ߞߊ߲ߞߊ߲߫ ߘߊ߲ߘߊߛߏߓߊ ߟߋ߬ ߡߊߝߌ߲߬ߣߍ߲߫߸ ߞߏ߫ ߊ߬ߟߎ߬ ߓߘߴߊ߬ߟߎ߬ ߢߊ ߕߍ߰ ߖߊ߲߬ߞߊ߬ߙߏ߬ߕߐ ߘߏ߫ ߟߎ߫ ߡߊ߬، ߏ߬ ߟߋ ߞߎߡߊ ߟߊߖߍ߲ߛߍ߲ߣߍ߲߫ ߘߍ߬ߞߙߏߝߏ ߟߎ߬ ߞߊ߲߬ ߕߋ߲߬، ߒ߬ߓߊ߬߸ ߘߊ߲ߘߊߛߏߓߊ ߓߘߊ߫ ߓߐ߫ ߡߊ߬ߞߎ߲ ߘߐ߫، ߞߊ߬ߕߎ߲߯߸ ߖߌ߬ߦߊ߬ߖߟߎ߬ ߟߊߖߍ߲ߛߍ߲ ߡߍ߲ ߦߋ߫ ߘߊ߫߸ ߓߟߐߟߐߛߙߏߝߋ߫ ߕߊ߬ߕߏ ߘߋ߬ ߔߐߙߑߕߏ߫ ߦߋ߫ ߖߊ߲߬ߞߊ߬ߙߏ߬ߕߐ߫ ߝߌ߬ߟߊ߫ ߟߋ߬ ߟߊߓߐ߫ ߟߊ߫߸ ߞߵߊ߬ ߦߌ߬ߘߊ߬ ߞߏ߫ ߛߋ߲߬ߘߐ߬ߞߎߟߎ߲߫ ߡߊ߫ ߛߋ߫ ߛߐ߬ߘߐ߲߬ ߠߊ߫ ߞߵߏ߬ ߟߎ߫ ߓߌ߬ߟߴߊ߬ ߞߣߐ߫، ߒ߬ߓߊ߬߸ ߗߋߕߌ߯ߘߊ ߞߊ߲߫ ߞߏ߫ ߘߐ߰ߘߏ߲߬ ߞߍ߫ ߘߊ߫ ߟߋ߬ ߖߊ߲߬ߞߊ߬ߙߏ߬ߕߐ ߏ߬ ߟߎ߬ ߟߊ߫ ߞߊ߬ ߞߐ߲߰ ߊ߬ߟߎ߬ ߓߐ ߢߍ߫ ߘߊ߲ߘߊߛߏ ߟߊ߫، ߊ߬ߟߎ߬ ߓߘߊ߫ ߡߞߊ߬ߛߟߌ߬ ߞߏ ߘߏ߫ ߓߟߏߘߐߓߍ߲ ߘߊߡߌ߬ߣߊ߬.
ߝߘߏ߬ߓߊ߬ ߗߋߕߌ߮ ߝߊߙߋ߲ߓߊ߫ ߞߡߊ߬ߙߊ߬ ߟߊ߫ ߝߐߟߌ߫ ߘߐ߫߸ ߊ߬ߟߋ ߞߍ߫ ߘߊ߫ ߣߌ߲߬ ߞߊ߬ߟߊߡߊ߬ ߖߌ߬ߦߊ߬ߖߟߎ ߘߏ߫ ߟߋ߬ ߘߐ߫߸ ߡߍ߲ ߕߎ߲߬ ߓߘߊ߫ ߘߐߜߍ߫ ߡߐ߰ ߛߌߦߊߡߊ߲߫ ߓߟߏ߫ ߓߟߐߟߐ ߟߊ߫.
<<ߡߐ߱ ߟߎ߬ ߞߊ߬ ߒ ߞߟߌ߫ ߞߏ߫ ߖߌ߬ߦߊ߬ߖߟߎ ߘߏ߫ ߦߋ߫ ߓߟߐߟߐ ߞߊ߲߬߸ ߞߏ߫ ߖߊ߲߬ߞߊ߬ߙߏ߬ߕߐ ߘߏ߫ ߟߎ߫ ߓߘߊ߫ ߣߊ߬ ߘߊ߲ߘߊߛߏߓߊ ߟߊ߫߸ ߞߏ߫ ߛߋ߲߬ߘߐ߬ߞߎ߬ߟߎ߲߬ ߡߊ߫ ߛߐ߬ߘߐ߲߫ ߦߊ߲߬ ߞߵߊ߬ߟߎ߬ ߟߊߕߊ߯ ߡߊ߲߬ߖߊ߲߬ߠߊ߫، ߏ߬ ߓߙߊ߬ ߘߊ߫ ߒ ߘߐ߫ ߞߏߛߓߍ߫، ߒ ߧߴߊ߬ ߦߌ߬ߘߊ߬ ߟߊ߫ ߓߍ߯ ߟߊ߫߸ ߒ ߞߏ߫ ߕߎ߬ߢߊ߬ ߕߴߊ߬ ߟߊ߫ ߡߊ߬ߝߌ߲߬ߞߊ߲߬ߠߊ ߏ߬ ߟߎ߬ ߘߐ߫ ߡߎ߰ߡߍ߫.>> ߊ߬ ߞߵߏ߬ ߟߋ ߝߐ߫.
ߗߋߕߌ߯ߘߊ ߟߊ߫ ߝߐߟߌ߫ ߘߐ߫߸ ߖߊ߲߬ߞߊ߬ߙߏ߬ߕߐ߫ ߝߌ߬ߟߊ ߢߌ߲߬ ߠߎ߬ ߟߊߟߊ߫ ߘߊ߫ ߞߊ߲ߞߊ߲߫ ߞߏ߫ ߟߞߊߟߌߡߊ߲ ߗߋߢߘߊ ߟߊ߫߸ ߞߊ߬ ߘߊ߲ߘߊߟߌ߫ ߞߎ߲߬ߝߟߐ ߟߎ߬ ߞߍ߫ ߊ߬ߟߎ߬ ߟߊ߫، ߘߊ߲ߘߊߟߌ ߞߊ߲߬ߞߎߡߊ ߘߏ߫ ߖߍ߬ߘߍ ߟߊߘߊ߲߫ ߘߊ߫߸ ߡߍ߲ ߦߋ߫ ߞߐߜߍ߫ ߛߊ߬ߓߊ߫ ߢߐ߲߰ ߘߌ߫߸ ߘߊ߲ߘߊߛߏ ߓߊ߯ߙߊߞߍߟߊ ߟߎ߫ ߞߵߏ߬ ߟߊߢߌߣߌ߲߫ ߘߊ߲ߘߊߟߌߟߊ ߟߎ߫ ߝߍ߬ ߌߞߘߐ߫.
<<ߖߊ߲߬ߞߊ߬ߙߏ߬ߕߐ ߛߋ߫ ߘߴߊ߲ ߝߍ߬ ߦߊ߲߬ ߝߛߊߦߌ߫، ߘߊ߲ߘߊߟߌ߫ ߞߎ߲߬ߝߟߐ ߟߎ߬ ߝߣߊ߫ ߞߍ߫ ߘߊ߫، ߡߊ߬ߝߟߍ߬ߟߌ ߟߎ߬ ߞߐߖߋߓߌ ߟߐ߲߫ ߘߊ߫߸ ߞߵߊ߬ ߢߊߝߐ߫ ߖߊ߲߬ߞߊ߬ߙߏ߬ߕߐ ߟߎ߬ ߟߊ߫ ߡߐ߱ ߟߎ߬ ߦߋ߫.>> ߗߋߕߌ߮ ߞߵߏ߬ ߔߘߋߔߘߋߟߊߕߍ߰.
ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߛߓߍߘߐ ߟߎ߬ ߦߋ߫ ߦߋ߲߬߸ ߞߵߏ߬ ߟߊ߫ ߟߊ߬ߞߙߐ߬ߛߟߌ߬ ߘߐߛߙߋ ߟߎ߬ ߞߊ߲߬߸ ߡߍ߲ ߠߎ߬ ߘߌ߫ ߡߐ߰ ߛߙߋ߫ ߓߐ߫.
ߞߏ߲߬ߓߏ ߊߓߘߎߟߊߦߌ߬ ߞߊ߬ߓߊ ߦߋ߫ ߝߘߏ߬ߓߦߊ߬ ߘߊ߲ߘߊߟߌߟߊ ߟߋ߬ ߘߌ߫ ߞߎ߲߬ߡߊ߬ߦߟߍ߬ߡߊ߲߬ߟߐ߲߬ߘߐ߬ߦߊ ߛߌ߲߬ߝߏ߲߬ߡߐ߬ߟߐ߲߬ߦߊ ߘߍ߬ߘߊ ߟߊ߫، ߊ߬ߟߋ ߟߋ߬ ߕߍ߬ߘߍ߫ ߞߣߐ߬ߜߍ߲߬ߠߌ߲ ߠߊ߫ ߣߌ߲߬ ߟߏ߲߸ ߂߀߂߆ ߞߏ߲ߞߏߜߍ ߕߟߋ߬ ߁߄.
ߖߊ߲߬ߞߊ߬ߙߏ߬ߕߐ߬ ߝߟߐ ߡߊߝߟߍ߫ ߘߊ߫߸ ߏ߬ ߕߐ߯ ߟߋ߬ ߞߏ߫ ߛߟߊߕߌ߯ ߟߊ߱ߦߌ߬ ߘߎ߲ߓߎߦߊ߫߸ ߏ߬ ߥߘߏߓߊ߫ ߞߟߏ ߟߋ߬ ߞߊߘߌߣߍ߲߫ ߕߘߍ߬، ߘߊ߲ߘߊߟߌߟߊ ߟߎ߬ ߟߊ߫ ߝߐߟߌ߫ ߘߐ߫߸ ߞߊߘߌ ߛߎ߯ߦߊ ߏ߬ ߓߊ߯ߙߊ ߕߴߛߋ߫ ߞߍ߫ ߟߊ߫ ߞߊ߲ߞߊ߲߫ ߦߊ߲߬.
<<ߊ߲ ߞߵߊ߬ ߦߌ߬ߘߊ߬ ߘߋ߲ߓߦߊ ߟߊ߫߸ ߒ ߞߏ߫ ߊ߬ߟߋ ߟߊ߫ ߞߏߢߊ ߕߴߛߋ߫ ߢߊߓߐ߫ ߟߊ߫ ߞߊ߲ߞߊ߲߫ ߦߊ߲߬߸ ߝߏ߫ ߞߵߊ߬ ߟߊߕߊ߯ ߞߐߣߊߞߙߌ߫ ߟߋ߬߸ ߞߏ߫ ߛߎ߮ ߏ߬ ߟߎ߬ ߘߊ߲ߘߊߟߌߟߊ߫ ߓߟߏߡߊߞߊ߬ߣߍ߲ ߦߋ߫ ߦߋ߲߬ ߠߋ߬.>> ߞߏ߲߬ߓߏ߫ ߞߊ߬ߓߊ ߟߋ߬ ߞߊ߲߫ ߕߋ߲߬.
ߖߊ߲߬ߞߊ߬ߙߏ߬ߕߐ ߝߌߟߊߣߊ߲ ߦߋ߫ ߛߟߊߕߌ߯ ߛߋߞߎ߬ ߞߏ߬ߣߊ߬ߕߍ߫ ߟߋ߬ ߘߌ߫߸ ߏ߬ ߣߐ߲߬ߞߐ߲߬ ߞߟߏ ߟߋ߬ ߞߊߘߌߣߍ߲߫، ߘߊ߲ߘߊߟߌߟߊ ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߘߌ߫ ߛߴߏ߬ ߕߊ ߏ߬ ߘߊ߲ߘߊ߫ ߟߊ߫، ߓߊ߬ߙߌ߬߸ ߣߴߏ߬ ߡߊ߫ ߢߊ߬ ߘߊ߲ߘߊ ߞߐ߫߸ ߝߏ߫ ߞߵߊ߬ ߘߐߓߛߏ߫ ߟߋ߬.
<<ߝߏ߫ ߖߊ߲߬ߞߊߙߏ ߏ߬ ߦߋ߫ ߟߊߘߏ߲߬ ߘߐ߬ߓߛߏ߬ߟߌ߬ ߓߏ߲ ߠߋ߬ ߞߣߐ߫߸ ߞߵߊ߬ ߘߐߓߛߏ߫، ߊ߬ߟߎ߫ ߓߍ߲߬ ߘߴߏ߬ ߡߊ߬ ߕߘߍ߬ ߝߋߎ߫، ߓߊ߬ߙߌ߬߸ ߊ߬ߟߎ߬ ߟߊ߫ ߢߐ߲߯ߦߋ ߞߐ ߘߐ߫߸ ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߘߐ߬ߓߛߏ߬ߟߌ߬ ߞߏ ߏ߬ ߡߊ߲߫ ߘߴߊ߬ߟߎ߬ ߦߋ߫.>> ߘߊ߲ߘߊߟߌߟߊ ߟߋ߬ ߞߊ߲߫ ߕߋ߲߬.
ߘߊ߲ߘߊߛߏ ߞߏߟߊߕߍ߮ ߟߎ߬ ߟߊ߫ ߝߐߟߌ߫ ߘߐ߫߸ ߖߊ߲߬ߞߊ߬ߙߏ߬ߕߐ ߟߎ߬ ߣߴߊ߬ߟߎ߬ ߟߊ߫ ߡߐ߱ ߟߎ߫ ߖߍ߬ߘߍ ߟߋ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬ ߞߊ߬ ߞߟߏߕߎ߲߯ߠߊ ߟߎ߬ ߓߘߊ.
<<ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߦߴߊ߬ ߝߍ߬ ߟߋ߬߸ ߞߊ߬ ߖߊ߲߬ߞߊ߬ߙߏ߬ߕߐ ߟߊ߫ ߘߊ ߘߊ߲ߘߊ߫ ߦߊ߲߬߸ ߊ߬ߟߎ߬ ߦߋ߫ ߥߊ߫ ߞߟߏ ߘߌ߫ ߞߟߏߕߎ߲߯ ߦߌߟߊ ߘߐ߫، ߊ߲ߠߎ߬ ߞߵߊ߬ ߦߌ߬ߘߴߊ߬ߟߎ߬ ߟߊ߫߸ ߞߏ߫ ߖߊ߲߬ߞߊߙߏ߫ ߝߌ߬ߟߊ ߏ߬ ߓߐ߫ ߢߊ߫ ߕߍ߫ ߢߐ߲߮ ߘߐ߫߸ ߊ߲ ߘߏ߲߬ ߕߴߛߋ߫ ߘߊ߲ߘߊߟߌ߫ ߝߊ߲߬ ߞߋ߬ߟߋ߲߬ߡߊ ߞߍ߫ ߟߊ߫.>> ߞߏ߲߬ߓߏ߫ ߞߊ߬ߓߊ ߟߋ߬ ߞߊ߲߫ ߕߋ߲߬.
ߖߊ߲߬ߞߊ߬ߙߏ߬ߕߐ ߟߎ߬ ߣߴߊ߬ߟߎ߬ ߟߊ߫ ߡߐ߱ ߟߎ߫ ߖߊ߭ ߞߏߛߐ߲߬߸ ߘߐ߬ߛߙߋ ߘߏ߫ ߟߎ߫ ߟߊߘߊ߲߫ ߘߊ߫߸ ߡߍ߲ ߦߴߊ߬ ߦߌ߬ߘߊ߬ ߟߊ߫ ߞߏ߫ ߊ߬ߟߎ߬ ߡߊ߫ ߓߍ߲߬ ߘߊ߲ߘߊߟߌߟߊ ߟߎ߬ ߟߊ߫ ߞߎߡߊ߫ ߝߐߣߍ߲ ߡߊ߬، ߛߓߍ ߏ߬ ߞߟߊ߬ߣߐ߬ߦߊ߬ ߘߴߊ߬ߟߎ߬ ߓߟߏ߫߸ ߞߵߊ߬ߟߎ߬ ߓߟߏߣߐ ߓߌ߬ߟߴߊ߬ ߘߐ߫.
<<ߖߊ߲߬ߞߊ߬ߙߏ߬ߕߐ ߕߴߛߋ߫ ߛߘߌ߬ ߟߴߊ߲ ߓߟߏ߫߸ ߞߏ߫ ߝߏ߫ ߊ߬ ߦߋ߫ ߕߏ߫ ߦߊ߲߬، ߘߋ߲ߣߍ߲߫ ߕߴߊ߬ߟߎ߬ ߘߌ߫ ߘߋ߬، ߞߋߟߋ߲ ߛߊ߲߬ ߂߇߸ ߘߐ ߛߊ߲߬ ߂߈، ߣߴߊ߬ߟߎ߬ ߞߊ߲߫ ߞߏ߫ ߊ߬ߟߎ߬ ߕߍ߫ ߘߊ߲ߘߊ߫ ߟߴߊ߲ߠߎ߬ ߓߟߏ߫߸ ߊ߬ߟߎ߬ ߞߊ߲ߠߊߓߌ߬ߟߊ߬ߣߍ߲߫ ߤߊ߲߫߸ ߊ߬ߟߎ߬ ߘߌ߫ ߥߊ߫ ߦߙߐ߫ ߘߐ߫߸ ߡߍ߲ ߘߌߡߊ߲߫ ߊ߬ߟߎ߬ ߦߋ߫.>> ߞߏ߲߬ߓߏ ߝߋߙߋ߲ߓߊ߫ ߟߋ߬ ߞߊ߲߫ ߕߋ߲߬.
ߗߋߕߌ߯ߘߊ ߞߵߊ߬ ߦߌ߬ߘߊ߬߸ ߞߏ߫ ߡߊ߬ߝߌ߲߬ߠߌ߲߬ ߞߎߡߊ ߡߍ߲ ߠߎ߬ ߦߴߌߘߐ߫߸ ߞߵߊ߬ ߝߐ߫ ߞߏ߫ ߛߋ߲߬ߘߐ߬ߞߎߟߎ߲߫ ߕߴߊ߬ߟߎ߬ ߓߟߏ߫ ߦߋ߲߬߸ ߏ߬ ߕߍ߫ ߕߎ߬ߢߊ߬ ߘߌ߫ ߤߊߟߌ߬ ߞߋߟߋ߲߫، <<ߛߋ߲߬ߘߐ߬ߞߎ߬ߟߎ߲߬ ߣߊ߯ߣߌ߲߫ ߠߋ߬ ߟߊߟߐ߬ߣߍ߲߫ ߒ߬ ߓߟߏ߫ ߦߊ߲߬߸ ߡߐ߰ ߡߊ߬ߘߏ߬ߣߌ߲߬ ߞߊ߲ߡߊ߬ ߞߊ߬ ߓߐ߫ ߛߏ߫ ߟߊ߫ ߞߊ߬ ߥߊ߫ ߛߏ߫ ߟߊ߫، ߞߵߊ߬ ߝߐ߫ ߞߏ߫ ߏ߬ ߝߋ߲߫ ߕߴߊ߲ ߓߟߏ߫ ߦߊ߲߬߸ ߕߎ߬ߢߊ߬ ߕߴߏ߬ ߘߌ߫.>> ߗߋߕߌ߮ ߟߋ߬ ߞߊ߲߫ ߕߋ߲߬.
ߊ߬ ߞߎߡߊ߫ ߘߊ߫ ߝߣߊ߫߸ ߞߊ߬ ߡߐ߱ ߟߎ߬ ߦߟߌߓߌ߬ߟߊ߫ ߞߵߊ߬ ߓߍ߲߬ ߘߊ߲ߘߊߛߏ ߟߊ߫ ߡߐ߰ ߟߊ߬ߓߐ ߛߙߊߕߌ ߟߎ߫ ߡߊ߬ ߖߌ߬ߣߍ߬ ߞߣߐ߫:
<<ߘߊ߲ߘߊߛߏ ߓߊ߯ ߞߍ߫ ߡߐ߱ ߟߊߕߊ߯ ߟߊ߫ ߝߊ߲߬ ߜߘߍ߫߸ ߏ߬ ߦߋ߫ ߞߍ߫ ߟߊ߫ ߦߙߐ߫ ߟߋ߬ ߘߌ߫߸ ߡߍ߲ ߝߣߊ߫ ߟߊ߫ ߞߏ ߟߎ߬ ߦߋ߫ ߛߊ߲ߝߍ߬، ߊ߬ ߘߏ߲߬߸ ߞߊ߲ߞߊ߲߫ ߕߌ߲߬ߞߎߘߎ߲ ߘߊ߲ߘߊߛߏ ߦߋ߫ ߦߙߐ߫ ߟߋ߬ ߘߌ߫߸ ߢߊ ߘߌ߫ ߛߋ߫ ߡߟߊ߫ ߟߊ߫ ߦߙߐ ߡߍ߲ ߘߐ߫، ߏ߬ ߘߐ߫߸ ߊ߲ߠߎ߬ ߕߴߛߋ߫ ߡߐ߱ ߟߊߓߐ߫ ߟߊ߫ ߦߊ߲߬߸ ߞߵߊ߬ ߟߊߕߊ߯ ߞߟߏߕߎ߲߯ ߦߙߐ ߘߐ߫.>>
ߌߞߏߡߌ߲߬ ߕߊ߬ߕߏ ߘߋ߬ ߔߐߙߑߕߏ ߟߊ߫ ߞߎߡߊ ߣߌ߲߬ ߓߘߊ߫ ߞߍ߫ ߛߊߓߎ߫ ߘߌ߫ ߞߊ߬ ߘߊ߲ߘߊߛߏߓߊ ߡߊߣߐ߯߸ ߊ߬ߟߎ߬ ߝߣߊ߫ ߞߊ߲߫ ߞߏ߫ ߊ߬ߟߎ߬ ߓߘߊ߫ ߖߌ߬ߦߊ߬ߖߟߎ ߟߊߕߊ߯ ߝߘߏ߬ߓߊ߬ ߞߕߌߞߊ߲ߘߊ ߡߊ߬.
<<ߣߌ߲߬ߛߋ߲߬ ߕߊ ߡߍ߲ ߦߋ߫ ߣߌ߲߬߸ ߊ߲ ߕߍߣߊ߬ ߣߌ߲߬ ߕߏ߫ ߟߊ߫ ߦߋ߲߬ ߕߋ߲߬ ߜߊ߲ߛߊ߲߫ ߘߋ߬، ߊ߲ ߥߊߕߐ߫ ߟߵߊ߬ ߞߏ ߘߌ߫ ߝߏ߯ ߛߊ߬ߙߌ߬ߦߊ߬ ߟߊ߫، ߛߴߊ߲ ߘߴߊ߬ ߟߐ߲߫߸ ߊ߬ ߞߵߊ߬ ߟߊߥߟߌ߬ ߡߍ߲ ߡߊ߬߸ ߡߙߌߦߊ ߡߍ߲ ߣߐ߬ ߓߊ߯ ߞߍ߫ ߊ߬ ߟߐ߬ ߟߴߊ߬߬ ߟߊ߫߸ ߊ߬ ߘߴߏ߬ ߝߐ߫، ߣߴߊ߬ ߣߊ߬ߣߍ߲߬ ߞߍ߫ ߘߊ߫ ߦߊ߲߬ ߞߊ߬ ߣߊ߬ ߞߏ ߢߊߘߐߜߍ ߢߊߢߌߣߌ߲߫߸ ߛߊ߬ߣߴߊ߬ ߦߋ߫ ߞߎߡߴߊ߬ ߞߊ߲߬߸ ߊ߬ ߘߴߏ߬ ߝߐ߫.>> ߞߏ߲߬ߓߏ ߝߊߙߋ߲ߓߊ߫ ߞߡߊ߬ߙߊ߫ ߟߋ߬ ߞߊ߲߫ ߕߋ߲߬.
ߞߎߡߊ߫ ߛߌߦߊߡߊ߲ ߣߌ߲߬ ߓߍ߯ ߞߐ ߘߐ߫ ߘߍ߬ߞߙߏߝߏ ߟߎ߫ ߞߊ߲߬߸ ߊ߬ ߞߏ ߓߍߣߊ߬ ߟߊߘߏ߲߬ ߛߊ߬ߙߌ߬ߦߊ߬ ߕߍ߯ ߞߘߐ߫ ߟߏ߲߫ ߣߊ߬ߕߐ ߟߎ߬ ߘߐ߫، ߡߍ߲ ߞߏ߬ߣߌ߲ ߓߊ߯ ߓߐ߫ ߊ߬ ߘߐ߫߸ ߊ߲ ߘߴߊߟߎ߫ ߟߊߟߐ߲ߠߌ߲߫ ߏ߬ ߟߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߣߌ߫ ߛߌߕߊ߲߬ ߞߊ߬ߓߊ ߓߟߏ߫
