ߞߏ ߡߍ߲ ߛߎ߮ ߦߋ߫ ߡߊ߲߫ ߘߌ߫߸ ߏ߬ ߟߋ ߞߍߣߍ߲߫ ߖߌ߬ߣߍ߬ ߞߣߐ߫، ߊ߬ ߕߎ߬ߡߊ߬ߙߋ߲߬ ߘߊ߲ߘߐ ߟߋ߬ ߕߋ߲߬߸ ߓߍ߯ ߞߊ߬ ߖߌ߬ߦߊ߬ߖߟߎ ߘߏ߫ ߦߋ߫ ߝߌߙߌ߲ߝߌߙߌ߲ ߞߊ߲߬ ߓߟߐߟߐ ߞߊ߲߬، ߖߌ߬ߦߊ߬ߖߟߎ ߏ߬ ߘߐ߫߸ ߛߏߝߍߞߎߟߎ߲߫ ߜߍߡߊ߲ ߟߐ߬ߣߍ߲߫߸ ߊ߬ ߛߓߍߣߴߊ߬ ߞߊ߲߬ ߞߏ߫ ߞߐߣߊߞߙߌ߫ ߥߛߎߖߌ߲ߓߊ، ߡߐ߱ ߟߎ߬ ߦߋ߫ ߘߏ߲߭ ߞߊ߲߬ ߏ߬ ߞߣߐ߫ ߦߏ߫ ߡߊ߭ߜߊ߬ߣߊ߲ ߠߋ߬، ߒ߬ߓߊ߬߸ ߏ߬ ߟߋ ߞߏ ߣߐ߬ ߓߍ߯ ߘߊߘߐߖߊ߬ ߟߊ߫، ߓߊߏ߬߸ ߛߏߝߍߞߎߟߎ߲ ߏ߬ ߓߌ߬ߟߊ߬ߣߍ߲߫ ߥߛߎߟߊߘߋ߲ ߠߎ߬ ߡߊߘߏ߬ߣߌ߲߬ ߞߊ߲ ߠߋ߬ ߡߊ߬ ߞߕߌߘߊ ߟߊ߫ ߖߊ߬ߡߊߙߌ ߞߣߐߡߊ߬.

ߞߊ߬ߕߎ߲߯߸ ߓߌ߬ ߞߐ߬ߟߏ߲ ߢߌ߲߬ ߡߊ߬ ߂߀߂߆ ߞߏ߲ߓߌߕߌ߮ ߕߟߋ߬ ߁߃߸ ߕߋߟߋ߲ߓߊ߯ߦߊ ߞߏߕߌ߮߸ ߌߓߙߊߤߌߡߊ߫ ߛߏߙߌ߬ ߂߲ ߕߎ߲߬ߞߙߊ߫ ߞߊ߬ ߟߊ߬ߛߋ߬ߟߌ ߘߏ߫ ߟߋ߬ ߞߟߊ߬ߣߐ߬ߦߊ߬߸ ߞߊ߬ ߥߛߎ߫ ߞߣߐߜߍ߲ߘߋ߲߫ ߡߊ߬ߡߊ߬ߘߎ߫ ߥߎ߬ߟߊ߬ߙߋ߫ ߟߊߘߎ߲߫ ߞߏ߫ ߞߎߡߊ ߝߐ߫ ߏ߬ ߞߣߐ߫، ߓߊߏ߬߸ ߞߏ߫ ߊ߬ ߣߐ߬ ߘߎ߰ߘߋ߲ ߠߎ߫ ߟߋ߬ ߡߊߘߏ߬ߣߌ߲߬ ߠߊ߫ ߘߎ߰ߞߎߟߎ߲ ߢߌ߲߬ ߞߣߐ߫߸ ߞߵߊ߬ ߛߐ߬ߘߐ߲߬ ߊ߬ߟߋ ߞߙߍߞߙߍߣߍ߲߫ ߥߛߎߟߊߘߋ߲ ߠߎ߫ ߟߋ߬ ߘߐߙߐ߲߫ ߡߊߘߏ߬ߣߌ߲߬ ߞߊ߲ߡߊ߬.

ߟߊ߬ߛߋ߬ߟߌ ߢߌ߲߬ ߞߣߐ߫߸ ߊ߬ ߝߐߣߍ߲߫ ߞߏ߫ ߓߊ߯ߙߊ ߡߍ߲ ߞߍߣߍ߲߫ ߥߎ߬ߟߊ߬ߙߋ߬ߗߍ ߓߟߏ߫ ߣߌ߲߬߸ <<ߏ߬ ߦߋ߫ ߥߛߎߟߊߘߋ߲ ߠߎ߬ ߡߊߘߏ߬ߣߌ߲ ߛߙߊߕߌ ߝߏ߬ߘߏ ߟߋ߬ ߘߌ߫ ߝߊ߯ߙߌ߫߸ ߊ߬ ߖߎ߯ߡߊ߲ ߠߊ߫ ߖߍ߬ߘߍ ߝߋߎ߫.>> ߞߊ߬ߕߎ߲߯߸ ߓߊ߯ߙߊ ߣߌ߲߬ ߞߍ߫ ߘߊ߫ ߞߊ߯ߙߌߟߏ߲ ߠߋ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߁߁ ߡߊ߬.

ߏ߬ ߞߏ ߛߋ߫ ߘߊ߫ ߞߍ߫ ߟߊ߫ ߘߌ߬؟

ߊ߬ ߝߐ߫ ߘߊ߫ ߞߏ߫ ߞߊ߬ ߡߞߊ߬ߛߌ߬ߒ߬ߞߊ߲߬ߓߊ߰ߕߐ ߟߎ߬ ߣߌ߫ ߛߌߞߊߒߡߊߓߊ߯ߕߐ ߘߏ߫ ߟߎ߫ ߟߋ߬ ߕߊ߬ ߞߐ߰ߦߊ߫ ߥߛߎߖߌ߲ߓߊ ߣߴߊ߬ ߖߏ߯ߘߏ߲ ߥߛߎߖߌ߲ ߠߊ߫߸ ߞߏ߫ ߞߊ߬ ߥߴߊ߬ߟߎ߬ ߡߊߟߐ߬ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߎ߬ߕߊ߬ߞߏ ߟߎ߬ ߟߊߕߐ߲ ߞߕߌߖߌ߲ ߠߊ߫ (ߞߙߌߦߍߝ)߸ ߊ߬ߟߎ߬ ߥߊߕߐ߫ ߊ߬ߟߎ߬ ߞߕߌ߫ ߞߊ߲ ߠߋ߬ ߡߊ߬߸ ߏ߬ ߡߍ߲ ߞߍߕߐ߫ ߞߎߣߎ߲߬ ߞߐ߬ߓߊ߬ߟߏ߲ ߡߊ߬߸ ߞߏ߲ߓߌߕߌ߮ ߕߟߋ߬ ߁߂߸ ߖߏ߯ߘߏ߲ ߞߕߌ߫ ߘߊߞߎ߲ ߘߐ߫.

ߒ߬ߓߊ߬߸ ߓߙߌ߬ߜ߭ߊ߬ߘߌߦߋ ߢߌ߲߬ ߥߊߕߐߟߊ ߡߐ߱ ߏ߬ ߟߎ߫ ߕߊ߬ ߞߊ߲ߡߊ߬ ߛߊ߫߸ ߛߴߊ߬ ߘߌ߫ ߣߊ߬ ߏ߬ ߟߎ߬ ߘߌ߫ ߞߐߣߊߞߙߌ߫߸ ߡߊ߬ߡߊ߬ߘߌ߫ ߥߎ߬ߟߊ߬ߙߋ߫ <<ߞߊ߬ ߛߌߟߊ߫ ߝߘߊ߫ ߜߘߍ߫ ߞߍ߫ ߏ߬ ߟߋ ߘߐ߫߸ ߘߎ߰ߞߎߟߎ߲ ߡߍ߲ ߞߙߍߞߙߍߣߍ߲߫ ߥߛߎߟߊߘߋ߲ ߠߎ߬ ߘߐߙߐ߲߫ ߡߊߘߏ߬ߣߌ߲߬ ߞߊ߲ߡߊ߬߸ ߞߵߏ߬ ߞߍ߫ ߞߊ߬ ߘߎ߰ߘߋ߲ ߘߏ߫ ߟߎ߫ ߡߊߘߏ߬ߣߌ߲߫ ߊ߬ ߞߣߐ߫.>> ߞߏߕߌ߯ߘߊ ߞߊ߬ ߣߌ߲߬ ߝߐ߫ ߟߊ߬ߛߋ߬ߟߌ߬ ߛߓߍ ߢߌ߲߲߬ ߞߣߐ߫.

ߊ߬ ߟߊ߫ ߓߊ߯ߙߊ ߏ߬ ߟߋ ߡߊ߫ ߓߍ߲߬ ߛߊ߬ߙߌ߬ߦߊ߬ ߓߊ߰ߙߊ߬ߟߊ ߟߎ߫ ߡߊ߬ ߛߊ߫، ߊ߬ߟߎ߫ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ ߊ߬ ߟߊ߫ ߞߋ߬ߟߋ߲߬ߠߊ߬ ߓߊ߯ߙߊ ߏ߬ ߕߍ߫ ߓߍ߲߬ ߛߊ߬ߙߌ߬ߦߊ߬ ߞߣߐ߫߸ ߥߛߎ ߞߣߐ߬ߜߍ߲߬ ߛߘߍ ߖߍ߬ߘߍ ߣߴߏ߬ ߞߍߟߌ ߡߊ߲߫ ߞߊ߲߫ ߝߋߎ߫.

ߏ߬ ߟߋ ߘߐ߫߸ ߕߋߟߋ߲ߓߊ߯ߦߊ ߞߏߕߌ߯ߘߊ ߞߵߊ߬ ߝߐ߫ ߡߐߣߍ ߣߌ߫ ߞߊ߲߫ ߜߍߟߍ߲ ߘߐ߫߸ ߞߏ߫ <<ߓߊ߯ߙߊ߫ ߛߎ߮ ߣߌ߲߬ ߦߋ߫ ߛߊ߬ߙߌ߬ߦߊ߬ ߓߏ߲߬ߘߊ ߕߐ߯ߕߌߢߍ߫ ߞߏ ߟߋ߬ ߘߌ߫߸ ߞߵߊ߬ ߡߊ߲߬ߞߕߎ ߖߎ߯ߦߊ߫.>>

ߏ߬ ߟߋ ߞߏߛߐ߲߬߸ ߊ߬ߟߎ߫ ߞߊ߬ ߛߊ߬ߙߌ߬ߦߊ߫ ߛߊ߬ߓߊ߫ ߕߊ߬߸ ߏ߬ ߝߟߐ ߦߋ߫ ߡߍ߲ ߘߌ߫߸ ߞߊ߬ ߡߊ߬ߡߊ߬ߘߌ߫ ߥߎ߬ߟߊ߬ߙߋ߬ ߟߊߘߎ߲߫، ߊ߬ ߝߌߟߊߣߊ߲߫߸ ߞߊ߬ ߖߏ߯ߘߏ߲ ߢߊߢߌߣߌ߲ߠߌ߲ ߠߊߥߌ߬ߟߌ߫ ߊ߬ ߞߐ߫، ߊ߬ ߛߓߊߣߊ߲߫߸ ߞߊ߬ ߖߊ߲߬ߕߏ߬ ߞߍ߫ ߥߛߎߟߊߘߋ߲ ߠߎ߬ ߟߊ߫ ߘߎ߰ߞߎߟߎ߲ ߘߐ߫ ߡߎ߬ߕߎ߲߬ ߜߘߋߜߘߋ߫߸ ߛߊ߫ ߣߌ߲߬ ߢߐ߲߰ ߞߊߣߊ߬ ߞߍ߫ ߏ߬ ߞߐ߫.

ߞߏߕߌ߮ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ ߝߏ߫ ߞߊ߬ ߣߌ߲߬ ߞߏ ߟߊߕߐ߲߫ ߠߋ߬߸ ߛߊ߫ ߡߐ߰ ߜߘߍ߫ ߞߊߣߵߊ߬ ߢߡߊߟߴߊ߬ ߛߎ߮ ߞߍ߫ ߞߏ ߡߊ߬، ߓߊߏ߬߸ ߊ߬ߟߋ߬ ߖߌ߬ߦߊ߬ߖߟߎ ߕߎ߲߬ ߓߘߊ߫ ߓߟߐߟߐ ߝߊ߲߬ ߛߌߦߊߡߊ߲߫ ߠߊߝߏ߬ ߕߎ߬ߡߊ߬ߙߋ߲߬ ߘߊ߲ߘߐ ߣߌ߲߬ ߞߣߐ߫.