ߓߌ߬ ߞߊ߯ߙߌ ߂߀߂߆ ߞߏ߲ߞߏߘߌ߬ߓߌ ߕߟߋ߬ ߀߅ ߣߌ߲߬ ߡߊ߬߸ ߞߊ߲ߞߊ߲߫ ߣߌ߫ ߟߊ߬ߡߌߣߌ߲ ߛߏ߫ ߛߌߦߊߡߊ߲߫ ߠߋ߬ ߓߐ߫ ߘߊ߫ ߓߌ߬ ߞߣߊ߬ ߢߍߓߊ߮ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߞߊ߬ߓߊ ߛߎ߬ߞߏ߬ߦߊ ߘߐ߫߸ ߊ߬ߟߋ ߡߍ߲ ߕߘߍ߬ ߦߋ߫ ߢߍߓߊ߯ ߝߟߐ߫ ߘߌ߫ ߞߊ߲ߞߊ߲߫ ߕߌ߲ߓߌߘߌ߲ߘߓߊ ߟߊ߫߸ ߒ߬ߓߊ߬߸ ߏ߬ ߟߋ߬ ߛߊ߬ ߘߊ߫ ߛߌ߲߬ߣߌ߲߬ߟߏ߲ ߕߊ߬ߡߌ߲߬ߣߍ߲ ߡߊ߬ ߂߀߂߆ ߞߏ߲ߞߏߘߌ߬ߓߌ ߕߋ߬ߟߋ߫ ߛߊ߬ߓߊ߫ ߡߊ߬߸ ߖߊ߬ߡߊ߫ ߝߌ߬ߙߌ߲ߞߐ߲߬ߞߐ߲ ߠߋ߬ ߓߐ߫ ߘߊ߫ ߓߌ߬߸ ߊ߬ ߓߊߘߍ߫ ߞߊ߲ߡߊ߬߸ ߢߍߓߊ߯ ߛߌߦߊߡߊ߲߫ ߣߌ߫ ߞߏߕߌ߯ ߛߌߦߊߡߊ߲߫ ߕߘߍ߬ ߡߍ߲ ߞߣߍ߫ ߞߊ߲߬߸ ߞߏߕߌ߯ ߞߎ߲ߠߊ߫߸ ߞߏߕߌ߯ ߝߟߐ ߊߡߊߘߎ߫ ߎ߯ߙߌ߬ ߓߊ ߕߘߍ߬ ߦߋ߫ ߞߣߍ ߞߊ߲߬߸ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߊ߬ ߊ߬ߟߋ ߡߍ߲ ߟߊߣߵߊ߬ ߞߐߦߌߘߦߊ ߟߊ߫.
ߓߌߟ ߞߐ߲ߘߍ߫ ߕߘߍ߬ ߦߋ߫ ߞߣߍ ߣߌ߲߬ ߞߊ߬߸ ߞߵߏ߬ ߟߊ߫ ߛߌߦߊߡߊ߲߫ ߜߘߍ߫ ߟߎ߫ ߞߊ߲߬߸ ߡߍ߲ ߓߍ߯ ߕߍ߫ ߛߋ߫ ߡߊߘߊ߲߫ ߠߴߊ߲ ߓߟߏ߫ ߦߊ߲߬، ߢߍߓߊ߮ ߞߎ߲ߠߊ߫߸ ߞߊ߬ߙߊ߲߬ߡߐ߯ ߖߊߥߙߊ߫ ߕߘߍ߬ ߦߋ߫ ߓߊߘߍ߫ ߞߣߍ ߣߌ߲߬ ߞߊ߲߬߸ ߊ߬ߟߋ ߡߍ߲ ߦߋ߫ ߖߌ߬ߣߍ߬ ߘߌ߯ߣߊ ߞߏߢߊ ߟߎ߬ ߝߘߏ߬ߓߊ߬ ߞߟߊ߬ߕߌ߮ ߘߌ߫߸ ߞߐߣߊߞߙߌ߫ ߢߍߓߊ߮ ߡߏ߬ߡߊ߬ߡߍ߬ߘߌ߫ ߛߊߟߌߥߎ߬ ߞߊ߬ߡߊߙߊ߬ ߝߣߊ߫ ߕߘߍ߬ ߦߋ߫ ߦߊ߲߬، ߊ߬ ߣߌ߫ ߛߌߦߊߡߊ߲߫ ߜߘߍ߫ ߟߎ߫، ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߞߵߊ߬ ߟߊ߫ ߗߋߘߋ߲߫ ߓߟߏߡߊߞߊ߬ߣߍ߲ ߠߎ߬ ߟߋ߬ ߟߊߣߊ߬ ߛߎ߬ߞߏ߬ߦߊ ߣߌ߲߬ ߘߐ߫߸ ߞߊ߬ ߞߏߕߌ߯ ߝߟߐ ߟߊߣߊ߬ ߊ߬ߟߋ ߖߍ߬ߘߍ ߕߐ߯ ߟߊ߫߸ ߞߏߕߌ߯ ߕߐ߭ ߟߎ߬ ߣߊ߬ߣߍ߲߫ ߏ߬ ߡߍ߲ ߡߊߟߐ߬ ߞߊ߲ߡߊ߬.
ߘߌ߯ߣߊ߫ ߢߍߡߐ߮ ߞߊ߬ߙߊ߲߬ߡߐ߮ ߖߊߥߙߊ߫ ߞߵߊ߬ ߟߊ߫ ߓߋߟߋ߲ߠߊ ߘߊߡߌ߬ߣߊ߫ ߊߟߊ߫ ߞߏߝߐ ߟߋ߬ ߡߊ߬ ߝߟߐ߫߸ ߞߏ߫ ߊ߲ ߧߋ߫ ߛߊ߬ߦߌ߲߬ ߊߟߊ߫ ߡߊ߬، ߏ߬ ߞߐ߫ ߞߊ߬ ߘߌ߯ߣߊ߫ ߢߍߡߐ߮ ߕߐ߭ ߟߎ߬ ߕߊ߬ ߞߵߊ߬ߟߎ߬ ߟߊ߫ ߊ߬ߟߋ ߞߊ߲߬߸ ߞߏ߫ ߊ߬ߟߎ߬ ߓߍ߯ ߦߋ߫ ߛߦߊ߬ ߝߏߟߌ ߟߊߛߋ߫ ߊ߲ ߠߊ߫ ߞߊ߲ߕߌ߮ ߡߊ߬ ߣߴߏ߬ ߦߋ߫ ߞߟߍ߬ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߘߌ߫ “ߊ߲ ߦߋ߫ ߝߏ߬ߟߌ ߟߊߛߋ߫ ߟߊ߫ ߖߌ߬ߣߍ߬ߞߊ ߓߍ߯ ߟߊߘߍ߬ߣߍ߲ ߡߊ߬߸ ߊ߬ ߣߌ߫ ߞߵߊ߬ߟߎ߬ ߡߊߛߓߊߙߌ߫ ߖߛߎ߬ߟߊ߬ߖߌ߮ ߟߊ߫߸ ߊߟߊ߫ ߞߊ߬ ߊ߲ ߘߊ߲߫ ߠߋ߬ ߞߊ߬ ߓߊ߲߫ ߞߊ߬ ߛߊ߬ߦߊ ߘߊ߲߫߸ ߏ߬ ߓߟߏߡߊ߬߸ ߢߍߓߊ߮ ߓߍ߯ ߝߣߊ߫ ߓߍߣߊ߬ ߛߊ߬ߦߊ ߣߍߣߍ߫ ߟߋ߬ ߗߐ߫߹” ߞߊ߬ߙߊ߲߬ߡߐ߮ ߖߊߥߙߊ߫ ߓߊ߲߫ ߘߊ߫ ߞߊ߬ ߝߏ߬ߟߌ ߟߊߛߋ߫ ߛߊ߬ߓߊ߰ߕߐ ߞߐߙߍ߫ ߟߎ߫ ߡߊ߬.
ߊ߬ ߣߌ߫ ߞߊ߬ ߕߌ߲ߞߌ߲߫ ߓߎ߰ߓߎ߰ߣߍ߲ ߣߌ߫ ߕߊ߲߬ߘߏ߬ߟߌ߬ ߞߍ߫ ߛߊ߬ߓߊ߰ߕߐ ߦߋ߫ “ߊ߬ ߞߍ߫ ߘߊ߫ ߡߐ߰ ߟߋ߬ ߘߌ߫߸ ߡߍ߲ ߕߘߍ߬ ߦߋ߫ ߡߐ߰ ߟߎ߬ ߡߊߞߟߌ߫ ߟߊ߫ ߊߟߊ߫ ߞߏߝߐ ߡߊ߬߸ ߊ߬ ߘߏ߲߬ ߞߵߊ߬ ߟߊ߫ ߖߊ߲߬ߞߊߙߏ ߡߎ߰ߡߍ ߞߍ߫ ߛߓߊߙߌ ߟߋ߬ ߘߐ߫” ߊ߬ ߞߵߊ߬ ߟߊ߫ ߞߎߡߊ ߞߎ߲߬ߘߏ߲ ߞߍ߫ ߡߍ߲ ߘߌ߫߸ ߏ߬ ߟߋ߬ ߦߋ߫ ߓߍ߲߭ ߢߌߣߌ߲߫ ߘߌ߫ ߓߎ߬ߕߎ߲߫߸ ߢߍߡߐ߯ ߓߊ߲߬ߞߊߟߌ߬ ߕߊ߯ߣߍ߲ ߞߐߝߍ߬. ߞߐߣߊߞߙߌ߫ ߘߌ߯ߣߊ߫ ߢߍߡߐ߱ߓߊ ߟߊ߫ ߓߋߟߋ߲ߠߊ ߘߐ߫߸ ߊ߬ߟߋ߬ ߡߍ߲ ߕߐ߯ ߦߋ߫ ߡߏ߬ߡߊ߬ߡߍ߬ߘߌ߫ ߛߊߟߌߥߎ߬ ߞߊ߬ߡߊߙߊ߬ ߘߌ߫߸ ߊ߬ ߞߵߊ߬ ߦߌ߬ߘߊ߬ ߊ߲ ߓߍ߯ ߦߋ߫ ߛߙߋ ߟߋ߬ ߘߌ߫ ߢߐ߲߯ ߦߋ߫ ߊ߬ߟߋ ߞߊ߬ ߞߊ߬ߙߊ߲߬ߡߐ߯ ߓߊ߲߬ߞߊߟߌ߬ ߟߐ߲߫߸ ߏ߬ ߘߐ߫߸ ߡߊ߰ߙߌ ߦߴߊ߬ ߖߌ߰ ߦߙߐ ߓߍ߲߬ ߡߍ߲ߘߌߦߊ ߣߊߞߐ ߡߊ߬߸ ߡߐ߰ ߝߡߊߖߌ߰ߣߍ߲ ߣߌ߫ ߡߐ߰ ߤߌߣߊ߲ߒߕߋ ߟߋ߬ ߦߴߊ߬ ߘߌ߫߸ ߊ߬ ߓߘߊ߫ ߕߊ߯߸ ߞߵߊ߬ ߢߐ߲߰ ߘߌ߫ ߞߊ߲ߞߊ߲߫ ߣߌ߫ ߟߊ߬ߖߌ߬ߣߍ߫ ߡߊ߬.
“ߊ߲ ߧߋ߫ ߝߏ߬ߟߌ ߟߊߛߋ߫ ߟߊ߫ ߞߊ߲ߕߌ߫ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬߸ ߓߊߏ߬߸ ߛߌ߭ ߟߋ߬ ߓߘߊ߫ ߛߋ߫ ߊ߬ ߘߊ߲߭ ߠߊ߫߸ ߣߌ߫ ߛߌ߭ ߕߎ߲߬ ߡߊ߫ ߛߴߊ߬ ߘߊ߲߭ ߠߊ߫߸ ߊ߬ ߕߘߍ߬ ߕߍ߫ ߛߊ߬߸ ߘߎ߲߬ߓߎߦߊ߬ ߞߊ߬ ߞߏ߫ ߛߌߦߊߡߊ߲߫ ߠߋ߬ ߞߍ߫، ߊ߬ ߞߵߊ߬ ߟߊߕߊ߯ ߕߎߣߎ߳ߖ߭ߌ߫߸ ߓߊ߬ߙߌ߫߸ ߊ߬ ߡߊ߫ ߓߍ߲߬، ߊ߲ ߧߋ߫ ߝߏ߬ߟߌ ߟߊߛߋ߫ ߟߴߊ߬ ߝߣߊ߫ ߡߊ߬߸ ߞߵߊ߬ ߟߊ߫ ߞߊ߲ߕߌ߯ߦߊ ߕߏ߫ ߊ߬ ߡߊ߬” ߢߍߓߊ߮ ߡߏ߬ߡߊ߬ߡߍ߬ߘߌ߫ ߛߊߟߌߥߎ߬ ߞߊ߬ߡߊߙߊ߬ ߟߊ߫ ߞߎߡߊ ߟߎ߫ ߓߏ߬ߙߌ߫ ߘߊ߫ ߝߏ߬ߟߌ ߣߌ߫ ߕߌ߲ߞߌ߲ ߠߋ߬ ߞߊ߲߬߸ ߣߊ߬ߓߊ߰ߕߐ ߘߏ߫ ߟߋ߬ ߦߋ߫ ߕߋ߲߬ ߊ߬ߟߋ ߣߴߊ߬ ߕߐ߯ ߦߋ߫ ߡߊ߬ߡߊ߬ߘߌ߬ ߖߊ߰ߣߊ߫ ߞߊ߬ߓߊ ߘߌ߫߸ ߊ߬ߟߋ ߟߊ߫ ߞߎߡߊ߫ ߘߐ߫߸ ߣߴߌ ߞߵߊ߲ ߣߊ߬ߣߍ߲ ߦߋ߫ ߦߊ߲߬ ߓߌ߬.
ߊ߲ ߣߊ߬ߣߍ߲߫ ߊ߲ ߞߊ߬ߙߊ߲߬ߡߐ߰ߓߊ ߟߋ߬ ߟߊ߫ ߛߎ߬ߞߏ߬ߦߊ ߘߐ߫߸ ߞߣߊ߬ ߞߵߊ߬ ߓߊߘߍ ߞߍ߫߸ ߒߠߋ ߘߌ߫ ߛߋ߫ ߡߍ߲߲ ߝߐ߫ ߊ߬ ߟߊ߫ ߞߏ ߞߊ߲߬߸ ߊ߬ ߞߍ߫ ߘߊ߫ ߟߊ߬ߞߊ߬ߙߊ߲߬ߠߌ߲ߠߊ ߟߋ߬ ߘߌ߫߸ ߊ߬ ߞߵߊ߬ ߛߊ߲߬ ߅߀ ߟߋ߬ ߞߍ߫ ߊߟߊ߫ ߞߏߝߐ ߟߊ߫، ߒߠߋ ߞߍ߫ ߘߴߊ߬ ߟߊ߫ ߞߊ߬ߙߊ߲߬ߘߋ߲ ߘߏ߫ ߟߋ߬ ߘߌ߫، ߊ߬ ߞߊ߬ ߛߊ߲߬ ߃߀ ߟߋ߬ ߞߍ߫ ߡߐ߰ ߟߊ߬ߛߊߟߌ ߟߊ߫ ߞߊ߲ߞߊ߲߫ ߦߊ߲߬߸ ߊ߲ ߞߏ߬ߣߌ߲ ߦߋ߫ ߊߟߊ߫ ߕߙߊ߫ ߟߊ߫ ߟߋ߬ ߊ߬ ߦߋ߫ ߘߌ߬ߢߍ߫ ߊ߬ ߡߊ߬߸ ߓߊߏ߬߸ ߊߡߘߊߘߋ߲߫ ߛߌ߫ ߘߝߊߣߍ߲߫ ߕߍ߫߸ ߏ߬ ߟߋ߬ ߞߍ߫ ߘߊ߫ ߡߊ߬ߡߊ߬ߘߌ߬ ߖߊ߰ߣߊ߫ ߞߊ߬ߓߊ ߟߊ߫ ߞߎߡߊ ߘߌ߫، ߞߏ߲߬ߓߏ߬ ߎߛߑߡߊ߯ߣߌ߲߬ ߞߊ߬ߓߊ ߟߊ߫ ߛߊ߬ߙߊ߲߬ߣߎ߲ ߘߐ߫߸ ߊ߬ ߞߊ߬ ߞߊ߲ߞߊ߲߫ ߕߌ߲ߓߌߘߌ߲ߘߓߊ ߢߍߓߊ߮ ߓߊ߲߬ߞߊߟߌ߬ ߞߊ߬ߓߊ ߝߏ߬ ߊ߬ ߟߊ߫ ߞߍߣߍ߲ ߠߎ߬ ߟߊ߫߸ ߊ߬ߟߋ ߡߍ߲ ߞߍ߫ ߘߊ߫ ߢߍߡߐ߯ ߝߟߐ߫ ߘߌ߫ ߞߊ߲ߞߊ߲߫ ߕߌ߲ߘߌ߲ߘߓߊ ߟߊ߫.
ߏ߬ ߓߘߊ߫ ߛߊ߲߬ ߂߀ ߣߌ߫ ߝߊ߲ߘߊ߫ ߓߐ߫߸ ߊ߬ ߞߍ߫ ߘߊ߫ ߡߐ߰ ߟߋ߬ ߘߌ߫ ߡߍ߲ ߞߵߊ߬ ߘߐߖߊ߬ ߛߌ߬ߟߡߊ߬ߦߊ߬ ߦߋ߫، ߊ߬ ߞߍ߫ ߘߊ߫ ߓߊߘߋ߲ߧߊ ߘߐߞߙߊ߫ ߖߟߎ ߟߋ߬ ߘߌ߫ “ߊ߲ ߧߋ߫ ߊߟߊ߫ ߕߙߊ߫ ߟߊ߫ ߞߊ߬ߙߊ߲߬ߡߐ߰ ߓߊ߲߬ߞߊߟߌ߬ ߞߊ߬ߓߊ ߞߊ߬ ߡߍ߲ ߞߍ߫߸ ߊߟߊ߫ ߦߋ߫ ߏ߬ ߟߊߛߊ߬ߦߌ߲߫ ߊ߬ ߡߊ߬߸ ߊߟߊߡߵߊ߬ ߞߐ ߟߎ߬ ߓߙߊߞߊ߫ ߘߊ߫߸ ߞߊ߬ ߤߌߣߊ߫ ߕߊ߯ߓߊ߯ߕߐ ߛߌ߬ߟߊ߬ߡߊ ߓߍ߯ ߟߊߘߍ߬ߣߍ߲ ߠߊ߫” ߞߏ߲߬ߓߏ߬ ߎߛߑߡߊ߯ߣߌ߲߬ ߞߊ߬ߓߊ ߟߊ߫ ߛߊ߬ߙߊ߲߬ߣߎ߲ ߞߎ߲߭ߘߏ߲߬ ߘߊ߫ ߘߎ߬ߥߊ߬ߎ ߟߋ߬ ߟߊ߫. ߖߊ߬ߡߊ ߟߋ߬ ߓߐ߫ ߘߊ߫ ߞߊ߲ߞߊ߲߫ ߞߣߐ߫ ߓߌ߬߸ ߢߍߓߊ߯ ߓߊ߲߬ߞߊߟߌ߬ ߞߊ߬ߓߊ ߓߊߘߍ߫ ߞߊ߲ߡߊ߬߸ ߊ߲ ߠߊ߫ ߟߊ߬ߞߙߐ߬ߛߌ߬ߟߌ ߛߋ߫ ߘߊ߫ ߡߍ߲ ߠߎ߫ ߡߊ߬߸ ߕߌ߲ߞߌߘߌ߲ߘߓߊ ߞߣߐߟߊ ߝߊ߬ߣߍ߲߫ ߠߋ߬ ߕߍ߬ߘߍ߫ ߖߊ߬ߡߊ ߟߊ߫ ߓߌ߬߸ ߝߏ߫ ߞߵߊ߬ ߘߊߛߙߊߓߊ ߟߊ߫، ߘߊߞߘߐߟߊ ߟߎ߫ ߡߌ߬ߣߊ߬ߣߍ߲߫ ߣߊ߲߬ߕߌ߮ ߟߎ߬ ߣߌ߫ ߞߟߍ߬ߡߐ߮ ߟߎ߬ ߟߊ߫.
ߝߎ߬ߙߋ ߡߊߛߊߟߌ߫ ߕߎߡߊ ߟߊ߫߸ ߞߊ߬ ߕߌ߲ߓߌߘߌ߲ߘߊ ߞߣߐߟߊ ߝߊ߫ ߖߊ߬ߡߊ ߟߊ߫، ߏ߬ ߕߐ߫ ߖߊ߬ߡߊ ߞߊ߬ ߕߐ߲߬ߕߐ߲ ߞߍ߫ ߢߐ߲߯ߝߍ߬ ߞߋߟߋ߲ߘߌ߫ ߁߄ ߕߎߡߊ ߟߊ߫߸ ߞߊ߬ ߢߍߓߊ߮ ߓߊ߲߬ߞߊߟߌ߬ ߞߊ߬ߓߊ ߖߌ߬ߦߘߊ߬ ߟߊ߬ߓߊ߲ ߡߊߜߍ߲߬߸ ߣߴߏ߬ ߦߴߊ߬ ߛߊ߬ߙߌ߬ߟߏ ߘߌ߫߸ ߊ߬ ߛߎ߭ ߘߏ߲߬ ߘߊ߫ “ߒߓߋ߲ߓߊߞߙߐ߫” ߛߊ߬ߙߌ߬ߝߍ ߟߋ߬ ߘߐ߫.
ߛߎ߯ߟߊ߲ߘߌ߫ ߛߊ߬ߞߐ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
