ߓߙߎߞߌߣߊ߫ ߞߎ߲߬ߠߊ߬ߛߌ߮ ߓߘߴߊ߬ ߝߐ߫ ߞߵߊ߬ ߝߊ߬ߘߊ ߓߐ߫ ߊ߬ ߡߊ߬߸ ߞߏ߫ ߊ߬ߟߎ߫ ߞߊ߬ ߝߊ߰ߟߌ ߓߌ߲߬ߓߊߥߏ ߡߍ߲ ߠߊߥߟߌ߬ ߂߀߁߈ ߠߊ߫ ߞߵߊ߬ ߓߐ߫ ߛߌ߰ߞߊ߲ ߘߐ߫، ߒ߬ߓߊ߬߸ ߞߏ߫ ߊ߬ߟߎ߬ ߓߘߴߏ߬ ߟߊߘߏ߲߬ ߌߞߐ߫߸ ߞߵߊ߬ ߛߌ߰ ߛߋ߲߬ߠߊ߫، ߏ߬ ߟߋ ߘߐ߫߸ ߞߏ߫ ߕߍ߮ ߞߍ߫ ߘߊ߫ ߡߐ߰ ߛߌ߫ ߘߐ߫߸ <<ߓߊ߰ߓߊ߰ߟߌ߬ ߞߏ ߘߐ߫߸ ߖߊߘߏߦߊ ߘߐ߫߸ ߖߊ߲߬ߝߊ ߘߐ߫߸ ߡߏߦߌߓߊ߯ߝߊ߮ ߘߐ߫߸ ߥߟߏߒߘߐ߫ ߕߎ߬ߡߊ߬ߓߊ߲ߣߍ߲ ߠߊߘߏ߲߭ ߘߐ߫ ߥߟߴߊ߬ ߞߏߙߏ߲߸ ߤߊ߲߯ߵ ߏ߬ ߞߊ߬ ߡߐ߱ ߓߐ߬ߣߐ߫ ߊ߬ ߣߌ ߘߐ߫.>> ߏ߬ ߓߍ߯ ߖߊ߲߬ߞߌ߬ߕߐ߫ ߝߊ߰ߟߌ ߓߌ߲߬ߓߊߥߏ ߟߋ߬ ߟߊ߫.

ߓߙߎߞߌߣߊ߫ ߝߊ߬ߛߏ߬ ߕߋߟߋ߲ߓߊ߯ߦߊ ߞߏߕߌ߯ߘߊ ߞߵߊ߬ ߝߐ߫ ߟߋ߬ ߊ߬ߟߎ߬ ߟߊ߫ ߝߍߛߑߓߎߞ ߖߊ߬ߕߋ߬ߘߊ ߟߊ߫ ߞߐ߬ߟߏ߲߸ ߞߏ߫: <<ߛߊ߬ߙߌ߬ߦߊ߬ ߞߎߘߊ ߣߌ߲߬ ߕߊ߭ ߟߊߥߟߌ߬ߣߍ߲߫ ߖߊ߬ߡߊ ߟߊ߫ ߖߛߎ߬ߛߎߡߊ ߓߊ߲ߓߊ߲ ߠߋ߬ ߡߊ߬߸ ߞߊ߬ ߝߊ߬ ߖߡߊߣߊ ߟߊ߲߬ߓߋ ߕߏ߫ ߊ߬ ߓߟߏ߫߸ ߞߊ߬ ߡߐ߱ ߟߎ߬ ߣߴߊ߬ߟߎ߬ ߓߟߏߝߋ߲ ߠߎ߬ ߟߊߞߊ߲ߘߊ߫ ߓߘߍߞߍ߭.>> ߊ߬ߟߎ߫ ߞߵߊ߬ ߝߐ߫ ߞߏ ߊ߬ ߘߏ߲߬ ߞߍߣߍ߲߫ ߛߊ߬ߙߌ߬ߦߊ߫ ߟߋ߬ ߘߌ߫߸ ߥߛߊ߬ߘߋ߲߬ ߇߁ ߓߍ߯ ߟߊߘߍ߬ߣߍ߲ ߞߊ߬ ߡߍ߲ ߛߎߥߊ߲ߘߌ߫ ߞߊ߬ ߓߍ߲߬ ߊ߬ ߡߊ߬ ߝߛߊߦߌ߫.

ߊߟߎ߫ ߦߴߊ߬ ߟߐ߲߫߸ ߌߓߙߊߤߌߡ ߕߙߊߥߟߋ߫ ߡߍ߲ ߦߋ߫ ߣߌ߲߬߸ ߊ߬ ߣߊ߬ ߘߊ߫ ߓߙߎߞߌߣߊ߫ ߖߡߊ߬ߣߊ ߞߎ߲߬ߠߊ߫ ߂߀߂߂ ߕߎߟߊߝߌ߲ ߠߋ߬ ߟߊ߫߸ ߞߊ߬ߝߏ߬ ߖߊߛߏ߲ ߛߌߟߊ ߝߍ߬، ߞߵߊ߬ ߛߐ߬ߘߐ߲߬߸ ߓߊ߰ߓߊ߰ߟߌ ߓߘߊ߫ ߝߊ߲߬ߞߊ߫ ߛߐ߬ߘߐ߲߫ ߖߡߊ߬ߣߊ߬ ߞߣߐ߫߸ ߊ߬ ߟߊ߫ ߞߎߡߊ ߟߎ߬  ߦߴߊ߬ ߦߌ߬ߘߊ߬ ߟߊ߫ ߝߣߊ߫ ߞߏ߫ ߝߊ߬ߙߊ߲߬ߛߌ߬ ߟߊ߫ ߘߎ߰ߞߘߐ߬ߞߓߊ߬ߦߊ ߕߎ߲߬ ߓߘߊ߫ ߥߙߊ߬، ߏ߬ ߟߋ ߖߍ߬ߘߍ ߞߏߛߐ߲߬߸ ߊ߬ ߟߊ߫ ߓߊ߯ߙߊ߫ ߝߟߐ ߞߍ߫ ߘߊ߫ ߓߙߎߞߌߣߊ߫ ߣߌ߫ ߝߊ߬ߙߊ߲߬ߛߌ߬ ߟߊ߫ ߞߊ߬ߣߌ߲ ߛߊ߭ ߟߋ߬ ߘߌ߫.

ߊ߬ ߓߘߊ߫ ߛߌߦߊߡߊ߲߫ ߞߍ߫ ߓߊ߰ߓߊ߰ߟߌ ߞߍ߬ߟߍ ߘߐ߫߸ ߏ߬ ߟߎ߫ ߟߋ߬ ߞߏߛߐ߲߬߸ ߝߊ߰ߟߌ ߓߌ߲߬ߓߊߥߏ ߟߊߘߏ߲߬ߣߍ߲߫ ߊ߬ߟߎ߬ ߓߟߏ߫ ߣߋ߲߬.

ߞߊ߬ߕߎ߲߯߸ ߕߋߟߋ߲ߓߊ߯ߦߊ ߞߏߕߌ߮ ߦߋ߫ ߋߘߊߛߏ ߙߏߘߙߌߖߋ ߓߦߊߟߊ߫ ߡߍ߲ ߘߌ߫߸ ߏ߬ ߞߵߊ߬ ߛߓߍ߫ ߓߟߐߟߐ ߞߊ߲߬ ߞߏ߫: <<ߓߊ߰ߓߊ߰ߟߌ߬ߟߊ ߟߎ߬ ߦߴߊ߬ߟߎ߬ ߘߎ߲߫ ߠߊ߫ ߛߊ߬ߙߌ߬ߦߊ߬ ߞߘߐ ߤߌߣߊ ߟߋ߬ ߟߊ߫߸ ߞߵߊ߬ߟߎ߫ ߛߊ߬ߥߏ ߞߍ߫.>> ߏ߬ ߟߋ ߞߏߛߐ߲߬߸ ߞߏ߫ ߤߌߣߊ ߏ߬ ߟߋ ߓߊ߲ߣߍ߲߫ ߣߌ߲߬߸ ߞߵߊ߬ ߕߏ߫ ߞߏߟߊߕߐ߲ ߡߊ߬.

ߣߴߌ ߘߏ߲߬ ߞߊ ߞߊ߲ߕߌ߮ ߖߘߍ߬ߓߊ߬ߞߎ߲ ߕߊ߬߸ ߢߍߡߌߘߊ߫ ߌߓߙߊߤߌߡ ߕߙߊߥߟߋ߫߸ ߏ߬ ߞߵߊ߬ ߝߐ߫ ߊ߬ ߟߊ߫ ߞߎߡߊ ߘߏ߫ ߘߐ߫ ߕߎߟߊߝߌ߲߫ ߕߊ߬ߡߌ߲߬ߣߍ߲ ߢߌ߲߬ ߟߊߓߊ߲߫ ߝߊ߲ ߝߍ߬߸ ߊ߬ ߣߌ߫ ߝߐ߰ߓߍ߬ߦߊ߬ߟߊ ߟߎ߬ ߟߊ߫ ߞߎߡߊߢߐ߲߯ߦߊ ߘߏ߫ ߘߐ߫ ߖߌ߬ߦߊ߬ߞߊ߲߬ߛߏ߬ߓߊ ߟߊ߫߸ ߞߏ߫: <<ߣߴߊ߲ ߞߵߊ߲ ߕߍ߯ ߞߍ߫ ߖߊߘߏ ߡߍ߲ ߘߐ߫߸ ߝߊ߰ߟߌ ߓߌ߲߬ߓߊߥߏ ߡߍ߲ ߦߋ߫ ߦߊ߲߬߸ ߏ߬ ߟߋ ߟߊߓߊ߯ߙߊߕߐ߫ ߝߋߎ߫، ߞߵߊ߬ ߝߐ߫ ߞߏ߫ ߌ ߦߋ߫ ߖߡߊ߬ߣߊ߬ ߜߘߍ߫ ߖߌ߲߬ߓߊ߲߬ ߞߘߐ߫߸ ߏ߬ ߕߴߊ߬ ߘߐ߫، ߡߍ߲ ߠߎ߬ ߞߍߕߐ߫ ߊ߬ߟߎ߫ ߖߘߍ߬ ߞߍ߫ ߟߊ߫ ߏ߬ ߣߊߢߌߡߊ߫ ߡߐ߯ ߢߌߡߦߊ߫ ߞߊ߲߫ ߝߐ ߘߌ߫ ߊ߲ ߓߘߊ ߦߊ߲߬߸ ߓߊ ߏ߬ ߟߎ߫ ߟߋ߬ ߊ߬ߟߎ߬ ߟߊ߫ ߡߐ ߟߎ߬ ߘߌ߫ ߦߊ߲߬߸ ߣߴߊ߲ ߞߊ߬ ߡߍ߲ ߡߌ߬ߣߊ߫ ߖߊ߲߬ߝߊ ߘߐ߫߸ ߤߌߣߊ߫ ߕߴߊ߬ ߘߐ߫، ߡߊ߬ߢߌ߬ߡߊ߬ ߟߊ߬ ߡߌߣߊ ߡߎ߬ߕߎ߲߫ ߓߊ߬߸ ߏ߬ ߓߘߊ߫ ߓߊ߲߫.>> ߌߓߋ߬ ߟߋ߬ ߞߊ߲߫ ߕߋ߲߬.

ߊߟߎ߫ ߦߴߊ߬ ߟߐ߲߫߸ ߝߊ߰ߟߌ ߓߌ߲߬ߓߊߥߏ ߕߘߍ߬ ߓߙߎߞߌߣߊ߫ ߞߘߐ߬ߡߊ߲߬ ߝߛߊߌ߫، ߓߊ߬ߙߌ߬߸ ߙߐߞ ߡߊߙߞ ߞߙߌߛߌߦߊ߲ ߞߊߓߏߙߋ߫ ߣߊ߭ ߡߍ߲ ߞߍ߫ ߘߊ߫߸ ߏ߬ ߟߋ ߞߵߊ߬ ߖߐ߬ߛߌ߫ ߞߵߊ߬ ߓߐ߫ ߛߌ߰ߞߊ߲ ߘߐ߫ ߂߀߁߈ ߠߊ߫، ߣߴߏ߬ ߕߍ߫߸ ߁߉߈߈ ߞߏߟߌ߲ߞߏߟߌ߲ ߠߊ߫߸ ߓߑߟߍߖ߭ ߞߐ߲ߔߊߥߏߙߋ߫ ߕߋ߬ߟߋ߸ ߕߍ߮ ߞߍ߫ ߘߊ߫ ߣߊ߲߬ߕߌ߯ ߡߐ߰ ߥߐߙߐ߲ߝߌ߬ߟߊ߬ ߘߐ߫ ߡߐ߰ ߝߊ߰ ߞߏ ߘߏ߫ ߘߐ߫߸ ߣߴߏ߬ ߦߋ߫ ߢߍߡߌߘߊ߫ ߟߊ߬ߡߎߛߊ߬ ߛߊߦߜ߭ߏ߫ ߝߊ߰ ߞߏ ߘߌ߫߸ ߊ߬ ߣߴߊ߬ ߡߏ߬ߛߏ، ߣߊ߲߬ߕߌ߯ ߡߐ߰ ߥߐߙߐ߲ߝߌ߬ߟߊ ߏ߬ ߟߎ߬ ߓߍ߯ ߟߊߟߐ߬ ߘߊ߫ ߟߋ߬ ߞߵߊ߬ߟߎ߬ ߓߏ߲߫ ߡߊ߬ߙߌ߬ߝߊ ߟߊ߫ ߞߵߊ߬ߟߎ߫ ߝߊ߰ ߝߊ߰ߟߌ ߓߌ߲߬ߓߊߥߏ ߞߏߛߐ߲߬.

ߕߏߡߊ߫ ߛߊ߲ߞߙߊ߫ ߝߣߊ߫ ߕߋ߬ߟߋ ߘߐ߫߸ ߁߉߈߄ ߠߊ߫߸ ߡߐ߰ ߥߐߙߐ߲ߝߌ߬ߟߊ߬ ߝߣߊ߫ ߡߌ߬ߣߊ߬ ߘߊ߫ ߓߍ߲߬ߓߍ߲߬ߓߍ߲߬ ߞߏ ߘߐ߫߸ ߏ߬ ߟߎ߫ ߝߊ߰ ߘߊ߫ ߟߋ߬.

ߛߌ߰ߞߊ߲߬ ߞߎߘߊ ߡߍ߲ ߦߋ߫ ߣߌ߲߬߸ ߞߏ߫ ߛߌߦߊߡߊ߲߫ ߠߋ߬ ߟߊߘߏ߲߬ߣߴߊ߬ ߞߣߐ߫، ߊ߬ ߖߍ߬ߘߍ߸ ߊ߬ߟߎ߬ ߟߊ߫ ߕߋߟߋ߲ߓߊ߯ߦߊ ߞߏߕߌ߮ ߞߊ߲߫߸ ߞߏ߫ ߊ߬ߟߎ߬ ߓߍߣߊ߬ ߞߏߟߊߕߐ߲ ߛߊ߬ߙߌ߬ߦߊ߬ߛߎ߲ ߓߌ߬ߟߊ߫ ߖߡߊ߬ߣߊ ߞߊ߲ ߠߎ߬ ߘߐ߫߸ ߛߊ߫ ߓߍ߯ ߘߴߊ߬ ߢߊߦߋ߫ ߢߊ ߡߍ߲ ߡߊ߬.