ߞߎߣߎ߲߬ ߞߐ߬ߓߐ߬ߟߏ߲ ߡߊ߬߸ ߂߀߂߆ ߕߟߋ߬ ߁߆، ߘߐߞߑߕߍߙ ߊ ߓߋ߬ ߛߋ ߞߊ߬ ߟߊ߬ߘߍ߬ߓߊ߫ ߡߊߞߟߌ߫ ߛߌ߯ߙߌ߲߫ ߞߟߍ߬ߡߐ߰ߟߊ߫߸ ߡߍ߲ ߢߣߊߓߊ߯ߦߊ߫ ߘߊ߫ ߛߌ߯ߙߌ߲߫ ߡߊ߲߬ߛߟߊ߬ߞߊ ߟߎ߬ ߓߟߏ߫، ߡߙߊ߬ߓߊ߮ ߣߌ߫ ߞߊ߬ߝߏ߬ߙߋ߲߬ߕߌ߮ ߣߌ߫ ߞߕߌߞߊ߲ߘߊ ߟߎ߬ ߓߟߏ߫߸ ߊ߬ ߣߌ߫ ߛߌ߯ߙߌ߲߫ ߛߊߣߌ߲߫ ߖߎߟߊ ߟߎ߬ ߣߌ߫ ߘߊ߲ߘߟߊ߫ ߛߌߦߊߡߊ߲߫ ߣߌ߫ ߓߊߛߌߓߏ߲߫ ߕߌ߮ ߟߎ߬ ߓߟߏ߫، ߞߵߏ߬ ߟߎ߬ ߟߊ߫ ߕߐ߲ߓߟߏߡߊ ߟߎ߬ ߣߌ߫ ߣߊ߲߬ߕߌ߰ ߛߌߦߊߡߊ߲߫ ߞߊ߲߬.
ߘߐߞߑߕߍߙ ߊ ߓߋ ߛߋ ߟߊ߫ ߜߊ߬ߙߊ߫ ߛߌ߲߬ߝߏ߲߬ߧߊ߬ߣߍ߲ ߣߌ߲߬ ߘߐ߫߸ ߊ߬ ߞߎߡߊ ߟߎ߬ ߓߏ߬ߙߌ߬ ߘߴߊ߬ߟߎ߬ ߟߊ߫ ߘߊ߲ߘߊߟߌ ߘߐ߬ߝߐ ߞߊ߲߬߸ ߊ߬ ߞߵߊ߬ ߦߌ߬ߘߊ߬ ߞߏ߫ ߡߐ߰ ߕߴߌ ߥߊ߫ ߦߙߐ ߟߐ߲߫߸ ߣߴߌ ߡߴߌ ߓߐ߫ ߦߙߐ ߟߐ߲߫، ߏ߬ ߓߟߏ ߡߊ߬ ߞߏ߫ ߞߟߌߟߌ ߡߍ߲ ߘߏ߲߬ ߘߴߊ߬ߟߎ߫ ߞߎ߲߬ ߂߀߂߀ ߠߊ߫߸ ߏ߬ ߟߋ ߞߍ߫ ߘߊ߫ ߞߟߌߟߌ߫ ߂߄߁ ߘߌ߫، ߂߀߂߁ ߞߟߌߟߌ߫ ߓߍ߲߬ ߘߊ߫ ߃߀߃ ߡߊ߬، ߂߀߂߂ ߕߊ ߦߋ߫ ߄߀߈، ߂߀߂߃ ߞߟߌߟߌ ߓߍ߲߬ ߘߊ߫ ߃߁߅ ߟߋ߬ ߡߊ߬.
ߞߊ߬ ߓߍ߲߬ ߖߊ߲߬ߞߊ߬ߙߏ߬ߕߐ ߟߎ߬ ߟߥߊ ߡߊ߬ ߛߏ߫ ߜߘߍ߫ ߘߊ߲ߘߊߛߏ ߟߊ߫ ߛߊ߫، ߂߀߂߀ ߠߊ߫߸ ߊ߬ߟߎ߫ ߞߊ߬ ߖߊ߲߬ߞߊ߬ߙߏ߬ߕߐ߬ ߅߃ ߟߋ߬ ߟߥߊ߫߸ ߓߡߊ߬ߞߐ߫: ߡߐ߰ ߃߃߸ ߞߊ߲ߞߊ߲߫: ߓߣߊ߬ߓߊ߰ߕߐ߬ ߁߂: ߞߏߣߊߞߙߌ߫: ߡߐ߰ ߇، ߂߀߂߁ ߡߐ߰ ߟߥߊߣߍ߲ ߦߙߌߞߊ ߦߋ߫ ߈߀ ߠߋ߬ ߘߌ߫، ߓߡߊ߬ߞߐ߫: ߆߂߸ ߞߊ߲ߞߊ߲߫: ߁߃߸ ߞߏߣߊߞߙߌ߫: ߃، ߞߛߌ߬ߘߎ߯: ߡߐ߰ ߂، ߂߀߂߂: ߖߊ߲߬ߞߊ߬ߙߏ߬ߕߐ߫ ߇߂ ߟߋ߬ ߟߥߊ߫ ߘߊ߫ ߛߏ߫ ߜߘߍ߫ ߟߊ߫߸ ߓߡߊ߬ߞߐ߫: ߄߈، ߞߊ߲ߞߊ߲߫: ߂߄، ߡߐ߰ ߡߊ߫ ߟߥߊ߫ ߞߏߣߊߞߙߌ߫ ߛߊ߲߭ ߢߌ߲߬ ߠߊ߫ ߞߵߏ߬ ߞߎ߲߭ ߞߍ߫ ߛߌߟߊ ߗߏ߯ߦߊ ߘߌ߫، ߂߀߂߃ ߟߊ߫߸ ߖߊ߲߬ߞߊ߬ߙߏ߬ߕߐ߫ ߅߂ ߟߋ߬ ߟߊߕߊ߯ ߘߊ߫ ߛߏ߫ ߜߘߍ߫ ߟߊ߫ ߘߊ߲ߘߊߟߌ߫ ߞߊ߲ߡߊ߬، ߓߡߊ߬ߞߐ߫: ߃߆߸ ߞߊ߲ߞߊ߲߫: ߁߂: ߞߏߣߊߞߙߌ߫: ߛߋߦߌ߲߫ (߈).
ߖߊ߲߬ߞߊ߬ߙߏ߬ߕߐ ߡߍ߲ ߠߊ߫ ߞߏ ߞߍ߫ ߘߴߊ߬ߟߎ߬ ߓߟߏ߫ ߂߀߂߄ ߠߊ߫߸ ߏ߬ ߟߋ ߦߋ߫ ߡߐ߰ ߄߀߃ ߘߌ߫߸ ߡߏ߬ߛߏ߫ ߁߀߈߸ ߗߍ߬ ߂߉߅، ߂߀߂߅: ߃߉߄߸ ߡߛߏ߬ ߇߉߸ ߗߍ߬ ߃߁߅، ߘߐߞߑߕߍߙ ߊ ߓߋ ߛߋ ߞߵߊ߬ ߖߊ߲߬ߞߊ߬ߙߏ߬ߕߐ߫ ߘߊ߲ߞߐ߫ ߝߐ߫ ߥߙߍߓߊߓߊ ߟߎ߬ ߕߍߡߊ߬߸ ߞߏ߫ ߊ߬ߟߎ߬ ߟߊ߫ ߛߌ߲߬ߝߏ߲߬ߘߊ ߟߊ߫ ߘߐ߬ߖߊ ߟߋ߬ ߛߘߊߘߐ߫ ߞߏ߫ ߡߊ߫ ߞߴߏ߬ ߟߎ߬ ߟߊ߫، ߊ߬ ߘߏ߫ ߟߋ߬ ߘߋ߲ߣߍ߲߫ ߛߊ߲߬ ߄ ߘߏ߫߸ ߏ߬ ߡߍ߲ ߞߊ߲ߠߊߕߍ߰ ߘߊ߫ ߡߎ߬ߙߎ ߟߊ߫، ߊ߬ ߣߌ߫ ߛߣߍ߬ߞߍ߬ߟߊ ߛߊ߲߭ ߂߂ ߘߏ߫߸ ߏ߬ ߝߣߊ߫ ߞߊ߲ߠߊߕߍ߰ ߘߊ߫ ߡߎ߬ߙߎ ߟߋ߬ ߟߊ߫، ߊ߬ ߣߌ߫ ߘߋ߲ߡߌߛߍ߲߫ ߂߂ ߡߍ߲ ߞߵߊ߬ ߢߝߍߟߊ ߕߍ߰ ߟߴߊ߬ ߡߎ߬ߙߎ ߟߊ߫، ߊ߬ߟߎ߬ ߓߟߏߟߞߊߟߌߦߊ ߞߏߛߐ߲߬ ߏ߬ ߦߋ߫ ߓߊߟߏ߫ ߘߐ߫ ߓߌ߬، ߊ߬ ߣߴߏ߬ ߢߐ߲߰ ߜߘߍ߫ ߟߎ߫.
ߊ߬ߟߎ߬ ߟߊ߫ ߖߊ߬ߕߋ߬ߘߐ߬ߛߌ߮ ߘߐ߫߸ ߛߌ߯ߙߌ߲߫ ߖߐߞߌߓߊ߯ߕߐ ߥߟߴߊ߬ ߓߌ߬ߟߊ߬ߒ߬ߘߐ߬ߓߊ߰ߕߐ ߡߍ߲ ߠߎ߬ ߦߋ߫ ߕߊ߯ ߟߴߊ߬ߟߎ߬ ߢߊ ߟߊ߫ ߟߊ߫ ߟߊߞߌߙߊ߫߫ ߞߊ߲߬߸ ߞߊ߬ ߞߍ߫ ߛߊ߬ߦߊ ߣߌ߫ ߢߣߊߡߦߊ ߕߍߟߊ ߘߐ߫߸ ߏ߬ ߟߎ߬ ߓߍ߯ ߟߋ߬ ߦߋ߫ ߛߋ߫ ߟߊߞߛߌ߫ ߟߊ߫߸ ߥߟߊ߫ ߣߴߊ߬ ߡߍ߲ ߞߊ߬ ߞߍ߫ ߛߊ߬ߝߋ߲߫ ߘߌ߫، ߏ߬ ߟߊ߫ ߛߊ߬ߦߊ ߦߋ߫ ߞߍ߫ ߊߟߊ߫ ߛߦߊ ߘߌ߫، ߊ߬ ߞߊߣߊ߬ ߝߐ߫ ߝߋߎ߫߸ ߞߏ߫ ߣߴߌ ߞߵߊ߬ ߦߋ߫ ߣߌ߲߬ ߛߊ߬ߣߍ߲߫߸ ߊ߬ ߡߊ߫ ߡߞߊߘߊ߲߫ ߖߏߣߊ߫ ߟߋ߬، ߝߏ߬ߣߌ߫ ߡߐ߰ ߞߋߟߋ߲߫ ߔߋ߫ ߦߋ߫ ߛߊ߬ ߟߊ߫ ߢߊ ߏ߬ ߡߊ߬߸ ߞߏ߫ ߊ߬ߟߎ߬ ߟߊ߫ ߓߊ߯ߙߊ ߟߋ߬ ߗߌߙߏ߲ߣߍ߲߫ ߏ߬ ߘߌ߫، ߏ߬ ߘߐ߫ ߊ߬ߟߎ߬ ߓߘߊ߫ ߞߏ߫ ߛߌߦߊߡߊ߲߫ ߠߋ߬ ߛߌ߰ ߛߋ߲߬ߞߊ߲߬߸ ߢߍߥߟߊ ߡߍ߲ ߘߍ߬ߡߍ߲ ߘߴߊ߬ ߞߍ߫߸ ߊ߬ߟߎ߬ ߘߌ߫ ߛߋ߫ ߊ߬ߟߎ߬ ߢߌߣߌ߲ߞߏ ߡߊ߬ ߟߊ߬ߞߊ߲߬ߘߊ߬ߟߌ ߘߐ߫.
ߊ߬ߟߎ߫ ߞߵߊ߬ ߦߌߘߊߞߊ߬ ߞߏ߫ ߣߴߊ߬ ߓߍ߲߬ ߘߊ߫ ߓߌ߬ߟߊ߬ߒ߬ߘߐ߬ߖߎ߮ ߘߏ߫ ߡߊ߬ ߛߌ߯ߙߌ߲߫ ߛߏ ߞߣߐ߫߸ ߡߐ߱ ߡߍ߲ ߠߎ߬ ߦߋ߫ ߞߏ ߏ߬ ߘߊ ߘߐ߫߸ ߏ߬ ߟߎ߬ ߘߌ߫ ߟߋ߫ ߝߙߍ ߣߌ߲߬ ߞߟߌ߫ ߟߊ߫: ߆߂߅ ߉߄ ߉߄߁߈.
ߞߙߎ ߡߍ߲ ߛߏ߯ߙߏߣߍ߲߫ ߛߋ߲߬ߘߐ߬ߞߎ߬ߟߎ߲߬ ߓߏ߬ߙߌ߬ߟߊ ߣߌ߫ ߘߊ߲ߘߟߊ ߟߊ߫߸ ߊ߬ ߣߌ߫ ߛߍߡߊ ߟߎ߬، ߏ߬ ߟߎ߬ ߘߌ߫ ߥߊ߫ ߘߌ߲߬ߞߌߙߊ ߏ߬ ߘߐ߫߸ ߊ߬ߟߎ߬ ߣߌ߫ ߖߐ߯ߙߊ߲߫ ߢߣߊߡߊ ߟߎ߬، ߊ߬ߟߎ߬ ߘߌ߫ ߥߊ߫ ߞߏߕߐ ߕߊ߬ ߕߊ߬ߟߌ߬ ߞߏ߬ߢߌߡߊ ߘߐ߫ ߞߊ߬ ߣߵߊ߬ ߘߌ߫ ߞߟߊߡߊ߲ߘߊ ߟߊ߫، ߣߴߊ߬ ߕߏ߫ ߘߴߊ߬ ߟߊߕߊ߮ ߡߊ߬ ߘߊ߲ߘߊߛߏߓߊ߫ ߜߘߍ߫ ߟߊ߫ ߝߊ߲߬ ߜߘߍ߫ ߝߍ߬߸ ߊ߬ߟߎ߬ ߘߴߏ߬ ߞߍ߫ ߝߣߊ߫ ߞߊߟߌߦߊ ߘߐ߫߸ ߖߐ߲߰ߛߊ߫ ߞߏߕߐ ߣߌ ߦߋ߫ ߟߊߞߛߌ߫، ߊ߬ߟߎ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬߸ ߞߵߊ߬ߟߎ߬ ߟߊ߫ ߘߊ߲ߘߊߟߌ߫ ߦߙߐ ߟߊߢߊ߬ ߞߵߊ߬ ߢߊߞߎߘߦߊ߫ ߓߘߍߞߍ߭߸ ߊ߬ ߣߌ߫ ߞߵߊ߬ ߞߣߐߞߍ߫ ߖߐ߯ߙߊ߲߫ ߓߘߍ ߟߎ߬ ߟߊ߫.
ߛߌ߯ߙߌ߲߫ ߛߊߣߌ߲߫ ߖߎߟߊ ߟߎ߬ ߟߊ߫ ߞߎ߲߬ߕߌ߮ ߞߎߡߊ߫ ߘߊ߫ ߟߋ߬ ߜߊ߬ߙߊ ߣߌ߲߬ ߘߐ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߝߏ߬ߟߌ ߦߋ߫ ߛߋ߫ ߟߊ߫ ߊ ߓߋ ߛߋ ߣߴߊ߬ ߟߊ߫ ߡߐ߱ ߟߎ߫ ߡߊ߬ ߞߏߛߓߍ߫߸ ߞߏ߫ ߞߏ ߣߌ߲߬ ߦߴߌߘߐ߫ ߊ߬ߟߎ ߟߋ߬ ߓߍ߯ ߟߊߞߊ߲ߘߊ߫ ߞߊ߲ ߡߊ߬߸ ߞߏ߫ ߊ߬ ߟߊ߫ ߞߎߡߊ ߘߌ߫ ߛߋ߫ ߊ߬ ߢߍߡߐ߮ ߟߎ߫ ߡߊ߬، ߞߏ߫ ߞߏߢߊ ߣߌ߲߬ ߦߋ߫ ߞߏ߫ ߘߍ߬ߡߍ߲߬ߕߊ ߟߋ߬ ߘߌ߫߸ ߞߏ߫ ߓߍ߯ ߦߴߊ߬ ߛߋߞߏ߫ ߞߍ߫߸ ߡߐ߰ ߞߊߣߊ߬ ߖߐ߬ ߊ߬ ߛߋߞߏ ߡߊ߬ ߘߋ߬߸ ߛߋߞߏߣߍ߲߫ ߛߌߦߊߡߊ߲߫ ߠߊߘߍ߬ߣߍ߲ ߠߋ߬ ߞߍ߫ ߟߊ߫ ߛߋߞߏߓߊ ߘߌ߫، ߊ߬ ߞߵߊ߬ ߟߴߊ߬ ߞߊ߲߬ ߝߣߊ߫ ߞߏ߫ ߊ߬ߟߎ߬ ߦߴߊ߬ߟߎ߬ ߢߊ ߡߊߖߌ߰ ߘߊ߬߬ߡߊ߲߬ ߞߏ ߝߣߊ߫ ߞߘߐ߫، ߞߏ߫ ߘߊ߬ߡߊ߲ ߠߊ߫ ߡߐ߰ ߝߊ߰ߕߊ ߞߊ߫ ߛߌߦߊ߫ ߤߊߟߌ߬ ߞߊ߬ ߕߊ߬ߡߌ߲߬ ߝߎ߬ߖߎ߰ߖߎ߰ ߖߊ߲ߞߊߙߏ ߟߊ߫ ߡߐ߰ ߝߊ߰ߕߊ ߟߊ߫، ߞߏ߫ ߊ߬ߟߎ߬ ߦߋ߫ ߝߙߍ߬ ߞߍ߫ ߏ߬ ߦߋ߫ ߛߋ߫ ߡߊߘߐ߯ߦߊ߫ ߟߊ߫، ߤߊߟߌ߬ ߣߴߊ߬ ߡߊ߫ ߓߊ߲߬ ߜߋߙߊ߫߸ ߊ߬ ߞߏ߬ߣߌ߲߬ ߦߋ߫ ߡߊߘߐ߯ߦߊ߫ ߝߎߍ߲߫، ߊ߬ ߞߵߏ߬ ߟߋ ߝߐ߫ ߛߌ߯ߙߌ߲߫ ߛߊߣߌ߲߫ ߖߎߟߊ ߟߎ߬ ߟߊ߫ ߞߎ߲߬ߕߌ߮ ߞߊ߬ߣߌ߲߫.
ߞߕߌߞߊ߲ߘߊ ߞߐߦߌߘߊ ߞߵߊ߬ ߦߌ߬ߘߊ߬߸ ߞߏ߫ ߡߍ߲ ߠߎ߬ ߦߋ߫ ߓߋ߬ ߟߊ߫ ߡߐ߱ ߟߎ߫ ߞߊ߲߬ ߥߟߊ߫ ߞߊ߬ ߓߌ߬ߟߊ߬ߒ߬ߘߐ߬ߖߎ߮ ߟߊߥߟߌ߬ ߡߐ߱ ߟߎ߫ ߡߊ߬߸ ߞߏ߫ ߣߌ߫ ߕߍ߯ ߞߍ߫ ߘߴߏ߬ ߡߍ߲ ߘߐ߫߸ ߞߏ߫ ߊ߬ߟߎ߬ ߦߴߊ߬ ߟߊ߫ ߞߕߌ ߟߥߊ߫ ߊ߬ߟߎ߫ ߡߊ߬ ߝߛߊߦߌ߫߸ ߣߴߊ߬ ߡߍ߲ ߣߌ߫ ߥߛߎ߫ ߞߊ߫ ߞߊ߲߫߸ ߏ߬ ߘߌ߫ ߟߊߘߏ߲߬ ߓߏ߲ߖߎ߮ ߟߊ߫߸ ߣߴߊ߬ ߡߍ߲ ߣߌ߫ ߓߌ߲߬ߓߊ߬ߏ߬ߟߌ߬ ߛߌ߫ ߞߊ߫ ߞߊ߲߫ ߏ߬ ߘߌ߫ ߟߴߊ߬ ߞߊ߲߬، ߓߊߙߊ߲ߕߏ߲߫߫ ߥߎߟߋ߲ ߡߐ߱ ߟߎ߬ ߞߵߊ߬ߟߎ߬ ߘߊ ߜߊ߬ߛߌ߫ ߛߋ߲߬ߘߐ߬ߞߎ߬ߟߎ߲߬ ߞߏ ߟߊ߫، ߞߏ߫ ߛߋ߲߬ߘߐ߬ߞߎ߬ߟߎ߲߬ ߞߏ ߦߴߊ߬ߟߎ߬ ߟߊ߫، ߘߊ߲ߘߟߊ ߟߎ߬ ߟߊ߫ ߢߍߡߐ߮ ߞߵߊ߬ ߛߍߥߊߣߊ߲߫ ߞߊ߲ ߦߌ߬ߘߊ߬߸ ߞߵߏ߬ ߟߊ߫ ߖߕ ߁߀ ߀߀߀ ߀߀߀ ߡߊ߬ߜߍ߲ ߞߊ߲߬.
ߒ߬ߓߊ߬߸ ߟߊ߬ߘߍ ߢߌ߲߬ ߠߊߥߟߌ߬ߣߍ߲߫ ߖߊ߬ߕߋ߬ߘߐ߬ߛߌ߮ ߦߌ߬ߘߊ ߟߋ߬ ߡߊ߬߸ ߊ߬ ߣߌ߫ ߡߊ߬ߜߍ߲߬ߠߌ߲߬ ߢߌߣߌ߲ ߖߊ߬ߕߋ߬ߘߐ߬ߛߌ߮ ߓߐߒߢߟߊ ߘߐ߫، ߊ߬ ߘߏ߲߬ ߞߎ߲߬ߠߊߛߌ߰ ߘߊ߫ ߛߌ߯ߙߌ߲߫ ߞߏߟߊߕߍ߯ ߛߌߦߊߡߊ߲߫ ߓߟߏ߫߸ ߞߵߏ߬ ߟߊ߫ ߕߐ߲ߓߟߏߡߊ ߟߎ߬ ߣߌ߫ ߞߟߍ߬ߡߐ߮ ߟߎ߫ ߞߊ߲߬، ߞߊ߬ߝߏ߬ߙߋ߲߬ߕߌ߮ ߣߌ߫ ߡߙߊ߬ߓߊ߮ ߡߊ߫ ߕߏ߫ ߞߐ߫ ߣߌ߲߬ ߞߏ ߘߐ߫. ߌߓߎߙߊߤߌߡߊ߬ ߝߙߊ߬ߓߊ ߞߡߊ߬ߙߊ ߣߌ߫ ߊ߬ߟߌ ߞߙߊ߬ߞߐ߬ߞߊ ߞߊ߬ߟߐ ߓߟߏ߫ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
