ߞߍ߲ߘߍߟߏ߲ ߠߋ߬ ߡߊ߬߸ ߂߀߂߆ ߞߏ߲ߓߌߕߌ߮ ߕߟߋ߬ ߁߇߸ ߟߞߊ߬ߙߊ߲߬ߠߌ߲߬ߠߊ߬ ߆ ߀߀߀ ߡߍ߲ ߠߎ߬ ߕߊ߬ ߞߏ ߝߐߣߍ߲߫ ߝߘߏ߬ߓߊ߬ ߓߊ߯ߙߊ ߞߏߕߌ߮ ߓߟߏ߫߸ ߏ߬ ߜߊ߬ߛߊ ߞߍ߫ ߘߊ߫ ߖߡߊ߬ߣߊ ߝߊ߲߭ ߓߍ߯ ߟߊߘߍ߬ߣߍ߲ ߘߐ߫، ߒ߬ߓߊ߬߸ ߝߛߏ߬ߝߛߊ߬ ߛߌߦߊߡߊ߲߫ ߠߋ߬ ߟߊߞߙߐ߬ߛߌ߬ ߘߴߏ߬ ߞߏߢߊ ߘߐ߫ ߞߊ߲ߞߊ߲߫ ߦߊ߲߬، ߞߊ߬ߕߎ߲߯߸ ߢߌ߬ߣߌ߲߬ߞߊ߬ߟߌ ߘߏ߫ ߟߎ߫ ߘߌ߫ ߘߊ߫ ߘߏ߫ ߟߎ߫ ߡߊ߬߸ ߏ߬ ߟߎ߬ ߕߊ߫ ߕߴߏ߬ ߘߌ߫، ߞߘߐߓߐߟߊ߲ ߡߍ߲ ߖߍ߬ߘߍ ߘߌ߫ ߘߊ߫ ߘߏ߫ ߟߎ߫ ߡߊ߬߸ ߏ߬ ߟߎ߬ ߕߊ ߡߊ߫ ߘߝߊ߫߸ ߘߏ߫ ߟߎ߫ ߜߎ ߟߊߕߊ߯ ߘߊ߫ ߘߊߞߎ߲ ߘߏ߫ ߟߎ߫ ߘߐ߫߸ ߏ߬ ߟߎ߬ ߣߌ߫ ߦߋ߲߬ ߡߊ߲߫ ߞߊ߲߫، ߒ߬ߓߊ߬߸ ߞߘߐߓߐߓߊ߯ߕߐ ߟߎ߬ ߞߊ߬ߛߌ߬ ߞߊ߲ ߦߋ߫ ߡߎ߲߬ ߘߌ߫ ߕߋ߲߬߸ ߏ߬ ߟߋ ߕߋߟߋ߲ߓߊߟߌߦߊ ߘߌ߫߸ ߊ߬ߟߎ߫ ߣߐ߬ ߊ߬ߟߎ߬ ߞߊ߲ߠߊߘߌ߫ ߟߊ߫ ߝߊ߰ߡߊ ߟߎ߫ ߡߊ߬ ߏ߬ ߟߋ ߘߐ߫߸ ߦߊ߬ߣߌ߫ ߞߐߖߋߓߌ ߟߎ߬ ߦߋ߫ ߟߊߖߍ߲ߛߍ߲߫߸ ߛߊ߫ ߢߊ ߘߌ߫ ߟߐ߬ ߊ߬ߟߎ߬ ߘߐ߫.

ߊߟߎ߫ ߦߴߊ߬ ߟߐ߲߫߸ ߕߊ߬ߟߌ߬ ߞߏ ߣߌ߲߬ ߞߊ߫ ߞߊ߲߫ ߕߍ߬ߘߍ߫ ߞߊ߬ ߞߍ߫ ߓߍ߲߬ߒ߬ߛߋ߲߬ߡߊ߬ߓߊ߫ ߟߋ߬ ߘߌ߫ ߟߞߊ߬ߙߊ߲߬ߠߌ߲߬ߠߊ ߟߎ߬ ߦߋ߫߸ ߡߍ߲ ߠߎ߬ ߣߊ߬ߕߊ ߦߋ߫߸ ߛߴߊ߬ߟߎ߬ ߘߌ߫ ߘߏ߲߬ ߝߘߏ߬ߓߊ߬ ߓߊ߯ߙߊ ߘߐ߫ ߢߊ ߡߍ߲ ߡߊ߬، ߒ߬ߓߊ߬߸ ߏ߬ ߟߋ ߞߏߢߊ ߕߊ߬ߡߌ߲߬ߣߍ߲߬ ߢߊ߫ ߡߊ߬ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫߸ ߡߍ߲ ߜߟߍ߬ߦߊ߬ߣߍ߲߫ ߡߊ߬ߡߌ߬ߣߊ߬ߟߌ߬ߟߊ߫ ߛߌߦߊߡߊ߲߫ ߡߊ߬߸ ߊ߬ ߘߏ߲߬ ߡߊ߫ ߓߍ߲߬ ߊ߬ߟߎ߫ ߡߊ߬، ߞߊ߬ߕߎ߲߯߸ ߣߴߌ ߞߊ߬ ߒߓߋ߲ߓߊ߫ ߕߎߙߋ߫ ߕߊ߬߸ ߏ߬ ߡߍ߲ ߕߘߍ߬ ߕߊ߲ߓߊ߲ ߘߏ߫ ߘߌ߫ ߞߘߐߓߐߟߌ ߞߊ߲ߡߊ߬߸ ߡߊ߬ߡߌ߬ߘߊ߬ߟߌ߬ߟߊ ߘߏ߫ ߟߎ߫ ߕߍ߬ߘߍ߫ ߦߋ߲߬߸ ߊ߬ ߕߌ߯ߕߌ߯ ߝߊߙߊ߲ߞߏ߫ ߊߙߊߓ߸ ߏ߬ ߟߎ߫ ߞߵߊ߬ ߦߌ߬ߘߊ߬ ߞߏ߫ ߝߛߏ߬ߝߛߊ ߘߏ߲߬ ߘߊ߫ ߟߋ߬ ߊ߬ߟߎ ߟߊ߫ ߞߘߐߓߐߟߊ߲߫ ߞߏ ߘߐ߫ ߝߋߝߋ߫، ߏ߬ ߘߐ߫߸ ߞߏ߫ ߤߊ߬ߙߌ߬ߖߍ߰ߣߍ߲ ߡߍ߲ ߕߎ߲߬ ߘߌ߫ ߞߍ߫ ߊ߬ߟߎ ߟߊ߫ ߞߵߊ߬ߟߎ߬ ߦߟߌߛߌ߰ ߊ߬ ߓߍ߲߬ ߞߏ ߟߊ߫߸ ߏ߬ ߟߋ ߕߌߢߍߣߴߏ߬ ߘߌ߫.

ߓߊߏ߬߸ ߊ߬ߟߎ߬ ߟߊ߫ ߡߞߊ߬ߛߟߌ߬ ߞߊ߲ ߠߎ߬ ߘߐ߫߸ ߞߏ߫ ߢߌ߬ߣߌ߲߬ߞߊ߬ߟߌ ߡߍ߲ ߠߎ߬  ߘߊ߫߸ ߝߍ߭ ߞߍ߫ ߘߊ߫ ߏ߬ ߘߐߕߟߊ߫ ߕߎߡߊ ߟߋ߬ ߟߊ߫، ߌ ߘߴߊ߬ ߦߋ߫߸ ߡߍ߲ ߠߎ߬ ߦߋ߫ ߝߊߙߊ߲ߞߏ߫ ߊߙߊߓ ߟߊ߫߸ ߥߟߊ߬ߘߊ ߡߍ߲ ߘߌߣߴߏ߬ ߟߎ߫ ߡߊ߬߸ ߏ߬ ߦߋ߫ ߝߘߏ߬ߓߊ߬ ߟߞߊ߬ߙߊ߲߬ߠߌ߲ ߥߟߊ߬ߘߊ ߟߋ߬ ߘߌ߫، ߞߵߊ߬ ߛߐ߬ߘߐ߲߬߸ ߏ߬ ߟߎ߫ ߞߊ߬ ߊߙߊߓߎ߫ ߞߊ߲ ߟߊ߬ߞߐ߰ߟߌ ߟߋ߬ ߞߍ߫ ߞߵߊ߬ ߓߊߓߋ߬ ߓߘߍߞߍ߬.

 ߡߊ߬ߡߌ߬ߘߊ߬ߟߌ߬ߟߊ ߢߌ߲߬ ߘߏ߫ ߞߵߊ߬ ߝߐ߫ ߊ߲ ߧߋ߫ ߏ߬ ߟߋ ߘߐ߫ ߞߏ߫: <<ߡߐ߰ ߛߌߦߊߡߊ߲߫ ߠߋ߬ ߕߍ߬ߘߍ߫ ߦߊ߲߬߸ ߊ߬ ߜߋ߲ߜߋ߲ ߝߊߙߊ߲ߞߏ߫ ߊߙߊߓ ߡߐ߱ ߟߎ߬߸ ߝߘߏ߬ߓߊ߬ ߟߞߊ߬ߙߊ߲߬ߠߌ߲ ߢߌ߬ߣߌ߲߬ߞߊ߬ߟߌ ߟߋ߬ ߘߌ߫ ߘߴߏ߬ ߟߎ߫ ߡߊ߬، ߊ߬ ߡߊߝߟߍ߫ ߤߊ߲߫߸ ߡߐ߱ ߡߍ߲ ߡߊ߫ ߝߊ߬ߙߊ߲߬ߛߍ ߟߐ߲߫߸ ߝߏ߫ ߊߙߊߓߎ߸ ߝߘߏ߬ߓߊ߬ ߟߞߊ߬ߙߊ߲߬ߠߌ߲ ߢߌ߬ߣߌ߲߬ߞߊ߬ߟߌ߫ ߝߊ߬ߙߊ߲߬ߛߌ߬ߡߊ ߦߋ߫ ߥߊ߫ ߘߴߏ߬ ߡߊ߬، ߘߏ߫ ߟߎ߫ ߝߣߊ߫ ߓߍ߫߸ ߏ߬ ߟߎ߬ ߞߊ߫ ߞߊ߲߫ ߕߘߍ߬ ߞߊ߬ ߟߐ߲ߠߌ߲ߦߊ ߢߌ߬ߣߌ߲߬ߞߊ߬ߟߌ ߟߎ߫ ߟߋ߬ ߟߊߛߐ߬ߘߐ߲߬߸ ߏ߬ ߟߎ߬ ߝߣߊ߫ ߟߊ߫ ߢߌ߬ߣߌ߲߬ߞߊ߬ߟߌ ߥߊ߫ ߘߊ߫ ߞߍ߫ ߊ߬ߟߋ߬ ߝߘߏ߬ߓߊ߬ ߟߞߊ߬ߙߊ߲߬ߠߌ߲ ߢߍߥߟߊ߫ ߞߋߟߋ߲ ߏ߬ ߟߋ ߘߌ߫، ߏ߬ ߞߏ ߡߊ߫ ߢߊߦߋ߫ ߞߵߊ߬ ߘߊ߲ߘߊ߫ ߞߏ ߛߌ߰ ߛߋ߲߬ߠߊ߫߸ ߝߏ߫ ߊ߬ ߞߎ߲߭ߝߊ߰ ߕߎߡߊ ߝߊߦߌߘߊ߫.>> ߡߊ߬ߡߌ߬ߘߊ߬ߟߌ߬ߟߊ ߘߏ߫ ߟߋ߬ ߞߊ߲߫ ߕߋ߲߬.

ߘߐ߬ߕߟߊ߬ߟߌ ߝߍ߭ ߏ߬ ߟߎ߫ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߞߊ߲߫ ߞߏ߫ ߢߌ߬ߣߌ߲߬ߞߊ߬ߟߌ ߡߍ߲ ߠߎ߬ ߝߣߊ߫ ߘߌ߫ ߘߴߊ߬ߟߎ߫ ߡߊ߬߸ ߓߊ߬ߛߊ߲ ߘߏ߲߬ ߘߴߏ߬ ߘߐ߫، ߟߊߒߡߊ߫ ߘߐ߫߸ ߡߍ߲ ߠߎ߬ ߞߊ߫ ߞߊ߲߫ ߕߍ߬ߘߍ߫ ߞߊ߬ ߘߐ߬ߝߐ ߞߍ߫߸ ߏ߬ ߟߎ߬ ߣߌ߫ ߢߌ߬ߣߌ߲߬ߞߊ߬ߟߌ ߞߐߜߍ߫ ߟߏ߯ߟߎ߫ ߟߋ߬ ߦߊ߫ ߞߊ߲߫ ߕߘߍ߬، ߓߊ߬ߙߌ߬߸ ߏ߬ ߟߎ߫ ߞߊ߬ ߣߊ߯ߣߌ߲߫ ߠߋ߬ ߟߊߛߐ߬ߘߐ߲߬، ߟߊ߬ߛߙߋ߬ߦߊ߬ߟߌ߬ ߞߊ߲߬ߠߊ ߟߎ߬ ߘߐ߫߸ ߘߏ߫ ߟߎ߫ ߟߊ߫ ߢߌ߬ߣߌ߲߬ߞߊ߬ߟߌ ߘߌߣߍ߲ ߊ߬ߟߎ߫ ߡߊ߬߸ ߊ߬ ߦߋ߫ ߘߊ߫ ߞߏ߫ ߞߵߊ߬ ߕߊ߬ ߁߅߲ ߡߊ߬ ߤߊ߲߯ ߂߄߲߸ ߏ߬ ߟߎ߬ ߕߴߊ߬ ߘߐ߫.

ߡߊ߬ߡߌ߬ߘߊ߬ߟߌ߬ߟߊ߫ ߜߘߍ߫ ߟߊ߫ ߞߎߡߊ߫ ߘߐ߫߸ ߞߏ߫: <<ߖߊ߬ߡߊ߫ ߘߍ߬ߜߍ ߟߋ߬ ߓߐ߫ ߘߊ߫ ߞߊ߬ ߣߊ߬ ߜߊ߬ߛߊ ߢߌ߲߬ ߘߐ߫߸ ߞߏ߬ߣߌ߲߬ ߞߏ߫ ߛߌߦߊߡߊ߲߫ ߠߋ߬ ߞߵߊ߬ ߖߊ߲߬߸ ߊ߲ ߞߊ߬ ߡߍ߲ ߠߊߞߙߐ߬ߛߌ߫ ߞߊ߬ߣߌ߲߬، ߞߵߊ߬ ߟߴߊ߬ ߞߊ߲߬߸ ߘߐ߬ߝߐ ߞߣߐ߫߸ ߞߐߜߍ߫ ߟߏ߯ߟߎ ߘߐ߫߸ ߛߓߊߣߊ߲ ߞߵߊ߬ ߖߊ߲߬ ߠߋ߬߸ ߏ߬ ߡߊ߫ ߣߊ߬، ߊ߬ ߘߏ߲߬߸ ߞߐߜߍ ߟߏ߯ߟߎ ߏ߬ ߦߋ߫ ߓߍ߲߬ ߠߊ߫ ߢߌ߬ߣߌ߲߬ߞߊ߬ߟߌ߬ ߆߀ ߟߋ߬ ߡߊ߬߸ ߡߍ߲ ߖߋ߬ߓߌ߬ߕߊ، ߏ߬ ߘߐ߫߸ ߢߌ߬ߣߌ߲߬ߞߊ߬ߟߌ߫ ߖߋ߬ߓߌ߬ߕߊ ߏ߬ ߟߎ߬ ߡߊ߫ ߘߝߊ߫، ߐ߲߹ ߊ߬ߟߎ߫ ߞߏ߬ߣߌ߲ ߞߵߊ߬ ߝߐ߫ ߞߏ߫ ߞߐߜߍ ߡߍ߲ ߠߎ߬ ߣߐ߬ ߊ߬ ߘߢߊ߫ ߟߊ߫ ߏ߬ ߘߌ߫߸ ߊ߬ߟߎ߬ ߘߴߊ߬ߟߎ߬ ߤߊ߲ߞߟߌ߫ ߕߏ߫ ߏ߬ ߞߐ߫، ߊ߬ ߞߏ߬ߣߌ߲߸ ߊ߲ ߞߵߊ߲ ߛߋߞߏ ߞߍ߫.>>

ߓߊ߬ߛߊ߲ ߡߍ߲߬ ߠߎ߬ ߓߘߊ߫ ߜߛߊ߬ߞߍ߬ߟߊ ߓߍ߯ ߞߣߐ ߞߟߊߦߊ߫߸ ߞߵߊ߬ߟߎ߬ ߟߊ߫ ߖߋ߬ߓߌ ߟߎ߬ ߤߊߡߌ߲ ߛߌ߰ ߊ߬ߟߎ߬ ߟߊ߫، ߓߊߏ߬߸ ߊ߬ ߦߴߊ߬ ߝߊ߲߬ߓߊ ߞߎ߲߭ ߘߐ߫ ߟߋ߬߸ ߞߏ߫ ߛߊߞߍߟߌ ߦߋ߫ ߞߍ߫ ߟߊ߫ ߞߊ߲ߞߋߦߊ߫ ߞߍߒߖߘߍߡߊ ߟߎ߫ ߟߋ߬ ߟߊ߫߸ ߏ߬ ߘߏ߲߬ ߕߍߣߊ߬ ߢߌ߬ߣߊ ߢߌ߲߬ ߠߎ߬ ߘߊ߲ߞߎ߲߫ ߠߊ߫.

ߡߊ߬ߡߌ߬ߘߊ߬ߟߌ߬ߟߊ ߘߏ߫ ߞߵߊ߬ ߝߐ߫ ߒ߬ ߧߋ߫ ߞߏ߫: <<ߓߊ߬ߛߊ߲ ߡߍ߲ ߠߎ߬ ߘߏ߲߬ߣߴߊ߬ ߘߐ߫ ߣߌ߲߬߸ ߣߌ߫ ߢߊ ߡߊ߫ ߟߐ߬ ߏ߬ ߟߎ߬ ߘߐ߫߸ ߡߊ߬ߡߌ߬ߣߊ߬ߟߌ߬ߟߊ ߡߍ߲ ߠߎ߬ ߣߌ߫ ߂߀/߂߀ ߛߐ߬ߘߐ߲ ߞߊ߫ ߞߊ߲߫߸ ߏ߬ ߟߎ߬ ߘߌ߫ ߥߊ߫ ߂߀/߁߀ ߦߴߊ߬ߟߎ߫ ߖߘߍ߬ ߓߟߏ߫، ߘߏ߫ ߟߎ߫ ߖߍ߬ߘߍ ߕߍߣߊ߬ ߝߋ߲߫ ߛߐ߬ߘߐ߲߬ ߠߊ߫߸ ߣߌ߫ ߓߊ߬ߛߊ߲ ߣߌ߲߬ ߡߊ߫ ߢߊߓߐ߫.>> ߡߊ߬ߡߌ߬ߘߊ߬ߟߌ߬ߟߊ ߘߏ߫ ߟߋ߬ ߞߊ߲߫ ߕߋ߲߬.

ߜߊ߬ߛߊ ߘߊߦߟߍߟߌ ߝߍ߬߸ ߊ߲ ߠߊ߫ ߢߌ߬ߣߌ߲߬ߞߊ߬ߟߌ ߛߋ߫ ߘߊ߫ ߓߐ߬ߟߐ߲߬ߞߊ߫ ߡߊߙߌߦߊߡ ߞߡߊ߬ߙߊ߫ ߡߊ߬߸ ߊ߬ߟߋ ߞߍ߫ ߘߊ߫ ߜߋ߬ߟߎ߲߬ߠߌ߲߬ߠߊ ߟߋ߬ ߘߌ߫ ߜߊ߬ߛߊ ߛߋ߲߭ߝߍ߬ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫߸ ߏ߬ ߝߣߊ߫ ߞߵߊ߬ ߦߌ߬ߘߊ߬ ߞߏ߫ <<ߓߊ߬ߛߊ߲ ߘߏ߫>> ߘߏ߲߬ ߘߊ߫ ߟߋ߬ ߞߘߐߓߐߟߊ߲ ߠߎ߬ ߟߊ߫ ߞߏ ߘߐ߫ ߝߋߎ߫، ߞߏ߫ ߊ߬ߟߎ߫ ߞߏ߬ߣߌ߲ ߛߋ߫ ߘߊ߫ ߢߊ߫ ߛߐ߬ߘߐ߲߬ ߠߴߊ߬ ߡߊ߬.

ߊ߬ ߞߵߊ߬ ߦߌ߬ߘߊ߬ ߞߏ߫: <<ߓߊ߬ߛߊ߲߬ ߓߘߎߓߘߎ ߘߏ߫ ߟߎ߫ ߕߍ߬ߘߍ߫ ߊ߬ ߘߐ߫߸ ߦߏ߫ ߟߊߒߡߊ߫ ߘߐ߫ ߡߊ߬ߡߌ߬ߣߊ߬ߟߌ߬ߟߊ ߡߍ߲ ߠߎ߬ ߞߊ߫ ߞߊ߲߫ ߞߊ߬ ߝߊߙߊ߲ߞߏ߫ ߊߙߊߓ ߞߘߐߓߐߟߌ ߞߍ߫߸ ߝߘߏ߬ߓߊ߬ ߟߞߊ߬ߙߊ߲߬ߠߌ߲ ߕߊ ߟߋ߬ ߘߏ߲߬ ߘߴߏ߬ ߟߎ߬ ߓߟߏ߫، ߞߏ߬ߣߌ߲߬ ߢߊ߫ ߓߘߊ߫ ߛߐ߬ߘߐ߲߫ ߊ߬ ߡߊ߬، ߊ߬ ߝߐ߫ ߘߊ߫ ߞߏ߫ ߓߍ߯ ߦߴߊ߬ ߛߌ߰ ߊ߬ ߟߊ߫ ߝߏ߯ ߞߣߐ߫ ߞߊ߬ ߡߊ߬ߞߐ߬ߣߐ߲߬ߠߌ߲ ߞߍ߫߸ ߖߐ߲߰ߛߊ߫ ߞߘߐߓߐߟߊ߲ ߠߎ߬ ߘߌ߫ ߘߐߕߟߊ߫߸ ߊ߲ ߘߏ߲߬ ߡߊ߫ ߢߌ߬ߣߊ߫ ߓߊ߬ߛߊ߲ ߏ߬ ߟߎ߬ ߞߐ߫ ߝߋߎ߫، ߞߊ߲ߞߊ߲߫ ߕߌ߲߬ߞߎߘߎ߲ ߡߎ߰ߡߍ ߜߛߊ߬ߞߍ߬ߟߊ ߓߍ߲߬ ߘߊ߫ ߡߐ߰ ߆ ߇߀߂ ߟߋ߬ ߡߊ߬.>> ߓߐ߬ߟߐ߲߬ߞߊ ߣߌ߲߬ ߞߵߏ߬ ߟߊߛߋ߫.

ߊ߲ ߛߋ߫ ߘߊ߫ ߡߊ߬ߡߌ߬ߘߊ߬ߟߌ߬ߟߊ ߡߍ߲ ߠߎ߬ ߡߊߛߐ߬ߘߐ߲߬ ߠߊ߫ ߥߎ߬ߙߊ ߝߍ߬߸ ߏ߬ ߟߎ ߫ ߞߵߊ߬ߟߎ߬ ߘߡߊߞߊ߬ߛߌ߫ ߟߋ߬߸ ߞߵߊ߬ߟߎ߬ ߘߡߊߞߊ߬ߛߌ߫ ߝߘߏ߬ߓߊ߬ ߓߊ߯ߙߊ ߞߏߕߌ߮ ߦߋ߫߸ ߝߊ߬ߙߊ߲߬ߛߎߥߊ߫ ߓߙߎ߬ߣߏ߬߸ ߞߵߊ߬ߟߎ߬ ߘߡߊߞߊ߬ߛߌ߫ ߖߡߊ߬ߣߊ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫߸ ߖߐ߲߰ߛߴߊ߬ߟߎ߬ ߟߊ߫ ߜߟߍ߬ߦߊ߫ ߛߐ߬ߘߐ߲߬ߣߍ߲ ߠߎ߬ ߘߌ߫ ߘߊ߲ߘߊ߫ ߢߊ ߡߍ߲ ߡߊ߬߸ ߦߊ߬ߣߌ߫ ߞߐߖߋߓߌ ߟߎ߬ ߟߊߖߍ߲ߛߍ߲ߕߐ߫.

ߛߊߛߋ߫ ߟߊ߫ ߟߞߊߙߊ߲ߠߌ߲ߠߊ ߡߍ߲ ߠߎ߬ ߕߘߍ߬ ߞߣߍ ߞߊ߲߬߸ ߏ߬ ߟߎ߫ ߞߵߊ߬ߟߎ߬ ߘߡߊߞߊ߬ߛߌ߬߸ ߞߏ߫ ߓߍ߲߬ߞߊ߲ ߡߍ߲ ߞߟߊ߬ߣߐ߬ߦߊ߬ ߘߊ߫ ߂߀߂߆ ߓߌ߲ߠߊߥߎߟߋ߲ ߕߋ߬ߟߋ߫ ߃ ߡߊ߬߸ ߞߏ߫ ߞߎ߲߬ߠߊ߬ߛߌ߮ ߦߴߊ߬ ߖߏ߫߸ ߞߵߏ߬ ߞߣߐߘߐ ߡߊߓߏ߲߬ߧߊ߬، ߊ߬ ߜߋ߲ߜߋ߲߫ ߊ߬ ߕߏ߲ߘߋ ߇߲ ߡߍ߲ ߟߐ߬ߣߍ߲߫ ߖߌ߬ߣߍ߬ ߛߏ ߟߎ߬ ߛߊߛߋ߫ ߟߊ߫ ߟߞߊߙߊ߲ߠߌ߲ߠߊ ߟߎ߬ ߡߊ߬߸ ߣߴߊ߬ߟߎ߬ ߡߊ߫ ߕߊ߬.

ߡߊ߬ߡߌ߬ߘߊ߬ߟߌ߬ߟߊ ߘߏ߫ ߞߵߊ߬ ߦߌ߬ߘߊ߬ ߞߎߡߊ߫ ߟߊߓߊ߲߫ ߘߐ߫߸ ߞߏ߫: <<ߞߊ߲ߞߊ߲߫ ߟߊ߬ߞߟߏ߬ߞߟߏ߬ߟߌ ߝߊ߰ߡߊ ߓߍ߯ ߦߴߊ߬ ߞߊ߬ߟߊߡߊ߬߸ ߞߎߡߊߕߍ߫ ߜߋ߬ߟߎ߲߬ߠߌ߲߬ߠߊ߬ ߡߛߏ ߡߊ߬، ߊ߲ ߧߋ߫ ߡߍ߲ ߢߌߣߌ߲߫ ߠߊ߫߸ ߜߟߍ߬ߦߊ ߡߍ߲ ߠߎ߬ ߛߐ߬ߘߐ߲߬ߣߍ߲߫ ߣߌ߲߬߸ ߏ߬ ߟߎ߬ ߦߋ߫ ߓߊߛߌ߫߸ ߞߊ߬ ߓߍ߯ ߟߊߞߢߊ߫، ߊ߬ߟߎ߫ ߞߏ߬ߣߌ߲ ߞߵߊ߬ ߟߊ߬ߤߘߌ ߕߊ߬ ߞߏ߫ ߊ߬ߟߎ߬ ߘߴߊߟߎ߫ ߖߊ߲߬ߕߏ߫ ߓߊ߬ߛߊ߲߬ ߞߍߣߍ߲ ߢߌ߲߬ ߠߎ߬ ߘߐ߫، ߐ߲߹ ߊ߲ ߛߌ߰ߣߍ߲߫ ߞߵߏ߬ ߞߐ ߘߐߜߍ߫، ߊ߬ ߞߏ ߞߏ߬ߣߌ߲߬ ߘߌ߫ ߡߐ߰ ߖߛߎ߬ߓߐ߫߸ ߞߏ߬ߣߵߊ߲ ߠߊ߫ ߟߊߒߠߦߊ ߦߋ߫ ߞߎ߲߬ߠߊ߬ߛߌ߮ ߘߐ߫߸ ߊ߲ ߟߊߣߴߊ߬ ߟߊ߫ ߝߣߊ߫߸ ߊ߬ߟߎ߬ ߘߌ߫ ߓߍ߲߬ߡߊ߬ߞߊ߲ ߓߐ߫ ߊ߬ ߛߌߟߊ ߝߍ߬.>>

ߊ߬ ߕߍ߫ ߡߍ߲߫ ߏ߬ ߞߐ߫߸ ߞߛߊߞߍߟߌ ߓߍߣߊ߬ ߘߊߡߌ߬ߣߊ߬߸ ߞߊ߬ ߞߐߖߋߓߌ ߟߊߓߐ߫، ߞߵߊ߬ ߛߐ߬ߘߐ߲߬߸ ߊ߬ ߞߏ ߞߟߊߡߊ߲߫ ߞߊ߲ߞߊ߲߫ ߝߊ߲߭ ߝߍ߬، ߣߌ߫ ߢߊ ߞߏ߬ߣߌ߲ ߡߊ߫ ߟߐ߬ ߣߌ߬ ߞߏ ߘߐ߫߸ ߜߊ߬ߛߊ ߢߌ߲߬ ߘߊ߲ߞߎ߲ߕߐ߫ ߕߐ߯ ߟߊߘߏ߲ߠߊ߫ ߡߐ߰ ߥߊ߯ ߦߙߌߞߊ߫ ߟߋ߬ ߓߟߏ߫ ߕߋߟߋ߲ߓߊߟߌߦߊ ߘߌ߫.