ߘߋ߲ߠߊߓߐ ߟߋ߬ ߞߍ߫ ߘߊ߫ ߡߌߛߌ߬ߙߊ߲߬ ߡߏߓߌߟ ߞߌ߲߬ߘߊ ߟߊ߫ ߞߊ߲ߞߊ߲߫߸ ߡߍ߲ ߕߐ߯ ߟߊߥߛߊ ߘߌ߫ ߘߊ߫ ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߊ߬ߓߊ߫ ߡߊ߬߸ ߞߊ߬ ߓߐ߫ ߛߌ߯ߙߌ߲߫، ߊ߬ ߞߵߊ߬ ߦߌ߬ߘߊ߫ ߏ߬ ߟߋ ߞߣߍ ߞߊ߲߬߸ ߞߏ߫: <<ߊ߲ ߕߴߊ߬ ߝߍ߬ ߊ߲ ߠߊ߫ ߕߐ߮ ߟߎ߫ ߟߋ߬ ߕߎߣߎ߲߫>> ߞߊ߬ߕߎ߲߯߸ ߘߋ߲ߠߊߓߐ߫ ߦߙߐ ߣߌ߲߬ ߞߍ߫ ߘߊ߫ ߕߐ߯ ߞߏ ߥߎ߬ߦߊ߲߬ߞߌ߬ߟߌ ߜߊߛߊ߲ߓߊ ߟߋ߬ ߘߌ߫ ߣߌ߲߬ ߟߏ߲߸ ߏ߬ ߡߍ߲ ߓߍ߲߬ ߘߊ߫ ߛߌ߬ߣߌ߲߬ߟߏ߲ ߡߊ߬ ߂߀߂߆ ߕߎߟߊߝߌ߲ ߕߋ߬ߟߋ߫ ߂߅߸ ߢߊ߰ߡߊ߫ ߖߌ߰ߡߝߊ߬ ߛߊ߲ߜ߭ߊߙߋ߫ ߓߘߊ، ߊ߬ ߣߌ߲߬ ߞߍ߫ ߘߊ߫ ߦߟߌߓߌߟߊߟߌ ߘߋ߲ߠߊߓߐ ߟߋ߬ ߘߌ߫߸ ߞߵߊ߬ ߦߌ߬ߘߊ߬ ߞߏ߫ ߞߐߛߊߦߌ߲߫ ߞߊ߫ ߞߊ߲߫ ߞߊ߬ ߞߍ߫ ߝߊ߬ߛߏ ߕߐ߯ ߓߘߍ ߟߎ߫ ߡߊ߬.

ߘߋ߲ߠߊߓߐ߫ ߘߊߞߎ߲ ߢߌ߲߬ ߘߐ߫߸ ߒߞߏ߫ ߕߐ߲߫ ߛߌߦߊߡߊ߲߫ ߕߘߍ߬ ߞߣߍ ߞߊ߲߬߸ ߒߞߏ ߛߍ߲ߓߊ߫ ߣߌ߫ ߒ.ߢ.ߦ.ߘ ߣߌ߫ ߒ.ߓ.ߘ ߛߌ߲߬ߝߏ߲߬ ߛߌߦߊߡߊ߲߫ ߕߘߍ߬ ߞߣߍ ߞߊ߲߬، ߒ߬ߓߊ߬߸ ߖߊ߬ߡߊ ߣߌ߲߬ ߓߍ߯ ߢߊߞߘߐ߫߸ ߛߏ߬ߙߌ߫ ߡߊ߲߬ߘߋ߲߬ߞߊ߫ ߞߓߊ߬ ߡߍ߲ ߦߋ߫ <<ߥߎ߬ߦߊ߲߬ߞߌ߬ߟߌ ߝߊ߬>> ߘߌ߫߸ ߊ߬ߟߋ ߞߵߊ߬ ߓߊ߲߬ ߞߎߡߊ ߘߏ߫ ߘߐ߫ ߞߣߍ ߣߌ߲߬ ߞߊ߲߬߸ ߏ߬ ߟߋ ߊ߬ ߝߐ ߘߌ߫ ߞߏ߫ ߝߘߊ߬ߝߌ߲߬ ߕߐ߮ ߣߌ߫ ߛߌ߬ߟߡߊ߬ߦߊ ߕߍ߫ ߓߍ߲߬ ߢߐ߲߮ ߡߊ߬.

<<ߊ߬ ߞߘߐ߫ ߕߍ߫ ߞߊ߬ ߝߐ߫߸ ߞߏ߫ ߊ߲ ߧߋ߫ ߊ߬ߙߊ߬ߓߎ߬ ߕߐ߮ ߏ߬ ߟߎ߫ ߞߟߍ߬ ߟߊ߫، ߊ߬ ߞߘߐ ߦߋ߫ ߡߍ߲ ߘߌ߫߸ ߏ߬ ߟߋ ߘߐߙߐ߲߫߸ ߊ߲ ߧߋ߫ ߞߍ߫ ߊ߲ ߛߎ߮ ߘߌ߫، ߓߊߏ߬߸ ߊ߬ߙߊ߬ߓߎ߬ ߕߐ߮ ߡߍ߲ ߠߎ߬ ߦߴߊ߲ ߠߊ߫߸ ߏ߬ ߟߎ߬ ߕߍ߫ ߡߐ߱ ߞߍ߫ ߟߊ߫ ߛߌ߬ߟߡߊ߬ ߘߌ߫. ߊ߬ߙߊ߬ߓߎ߬ ߕߐ߰ ߞߏ ߞߘߐ߫ ߕߍ߫ ߛߌ߬ߟߡߊ߬ߦߊ߬ ߘߌ߫߸ ߝߘߊ߬ߝߌ߲߬ ߕߐ߰ ߞߏ ߞߘߐ߫ ߕߍ߫ ߞߊ߯ߝߙߌߦߊ߫ ߘߌ߫.>> ߊ߬ ߞߵߏ߬ ߟߊߛߋ߫.

ߊ߬ߟߋ ߟߊ߫ ߖߊ߬ߕߋ߬ ߘߐ߫߸ ߝߘߊ߬ߝߌ߲ ߠߎ߫ ߞߎ߬ߛߊ߲߬ߧߊ߬ ߘߊ߫ ߟߋ߬ ߕߐ߯ ߟߊ ߟߊ߫߸ ߞߊ߬ߦߌ߯ ߛߌ߬ߟߡߊ߬ߦߊ ߣߌ߫ ߌߛߊߟߞߊߦߊ ߡߊ߫ ߣߊ߬ ߡߎߣߎ߲߬، ߓߊߏ߬߸ ߝߘߊ߬ߝߌ߲ ߠߎ߬ ߓߋ߲ߓߊ ߟߎ߬ ߛߋ߫ ߘߊ߫ ߓߊߓߊ ߟߎ߬ ߕߐ߯ߟߊ߫ ߟߊ߫߸ ߦߏ߫ ߡߌߟߏ߸  ߢߊ߲ߘߊ߲، ߊ߬ ߣߌ߫ ߛߏ ߟߎ߬߸ ߦߏ߫ ߞߊ߲ߞߊ߲߫ ߣߌ߫ ߓߡߊ߬ߞߐ߬، ߊ߬ ߣߌ߫ ߓߌߦߊ߲ ߠߎ߬߸ ߦߏ߫ ߟߏ߲ߖߊ߲߫ ߣߌ߫ ߛߟߎ߬ߝߊ߬، ߐ߲߬ߤߐ߲߫߸ ߏ߬ ߟߎ߫ ߞߢߊ߬ߕߐ߫ ߊ߬ߟߎ߫ ߡߐ߰ ߢߐ߲߮ ߕߐ߯ߟߊ߫ ߟߊ߫ ߘߌ߬߸ ߓߟߏߝߋ߲ ߠߎ߬ ߣߌ߫ ߡߙߊ߬ߝߋ߲ ߠߎ߬ ߣߌ߫ ߡߊ߬ߞߍ߬ ߦߙߐ ߟߎ߬ ߕߐ߯ߟߊ ߞߐߝߍ߬؟

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߊ߲ ߓߋ߲ߓߊ ߟߎ߫ ߞߊ߬ ߕߐ߯ ߞߏ ߟߐ߲߫߸ ߦߊ߬ߣߴߊ߲ ߣߌ߫ ߥߊߟߌ߫ ߡߐ߮ ߟߎ߬ ߦߋ߫ ߢߐ߲߮ ߠߊߛߐ߬ߘߐ߲߬، ߒ߬ߞߵߊ߲ ߘߏ߲߬ߣߍ߲ ߛߌ߬ߟߡߊ߬ߦߊ ߘߐ߫߸ ߡߐ߱ ߟߎ߬ ߓߘߴߊ߬ ߖߊ߬ߕߋ߬ ߛߊ߫߸ ߞߏ߫ ߣߌ߫ ߡߐ߱ ߡߍ߲ ߕߐ߮ ߕߍ߫ ߊ߬ߙߊ߬ߓߎ߬ ߕߐ߮ ߘߌ߫߸ ߞߏ߫ ߏ߬ ߕߍ߫ ߛߌ߬ߟߡߊ߬ ߘߌ߫، ߊ߬ ߓߘߊ߫ ߖߊ߬ߕߋ߬߸ ߞߏ߫ ߣߌ߲ ߡߍ߲ ߡߴߊ߬ ߕߐ߮ ߞߍ߫ ߕߎ߬ߓߊ߬ߓߎ߬ ߕߐ߮ ߘߌ߫߸ ߞߏ߫ ߏ߬ ߕߍ߫ ߞߍ߫ ߞߙߋߕߌߢߍ߲߫ ߓߘߍ߫ ߘߌ߫، ߞߵߊ߬ ߛߐ߬ߘߐ߲߬߸ ߞߎߡߊ ߏ߬ ߦߋ߫ ߝߌ߬ߟߌ ߟߋ߬ ߘߌ߫.>> ߊ߬ ߞߵߏ߬ ߦߌ߬ߘߊ߬.

ߛߏ߬ߙߌ߫ ߡߊ߲߬ߘߋ߲߬ߞߊ ߞߵߊ߬ ߝߛߊ߬ ߞߎߡߊ߫ ߞߋߟߋ߲߫ ߝߣߊ߫ ߡߊ߬ ߘߋ߲ߠߊߓߐ ߢߌ߲߬ ߘߐ߫߸ ߏ߬ ߟߋ ߞߏ߫: <<ߘߋ߲ ߕߐ߮ ߓߐ ߞߎ߬ߙߊ߬ߣߊ ߞߣߐ߫߸ ߏ߬ ߕߍ߫ ߞߎ߬ߙߣߊ߬ ߞߣߐ߫߸ ߊ߬ ߕߍ߫ ߤߊ߬ߘߌ߬ߛߊ߬ ߞߣߐ߫.>> ߏ߬ ߘߐ߫߸ ߞߵߊ߬ ߝߐ߫ ߞߏ߫ ߝߏ߫ ߞߊ߬ ߘߋ߲ ߕߐ߮ ߓߐ߫ ߞߎ߬ߙߊ߬ߣߊ ߞߣߐ߫ ߏ߬ ߦߋ߫ ߝߍ߭ ߟߋ߬ ߘߌ߫، ߓߊߏ߬߸ ߞߋߟߊ ߟߊ߫ ߛߊ߰ߓߊ ߘߏ߫ ߟߎ߫ ߓߍ߫߸ ߦߏ߫: ߎߛߑߡߊߣߌ߲߬߸ ߎߡߊߙߎ߫߸ ߊ߬ߟߌ߸ ߓߌ߬ߟߊߟߌ߫߸ ߏ߬ ߟߎ߬ ߓߍ߯ ߕߐ߮ ߕߍ߬ߘߍ߫ ߦߋ߲߬ ߦߊ߬ߣߌ߫ ߛߌ߬ߟߡߊ߬ߦߊ ߦߋ߫ ߣߊ߬߸ ߊ߬ߟߎ߫ ߘߏ߲߬ ߕߐ߮ ߡߊ߫ ߡߊߝߊ߬ߟߋ߲߫ ߛߌ߬ߟߡߊ߬ߦߊ ߣߊ߭ ߞߐߝߍ߬.

ߊ߬ ߖߍ߬ߘߍ ߞߵߊ߬ ߝߐ߫ ߏ߬ ߟߊߒߡߊ߫ ߜߘߍ߫ ߘߐ߫߸ ߞߏ߫ ߞߋߟߊ ߘߋ߲߫ ߟߏ߯ߟߎ ߡߍ߲ ߛߐ߬ߘߐ߲߬ ߘߊ߫ ߦߊ߬ߣߌ߫ ߛߌ߬ߟߡߊ߬ߦߊ ߦߋ߫ ߣߊ߬߸ ߊ߬ ߡߴߏ߬ ߟߎ߬ ߕߐ߮ ߡߊߝߊ߬ߟߋ߲߫ ߛߌ߬ߟߡߊ߬ߦߊ ߣߊ߭ ߞߐ ߘߐ߫، ߞߏ߫ ߊ߬ ߞߵߊ߬ ߝߊ߬ ߣߴߊ߬ ߣߊ߫ ߕߐ߯ߟߊ߫߸ ߛߌ߬ߟߡߊ߬ߦߊ ߘߏ߲߬ ߞߵߏ߬ ߟߎ߬ ߓߍ߯ ߕߐ߮ ߏ߬ ߛߐ߬ߘߐ߲߫ ߠߋ߬ ߦߋ߲߬، ߓߊߏ߬߸ ߞߋߟߊ ߖߍ߬ߘߍ ߡߊ߫ ߞߋߟߦߊ߫ ߊ߬ ߛߐ߬ߘߐ߲߬ߓߊ߮ ߟߎ߬ ߢߣߊ߫.

ߊ߬ ߞߵߊ߬ ߦߌ߬ߘߊ߬ ߝߣߊ߫߸ ߞߏ߫ ߝߙߋߞߋ߫ ߜߘߍ߫ ߦߋ߫ ߡߊ߲߬ߘߋ߲߬ ߞߣߐ߫߸ ߏ߬ ߟߋ ߝߘߊ߬ߝߌ߲߬ ߕߐ߮ ߟߎ߫ ߦߟߍ߬ߡߊ߲ ߘߌ߫ ߛߐ߲߬߸ ߞߵߊ߬ ߞߍ߫ ߕߐ߯ ߟߎ߫ ߘߌ߫ ߖߍ߬ߘߍ߸ ߕߐߟߊߟߌߟߊ ߟߎ߫ ߖߍ߬ߘߍ ߡߊ߫ ߡߍ߲ ߞߘߐ߫ ߟߐ߲߫، ߞߊ߬ߕߎ߲߯߸ ߊ߬ ߞߵߊ߬ ߝߐ߫ ߏ߬ ߟߋ ߞߏ߫ ߣߴߌ ߞߊ߬ ߛߌ߬ߦߊ߬߸ ߕߋ߰ߥߊ߫߸ ߕߊ߲߬ߓߊ߫߸ ߒ߬ߜ߭ߏ߬ߟߏ߫߸ ߥߟߊ߫ ߝߙߏߡߏ߫߸ ߣߴߌ ߞߵߏ߬ ߟߎ߫ ߕߊ߬߸ ߏ߬ ߟߎ߬ ߦߋ߫ ߡߏ߬ߛߏ ߘߋ߲ ߠߎ߬ ߓߙߍ߬ߦߊ ߟߋ߬ ߘߌ߫، ߞߊ߬ߙߊ߲߬ߡߐ߰ߗߍ ߘߌ߫ ߕߐ߮ ߏ߬ ߟߎ߬ ߡߊߝߊ߬ߟߋ߲߬߸ ߊ߬ߟߎ߬ ߕߴߊ߬ ߞߘߐ߫ ߢߊߢߌߣߌ߲߫ ߠߊ߫، ߞߵߊ߬ ߛߐ߬ߘߐ߲߬߸ ߝߙߏߡߏ߫ ߣߌ߫ ߊ߬ߟߌ ߓߍ߯ ߞߘߐ߫ ߞߋߟߋ߲߫.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߞߊ߬ߙߊ߲߬ߡߐ߮ ߘߏ߫ ߟߎ߫ ߖߍ߬ߘߍ ߕߍ߫ ߕߐ߯ ߦߟߍߡߊ߲ ߢߊߓߐ߫ ߟߊ߫߸ ߊ߬ߟߎ߬ ߡߴߊ߬ ߟߐ߲߫ ߖߍ߬ߘߍ߸ ߕߐ߮ ߡߍ߲ ߦߟߍ߬ߡߊ߲߬ߕߐ߫ ߊ߬ߟߎ߬ ߓߟߏ߫߸ ߏ߬ ߞߘߐ ߦߋ߫ ߡߍ߲ ߘߌ߫، ߝߏ߫ ߞߵߊ߬ ߝߐ߫ ߕߋ߲߬ ߘߐߙߐ߲߫ ߞߏ߫: "ߛߌ߬ߟߡߊ߬ ߕߐ߯ ߟߎ߫ ߕߍ߫">> ߡߊ߲߬ߘߋ߲߬ߞߊ ߞߵߊ߬ ߦߌ߬ߘߊ߬ ߞߏ߫ ߝߍ߭ ߟߵߏ߬ ߘߌ߫.

ߊ߬ ߞߵߊ߬ ߟߊ߫ ߘߋ߲ߠߊߓߐ ߞߎߡߊ ߣߌ߲߬ ߞߎ߲߬ߘߏ߲ ߞߍ߫ ߓߌߦߊ߲ ߠߎ߬ ߟߋ߬ ߞߊ߲߬، ߞߵߊ߬ ߦߌ߬ߘߊ߬ ߞߏ߫ ߡߊ߲߬ߘߋ߲߬ ߓߌߦߊ߲߫ ߝߊ߰ߕߊ ߘߋ߲ߠߊߓߐ ߘߐ߫߸ ߏ߬ ߟߋ ߓߊ߭ ߘߌ߫.

ߊ߬ ߞߊ߲߫ ߞߏ߫: <<ߏ߬ ߞߘߐ߫ ߕߍ߫ ߖߐ߲߬ߧߊ߬ ߞߏ߫ ߘߌ߫، ߊ߲ ߠߊ߫ ߟߐ߲ߠߌ߲ߦߊ ߟߎ߬ ߛߊ߲ߞߘߐߕߊ߭ ߟߋ߬ ߘߐߙߐ߲߫ ߦߋ߫.>> ߊ߬ ߞߵߏ߬ ߟߋ ߞߍ߫ ߢߊ߰ߡߊ߬ ߛߊ߲ߜ߭ߊߙߋ߫ ߟߊ߫ ߘߋ߲ߠߊߓߐ ߞߎߡߊ ߞߎ߲߬ߘߏ߲ ߘߌ߫.