ߞߊ߲ߞߊ߲߫ ߞߊ߬ߙߊ߲߬ߓߏ߲ ߠߎ߬ ߓߘߊ߫ ߡߊߞߊ߬ߝߏ߫ ߞߊ߬ߙߊ߲߬ߕߊ߬ ߞߎߘߊ߫ ߛߊ߲ߞߊߛߏߡߊ ߟߊ߫، ߞߊ߬ߕߎ߲߯߸ ߞߊ߯ߙߌ ߢߌ߲߬ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߁߈߸ ߥߊߖߟߌ߫ ߟߊ߱ߖߌ߬ ߛߟߏ߬ߡߣߊ߫ ߛߘߌ߬ߓߋ߬ ߡߍ߲ ߡߊߟߐ߲߫ ߕߐ߮ ߦߋ߫ ߞߊ߬ߙߊ߲߬ߡߐ߯ ߛߏ߬ߟߏ ߘߌ߫߸ ߥߟߊ߫ ߖߊ߲ߛߎߡߣߊ߫ ߛߏ߬ߟߏ߸ ߊ߬ ߟߊ߫ ߞߊ߬ߙߊ߲߬ߕߊ߬ ߞߎߘߊ߫ ߟߐ߬ߣߍ߲ ߘߏ߫ ߟߋ߬ ߓߌ߬ߟߊ߬ߣߍ߲߫ ߖߊ߬ߡߊ ߛߊ߬ߥߏ߬ ߘߐ߫߸ ߡߍ߲ ߕߐ߯ ߞߏ߫ ߘߎ߲߬ߘߎ߬ߡߊ߬ ߞߊߙߊ߲ߕߊ߫ ߣߎߙߑߘߌߣ ߌߛߑߟߊߡ߸ ߣߴߊ߬ ߟߐ߬ߣߍ߲߫ ߊߝ߭ߌߦߊߛߌߦߐ߲ ߞߌ߲߬ߘߊ ߟߊ߫߸ ߞߊ߲ߞߊ߲߫ ߛߏ ߞߣߐ߫، ߘߊߦߟߍߟߌ߫ ߖߊ߲ߖߏ߲ ߣߌ߲߬ ߞߍ߫ ߘߊ߫ ߞߊ߲ߞߊ߲߫ ߡߐ߰ߘߐ߬ߜߍ߬ ߛߌߦߊߡߊ߲߫ ߠߋ߬ ߢߣߊ߫߸ ߟߊ߬ߞߟߏ߬ߞߟߏ߬ߟߌ ߝߊ߰ߡߊ ߟߎ߬߸ ߘߌ߯ߣߊ߫ ߢߍߡߐ߮ ߟߎ߬߸ ߛߏ ߡߐ߰ߓߊ ߟߎ߬߸ ߊ߬ ߣߌ߫ ߞߟߌߣߍ߲߫ ߛߌߦߊߡߊ߲߫.

ߡߙߌߦߊ ߡߍ߲ ߦߋ߫ ߞߊ߬ߙߊ߲߬ߡߐ߯ ߛߏ߬ߟߏ ߟߊ߫ ߞߊ߬ ߓߍ߲߬ ߟߞߊ߬ߙߊ߲߬ߠߌ߲ ߝߊ߲߬ߞߊߘߏ߲߭ ߡߊ߬߸ ߏ߬ ߕߊ߬ߡߌ߲߬ ߘߊ߫ ߟߊ߫ ߟߊ߫ ߜߍ ߘߐ߫ ߓߌ߬ ߞߏߞߎߘߊ߫، ߞߎߡߊ ߕߊ߬ ߘߊ߫ ߞߊ߲ߞߊ߲߫ ߡߙߊ߬ߘߊ߬ߓߊ ߟߊ߬ߞߟߏ߬ߞߟߏ߬ߟߌ ߗߋߕߌ߮ ߓߟߏ߫߸ ߛߎ߬ߟߋ߬ߡߊ߯ߣ ߘߊ߬ߝߋ߸ ߞߊ߬ ߛߐ߰ ߞߊ߬ߙߊ߲߬ߡߐ߯ ߛߏ߬ߟߏ ߝߏ߭ ߡߊ߬ ߡߎߣߎ߲߬߸ ߊ߬ ߟߊ߫ ߓߊ߯ߙߊ߫ ߞߍߣߍ߲߫ ߞߘߐ߬ߡߊ߲ ߠߎ߬ ߟߊ߫߸ ߞߊ߬ߙߊ߲ ߝߊ߲߬ߞߊߘߏ߲߭ ߘߐ߫.

ߊ߬ ߞߵߊ߬ ߞߐߛߊ߬ߦߌ߲߬ ߞߏ߫ ߞߘߐ ߘߏ߫ ߡߊ߬߸ ߕߎ߬ߡߊ ߡߍ߲ ߠߊ߫߸ ߞߊ߬ߙߊ߲߬ߘߋ߲ ߠߎ߬ ߟߊ߫ ߝߐߢߐ߲߯ߞߐ ߞߍ߫ ߘߊ߫ ߛߊߓߎ߫ ߘߌ߫ ߞߊ߬ ߕߊ ߛߎ߫ ߛߊ߭ߡߏ߬ߙߌ߬ ߣߌ߫ ߊߟߌߝߊ߫ ߦߊߦߊ߫ ߟߊ߫߸ ߘߍ߬ߡߍ߲߬ߠߌ߲߬ ߢߌߣߌ߲ ߓߍ߯ ߞߐߝߍ߬߸ ߞߊ߬ߙߊ߲߬ߡߐ߯ ߛߏ߬ߟߏ ߟߋ߬ ߞߊ ߞߊ߬ߙߊ߲߬ߕߊ߫ ߝߌ߬ߟߊ ߏ߬ ߘߐߓߍ߲߬ ߞߏߞߎߘߊ߫ ߞߵߊ߬ ߓߌ߬ߟߊ߫ ߖߊ߬ߡߊ ߛߊ߬ߥߏ߬ ߘߐ߫.

ߛߎ߬ߟߋ߬ߡߊ߯ߣ ߘߊ߬ߝߋ ߛߍߥߊ߫ ߘߊ߫ ߏ߬ ߟߋ ߘߐ߫ ߞߵߊ߬ ߦߌ߬ߘߊ߬ ߞߏ߫: <<ߒ ߧߋ߫ ߓߌ߬ ߓߍ߲߬ߒ߬ߛߋ߲߬ߡߊ ߟߋ߬ ߕߣߐ߬ߓߐ߬ ߟߊ߫߸ ߞߊ߬ ߞߊ߬ߙߊ߲߬ߓߏ߲ ߢߌ߲߬ ߜߙߋ߬ߡߊߕߍ߰ߓߊ߮ ߝߏ߬ ߞߵߊ߬ ߞߎߟߎ߲ߖߋ߫߸ ߓߊߏ߬ ߊ߬ ߟߊ߫ ߓߊ߯ߙߊ߫ ߝߟߐ߫ ߕߍ߫ ߣߌ߲߬ ߘߌ߫، ߊ߬ ߓߘߊ߫ ߓߊ߯ߙߊ߫ ߛߌߦߊߡߊ߲߫ ߠߋ߬ ߞߍ߫ ߞߊ߲ߞߊ߲߫ ߞߊ߬ߙߊ߲߬ ߞߏ ߘߐ߫߸ ߞߊ߬ ߟߞߊ߬ߙߊ߲߬ߠߌ߲ ߝߊ߰ߡߊ ߟߎ߬ ߡߊߘߍ߬ߡߍ߲߬.>> ߡߟߗ ߞߵߏ߬ ߦߌ߬ߘߊ߬.

ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߞߊ߬ߙߊ߲߬ߡߐ߯ ߛߏ߬ߟߏ ߓߘߊ߫ ߞߊ߬ߙߊ߲߬ߛߏ߫ ߝߌ߬ߟߊ߫ ߟߐ߬ ߞߵߊ߬ ߞߍ߫ ߝߘߏ߬ߓߊ ߘߌ߫ ߞߎ߲߬ߠߊ߬ߛߌ߮ ߖߌ߲߬ߓߊ߬ ߞߘߐ߫߸ ߞߵߏ߬ ߓߌ߬ߟߊ߬ ߗߋߕߌ߯ߘߊ ߟߊ߫ ߓߌ߬ߟߊ ߘߐ߫߸ ߞߊ߬ߙߊ߲߬ ߦߙߐ߬ ߜߘߍ߫ ߟߎ߫ ߘߏ߲߬ ߦߴߊ߬ ߓߟߏ߫ ߞߘߐ߬ߡߊ߲߬ ߝߣߊ߫. ߞߊ߬ߙߊ߲߬ߕߊ߫ ߝߌ߬ߟߊ ߡߍ߲ ߟߐ߬ ߘߴߊ߬ ߓߟߏ߫߸ ߓߏ߲ߞߣߐ߫ ߥߐ߯ߙߐ߫ ߟߐ߬ ߘߴߊ߬ ߓߟߏ߫ ߓߊߕߍ߫ ߞߐ߬ߓߊ߬߸ ߞߵߏ߬ ߢߐ߲߰ ߝߣߊ߫ ߟߐ߬ ߊ߬ ߓߟߏ߫ ߓߐ߬ߙߑߘߏ߫ ߞߌ߲߬ߘߊ ߟߊ߫.

ߒ߬ߓߊ߬߸ ߞߊ߬ߙߊ߲߬ߓߏ߲ ߡߍ߲ ߘߟߊߞߊ߬ߣߍ߲߫ ߓߌ߬߸ ߥߊߟߌߘߊ ߡߍ߲ ߞߵߊ߬ ߟߐ߬ߟߌ ߓߊ߯ߙߊ ߞߍ߫߸ ߏ߬ ߗߋ߬ߥߎ߬ߣߊ߲߬ߗߋߥߎ ߟߊ߫ ߞߎߡߊ߫ ߘߐ߫߸ ߞߏ߫ ߓߏ߲ ߟߐ߬ߣߍ߲߫ ߞߵߊ߬ ߞߍ߫ ߒߞߏ ߛߓߍߘߋ߲ ߎ ߟߋ߬ ߘߌ߫߸ ߏ߬ ߡߍ߲ ߦߋ߫ ߝߊ߬ߙߊ߲߬ߛߌ߬ ߛߓߍߘߋ߲ ߎ߳ ߞߐߦߌ߬ߘߊ߬ ߟߊ߫، ߊ߬ ߟߐ߬ߣߍ߲߬ ߜߍߞߣߍ ߡߍ߲ ߘߐ߫߸ ߏ߬ ߦߋ߫ ߓߍ߲߬ ߠߊ߫ ߜߟߊ߬ߝߘߎ߬ߓߍ߲߫ ߆߀߀ ߟߋ߬ ߡߊ߬، ߞߊ߬ߙߊ߲߬ߓߏ߲߬ ߞߣߐ߫ ߂߄ ߠߋ߬߸ ߡߍ߲ ߞߋ߬ߟߋ߲߬ߞߋ߬ߟߋ߲߬ߠߊ ߞߣߐߟߊ ߦߋ߫ ߜߟߊ߬ߜߟߊ߬ ߈،߇ ߣߌ߫ ߜߟߊ߬ߜߟߊ߬ ߇ ߘߌ߫، ߛߓߍߘߊ߫ ߣߊ߯ߣߌ߲߫ ߕߊ߬ߣߍ߲ ߞߵߊ߬ ߟߊ߫ ߕߐ߯ ߛߓߍߟߌ߫ ߝߏ߯ ߞߋߟߋ߲߫ ߣߌ߫ ߛߊߣߌ߲ߧߊ߫ ߓߏ߲ ߠߎ߬ ߞߊ߲߬߸ ߣߊߟߌ߬ߡߎ߲߬ ߢߍ߲߮ ߠߎ߬ ߘߌ߫.

ߟߊ߱ߖߌ߬ ߛߋߞߎ߬ ߛߌ߬ߛߋ ߡߍ߲ ߦߋ߫ ߣߍߙߑߘߌߣ ߞߊ߬ߙߊ߲߬ߕߊ߬ ߞߎߘߊ ߢߌ߲߬ ߝߘߏ߬ߓߊ߬ ߗߋߕߌ߮ ߘߌ߫߸ ߏ߬ ߞߵߊ߬ ߟߊ߫ ߛߍߥߊ ߖߍ߬ߘߍߖߍ߬ߘߍ ߦߌ߬ߘߊ߫ ߣߌ߲߬ ߞߏ ߘߐ߫߸ ߟߊߒߠߦߊ ߟߊ ߞߏߛߐ߲߬ ߊ߬ߟߋ߬ ߘߐ߫߸ ߞߊ߬ ߦߋ߲߬ ߞߊ߬ߙߌ߬ߝߊ߫ ߊ߬ ߟߊ߫، ߊ߬ ߝߣߊ߫ ߞߊ߬ ߕߡߊ߬ߖߌ ߓߐ߫ ߘߋ߲ߓߊߕߌ߮ ߟߎ߬ ߘߐ߫߸ ߞߏ߫ ߓߍ߯ ߦߋ߫ ߥߴߊ߬ ߘߋ߲߫ ߕߐ߯ ߛߓߍ߫ ߦߋ߲߬߸ ߞߏ߫ ߊ߬ߟߎ߬ ߘߌ߫ ߓߍ߯ ߟߊߛߍߥߊ߫ ߞߊ߬ߙߊ߲ ߞߍߢߊ ߘߐ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߣߴߊߟߊ߫ ߛߐ߲߬ ߘߊ߫߸ ߊߟߎ߫ ߣߊ߬ߕߐ߫ ߞߊ߬ߙߊ߲ ߡߍ߲ ߞߐ߫߸ ߊߟߎ߫ ߘߌ߫ ߣߵߏ߬ ߓߍ߯ ߛߐ߬ߘߐ߲߫ ߦߊ߲߬، ߊ߬ ߞߍ߫ ߘߊ߫ ߊ߬ߙߊ߬ߓߎ߬ ߞߊ߲߫ ߘߌ߫ ߓߊ߬߸ ߝߊ߬ߙߊ߲߬ߛߌ߬ ߞߊ߲߫ ߘߌ߫ ߓߊ߬߸ ߒߞߏ߫ ߘߌ߫ ߓߊ߬߸ ߊ ߓߍ߯ ߦߋ߫ ߦߊ߲߬، ߓߌ߬ߟߊ߬ߢߐ߲߰ߡߊ ߦߴߊ߲ ߠߊ߫ ߞߊ߬ߙߊ߲߬ߕߊ ߢߌ߲߬ ߣߌ߫ ߖߡߊ߬ߣߊ߬ߓߊ ߘߏ߫ ߟߎ߫ ߕߍ߫߸ ߡߌߛߌ߬ߙߊ߲߬߸ ߛߎ߰ߘߎ߬ߟߊ߫߸ ߊߟߌߖ߭ߋߙߌ߫߸ ߊ߬ ߣߌ߫ ߞߕߊߙ.>> ߊ߬ ߞߵߏ߬ ߦߌ߬ߘߊ߬.

ߦߙߐ߫ ߞߎߘߊ ߡߍ߲ ߟߐ߬ߣߍ߲߫ ߣߌ߲߬߸ ߞߊ߬ߙߊ߲߬ߡߐ߯ ߛߏ߬ߟߏ ߓߘߴߊ߬ ߣߐ߭ ߕߏ߫ ߞߎ߲߬ߝߌ߲߬ߧߊ ߞߍ߬ߟߍ ߘߐ߫ ߞߊ߲ߞߊ߲߫ ߞߣߐ߫، ߓߏ߲߫ ߞߣߐ߫ ߂߄ ߡߍ߲ ߦߋ߫ ߕߋ߲߬߸ ߝߊ߬ߙߊ߲߬ߛߌ߬ ߞߊ߲ ߘߌ߫ ߞߊ߬ߙߊ߲߫ ߊ߬ ߞߣߐ߫߸ ߊߙߊߓߎ ߘߌ߫ ߞߊ߬ߙߊ߲߫ ߊ߬ ߞߣߐ߫߸ ߊ߬ߜ߭ߌߟߋ ߝߣߊ߫ ߞߊ߬ߙߊ߲߬ߕߐ߫ ߟߋ߬߸ ߞߵߏ߬ ߟߊ߫ ߒߞߏ ߞߊ߲߬߸ ߏ߬ ߡߍ߲ ߦߋ߫ ߝߘߊ߬ߝߌ߲ ߠߎ߬ ߟߊ߫ ߛߓߍߟߌ߫ ߞߟߊߒߞߋ߫ ߘߌ߫߸ ߡߊ߲߬ߘߋ߲߬ ߞߊ߲ ߠߎ߬ ߛߓߍ߫ ߞߊ߲ߡߊ߬، ߤߊߟߌ߬ ߣߴߊ߬ ߛߐ߬ߘߐ߲߬ ߘߊ߫ ߞߏ߫ ߊ߲ ߡߊ߫ ߒߞߏ ߛߓߍߟߌ߫ ߦߋ߫ ߞߊ߬ߙߊ߲߬ߕߊ ߛߓߍߟߌ߫ ߞߍߣߍ߲ ߠߎ߬ ߕߍߡߊ߬.

ߞߊ߲ߞߊ߲߫ ߡߐ߰ߓߊ ߛߌߦߊߡߊ߲߫ ߞߵߊ߬ ߕߏ߲߬ߘߊ ߕߊ߬ ߞߊ߬ ߦߙߐ ߣߌ߲߬ ߡߊߜߍ߲߫ ߓߌ߬߸ ߛߏߕߌ߮ ߞߐߦߌߘߊ ߕߘߍ߬ ߞߣߍ ߞߊ߲߬߸ ߟߊ߱ߖߌ߬ ߊ߬ߛߊ߬ ߡߊ߯ߘߌ߫ ߞߊ߬ߓߊ߸ ߊ߬ ߣߌ߫ ߕߌ߲ߓߌߘߌ߲ߘߓߊ ߢߍߓߊ߮ ߘߏ߫߸ ߟߊ߱ߖߌ߬ ߊ߬ߙߊ߬ߝߊ߲߫ ߞߊ߬ߓߊ߸ ߞߎߡߊߕߍ߫ ߓߊߕߍ߫ ߡߐ߰ߓߊ ߟߎ߬ ߣߌ߫ ߖߊ߲߬ߞߊ߰ߣߊ߬ ߣߌ߫ ߖߊ߲ߛߎߡߣߊ߫ ߡߊ߬.