ߖߊ߲߬ߞߊ߬ߙߏ߬ߕߐ ߟߊߓߐ ߛߌ߯ߙߌ߲߫ ߞߵߊ߬ ߟߊߕߊ߯ ߓߡߊ߬ߞߐ߫߸ ߏ߬ ߡߊ߫ ߟߊߘߎ߲߫، ߞߊ߬ߕߎ߲߯߸ ߛߌ߯ߙߌ߲߫ ߘߊ߲ߘߊߛߏߓߊ ߞߵߊ߬ ߦߌ߬ߘߊ߫ ߟߋ߬ ߖߎߡߊ߫ ߛߊߟߌ߫ ߞߐ ߣߌ߲߬ ߘߐ߫߸ ߛߌߟߊߓߐߛߐ߯ߣߊ߫ ߞߎߡߊߓߘߎ ߟߊ߫߸ ߞߏ߲߬ߓߏ ߊߓߘߎߟߊߦߌ߫ ߓߊߛ߭ߌߙߎ߬ ߞߐ߲ߘߍ߫ ߟߊ߫ ߞߎߡߊ ߞߐߝߍ߬ ߕߎ߬ߡߊ߬ߙߋ߲߬ ߘߊ߲ߘߐ߫ ߟߊ߫.

ߓߊߏ߬ ߛߐ߱ߡߊ߬߸ ߞߏ߲߬ߓߏ ߊߓߋ߬ߛߋ ߞߵߊ߬ ߝߐ߫ ߟߋ߬ ߞߏ߫ ߊ߬ߟߎ߫ ߞߊ߬ ߡߐ߱ ߘߏ߫ ߟߊߕߊ߯ ߓߡߊ߬ߞߐ߫ ߣߍߣߍߓߊ ߕߟߋ߬ ߣߊ߯ߣߌ߲ ߡߊ߬߸ ߖߊ߲߬ߞߊ߬ߙߏ߬ߕߐ ߏ߬ ߕߘߍ߬ ߓߙߎߞߌߣߞߊ ߟߋ߬ ߘߌ߫߸ ߡߍ߲ ߕߘߍ߬ ߛߊߣߌ߲߫ ߢߌߣߌ߲ ߠߊ߫ ߓߎ߬ߙߋ߬، ߏ߬ ߛߋ߲߬ ߞߊ߬ߘߌ߬ߓߊ߰ߕߐ ߟߋ߬ ߟߊߕߊ߯ ߘߊ߫ ߓߡߊ߬ߞߐ߫ ߜ߭ߊߓߙߌߦߍߟ ߕߎߙߋ ߟߊ߫، ߊ߬ ߝߐ߫ ߘߊ߫ ߏ߬ ߡߊ߬ ߦߋ߲߬ ߞߏ߫ ߓߟߏ ߕߍ߫ ߛߌ߰ ߟߴߊ߬ ߞߘߐ߫߸ ߓߊߏ߬ ߊ߬ ߓߐߣߍ߲߫ ߖߌ߬ߣߍ߫ ߟߋ߬، ߞߏ߲߬ߓߏ ߊߓߋ߬ߛߋ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫ ߒ߬ߓߊ߬߸ ߊ߬ߟߎ ߕߍ߫ ߡߐ߰ ߟߊߕߊ߯ ߟߊ߫ ߓߡߊ߬ߞߐ߫ ߏ߬ ߞߐ߫ ߡߎߣߎ߲߬߸ ߝߏ߫ ߖߡߊ߬ߙߌ߬ ߞߎߘߊ߫ ߦߋ߫ ߕߊ߬ ߕߎ߬ߡߊ ߡߍ߲ ߠߊ߫.

ߒ߬ߓߊ߬߸ ߛߌ߯ߙߌ߲߫ ߘߊ߲ߘߊߛߏߓߊ ߞߎ߲߬ߕߌ߮ ߟߊ߫ ߝߐߟߌ߫ ߘߐ߫߸ ߕߎ߬ߢߊ ߟߋ߬ ߝߛߊߦߌ߫߸ ߝߙߋߞߋ ߘߏ߲߬ ߘߊ߫ ߖߊ߲߬ߞߊ߬ߙߏ߬ߕߐ ߟߊ߫ ߞߏ ߘߐ߫ ߜ߭ߊߓߙߌߦߍߟ ߕߎߙߋ ߟߊ߫، ߞߏ߫ ߡߐ߰ ߞߋߟߋ߲߫ ߠߋ߬ ߕߍ߬ߘߍ߫ ߦߋ߲߬߸ ߏ߬ ߟߋ ߞߊ߬ ߞߎߡߊ ߏ߬ ߝߐ߫߸ ߞߏ߬ߣߌ߲߬ ߘߊ߲ߘߊߛߏ ߞߎ߲߬ߕߌ߮ ߟߎ߬ ߟߊ߫ ߖߡߊ߬ߙߌ߬ ߕߍ߫߸ ߊ߬ ߘߏ߲߬ ߡߊ߫ ߝߘߊ߫ ߞߎ߲߬ߠߊ߬ߛߌ߰ ߟߊ߫.

ߊ߲ ߝߣߊ߫ ߞߍߢߊ ߟߵߏ߬ ߘߌ߫ ߞߊ߬ ߞߏ߲߬ߓߏ߫ ߓߊ߬ߟߊ ߡߊߖ߭ߐߙ ߡߊߢߌ߬ߣߌ߲߬ߞߊ߬ ߛߌ߯ߙߌ߲߫ ߘߊ߲ߘߊߛߏߓߊ ߟߊ߫߸ ߊ߬ߟߋ ߞߊ߬ ߢߊߝߐߟߌ߫ ߞߟߊ߬ߟߡߊ߬ ߞߍ߫ ߊ߬ ߞߏ ߞߊ߲߬، ߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ߟߎ߬ ߥߊ߫ ߘߊ߫ ߓߊ߯ߙߟߊ ߡߍ߲ ߛߐ߬ߘߐ߲߫ ߦߋ߲߬ ߏ߬ ߟߏ߲߸ ߏ߬ ߟߋ ߞߋߟߋ߲߫ ߞߊ߬ ߞߎߡߊ ߣߌ߲߬ ߝߐ߫.

<<ߊ߬ ߞߏ ߞߍߣߍ߲߫ ߓߌ߬ߟߊ߬ߒ߬ߘߐ ߟߋ߬ ߘߐߙߐ߲߫ ߘߌ߫، ߡߐ߱ ߡߍ߲ ߕߘߍ߬ ߓߊ߯ߙߊ߫ ߘߊߞߎ߲ ߘߐ߫ ߞߏ߫ ߘߐߜߊ߬ߣߍ߲ ߠߎ߬ ߘߌ߲߬ߞߌߙߊ ߘߐ߫ ߦߋ߲߬߸ ߏ߬ ߟߋ ߞߊ߬ ߣߌ߲߬ ߞߎߡߊ ߝߐ߫، ߊ߲ ߝߣߊ߫ ߞߍ ߊ߬ ߞߊ߬ߟߊߡߊ߬߸ ߊ߲ ߞߊ߬ ߜ߭ߊߓߙߌߦߍߟ ߕߎߙߋ ߞߏߟߊߕߍ߮ ߟߎ߬ ߞߟߌ߫ ߒߕߟߋߡߊ߬، ߊ߬ ߗߋߕߌ߮ ߓߊ߬߸ ߊ߬ ߞߏ߫ ߘߐߜߊ߬ߣߍ߲ ߠߎ߬ ߘߌ߲߬ߞߌߙߊ ߘߊ߲ߘߟߊ߫ ߞߎ߲ߕߌ߮ ߓߊ߬߸ ߏ߬ ߛߌ߫ ߕߎ߲߬ ߕߍ߫ ߓߊ߲߬ߠߌ߲߬ ߞߏ ߣߌ߲߬ ߞߊ߬ߟߊߡߊ߬߸ ߞߊ߬ ߝߐ߫ ߞߏ߫ ߣߌ߫ ߖߊ߲߬ߞߊ߬ߙߏ߬ߕߐ ߓߐ߫ ߘߊ߫ ߖߌ߬ߣߍ߬߸ ߞߏ߫ ߊ߬ߟߎ߬ ߕߴߏ߬ ߝߍ߬ ߦߋ߲߬.>> ߞߏ߲߬ߓߏ߫ ߓߊ߬ߟߊ ߞߵߏ߬ ߢߊߝߐ߫.

ߘߊ߲ߘߊߟߌߟߊ ߞߵߊ߬ ߝߐ߫ ߞߏ߫ ߘߊ߲ߘߊߛߏ߫ ߜ߭ߊߓߙߌߦߍߟ ߕߎߙߋ ߞߎ߲߬ߕߌ߮ ߟߎ߫ ߛߐ߲߬ ߘߴߊ߬ ߡߊ߬߸ ߞߏ߫ ߞߏ ߡߍ߲ ߞߍߣߍ߲߫߸ ߊ߬ ߡߊ߫ ߓߍ߲߬، ߏ߬ ߟߋ ߘߐ߫߸ ߓߊ߯ߙߟߊ ߡߍ߲ ߞߵߊ߬ ߞߍ߫߸ ߊ߬ߟߎ߫ ߞߵߏ߬ ߡߌ߬ߣߊ߬߸ ߞߊ߬ ߓߊ߲߫ ߞߊ߬ ߦߊ߬ߝߊ ߕߙߊ߫ ߞߵߊ߬ ߟߴߊ߬ ߞߊ߲߬.

ߊߓߎߓߞߊߙ ߛߘߌߞߌ߬ ߖߊ߰ߣߍ ߡߍ߲ ߦߋ߫ ߛߌ߯ߙߌ߲߫ ߘߊ߲ߘߊߛߏߓߊ ߗߋߕߌ߮ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߝߐ ߞߏ߫ ߛߌ߯ߙߌ߲߫ ߠߊ߫ ߡߐ߰ ߕߍ߫ ߥߊ߫ ߟߊ߫ ߡߊ߬ߟߌ ߟߊ߫ ߡߎ߬ߕߎ߲߬ ߘߊ߲ߘߊߟߌ ߕߊ߫ ߓߟߏ ߡߊ߬ߟ ߞߏ߫ ߕߎ߬ߢߊ߬ ߕߴߏ߬ ߘߐ߫، ߏ߬ ߘߐ߫߸ ߞߏ߫ ߊ߬ߟߎ߬ ߦߴߏ߬ ߕߡߊ߬ߖߌ ߓߐ߫ ߓߍ߯ ߘߐ߫߸ ߞߏ߫ ߊ߬ߟߎ߬ ߡߊ߫ ߡߙߌߘߐ߫ ߛߎ߮ ߏ߬ ߕߊ߬ ߡߎߣߎ߲߬.

ߊ߬ ߞߵߊ߬ ߝߐ߫ ߏ߬ ߟߋ ߘߐ߫ ߞߏ߫: <<ߡߐ߰ ߛߌ߫ ߡߊ߫ ߡߙߌߘߐ߫ ߕߊ߬ ߦߊ߲߬ ߡߎߣߎ߲߬ ߞߵߊ߬ ߝߐ߫ ߞߏ߫ ߊ߲ ߕߍ߫ ߖߊ߲߬ߞߊ߬ߙߏ߬ߕߐ߬ ߟߊߕߊ߯ ߟߊ߫ ߓߡߊ߬ߞߐ߫ ߡߎ߬ߕߎ߲߬ ߤߊ߲߯ ߖߡߊ߬ߙߌ߬ ߞߎߘߊ߫، ߤߊߟߌ߬ ߓߌ߬ ߡߍ߲ ߓߌ߬ ߘߌ߫߸ ߊ߲ ߞߊ߬ ߖߊ߲߬ߞߊ߬ߙߏ߬ߕߐ ߘߏ߫ ߟߊߕߊ߯ ߘߊ߲ߘߊߛߏ߫ ߜ߭ߊߓߙߌߦߍߟ ߕߎߙߋ ߟߊ߫، ߓߊ߯ߙߟߊ ߘߏ߫ ߟߋ߬ ߞߊ߬ ߓߟߏߡߓߊߟߌ߫ ߞߍ߫ ߦߋ߲߬߸ ߏ߬ ߟߋ ߞߵߊ߬ ߝߐ߫ ߞߏ߫ ߖߊ߲߬ߞߊ߬ߙߏ߬ߕߐ ߡߍ߲ ߠߎ߬ ߦߋ߫ ߓߐ߫ ߟߊ߫ ߖߌ߬ߣߍ߬߸ ߞߏ߫ ߊ߬ߟߎ߬ ߕߴߊ߬ߟߎ߬ ߓߟߏ ߛߌ߰ ߟߴߏ߬ ߞߘߐ߫، ߞߏ߬ߣߌ߲߬߸ ߘߊ߲ߘߊߛߏ ߞߎ߲߬ߕߌ߮ ߟߎ߫ ߞߊ߬ ߦߝߊ߬ ߕߙߊ ߞߍ߫، ߏ߬ ߘߐ߫߸ ߓߊ߯ߙߟߊ߫ ߞߋߟߋ߲ ߣߐ߬ ߞߊ߲߫ ߞߏߙߏ߲ ߡߍ߲ ߝߐ߫ ߟߊ߫߸ ߊ߲ ߕߍ߫ ߛߴߊ߲ ߓߟߏߞߍ߫ ߟߴߏ߬ ߟߊ߫ ߞߵߊ߬ ߞߍ߫ ߦߏ߫ ߡߊ߬ߟߌ ߝߊ߰ߡߊ ߟߎ߬ ߟߊ߫ ߞߎߡߊ ߟߵߏ߬ ߘߌ߫.>> ߗߋߕߌ߮ ߞߵߏ߬ ߟߋ ߝߐ߫.

ߛߌ߯ߙߌ߲߫ ߘߊ߲ߘߊߛߏ ߞߎ߲߬ߕߌ߮ ߟߎ߬ ߟߊ߫ ߞߎߡߊ ߢߌ߲߬ ߠߎ߬ ߟߋ߬ ߊ߬ ߦߌ߬ߘߊ߬ ߟߊ߫߸ ߞߊ߬ ߦߟߌߟߊߕߍ߯ ߘߌ߫ ߖߊ߬ߡߊ ߡߊ߬߸ ߞߏ߫ ߊ߬ߟߎ߬ ߡߊ߫ ߖߊ߲߬ߞߊ߬ߙߏ߬ߕߐ ߟߎ߬ ߟߊ߫ ߓߡߊ߬ߞߐ߬ ߕߊ߰ ߞߏ ߟߊߟߐ߬߸ ߏ߬ ߡߙߌߦߊ߫ ߡߊ߫ ߕߊ߬ ߝߣߊ߫، ߏ߬ ߘߐ߫߸ ߞߏ߫ ߡߐ߱ ߟߎ߬ ߞߊߣߊ߬ ߓߊ߯ߙߟߊ߫ ߞߋߟߋ߲ ߠߊ߫ ߞߎߡߊ ߣߌ߫ ߓߊ߯ߙߊ߫ ߦߙߐ ߡߎ߰ߡߍ ߟߊ߫ ߞߎߡߊ ߟߊ߫ ߢߐ߲߮ ߡߊ߬.

ߏ߬ ߘߐ߫߸ ߖߊ߲߬ߞߊ߬ߙߏ߬ߕߐ ߡߍ߲ ߞߏ߬ߣߌ߲ ߠߊ߫ ߞߎߡߊ ߦߴߌߘߐ߫߸ ߏ߬ ߦߋ߫ ߓߙߎߞߌߣߞߊ ߟߋ߬ ߘߌ߫߸ ߊ߬ ߜߍ߬ߟߍ߲ ߠߋ߬ ߞߊߘߌ߫ ߘߊ߫߸ ߊ߬ ߟߊߟߊ߫ ߘߊ߫ ߜ߭ߊߓߙߌߦߍߟ ߕߎߙߋ ߘߊ߲ߘߊߛߏ ߟߋ߬ ߟߊ߫߸ ߛߋ߲߬ߘߐ߬ߞߎߟߎ߲ ߟߊ߬ߓߏ߬ߙߟߌ߬ߟߊ ߟߊ߫ ߢߊߝߐߟߌ ߞߐߝߍ߬ ߞߵߊ߬ ߦߌ߬ߘߊ߬ ߞߏ߫ ߖߌ߬ߣߍ߬ߞߊ߬ ߕߍ߫، ߣߴߏ߬ ߕߍ߫߸ ߓߟߏ ߕߎ߲߬ ߕߍߣߊ߬ ߛߌ߰ ߟߴߊ߬ ߞߘߐ߫، ߊ߬ ߞߏ ߘߏ߲߬ ߞߍ߫ ߕߎߡߊ ߝߣߊ߫ ߣߌ߫ ߛߊߣߌ߲߫ ߢߌߣߌ߲߫ ߞߏ ߟߊߟߐ߬ ߥߊ߯ߕߌ ߟߋ߬ ߓߍ߲߬ߣߍ߲߬ ߢߐ߲߮ ߡߊ߬߸ ߡߊ߬ߟߌ߬ߞߊ ߣߌ߫ ߓߙߎߞߌߣߞߊ ߥߊ߯ ߦߙߌߞߊ߫ ߓߘߴߊ߬ߟߎ߬ ߞߐߛߊ߬ߦߌ߲߫ ߊ߬ߟߎ߫ ߝߊ߬ ߓߘߊ ߡߍ߲ ߞߏߛߐ߲߬.