ߕߊߓߐ ߘߏ߫ ߟߋ߬ ߞߍߣߍ߲߫ ߞߎߣߎ߲߬ ߞߎߣߎ߲ߟߏ߲ ߂߀߂߆ ߣߍߣߍߓߊ ߕߟߋ߬ ߁߈ ߡߊ߬߸ ߞߵߊ߬ ߓߊ߲ߘߊ ߞߊ߬ ߓߌ߬ ߓߌߟߏ߲ ߂߀߂߆ ߣߍߣߍߓߊ ߕߟߋ߬ ߁߉ ߟߊ߫، ߡߍ߲ ߞߍ߫ ߘߊ߫ ߛߊߓߎ߫ ߘߌ߫ ߞߊ߬ ߓߏ߲߫ ߛߊ߬ߓߊ߫ ߢߐ߲߰ ߖߋ߬ߣߌ߲߬ ߜ߭ߏ߲߬ߓߏ߬ߦߊ߫߸ ߡߊ߬ߣߍ߬ߦߊ߫ ߞߊ߬ߝߏ߬ߙߋ߲ ߞߣߐ߫߸ ߞߊ߬ ߓߟߏߝߋ߲߫ ߛߌߦߊߡߊ߲߫ ߞߊ߬ߛߙߊ߫ ߖߌ߬ߣߍߡߊ߬ߕߍ߲ ߠߊ߫ ߝߐߟߌ߫ ߘߐ߫.
ߊ߲ ߠߊ߫ ߟߌ߬ߤߟߊ߫ ߛߐ߬ߘߐ߲߬ߣߍ߲ ߘߐ߫߸ ߞߏ߫ ߕߊ ߣߌ߲߬ ߓߐ߫ ߘߊ߫ ߂߂ ߕߎߡߊ ߝߊ߲߭ ߠߋ߬ ߝߍ߬߸ ߞߵߏ߬ ߞߎ߲߭ ߞߍ߫ ߢߎߡߍ ߟߊ߫ ߕߊ߬ߡߌ߲߬ ߞߏ߬ ߞߋߟߋ߲ ߘߌ߫، ߞߊ߬ ߓߏ߲߫ ߛߓߊ߬ ߟߊߡߌ߬ߘߊ߬߸ ߡߍ߲ ߞߋ߬ߟߋ߲߬ߞߋ߬ߟߋ߲߬ߠߊ ߓߍ߯ ߞߣߐߟߊ ߕߎ߲߬ ߦߋ߫ : ߓߏ߲ߘߋ߲߫ ߞߋߟߋ߲߫ ߣߌ߫ ߝߏ߯ ߞߋߟߋ߲߫ ߣߌ߫ ߢߍ߲߯ ߞߋߟߋ߲߫ ߘߌ߫.
ߒ߬ߓߊ߬߸ ߟߊ߲ߓߍ߯ߙ ߜ߭ߙߊߛ ߕߍ߲ߖߌߣߏ߫ ߡߍ߲ ߞߏߢߊ ߣߌ߲߬ ߛߏ߬ߟߊ߬ߓߊ߰ߕߐ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߕߎ߲߬ ߕߍ߫ ߞߣߍ ߞߊ߲߬ ߕߊߓߐ ߣߌ߲߬ ߥߊ߯ߕߌ ߟߊ߫߸ ߊ߬ ߟߊ߫ ߓߏ߲ ߖߋ߬ߣߌ߲߬ߣߍ߲߫ ߏ߬ ߡߍ߲ ߛߋ߲߭ߝߍ߬، ߊ߬ ߞߵߏ߬ ߦߌ߬ߘߊ߫ :<< ߒ ߓߐ߫ ߘߊ߫ ߓߊ߯ߙߊ߫ ߘߌߦߊ ߂߀ ߕߎߡߊ ߝߊ߲߭ ߠߋ߬ ߝߍ߬߸ ߞߊ߬ ߒ ߞߏ߬، ߌߞߏߡߌ߲߬ ߒ ߡߏ߬ߛߏ ߕߎ߲߬ ߕߍ߫ ߟߎ ߡߊ߬߸ ߒ ߕߊ߯ ߘߊ߫ ߓߐ߫ ߦߌߟߊ ߒ ߡߏ߬ߛߏ ߣߌ߫ ߒ ߘߋ߲ ߡߊ߬ ߏ߬ ߟߋ߬ ߘߐ߫. ߒ ߕߏ߫ ߘߊ߫ ߦߋ߲߬ ߠߋ߬߸ ߒ ߛߌ߰ߢߐ߲߮ ߠߎ߫ ߞߊ߬ ߒ ߞߟߌ߫ ߞߏ߫ ߒ ߕߊ ߦߋ߫ ߒ ߠߊ߫ ߓߏ߲ ߠߊ߫߸ ߒ ߝߣߊ߫ ߞߊ߬ ߒ ߓߏ߬ߙߌ߬ ߞߊ߬ ߟߎߡߟߊ ߡߊߜߍ߲߫، ߓߊ߬ߙߌ߬߸ ߒ ߧߋ߫ ߛߋ߫ ߟߊ߫ ߕߎ߬ߡߊ ߡߍ߲߸ ߒ ߞߵߊ߬ ߛߐ߬ߘߐ߲߬ ߒ ߠߊ߫ ߓߏ߲ ߞߣߐ߫ ߝߋ߲ ߓߍ߯ ߓߘߊ߫ ߖߋ߬ߣߌ߲߬ ߞߎߙߍ߫߸ ߝߐ߫ ߒ ߟߐ߬ߣߍ߲߫ ߝߊ߰ߣߌ߲ ߡߍ߲ ߘߌ߫ ߕߋ߲߬߸ ߊ߬ ߣߌ߫ ߛߍ߲߬ߓߍ߬ߟߊ߲ "ߝߏߕߍߦߌ߬" ߡߍ߲ ߝߣߊ߫ ߕߎ߲߬ ߛߌ߰ߣߍ߲߫ ߘߊ ߞߘߐ. ߒ ߛߌ߰ߢߐ߲߰ ߝߌߟߊߣߊ߲ ߝߣߊ߫ ߓߘߊ߫ ߞߍߣߍ߲߫ ߢߊ߫ ߞߋߟߋ߲߫ ߏ߬ ߟߋ߬ ߡߊ߬߸ ߝߐ߫ ߛߓߊߣߊ߲ ߡߍ߲ ߠߊ߫ ߛߊ߲ߓߍ߲ ߞߋߟߋ߲߫ ߖߋ߬ߣߌ߲߬ ߘߊ߫، ߏ߬ ߞߏ߬ߣߌ߲ ߓߟߏߝߋ߲߫ ߛߌ߫ ߡߊ߫ ߖߋ߬ߣߌ߲߬ >>، ߊ߬ ߞߵߏ߬ ߢߊߝߐ߫.
ߞߊ߬ ߓߍ߲߬ ߕߊߓߐ ߣߌ߲߬ ߞߊ߬ߛߙߊ ߟߊߥߊ߬ߙߊ ߡߊ߬߸ ߛߏ߬ߟߊ߬ߓߊ߰ߕߐ ߞߵߊ߲ ߞߊ߲ߠߊߓߐ߫ ߓߐߒߖߘߍߘߐ߫ ߡߐ߮ ߟߎ߫ ߡߊ߬، ߛߴߊ߬ߟߎ߬ ߘߴߊ߬ ߡߊߘߍ߬ߡߍ߲߬ ߢߊ ߡߍ߲ :<< ߒ ߘߌ߫ ߛߋ߫ ߡߍ߲ ߝߐ߫ ߟߊ߫ ߓߌ߬ ߢߐ߲߰ ߟߏ߲߫߸ ߏ߬ ߟߴߊ߲ ߡߊߘߍ߬ߡߍ߲߬ ߘߌ߫. ߞߏ߫ ߓߍ߯ ߦߋ߫ ߊߟߊ߫ ߟߊ߫ ߟߊ߬ߕߍ߮ ߟߋ߫ ߘߌ߫߸ ߞߏ߫ ߛߎ߮ ߣߌ߲߬ ߘߏ߫ ߘߌ߫ ߛߋ߫ ߞߊ߬ ߓߍ߯ ߟߊߘߍ߬ߣߍ߲ ߡߊߛߐ߬ߘߐ߲߬، ߏ߬ ߘߐ߫߸ ߊߟߊߡߊ߬ ߊߟߊ߫ ߞߊ߬ ߡߐ߱ ߟߎ߬ ߘߐߛߎ߫ ߊ߲ ߘߍ߬ߡߍ߲ ߡߊ߬. ߒ ߘߏ߲߬ ߝߏߣߍ߲߫ ߒ ߠߊ߫ ߘߐ߬ߛߙߋ߬ ߛߌߦߊߡߊ߲߫ ߠߋ߬ ߟߊ߫ ߣߌ߲߬ ߞߏ ߘߊߞߎ߲ ߘߐ߫، ߊ߬ ߜߋ߲ߜߋ߲߫ ߖߍ߬ߘߍ: ߒ ߠߊ߫ ߡߊ߬ߟߐ߲߬ ߔߊߔߘߊ߸ ߊ߬ ߣߌ߫ ߒ ߠߊ߫ ߡߊ߬ߡߙߊ߬ߟߌ߬ ߘߐߛߙߋ ߞߙߎߞߍ߬ߙߍ، ߝߐ߫ ߒ ߠߊ߫ ߖߊ߯ߓߘߊ ߖߐ߲ߓߐ߲ ߡߍ߲ ߞߋߟߋ߲߫ ߕߎ߲߬ ߦߋ߫ ߒ ߓߋ߲ߓߊ߫ ߓߘߊ، ߏ߬ ߓߐ߲߯ߕߍ߫߸ ߒ ߠߊ߫ ߝߋ߲ ߡߎ߰ߡߍ ߓߍ߯ ߞߍߣߍ߲߫ ߠߋ߬ ߞߎ߲߫ >>، ߟߊ߲ߓߍ߯ߙ ߜ߭ߙߊߛ ߕߍ߲ߖߌߣߏ߫ ߞߵߏ߬ ߦߌ߬ߘߊ߫.
ߕߊ ߞߊ߬ ߓߟߊ߬ߥߎ ߡߍ߲ ߟߴߊ߬ ߘߐ߫ ߜ߭ߏ߲߬ߓߏ߬ߦߊ߫ ߓߌ߬߸ ߏ߬ ߟߋ ߢߊߝߐߣߍ߲߫ ߊߟߎ߫ ߦߋ߫ ߣߌ߲߬، ߞߊ߬ߛߙߊ߬ߓߊ߰ߕߐ ߟߎ߫ ߞߏ߬ߣߌ߲ ߢߌߣߌ߲ߣߍ߲߫ ߓߍ߯ ߟߊ߫ ߘߍ߬ߡߍ߲߬ߠߌ߲߬ ߞߏ߬ߢߌߡߊ ߡߊ߬ ߕߋ߲߬ ߜߟߍ߬ߦߊ ߕߎ߬ߡߊ ߣߌ߲߬ ߠߊ߫߸ ߡߍ߲ ߞߍ ߘߴߊ߬ߟߎ߬ ߢߊߖߌ ߟߊߕߍ߬ߙߍ߲߬ߘߍ߬ ߘߏ߯ߣߍ߲߫.
ߖߐ߲߬ߡߊ߬ߛߌߣߌ߲ߟߐ߲߫ ߞߊ߬ߟߐ ߓߟߏ߫߸ ߛߌߟߊߓߐߛߐ߯ߣߊ߫ ߞߐߦߌߘߊ ߛߌ߯ߙߌ߲߫.






