ߡߊ߬ߟߌ ߘߐ߬ߕߊߡߌ߲ ߞߏߟߊߕߍ߯ߘߊ ߝߊ߬ߛߏ߬ߟߊ߬ߞߊ (ߘߞߝ) ߣߐ߬ ߟߊ߬ߘߍ ߡߍ߲ ߞߍ߫ ߟߊ߫ ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߆ ߞߏ߲ߓߌߕߌ߮ ߕߋ߬ߟߋ߫ ߂߂߸ ߞߏߟߊߕߍ߯ ߡߐ߰ ߁߂߂ ߓߍ߯ ߞߵߊ߬ ߞߊ߲ ߘߌ߫ ߞߐߟߌߞߐߟߌ ߟߊ߫߸ ߝߋ߲߫ ߡߊ߫ ߛߐ߬ߘߐ߲߬ ߡߍ߲ ߞߵߊ߬ ߡߊߞߎ߲߬߸ ߥߟߊ߫ ߞߵߊ߬ ߓߊ߲߬ ߊ߬ ߞߏ ߡߊ߬߸ ߓߍ߯ ߟߋ߬ ߓߍ߲߬ ߘߴߊ߬ ߡߊ߬، ߞߏ߫ ߊ߬ߟߎ߬ ߓߘߊ߫ ߡߐ߬ߟߐ߲߬ ߘߌ߫ ߝߊ߬ߛߏ߬ ߞߊ߲ ߠߎ߬ ߡߊ߬߸ ߞߵߊ߬ߟߎ߬ ߞߛߌ߫ ߖߐ߬ ߞߍ ߡߵߊ߬ߟߎ߫ ߡߊ߬߸ ߊ߬ ߣߌ߫ ߞߵߊ߬ߟߎ߬ ߘߊ߲ߞߎ߲߫ ߘߌ߲߬ߞߌߙߊ ߓߍ߯ ߘߐ߫.

ߞߏ ߺ ߏ ߺ ߞߏ߫ ߘߌ߫ ߞߍ߫ ߝߊ߬ߛߏ߬ ߞߊ߲ ߠߎ߬ ߘߐߜߊ߬ߛߌ߬ ߞߏ ߘߌ߫߸ ߥߟߊ߫ ߞߵߊ߬ߟߎ߫ ߛߋ߲߬ߓߐ߫ ߞߏ ߘߏ߫ ߟߎ߫ ߘߐ߫ ߞߊ߲߫ ߞߏ ߘߊ߲ߞߎ߲ߣߍ߲߫ ߦߙߐ ߡߍ߲ ߠߎ߬ ߘߐ߫߸ ߏ߬ ߓߍ߯ ߟߋ߬ ߟߊߜߎ߬ߝߎ߲߬ߣߍ߲߫ ߊ߬ߟߎ߬ ߓߟߏ߫، ߝߏ߫ ߊ߬ߟߎ߫ ߞߊ߬ ߞߊ߲߫ ߕߊ߲ߣߌߛߓߊ߬ ߡߊߘߊ߲߫߸ ߡߍ߲ ߠߎ߬ ߘߊ߲ߞߎ߲ߣߍ߲߫ ߞߵߊ߬ߟߎ߬ ߝߣߊ߫ ߞߍ߫ ߖߡߊ߬ߣߊ ߞߎ߲߬ߠߊ߬ߛߌ߰ ߞߊ߲ ߘߌ߫ ߝߛߊߦߌ߫، ߏ߬ ߟߎ߫ ߟߋ߬: ߓߡߊߣߊ߲ߞߊ߲߸ ߓߏߡߎ߸ ߓߏ߬ߖ߭ߏ߸ ߘߜ߭ߐ߸ ߝߎ߬ߟߑߝߎߟߑߘߋ߬߸ ߤߊߛߣߊߦߊ߸ ߡߊߡߙߊ߸ ߡߊ߬ߣߌ߲߬ߞߊ߬ߞߊ߲߸ ߛߏ߬ߣߌ߲߬ߞߋ߸ ߛߐ߲߬ߜ߭ߊߦߌ߸ ߛߌߦߋߣߙߊ߸ ߕߡߊߛ߭ߍߞ߸ ߞߊ߬ߛߏ߲߬ߞߊ߬ ߞߊ߲.

ߊߟߎ߫ ߦߴߊ߬ ߟߐ߲߫߸ ߂߀߂߃ ߛߌ߰ߞߊ߲ ߕߐ߲ߛߋ߲ ߃߁ ߞߣߐ߫߸ ߊ߬ ߝߐߣߍ߲߫ ߠߋ߬ ߦߋ߲߬ ߞߏ߫ ߝߊ߬ߛߏ߬ ߞߊ߲ ߠߎ߬ ߦߋ߫ ߞߎ߲߬ߠߊ߬ߛߌ߰ ߞߊ߲ ߠߋ߬ ߘߌ߫߸ ߡߍ߲ ߡߊ߬ߞߏ ߦߋ߫ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߊ߬ߞߊ ߟߊ߫߸ ߞߊ߬ ߓߍ߲߬ ߊ߬ߟߎ߬ ߟߊߓߊ߯ߙߊ߫ ߢߊ ߡߊ߬، ߒ߬ߓߊ߬߸ ߊ߬ ߦߌ߬ߘߊ߬ߣߍ߲߬ ߞߏ߫ ߝߊ߬ߛߏ߬ ߞߊ߲ ߠߎ߬ ߓߘߊ߫ ߞߍ߫ ߡߊ߬ߡߙߊ߬ߟߌ߬ ߞߊ߲ ߘߌ߫߸ ߞߎ߲߬ߠߊ߬ߛߌ߮ ߟߊ߫ ߘߐ߬ߛߙߋ ߓߍ߯ ߓߌ߬ߟߊ߬ߕߐ߫ ߟߋ߬ ߝߊ߬ߛߏ߬ ߞߊ߲ ߠߎ߬ ߘߐ߫، ߊ߬ ߘߊ߲߬ ߕߍ߫ ߞߎ߲߬ߠߊ߬ߛߌ߮ ߟߊ߫ ߘߐ߬ߛߙߋ ߟߎ߬ ߓߌ߬ߟߊ ߡߊ߬ ߝߊ߬ߛߏ߬ ߞߊ߲ ߠߎ߬ ߘߐ߫ ߘߋ߬߸ ߊ߬ ߟߊߘߏ߲߬ߕߐ߫ ߟߋ߬ ߞߊ߬ߙߊ߲߬ߕߊ ߟߎ߬ ߟߊ߫߸ ߏ߬ ߞߏ߬ߣߌ߲ ߕߍߣߊ߬ ߞߍ߫ ߟߊ߫ ߡߎߣߎ߲߬ ߝߏ߫ ߛߙߊߕߌ ߡߍ߲ ߠߎ߬ ߦߴߏ߬ ߟߊ߫߸ ߏ߬ ߟߎ߬ ߦߋ߫ ߘߝߊ߫ ߡߎߣߎ߲߬. ߊ߬ ߞߏ߬ߣߌ߲߸ ߛߌߞߊ߫ ߕߴߊ߬ ߘߐ߫߸ ߝߊ߬ߙߊ߲߬ߛߌ߬ ߞߊ߲ ߠߋ߬ ߓߊ߯ߙߊ߫ ߞߊ߲ ߘߌ߫.

ߊ߬ߟߎ߬ ߟߊ߫ ߛߊ߬ߙߌ߬ߦߊ߬ ߞߎߘߊ ߣߌ߲߬ ߕߊ߭߸ ߏ߬ ߘߌߦߊ߫ ߘߊ߫ ߟߋ߬ ߟߊ߬ߞߟߏ߬ߞߟߏ߬ߟߌ ߞߏߕߌ߮ ߦߋ߫ ߝߋߝߋ߫߸ ߞߏ߲߬ߓߏ ߊߡߊ߬ߘߎ߫ ߛߌ߫ ߛߥߊ߬ߣߍ߬، ߏ߬ ߞߊ߲߫ ߞߏ߫ ߓߟߋ߬ߓߟߋ߫ ߟߋ߬ ߞߍߣߍ߲߫ ߊ߬ߟߎ߬ ߓߟߏ߫ ߣߌ߲߬߸ ߡߊ߬ߟߌ ߝߊ߬ߛߏ߬ ߞߊ߲ ߠߎ߬ ߟߊ߫ ߞߏ ߛߊ߲ߞߘߐߕߊ߭ ߘߐ߫.

ߊ߬ߟߎ߬ ߟߊ߫ ߛߊ߬ߙߌ߬ߦߊ߬ ߞߎߘߊ ߣߌ߲߬ ߓߘߊ߫ ߝߊ߲߬ߞߊ߬ ߘߌ߫ ߝߊ߬ߛߏ߬ ߞߊ߲ ߠߎ߬ ߡߊ߬، ߊ߬ ߕߐ߭ ߕߏߣߍ߲߫ ߡߍ߲ ߡߊ߬ ߡߎ߬ߕߎ߲߬߸ ߞߊ߲ߕߌ߮ ߦߴߊ߬ ߟߊߘߌ߬ߢߍ߬߸ ߞߵߊ߬ ߓߌ߬ߟߊ߬ ߞߍߟߌ ߘߊߞߘߐ߫، ߝߣߊ߫߸ ߝߊ߬ߙߊ߲߬ߛߌ߬ ߞߊ߲ ߠߋ߬ ߟߊߓߊ߯ߙߊߕߐ߫ ߞߎ߲߬ߠߊ߬ߛߌ߮ ߛߌ߲߬ߝߏ߲ ߠߎ߬ ߣߌ߫ ߢߐ߲߯ ߕߍ߫ ߛߓߍߟߌ ߘߐ߫ ߡߎߣߎ߲߬߸ ߝߐߟߌ ߞߏ߬ߣߌ߲ ߘߐ߫߸ ߝߊ߬ߛߏ߬ ߞߊ߲ ߠߎ߬ ߘߌ߫ ߟߊߓߊ߯ߙߊ߫ ߕߎ߬ߡߊ ߓߍ߯ ߣߌ߫ ߘߊߞߎ߲ ߓߍ߯ ߘߐ߫. ߢߊߢߌߣߌ߲ߠߌ߲ ߠߎ߬ ߓߘߴߊ߬ ߦߌ߬ߘߊ߬߸ ߞߏ߫ ߝߊ߬ߛߏ߬ ߞߊ߲ ߡߍ߲ ߠߎ߬ ߦߋ߫ ߝߐ߫ ߟߊ߫ ߓߊߞߍ߬߸ ߏ߬ ߟߎ߬ ߓߍߣߊ߬ ߣߐ߭ߛߐ߬ߘߐ߲߬ ߞߊ߲ ߕߐ߭ ߟߎ߬ ߡߊ߬ ߝߛߊߦߌ߫.

ߟߊ߬ߘߍ ߣߌ߲߬ ߞߍ߫ ߘߊ߫ ߓߡߊ߬ߞߍ߫ ߡߊ߲߬ߕߏ߲߬ߕߍ߬ ߜߙߊ߬ ߝߏ߮ ߟߋ߬ ߞߣߐ߫ (ߛߋߌߛߓߋ)߸ ߊ߬ߟߎ߫ ߞߊ߬ ߞߎ߬ߙߎ߲߬ߘߎ߫ ߛߌ߲߬ߝߏ߲߬ߠߞߊ߬ ߟߏ߯ߟߎ߫ ߟߋ߬ ߘߐߢߌߡߌ߲߫߸ ߞߵߊ߬ߟߎ߬ ߟߊ߫ ߟߊ߬ߞߙߐ߬ߛߌ߬ߟߌ ߟߎ߬ ߞߍ߫ ߊ߬ ߞߊ߲߬߸ ߞߊ߬ ߞߐ߲߰ ߊ߬ߟߎ߬ ߟߊߘߌ߬ߢߍ ߣߴߊ߬ߟߎ߬ ߟߊߥߊ߲߬ߞߊ߲ ߢߍ߫ ߞߊ߲ߕߌ߮ ߓߟߏ߫.