌ߲߬ߛߋ߲߬ ߕߊ ߣߍ߲߬ ߘߐ߫߸ ߛߌߟߊ ߟߎ߬ ߕߍ߫ ߞߋߟߋ߲߫ ߘߌ߫، ߘߐ ߏ߬ ߕߘߍ߬ ߞߎߘߍ߫ ߆߆߂ ߟߋ߬ ߘߌ߫߸ ߞߐߣߊߞߙߌ߫ ߣߌ߫ ߞߊ߲ߞߊ߲߫، ߛߋ߲߬ߢߊ ߣߌ߲߬ ߕߊ ߦߋ߫ ߞߎߘߍ߫ ߆߅߀ ߟߋ߬߸ ߡߍ߲ ߛߌ߰ߣߍ߲߫ ߛߋ߲߬ߠߊ߫ ߕߑߙߊ߲ߛߑߖߌߣߋߦߍ߲ ߓߟߏ߫߸ ߞߊ߬ ߘߊ߬ߡߊ߲߬ߘߊ ߟߎ߫ ߓߌ߬ߟߊ߬ ߢߐ߲߮ ߡߊ߬߸ ߞߊ߬ ߓߐ߫ ߓߋߟߊ߫߸ ߞߊߦߌߙߊߥߊ߯ߣߍ߲߫߸ ߞߊ߬ ߥߊ߫ ߡߏ߬ߙߌ߬ߓߊ߬ߦߊ߫ ߘߊ߲ߞߊ߲ ߠߊ߫߸ ߝߏߙߋߞߊߙߌߦߊ߫ ߡߊ߬ߙߊ ߘߐ߫߸ ߞߊ߬ ߞߊ߲ߞߊ߲߫ ߡߟߊ߫، ߊ߬ߟߎ߬ ߞߊ߲߫ ߞߏ߫ ߖߎ߬ߟߊ߬ߦߊ ߡߊ߬ߘߏ߬ߣߌ߲߬ߠߌ߲߬ ߛߌߛߌߞߎߟߎ߲ ߘߌ߫ ߛߌ߰ ߛߋ߲߬ߠߊ߫ ߞߵߊ߬ ߕߊ߬ ߂߀߂߆ ߟߊߓߊ߲ ߡߊ߬߸ ߞߵߊ߬ ߛߌ߰ ߂߀߂߇ ߟߊ߫.

ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߍ߲ ߦߋ߫ ߖߌ߬ߣߍ߬ ߞߊ߲ߓߍ߲ ߞߊ߲ߕߌ߯ ߡߊ߬ߓߏ߲߬ߧߊ߬ߕߊ ߘߌ߫߸ ߏ߬ ߞߵߊ߬ ߝߐ߫ ߊ߬ ߟߊ߫ ߞߐߜߍ ߞߊ߲߬ ߞߏ߫: <<ߛߌ߬ߡߊ߲߬ߘߎ߯ ߕߍ߫ ߘߊ߬ߡߊ߲߬ ߓߊ߰ߙߊ߬ ߖߊߕߋߘߐߛߌ߮ ߘߐߙߐ߲߫ ߘߌ߫ ߘߋ߬، ߊ߬ ߦߴߊ߬ ߦߌ߬ߘߊ߬ߟߊ߲ ߠߋ߬ ߘߌ߫߸ ߞߏ߫ ߝߏ߫ ߊ߲ ߧߋ߫ ߞߍ߫ ߊ߲ ߖߘߍ߬ ߘߌ߫ ߛߐ߬ߘߐ߲ ߖߘߍ߬ߕߌ߰ߦߊ ߛߌߟߊ ߝߍ߬߸ ߊ߬ ߜߎ߸ ߞߵߊ߬ ߞߍ߫ ߝߊ߬ߛߏ ߢߡߊߦߟߍ߬ߡߊ߲ ߓߊ߬ߙߏ߲߬ߡߊ ߘߌ߫.>> ߏ߬ ߘߐ߫߸ ߞߏ߫ ߛߌ߬ߡߊ߲߬ߘߎ߯ ߘߌ߫ ߓߊ߯ߙߊ ߘߌ߫߸ ߞߊ߬ ߟߊ߬ߞߐ߰ߟߌ ߘߌ߫߸ ߞߊ߬ ߖߌ߬ߣߍ߬ߞߊ ߟߎ߬ ߤߊ߲ߞߟߌ ߡߊߞߊ߬ߝߏ߬.

ߊ߬ ߟߊ߫ ߞߎߡߊ ߟߊߓߊ߲ ߞߍ߫ ߘߊ߫ ߡߎ߲߬ ߘߌ߫: <<ߛߌߣߌ߲ߢߍߛߌ߮ ߛߌ߬ߛߌ߬ߞߎߟߎ߲ ߓߘߊ߫ ߥߟߌ߬، ߝߏߦߌ߬ ߕߴߏ߬ ߟߊߟߐ߬ ߟߊ߫ ߡߎ߬ߕߎ߲߬.>>