ߊ߬ ߓߘߊ߫ ߛߊ߲߬ ߕߊ߲߫ ߓߐ߫߸ ߞߵߊ߬ ߛߐ߬ߘߐ߲߫ ߖߐ߲߬ߡߊߛߌߣߌ߲ߟߐ߲߫ ߦߋ߫ ߛߊ߲ߞߍ ߛߘߌ߬ ߟߊ߫ ߞߣߍߡߊ߬߸ ߞߊ߬ ߡߐ߲߬ߛߐ߲ ߛߌ߬ߘߌ߫ ߊ߬ ߕߌ߲ ߠߊ߫߸ ߞߊ߬ ߛߎ ߛߌ߬ ߊ߬ ߢߣߊ߫ ߛߓߍߟߌ ߟߊ߫، ߒ߬ߓߊ߬߸ ߞߊ߬ߝߊ߫ ߂߄߀ ߣߌ߫ ߞߐ ߛߓߍߓߊ߮ ߡߏߙߌ߫ ߞߡߊ߬ߙߊ߫ ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ ߓߎ߬ߞߊ߬ߙߌ ߟߊ߫ ߔߌߦߐߔߌߦߐ ߘߟߊߡߌߣߊ ߓߊ߯ߙߊ ߞߍ߫ ߛߍ߱ ߏ߬ ߟߋ ߕߍߡߊ߬، ߊ߬ ߣߌ߫ ߛߌߟߊߓߐߛߐ߯ߣߊ߫ ߛߍߝߍ߲ߘߊ ߟߊ߫ ߓߊ߬ߘߏ߬ߢߐ߲߰ߦߊ ߘߏ߫ ߘߐ߫߸ ߘߐ߬ߝߐ ߞߣߐ߫ ߞߟߊ߬ߘߏ߲ߛߏ ߛߊ߬ߦߌ߲߬ ߘߴߊ߬ ߟߊ߫ ߓߊ߯ߙߊ߫ ߞߟߏߡߊ ߘߏ߫ ߘߐ߬ߝߐ ߞߊ߲߬ ߦߋ߲߬߸ ߡߍ߲ ߞߎ߲߭ߝߊ߰ ߘߴߊ߬ ߓߟߏ߫ ߂߀߁߆ ߘߓߊ߬ߓߌߟߊ ߂߆ ߟߊ߫߸ ߣߊߟߌ߬ߡߎ߲߫ ߓߎ߬ߞߊ߬ߙߌ ߟߊ߫ ߔߌߦߐߔߌߦߐ ߘߟߊߡߌߣߊ ߘߌ߫.

ߛߊ߲߬ ߕߊ߲߫ ߕߊ߬ߡߌ߲ ߞߐߝߍ߬߸ ߘߐ߬ߝߐ ߓߘߊ߫ ߖߌߘߊ߲߫ ߜߘߍ߫ ߘߌ߫ ߖߐ߲߬ߡߊ߬ߛߌߣߌ߲ߟߐ߲߫ ߠߊ߫ ߓߊ߯ߙߊ ߡߊ߬، ߞߊ߬ߕߎ߲߯߸ ߊߡߙߌߞߌ߬ ߞߎ߲߬ߜߙߊ ߟߊ߫ ߟߍߙߊߓߏ߲ ߠߊ߫ ߝߐߟߌ߫ ߘߐ߫߸ ߓߎ߬ߞߊ߬ߙߌ ߟߊ߫ ߔߌߦߐߔߌߦߐ ߓߊߛߎ߲ ߡߍ߲ ߛߓߍ߫ ߘߊ߫ ߊߙߊߓߎ ߘߐ߫߸ ߏ߬ ߓߊ߯ߙߊ ߓߊ߲߫ ߘߊ߫ ߈߄߆ ߟߋ߬ ߟߊ߫߸ ߌߛߊ߫ ߡߏߦߌ ߞߐߝߍ߬، ߏ߬ ߞߍ ߛߊ߲߬ ߁ ߁߇߀ ߟߋ߬ ߡߊ߬߸ ߖߐ߲߬ߡߊߛߌߣߌ߲ߟߐ߲߫ ߓߊ߲߫ ߘߴߊ߬ ߘߟߊߡߌ߬ߣߊ߬ ߟߊ߫ ߒߞߏ ߘߐ߫߸ ߞߊ߬ߟߊ߫ ߁߁߀ ߖߌ ߓߊ߲ߣߍ߲ ߞߐߝߍ߬߸ ߘߟߊߡߌߘߊߓߊ߮ ߟߊ߫ ߟߞߊ߬ߟߌ߬ ߞߊ߲߫ ߘߐ߫.

<< ߞߊ߬ߟߊ ߡߍ߲ ߞߊ߬ ߓߎ߬ߞߊ߬ߙߌ߮ ߟߊ߫ ߔߌߦߐߔߌߦߐ ߛߓߍ߫ ߊ߲ ߓߟߏ߫ ߒߞߏ ߘߐ߫ ߸ ߞߊ߬ߟߊ߫ ߁߁߀>> ߊ߬ ߞߵߏ߬ ߝߐ߫.

ߣߌ߲߬ ߞߏ ߘߊߡߌ߬ߣߊ߬ ߘߊ߫ ߞߊ߬ߦߌ߯ ߂߀߀߆ ߟߋ߬ ߟߊ߫߸ ߖߊ߲߬ߞߊ߰ߣߊ߫، ߏ߬ ߛߊ߲߭ ߠߋ߬ ߟߊ߫߸ ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ ߓߎ߬ߞߊ߬ߙߌ ߞߊ߬ߙߊ߲߬߸ ߞߋߟߊ ߟߊ߫ ߛߙߊ߬ߣߎ߲߬ ߞߟߏߡߊ، ߏ߬ ߟߋ ߞߐߝߍ߬ ߛߊ߲߬ ߕߊ߲߫߸ ߊ߬ ߓߊ߲߫ ߘߴߊ߬ ߘߟߊߡߌ߬ߣߊ߬ ߟߊ߫ ߒߞߏ ߘߐ߫߸ ߞߵߊ߬ ߕߏ߫ ߞߊ߬ߦߋ߫ ߘߎ߱ ߞߣߐ߫߸ ߡߊ߬ߟߌ ߟߊ߫.

ߊ߬ ߞߵߊ߬ ߝߐ߫ ߊ߲ ߧߋ߫ ߏ߬ ߟߋ ߘߐ߫ ߞߏ߫: << ߒ ߞߊ߫ ߓߎ߬ߞߊ߰ߙߌ ߞߊ߬ߙߊ߲߬ ߂߀߀߆ ߖߊ߲߬ߞߊ߰ߣߊ߫، ߏ߬ ߞߐ߫ ߛߊ߲߬ ߁߀߸ ߒ ߞߵߊ߬ ߘߟߊߡߌ߬ߘߊ߬ ߒߞߏ ߘߐ߫ ߂߀߁߆ ߟߊ߫ ߞߊ߬ߦߋ߫.>> ߞߊ߬ߙߊ߲߬ߝߊ ߞߵߏ߬ ߢߊߝߐ߫.

ߡߎ߲߬ ߞߵߊ߬ ߟߐ߬ ߖߘߍ߬ ߛߍ߰ ߓߊ߯ߙߊ ߢߌ߲߬ ߞߍ߫ ߟߊ߫؟ ߊ߬ ߟߊ߫ ߖߋ߬ߓߌ ߡߊ߫ ߖߊ߲߰ߧߊ߫ ߏ߬ ߞߊ߲߬߸ ߊ߬ ߞߵߊ߬ ߦߌ߬ߘߊ߫ ߟߋ߬ ߞߏ߫ ߘߌ߯ߣߊ ߟߊߘߌߦߊߢߍ ߣߌ߫ ߟߐ߲ߠߌ߲ ߞߊ߬ߣߌ߲ ߠߋ߬ ߞߊ߬ ߟߐ߬ ߊ߬ ߟߊ߫، ߊ߬ ߞߵߊ߬ ߝߐ߫ ߏ߬ ߦߙߐ ߟߋ߬ ߘߐ߫ ߞߏ߫: <<ߛߙߊ߬ߣߎ߲߬ ߞߏ ߟߊߘߌߦߊߢߍ. ߛߙߊ߬ߣߎ߲߬ ߞߝߊ߬ ߞߎ߲ߓߊ ߟߊߛߌߦߊߦߊ ߒߞߏ ߘߐ߫، (....) ߓߎ߬ߞߊ߬ߙߌ߮ ߟߊ߫ ߔߌߦߐߔߌߦߐ ߖߍ߬ߘߍ ߞߊ߬ߣߎ߲.>> ߊ߬ ߞߵߏ߬ ߟߋ ߞߍ߫ ߖߋ߬ߓߌ ߘߌ߫.

ߊ߬ ߞߵߊ߬ ߝߐ߫ ߝߣߊ߫߸ ߞߏ߫ ߞߏ߫ ߜߘߍ߫ ߞߵߊ߬ ߟߐ߬ ߊ߬ ߘߟߊߡߌ߬ߣߊ ߟߊ߫߸ ߏ߬ ߡߍ߲ ߞߵߊ߬ ߞߊ߬ߣߎ߲ ߘߏ߲߬ ߊ߬ ߛߣߐ߬ߡߍ ߘߐ߫ ߓߘߍߞߍ߭߸ ߏ߬ ߟߋ ߞߏ߫ <<ߒ ߞߵߊ߬ ߕߊ߬ ߒ ߝߊ߬ ߗߍ ߟߋ߬ ߘߐ߫ ߞߵߊ߬ ߞߊ߬ߙߊ߲߬.>>

ߤߊ߲ߞߟߌ߫ ߟߊ߫ ߓߊ߯ߙߊ ߕߍ߰ߣߍ߲ ߞߊ߬ ߓߐ߫ ߊ߬ ߟߊ߫߸ ߖߐ߲߬ߡߊ߬ߛߌߣߌ߲ߟߐ߲ ߞߵߊ߬ ߦߌ߬ߘߊ߬ ߞߏ߫ ߊ߬ ߟߊ߫ ߛߓߍߟߌ ߣߌ߫ ߓߊ߬ߕߏ ߟߋ߬ ߕߘߍ߬ ߥߊ߫ ߟߊ߫ ߢߐ߲߯ ߝߍ߬، ߓߊߏ߬߸ ߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߓߎ߬ߞߊ߬ߙߌ ߟߊ߫ ߔߌߦߐߔߌߦߐ ߡߎ߰ߡߍ ߦߋ߫ ߛߌ߰ߘߊ߫ ߁߀߃ ߟߋ߬ ߘߌ߫، ߏ߬ ߡߍ߲ ߏ߬ ߘߌ߫߸ ߊ߬ ߞߵߏ߬ ߛߌ߰ߘߊ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߘߊߡߌ߬ߣߊ߫ ߟߐ߬ ߝߌ߬ߟߊ߫ ߟߋ߬ ߟߊ߫.

<< ߊ߬ ߕߌ߱ ߞߊ߬ ߟߐ߬ ߂ ߺ ߂  ߛߊߟߌ߫ ߛߙߊ߬ߣߎ߲ ߓߍ߯ ߘߊߡߌߣߊ ߟߊ߫߸ ߒߠߋ ߡߴߏ߬ ߣߐ߬ ߛߊ߫߸ ߞߏ߬ߣߌ߲߬ ߒ ߞߊ߬ ߟߐ߬ ߂ ߺ ߂ ߛߊߟߌ߫ ߊ߬ ߓߏ߲߬ߘߊ ߓߍ߯ ߘߊߡߌߣߊ ߟߊ߫߸ ߟߐ߬ ߂߀߆ ߓߐߢߐ߲߯ߞߏ߫.>> ߞߊ߬ߙߊ߲߬ߝߊ ߞߵߏ߬ ߝߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ ߞߊ߬ ߢߍߓߊ߯ ߓߎ߬ߞߊ߬ߙߌ ߟߊߘߍ߲߰ ߘߟߊߡߌߣߊߟߌ ߓߊ߯ߙߊ ߝߣߊ߫ ߘߐ߫.

ߓߊ߯ߙߓߊ ߡߍ߲ ߝߐ߫ ߞߊ߲߫ ߣߌ߲߬߸ ߞߊ߬ߙߊ߲߬ߝߊ ߞߊ߲߫ ߞߏ߫ ߊ߬ ߛߋ߫ ߘߴߏ߬ ߝߊ߲߬ߓߊ ߞߍ߫ ߟߊ߫ ߛߎ ߟߋ߬ ߘߐ߫، ߓߊߏ߬߸ ߏ߬ ߟߋ ߡߝߊߣߍ߲߫ ߊ߬ ߢߊ ߖߍ߬ߘߍߖߍ߬ߘߍ ߡߊ߬߸ ߞߊ߬ ߛߋ߫ ߛߌߦߊߡߊ߲߫ ߞߍ߫ ߟߊ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: << ߊ߬ ߛߓߍߟߌ %߈߀ ߞߍ߫ ߘߊ߫ ߛߎ ߟߋ ߝߍ߬، ߓߊߏ߬߸ ߛߎ ߦߟߌߡߊߟߐ߬ ߕߎߡߊ ߟߋ߬ ߤߊ߲ߞߟߌ ߟߎ߬ ߢߡߊߟߐ߬ ߕߎߡߊ ߘߌ߫.>> ߊ߬ ߞߵߏ߬ ߞߌ߬ߦߴߊ߲ ߡߊ߬.

ߞߊ߬ߙߊ߲߬ߝߊ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߕߍ߫ ߛߴߊ߬ ߝߐ߫ ߟߊ߫ ߞߏ߫ ߛߍ߰ ߞߵߊ߬ ߛߐ߬ߘߐ߲߬ ߓߎ߬ߞߊ߬ߙߌ ߘߟߊߡߌߣߊ ߘߐ߫، ߓߊߏ߬߸ ߛߍ߱ ߘߊ߲߭ ߠߋ߬ ߢߊ ߖߊ߭ ߘߴߌ ߘߌߦߊߣߊ߲ߞߏ ߟߎ߬ ߘߐ߫߸ ߞߵߌ ߓߊ߲߬ ߥߊ߫ ߟߊ߫  ߌ ߘߌߦߊߣߊ߲߫ ߦߙߐ ߟߎ߬ ߘߐ߫߸ ߞߵߌ ߛߌ߰ ߛߓߍߟߌ ߞߊ߲ߡߊ߬، ߏ߬ ߘߐ߫߸ ߞߏ߫ ߜߘߍ ߡߍ߲ ߺ ߍ ߺ ߡߍ߲߫ ߣߊ߬ߕߐ߫ ߏ߬ ߞߐߝߍ߬߸ ߏ߬ ߝߌ߬ߟߊ ߦߴߏ߬ ߓߍ߯ ߢߍ߫.

ߥߊ߯ߕߌ ߡߍ߲ ߘߏ߲߬ ߝߐ߫ ߞߊ߲߫ ߣߌ߲߬߸ ߏ߬ ߞߵߊ߬ ߛߐ߬ߘߐ߲߫ ߠߋ߬߸ ߢߎߡߍ߫ ߕߴߊ߬ ߟߊ߫ ߟߎ ߡߊ ߞߊ߬ߦߋ߬، ߊ߬ ߜߍ߬ߟߍ߲߬ߡߊ߲߫ ߕߍ߬ߘߍ߫ ߞߊ߬ ߓߊ߯ߙߊ߫ ߡߊ߬ߝߊ ߘߐ߫ ߓߏ߲ ߞߣߐ߫߸ ߞߵߏ߬ ߞߎ߲߭ ߞߍ߫ ߞߟߊߦߊ ߣߌ߫ ߕߙߊ ߘߌ߫.

<< ߒ ߕߘߍ߬ ߛߊ߲ߞߍ ߟߋ ߛߘߌ߬ ߟߊ߫ ߞߣߍߡߊ߬ ߸ ߞߊ߬ ߕߙߐߛߌ ߡߍߣߍ߲߫ ߒ ߞߎ߲߬ߘߐ߫ ߞߊ߬ ߘߏ߲߬ ߛߊ߲ߞߍ ߞߘߐ߫ ߞߊ߬ ߒ ߛߌ߰ ߛߓߍߟߌ߫ ߞߊ߲ߡߊ߬.>> ߊ߬ ߞߵߏ߬ ߢߊߝߐ߫.

ߞߊ߲߫ ߞߏ ߜߟߍ߬ߦߊ ߝߣߊ߫ ߞߵߊ߬ ߛߐ߬ߘߐ߲߬ ߛߓߍߟߌ ߢߌ߲߬ ߘߐ߫ ߞߎߡߊߘߋ߲߫ ߞߏ ߛߌߟߊ ߝߍ߬، ߓߊߏ߬߸ ߞߊ߬ߙߊ߲߬ߝߊ ߟߊ߫ ߝߐߟߌ߫ ߘߐ߫߸ ߞߝߊ߬ ߜߍߟߍ߲߫ ߞߝߊ߬ ߓߟߋߓߟߋ ߢߌ߲߬ ߘߟߊߡߌߣߊ ߡߊ߬ߞߏ ߦߋ߫ ߦߟߌߡߊߟߐ ߖߍ߬ߘߍߖߍ߬ߘߍ ߟߋ߬ ߟߊ߫ ߞߎߡߊߘߋ߲ ߠߎ߬ ߟߊ߫ ߞߏ ߘߐ߫߸ ߊ߬ ߣߌ߫ ߞߎߡߊ ߞߍߢߊ ߟߎ߬ ߘߐ߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫: << ߞߎߡߊߘߋ߲ߧߊߟߌ ߛߌߟߊ ߝߍ߬ ߸ ߒ ߕߙߐ߫ ߘߊ߫. ߓߊ ߓߎ߬ߞߊ߬ߙߌ߮ ߣߌ߫ ߞߝߊ߬ ߛߌ߫ ߕߍ߫ ߞߋߟߋ߲߫ ߘߌ߫.>>

ߊ߲ ߣߌ߫ ߞߊ߬ߙߊ߲߬ߝߊ ߟߊ߫ ߓߊ߬ߘߏ ߘߐ߫߸ ߊ߬ ߤߊ߲ߞߟߌ ߛߋ߫ ߘߴߊ߬ ߟߊ߫ ߛߓߍߟߌ߫ ߕߎߡߊ ߦߙߐ ߘߏ߫ ߡߊ߬߸ ߊ߬ ߛߌ߰ߣߍ߲߬ ߛߓߍߟߌ ߟߊ߫߸ ߡߏ߬ߛߏ ߟߎ߬ ߦߋ߫ ߞߎ߲߬ߘߊ߲ ߞߊ߲߬ ߊ߬ ߘߊߝߍ߬߸ ߓߍ߯ ߣߴߊ߬ ߟߊ߫ ߞߏ߫߸ ߊ߬ߟߋ ߦߋ߫ ߘߟߊߡߌߣߊߟߌ ߞߊ߲߬ ߕߎ߲߫.

ߓߎ߬ߞߊ߬ߙߌ ߘߟߊߡߌߣߊ ߞߐߝߍ߬ ߛߊ߲߬ ߕߊ߲߫߸ ߞߊ߬ߙߊ߲߬ߝߊ߬ ߡߏߙߌ߫ ߖߐ߲߬ߡߊ߬ߛߌߣߌ߲ߟߐ߲߫ ߠߊ߫ ߢߊߝߐߟߌ ߓߘߴߊ߬ ߦߌ߬ߘߊ߬ ߞߏ߫ ߊ߬ ߞߊ߬ ߖߘߍ߬ߘߌ߬ ߛߌߦߊߡߊ߲߫ ߠߋ߬ ߞߍ߫߸ ߞߊ߬ ߛߋ߫ ߣߌ߲߬ ߓߊ߯ߙߊ ߞߍ߫ ߟߊ߫، ߒߞߏ ߘߏ߲߬ߞߏ ߟߎ߫ ߞߏ߬ߣߌ߲ ߦߴߊ߬ߟߎ߫ ߞߎ߲߬ߘߋ߲ߜߊ߬ߛߌ߬ ߟߊ߫ ߓߎ߬ߞߊ߬ߙߌ ߞߊ߬ߝߊ ߘߐ߫ ߓߌ߬ ߢߐ߲߰ ߟߏ߲߫߸ ߡߍ߲ ߞߍ߫ ߘߊ߫ ߒߞߏ ߡߊ߲߬ߘߌ߬ߦߊ߬ ߞߏ߬ߓߊ߫ ߘߌ߫.