ߡߐ߱ ߥߊ߯ ߓߌ߫ ߦߙߌߞߊ߫ ߟߋ߬ ߞߵߊ߬ߟߎ߫ ߕߋ߬ ߝߊ߬ߙߊ߲߬ߛߌ߬ ߛߌߟߓߊ ߟߎ߫ ߞߊ߲߬ ߓߌ߬ ߞߍ߲ߘߍߟߏ߲ ߣߌ߲߬ ߡߊ߬ ߂߀߂߆ ߞߏ߲ߓߌߕߌ߮ ߕߟߋ߬ ߁߇߸ ߞߵߊ߬ߟߎ߬ ߟߊ߫ ߡߐߣߍ ߦߌ߬ߘߊ߬ ߞߊ߬ ߓߍ߲߬ ߖߡߊ߬ߣߊ ߜߟߍ߬ߦߊ ߡߊ߬، ߞߵߊ߬ ߕߊ߬ ߔߊ߬ߙߌ߫ ߡߊ߬߸ ߞߊ߬ ߛߋ߫ ߡߊ߬ߙߑߛߍߦ ߡߊ߬߸ ߞߊ߬ ߕߊ߬ߡߌ߲߬ ߟߌߦߐ߲߫ ߝߍ߬߸ ߞߊ߬ ߓߌ߬ߟߊ߬ ߣߊ߲ߕ߸ ߊ߬ ߣߌ߫ ߙߍߣ߸ ߖߡߊ߬ߓߊ ߟߋ߬ ߓߐ߫ ߘߊ߫ ߦߋ߲߬ ߠߎ߬ ߘߐ߫، ߖߊ߬ߡߊ ߡߍ߲ ߠߎ߬ ߦߋ߫ ߣߌ߲߬߸ ߞߘߐ߬ߡߊ߲ ߠߎ߬ ߘߐ߫߸ ߞߏ߫ <<ߖ߭ߌ߬ߟߍ ߗ߭ߋ߳ߣ>>߸ ߊ߬ ߣߌ߫ ߓߊ߯ߙߊߞߍߟߊ ߟߎ߬ ߟߊ߫ ߕߐ߰ߕߐ߰ߟߌ߬ߟߊ ߟߎ߬߸ ߛߣߍ߬ߞߍ߬ߟߊ ߟߎ߬߸ ߊ߬ ߣߌ߫ ߞߊ߬ߙߊ߲߬ߘߋ߲ ߠߎ߬.
ߣߌ߲߬ ߞߏ ߛߓߊߓߎ ߞߍߣߍ߲߫ ߡߎ߲߬ ߘߌ߫؟ ߞߊ߬ߦߌ߯ ߕߎߟߊߝߌ߲ ߠߊ߫߸ ߞߟߌߟߌ ߟߋ߬ ߞߍ߫ ߘߊ߫ ߘߍ߬ߞߙߏߝߏ ߞߊ߲߬߸ ߞߏ߫ ߘߏ߫ ߓߘߊ߫ ߟߊ߫ ߖߋ߬ߣߌ߲߬ߕߊ ߟߎ߫ ߛߐ߲߬ߞߐ ߞߊ߲߬߸ ߢߎߡߍ ߞߊ ߓߘߊ߫ ߜߟߍ߬ߦߊ߬߸ ߞߎߡߊߕߍ߫ ߓߊߟߏ ߡߊ߬، ߊ߬ ߘߏ߲߬߸ ߞߊ߬ߦߌ߯ ߂߀߁߈ ߠߊ߫߸ ߕߏ߰ߝߏ ߘߏ߫ ߟߊߘߊ߲߫ ߘߊ߫߸ ߞߏ߫ ߖ߭ߌ߬ߟߍ߬ ߗ߭ߋ߳ߣ߸ ߕߏ߰ߝߏ߬ ߞߋߟߋ߲ ߏ߬ ߟߋ ߣߌ߲߬ ߞߏ ߞߐߞߘߐ߫ ߤߊߟߌ߬ߛߊ߫، ߓߊߏ߬߸ ߛߊ߲߭ ߏ߬ ߟߊ߫߸ ߊ߬ߟߋ ߟߊߘߊ߲߫ ߘߊ߫ ߟߋ߬߸ ߞߏ߫ ߟߊ߲ߞߎ߲ ߓߘߊ߫ ߜߟߍ߬ߦߊ߬߸ ߖߋ߬ߣߌ߲߬ߕߊ ߟߎ߬ ߓߘߊ߫ ߦߟߍ߬߸ ߕߋߟߋ߲߫ ߕߍ߫ ߞߍ߫ ߟߊ߫ ߡߐ߱ ߟߎ߬ ߕߍ߫ ߞߏ ߟߎ߬ ߟߊߕߊ߯ߡߊ߫ ߢߊ ߘߐ߫، ߊ߬ߟߋ߬ ߕߏ߰ߝߏ߬ ߞߋߟߋ߲ ߠߋ߬ ߟߊ߬ߡߊ߮ ߞߊ߲߬ ߣߌ߲߬ ߤߊ߲߯ ߕߋ߲߬.
ߡߍ߲ ߠߎ߬ ߓߐߣߍ߲߫ ߛߌߟߊ ߞߊ߲߬ ߣߌ߲߬߸ ߊ߬ߟߎ߬ ߟߊ߫ ߓߐߟߌ ߞߎ߲߭ ߦߋ߫ ߡߎ߲߬ ߞߋߟߋ߲߫ ߘߌ߫؟
ߞߏ߫ ߞߊ߬ ߘߏ߫ ߟߊ߫ ߛߊ߬ߙߊ ߞߊ߲߬߸ ߞߊ߬ ߘߏ߫ ߟߊ߫ ߟߊ߬ߣߡߐ߬ߟߊ߲ ߞߊ߲߬߸ߊ߬ ߖߋ߬ߣߌ߲߬ߕߊ ߟߎ߫ ߛߐ߲߬ߞߐ ߟߊߖߌ߰߸ ߞߊ߬ ߝߘߏ߬ߓߊ߬ ߓߊ߯ߙߊ ߟߎ߬ ߞߍߝߊߘߌ ߟߊߓߘߍ߬ߦߊ߫. ߛߏߝߌ߫ ߓߌ߬ߣߍߕ ߡߍ߲ ߦߋ߫ ߛߋ.ߖ߭ߋ.ߕߋ ߡߊߡߙߊ߬ߓߊ߮ ߘߌ߫߸ ߏ߬ ߦߋ߫ ߔߊߞߌߛߦߊߟߊ ߢߌ߲߬ ߠߎ߬ ߞߐߡߊߓߌ߲ߓߌ߲߫ ߠߊ߫، ߞߊ߬ߦߌ߯ ߕߎߟߊߝߌ߲ ߠߊ߫߸ ߊ߬ ߦߋ߫ ߞߊ߬ߙߊ߲߬ߘߋ߲ ߠߎ߬ ߝߣߊ߫ ߞߐߡߊߓߌ߲ߓߌ߲߫ ߠߊ߫ ߓߐߟߌ ߘߐ߫. ߓߊߏ߬߸ ߞߊ߬ߙߊ߲߬ߘߋ߲ ߡߍ߲ ߠߎ߬ ߝߣߊ߫ ߕߘߍ߬ ߛߌߟߊ ߞߊ߲߬߸ ߏ߬ ߟߎ߬ ߞߊ߲߫ ߠߋ߬ ߞߏ߫ ߟߞߊ߬ߙߊ߲߬ߠߌ߲߬ߠߊ߬ ߕߴߊ߬ߟߎ߬ ߓߟߏ߫߸ ߞߏ߫ ߞߊ߬ߙߊ߲ ߞߍߢߊ ߜߎ ߓߘߊ߫ ߕߌߢߍ߫ ߟߋ߬.
ߓߌ߬ ߞߍ߲ߘߍߟߏ߲ ߡߍ߲ ߦߋ߫ ߣߌ߲߬߸ ߊ߬ ߞߟߊߦߊ߫ ߘߊ߫ ߟߋ߬ ߝߊ߬ߙߊ߲߬ߛߌ߬ ߞߣߐ߫ ߞߏߛߓߍ߫، ߣߴߌ ߞߊ߬ ߔߊ߬ߙߌ߬ ߡߊߝߟߍ߫߸ ߕߊ ߛߎ߫ ߘߊ߫ ߟߋ߬ ߘߎ߰ߞߎߟߎ߲ ߠߎ߬ ߟߊ߫ ߦߋ߲߬߸ ߕߐ߲ߓߟߏߡߊ ߟߎ߫ ߞߊ߬ ߢߊߖߌߓߐߥߊߦߌ߲ ߠߊߓߊ߯ߙߊ߫ ߞߏߛߓߍ߫، ߣߴߌ ߞߊ߬ ߟߌߦߐ߲߫ ߕߊ߬߸ ߞߎ߲ߝߊ߲ߓߐߟߌߟߊ ߟߎ߬ ߟߊ߫ ߛߓߍߘߊ ߡߍ߲ ߦߋ߲߬߸ ߕߊ ߛߎ߫ ߘߴߏ߬ ߟߊ߫، ߡߊ߬ߙߑߛߍߦ ߝߣߊ߫ ߞߣߐ߫߸ ߞߎ߲߬ߠߊ߬ߛߌ߮ ߟߊ߫ ߓߏ߲ ߘߏ߫ ߟߎ߫ ߘߐߕߌߢߍ߫ ߞߏߖߎ߮ ߞߍ߫ ߘߊ߫.
ߝߊ߬ߙߊ߲߬ߛߌ߫ ߞߣߐߟߊ ߞߏߕߌ߯ߘߊ ߟߊ߫ ߝߐߟߌ߫ ߘߐ߫߸ ߕߋ߬ߟߋ ߦߋ߫ ߛߋ߫ ߟߴߊ߬ ߕߍߡߊ߬ ߕߎ߬ߡߊ ߡߍ߲ ߠߊ߫߸ ߕߍ߮ ߕߎ߲߬ ߓߘߊ߫ ߞߍ߫ ߡߐ߰ ߂߇߂ ߘߐ߫، ߝߊ߰ߡߊ ߟߎ߬ ߦߋ߫ ߣߎߡߊ߲ߓߟߏߟߞߊ ߟߎ߫ ߟߋ߬ ߖߙߊ߬ߞߌ߬ ߟߊ߫߸ ߞߏ߫ ߕߌߢߍߟߌ ߣߌ߲߬ ߛߓߊߓߎ ߦߴߏ߬ ߟߎ߫ ߟߋ߬ ߘߌ߫. ߔߊߞߌߛߦߊߟߊ ߝߊ߲߬ߓߊ ߝߣߊ߫ ߞߊ߲߫ ߠߋ߬߸ ߞߏ߫ ߕߐ߲ߓߟߏߡߊ ߟߎ߬ ߓߘߴߊ߬ߟߎ߫ ߘߊ߲߬ߠߊߕߊ߬ߡߌ߲߫ ߜߊ߰ߢߊ߰ߜߊ߯ߢߊ ߘߐ߫.
ߋߡߊߣߎ߳ߍߟ ߡߊߞߐߙߐ߲߫ ߡߍ߲ ߦߋ߫ ߞߊ߲ߕߌ߮ ߘߌ߫߸ ߏ߬ ߣߐ߬ ߊ߬ ߞߊ߲ߠߊߓߐ߫ ߟߊ߫ ߟߋ߬ ߞߏ߫ ߓߍ߯ ߦߋ߫ ߕߏ߫ ߡߊ߬ߝߊ ߘߐ߫߸ ߕߐ߰ߕߐ߰ߟߌ߬ߟߊ ߟߎ߬ ߞߊ߲߫ ߞߏ߫ ߝߏ߫ ߢߊ ߦߋ߫ ߟߐ߬ ߖߡߊ߬ߣߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߠߋ߬ ߘߐ߫، ߏ߬ ߘߐ߫߸ ߓߌ߬ ߕߋ߬ߟߋ ߦߋ߫ ߢߊ ߡߍ߲߸ ߏ߬ ߟߋ ߝߟߍ߫ ߣߌ߲߬.
