ߞߐߞߊ߲ߞߏ ߟߎ߬ ߞߏߕߌ߮߸ ߡߏ߬ߙߌ߬ߛߊ߲߬ߘߊ߬ ߞߎߦߊߕߍ߫ ߞߎߡߊߣߍ߲߫ ߠߋ߬ ߓߌߟߏ߲߸ ߣߍߣߍߓߊ ߕߟߋ߬ ߅ ߡߊ߬߸ ߞߵߊ߬ ߝߐ߫ ߖߌ߬ߣߍ߬ߞߊ ߘߏ߫ ߟߎ߫ ߡߊ߬ ߞߏ߫ <<ߛߓߍߟߐ߲ߓߊߟߌ>>߸ ߡߍ߲ ߠߎ߬ ߦߋ߫ ߖߌ߬ߣߍ߬ ߟߊ߫ ߛߌ߰ߢߐ߲߰ ߛߐ ߡߊߞߕߌ߫ ߟߊ߫ ߢߎߡߍߞߏ ߘߐ߫، ߊ߬ ߡߊ߫ ߞߏ߲߬ߓߏ ߕߐ߯ ߝߐ߫ ߛߊ߫߸ ߒ߬ߞߊ߬߸ ߟߊ߬ߞߙߐ߬ߛߟߌ߬ߟߊ ߝߊ߲߬ߓߊ ߦߟߌ ߓߋ߬ߣߍ߲߫ ߎߛߑߡߊߣߌ߲߬ ߞߊ߬ߓߊ ߟߋ߬ ߞߐ߫߸ ߏ߬ ߡߍ߲ ߞߊ߬ ߞߎߡߊ ߏ߬ ߟߊߓߐ߫ ߝߊ߬ߛߏ߬ ߜߙߊ ߟߊ߫.

ߊߟߎ߫ ߦߴߊ߬ ߟߐ߲߫߸ ߣߌ߲߬ ߞߍ߫ ߘߊ߫ ߢߐ߲߯ߦߋ ߘߏ߫ ߟߋ߬ ߘߐ߫߸ ߞߐߞߊ߲ߞߏ ߟߎ߬ ߞߏߏߕߌ߮ ߣߌ߫ ߟߊ߬ߛߌ߰ߘߋ߲߬ ߠߊߘߌ߬ߢߍ߬ߣߍ߲ ߠߎ߬ ߟߊ߫ ߢߐ߲߯ߦߋ߸ ߘߎ߲߬ߘߎ߬ߡߊ߬ ߝߐ߰ߓߍ߬ߦߊ߬ߟߊ ߟߎ߬ ߜߍ߲߫ ߘߊ߫ ߏ߬ ߡߍ߲ ߟߊ߬ߘߍ߬ ߘߊߞߎ߲ ߘߐ߫، ߞߊ߬ߕߎ߲߯߸ ߊ߬ ߕߏ߫ ߘߊ߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߓߊ߯ߙߊ߫ ߞߍߣߍ߲ ߠߎ߫ ߟߋ߬ ߡߊߛߊ߲߬ߛߊ߲ ߠߊ߫ ߢߎߡߍ߫ ߞߏ ߡߊ߬ߘߎ߮ ߘߐ߫߸ ߝߏ߫ ߊ߬ ߥߊ߫ ߘߊ߫ ߣߌ߲߬ ߝߐ߫.

<<ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߦߋ߫ ߛߌ߰ ߟߊ߫ ߕߎ߬ߡߊ ߟߊ߫߸ ߊ߬ ߞߊ߬ ߡߎ߲߬ ߛߐ߬ߘߐ߲߫ ߊ߬ ߢߍ߫؟ ߖߡߊ߬ߣߊ ߕߍ߬ߘߍ߫ ߘߌ߬ߓߌ ߟߋ߬ ߘߐ߫، ߐ߲߬ߤߐ߲߫߸ ߖߌ߬ߣߍ߬ߞߊ߬ ߟߎ߬ ߦߋ߫ ߦߋ߲߬ ߏ߬ ߘߐ߫߸ ߡߍ߲ ߠߎ߬ ߘߴߊ߬ߟߎ߫ ߛߌ߰ߣߍ߲ ߕߏ߫ ߝߊ߬ߛߏ߬ ߜߙߊ ߟߊ߫ ߞߵߊ߬ ߝߐ߫߸ ߞߏ߫ ߖߌ߬ߣߍ߬ ߦߋ߫ ߛߌ߰ߢߐ߲߮ ߠߎ߬ ߛߐ߫ ߟߊ߫ ߢߎߡߍ ߘߐ߫ ߞߵߊ߬ ߛߐ߬ߘߐ߲߬ ߢߎߡߍ߫ ߕߍ߫ ߖߡߊ߬ߣߊ ߖߍ߬ߘߍ ߞߣߐ߫، ߛߓߍߟߐ߲ߓߊߟߌ ߡߍ߲ ߠߎ߬ ߦߋ߫ ߟߐ߲ߠߌ߲ ߜߏ߬ߟߏ ߘߐ߫ (ߏ߬ ߟߎ߫ ߟߵߏ߬ ߝߐ߫ ߟߊ߫).>> ߊ߬ ߞߵߏ߬ ߝߐ߫ ߟߊ߬ߘߍ߬ ߘߊߞߎ߲ ߏ߬ ߟߋ ߘߐ߫.

ߊߟߎ߫ ߦߴߊ߬ ߟߐ߲߫߸ ߞߍ߲ߘߍߟߏ߲ ߠߋ߬ ߡߊ߬߸ ߞߏ߲ߓߌߕߌ߮ ߕߟߋ߬ ߃߁߸ ߞߵߊ߬ ߛߐ߬ߘߐ߲߫ ߖߌ߬ߣߍ߫ ߥߛߊ߬ߘߋ߲ ߠߎ߬ ߦߋ߫ ߂߀߂߆ ߣߊ߲߬ߝߟߏ߬ߦߊ߬ߟߌ ߞߎ߬ߙߎ߲߬ߘߎ ߛߊߞߍߟߌ ߘߊߞߘߐ߫߸ ߞߎߡߊ߫ ߛߌߦߊߡߊ߲ ߣߌ߲߬ ߓߍ߯ ߖߎ߭ ߓߐߣߍ߲߫ ߦߋ߲߬ ߠߋ߬، ߓߊߏ߬߸ ߏ߬ ߟߏ߲ ߠߋ߬߸ ߞߏ߲߬ߓߏ ߎߛߑߡߊߣߌ߲߬ ߞߊ߬ߓߊ ߞߊ߬ ߢߌ߬ߣߌ߲߬ߞߊ߬ߟߌ ߞߍ߫ ߞߎ߲߬ߠߊ߬ߛߌ߮ ߞߎ߲߬߸ ߞߏ߫ ߌߞߏߡߌ߲߬ ߖߌ߬ߣߍ߬ ߦߋ߫ ߛߣߍ߬ߜ߭ߊߟߌ߫ ߣߌ߫ ߜ߭ߊ߲ߓߌ߫ ߣߌ߫ ߓߌ߬ߛߊߥߏ߫ ߖߌ߬ߣߍ߬ ߛߐ߫ ߟߊ߫ ߢߎߡߍ ߘߐ߫߸ ߐ߲߬ߤߐ߲߫߸ ߏ߬ ߕߐ߬ߣߐ ߦߋ߫ ߥߊ߫ ߟߊ߫ ߡߌ߲߫ ߓߏ߲߰، ߓߊߏ߬߸ ߞߏ߫ ߣߊ߲߬ߝߟߏ߬ ߟߊ߬ߘߏ߲߬ߘߊ ߡߍ߲ ߠߎ߬ ߦߋ߫ ߦߋ߲߬߸ ߦߙߐ ߏ߬ ߕߴߊ߬ ߘߐ߫.

ߎߛߑߡߊߣߌ߲߬ ߞߊ߬ߓߊ ߓߊ߬ߟߌ߬ߣߍ߲ ߞߊ߲߫ ߏ߬ ߟߋ ߘߐ߫ ߞߏ߫: <<ߌ ߡߴߊ߲ ߠߊ߫ ߖߡߊ߬ߣߊ ߦߋ߫ ߛߍߣߍ߲߬߸ ߝߋ߲ ߡߍ߲ ߡߊ߫ ߛߴߊ߬ ߟߊ߫ ߞߎߓߋߘߊ ߢߎߡߍ߫ ߞߏ ߢߊߓߐ߫ ߟߊ߫߸ ߏ߬ ߦߋ߫ ߢߎߡߍ ߝߙߋ߬ ߟߊ߫ ߞߐߞߊ߲߫ ߖߡߊߣߊ߫ ߛߊ߬ߓߊ߫ ߡߊ߬. ߏ߬ ߦߋ߫ ߞߓߊߞߏ ߟߋ߬ ߘߌ߫ ߘߋ߬.>> ߊ߬ ߓߊ߬ߟߌ߬ߣߍ߲ ߞߵߏ߬ ߟߋ ߝߐ߫.

ߊ߬ ߞߍߕߐ ߞߎߡߊ ߏ߬ ߝߐ߫ ߟߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߜߟߐߡߌ߲ ߞߏߕߌ߮߸ ߟߊ߱ߦߌ߬ ߛߋߞߎ߬ ߞߵߊ߬ ߝߐ߫ ߊ߬ ߦߋ߫ ߟߋ߬߸ ߞߏ߫ ߓߍ߲߬ߞߊ߲߬ߡߊ ߏ߬ ߕߍ߬ߘߍ߫ ߦߋ߲߬ ߠߋ߬ ߞߊ߬ߦߌ߯ ߊ߬ߟߎ ߡߊ߫ ߣߊ߬ ߡߎߣߎ߲߬߸ ߞߏ߫ ߊ߬ߟߎ߫ ߞߵߏ߬ ߛߐ߬ߘߐ߲߫ ߠߋ߬ ߦߋ߲߬، ߞߏ߲߬ߓߏ ߞߓߊߞߏߦߊߣߍ߲ ߞߵߊ߬ ߝߐ߫ ߞߏߕߌ߮ ߡߊ߬ ߞߏ߫ ߡߙߌߘߐ߫ ߞߘߐ߫ ߕߊ߬ߣߍ߲ ߛߌߦߊߡߊ߲߫ ߠߋ߬ ߓߘߊ߫ ߟߊߥߟߌ߬߸ ߡߎ߲߬ ߠߊ߫ ߘߐ ߣߌ߲߬ ߝߣߊ߫ ߡߊ߫ ߓߐ߫ ߦߋ߲߬.

ߏ߬ ߖߋ߬ߓߌ ߘߐ߫߸ ߡߊߙߌߦߡߊ߫ ߛߌߙߋ߬ ߛߌ߬ߟߊ ߡߍ߲ ߦߋ߫ ߝߛߎߞߎ ߣߌ߫ ߣߊ߲߬ߝߟߏ߬ߦߊ߬ߟߌ ߟߎ߬ ߣߌ߫ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲ ߞߏߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߕߍ߫ ߘߋ߬ ߞߏ߫ ߖߌ߬ߣߍ߬ ߞߋߟߋ߲߫ ߠߋ߬ ߏ߬ ߟߎ߬ ߛߐ߫ ߟߊ߫، ߞߏ߫ ߖߌ߬ߣߍ߬ ߣߴߊ߬ ߛߌ߰ߢߐ߲߰ ߖߡߊߣߊ ߟߎ߬ ߦߋ߫ ߢߐ߲߮ ߛߐ߫ ߟߊ߫ ߟߋ߬. ߞߊ߬ߕߎ߲߯߸ <<ߖߡߊ߬ߣߊ ߏ߬ ߟߎ߬ ߦߴߊ߬ ߛߙߊ߬ ߟߊ߫߸ ߖߎ߬ߟߎ ߘߏ߲߬ ߦߴߊ߬ߟߎ߬ ߟߊ߫، ߖߌ߬ߣߍ߬ ߝߣߊ߫ ߦߴߊ߬ ߛߙߊ߬ ߟߊ߫߸ ߖߎ߬ߟߎ ߦߋ߫ ߖߌ߬ߣߍ߬ ߟߊ߫. [...] ߏ߬ ߕߐ߬ߣߐ߫ ߛߐ߬ߘߐ߲߬ߣߍ߲ ߝߊ߲߬ߓߊ ߦߋ߫ ߥߊ߫ ߟߊ߫ ߖߌ߬ߣߍ߬ ߢߎߡߍ߫ ߞߏߟߊߘߍ (ߖߢߞ=EDG) ߟߊ߫ ߢߎߡߍ߫ ߕߊ߲ߓߊ߲ ߠߎ߬ ߘߐߓߍ߲߬ ߞߏ ߟߋ߬ ߘߟߊ߫ ߊ߬ ߛߌߦߊߡߊ߲ ߘߐ߫.>> ߞߏߕߌ߯ߡߛߏ ߞߵߏ߬ ߢߊߝߐ߫.

ߢߊߝߐߟߌ ߏ߬ ߡߊ߫ ߡߐ߱ ߟߎ߫ ߖߌ߰ߡߝߊ߬، ߕߏ߫ ߞߍߣߍ߲ ߏ߬ ߟߋ ߞߏߢߊ ߘߐ߫߸ ߡߏ߬ߙߌ߬ߛߊ߲߬ߘߊ߬ ߝߣߊ߫ ߣߊ߬ ߘߊ߫ ߞߎߡߊ߫ ߘߐ ߣߌ߲߬ ߝߐ߫ ߞߎߣߎ߲߬.