ߊ߲ ߧߋ߫ ߞߊ߲ߕߌ߯ߦߊ߫ ߢߌߣߌ߲ ߓߙߊߡߊߖߊ߲ߓߊ߲ ߕߎ߬ߡߊ ߟߋ߬ ߘߐ߫ ߕߋ߲߬߸ ߏ߬ ߟߋ ߞߊ߬ ߓߌ߬ߟߊ߬ߢߐ߲߰ߡߊ ߞߏߟߊߕߍ߯ ߛߊ߲ߘߐ (ߓߞߛ) ߟߐ߬ ߗߋߘߋ߲ ߠߎ߬ ߟߊߥߟߌ߬ ߟߊ߫߸ ߞߊ߬ ߖߡߊ߬ߣߊ ߘߐߦߊ߯ߟߊ߫ ߝߐ߰ߓߍ߬ߦߊ߬ߟߊ ߟߎ߬ ߦߟߌߓߌ߬ߟߊ߬ ߞߊ߲ߡߊ߬ ߖߐ ߣߌ߫ ߓߊߛߌ߯ߟߌ ߛߌ߲ߛߌ߲ ߘߐ߫ ߢߣߊߕߊߟߌ ߥߎ߬ߛߎ ߣߌ߲߬ ߞߣߐ߫، ߒ߬ߓߊ߬߸ ߞߊ߯ߙߌ ߣߌ߲߬ ߡߊ߬ ߞߏߟߌ߲ߞߏߟߌ߲ ߕߟߋ߬ ߀߇߸ ߊ߬ߟߎ߫ ߕߘߍ߬ ߛߌ߯ߙߌ߲߫ ߠߋ߬.
ߞߵߊ߬ ߓߍ߲߬ ߛߏ߬ߓߌ߬ߟߊ߬ߞߎ߬ߣߌ߲߬ߠߌ߲ ߡߊ߬ ߢߣߊߕߊߟߌ ߥߎ߬ߛߎ ߣߌ߲߬ ߞߘߐ߫߸ ߓߌ߬ߟߊ߬ߢߐ߲߰ߡߊ ߞߏߟߊߕߍ߯ ߛߊ߲ߘߐ ߟߊ߫ ߗߋߘߋ߲ ߠߎ߬ ߓߘߊ߫ ߖߌ߰ ߖߡߊ߬ߣߊ ߞߣߐߟߊ ߘߐ߫߸ ߞߊ߬ ߝߐ߰ߓߍ߬ߦߊ߬ߟߊ ߟߎ߬ ߛߏ߬ߓߌ߬ߟߊ߬ߞߎߣߎ߲߫߸ ߞߵߊ߬ߟߎ߬ ߦߟߌߓߌ߬ߟߴߊ߬ߟߎ߬ ߟߊ߫ ߞߍߕߊ ߟߎ߬ ߘߐ߫، ߞߊ߯ߙߌ ߣߌ߲߬ ߡߊ߬߸ ߂߀߂߅ ߞߏߟߌ߲ߞߏߟߌ߲ ߕߟߋ߬ ߀߇߸ ߓߞߛ ߟߊ߫ ߗߋߘߋ߲ ߠߎ߬ ߛߣߍ߫ ߘߊ߫ ߛߌ߯ߙߌ߲߫߸ ߊ߬ߟߎ߬ ߣߌ߫ ߦߋ߲߬ ߝߐ߰ߓߍ߬ߦߊ߬ߟߊ ߟߎ߫ ߞߊ߬ ߢߐ߲߯ߦߋ߫ ߊ߬ߟߎ߬ ߟߊ߫ ߞߏ߲ߞߏߘߐߕߊ ߥߎߢߊ߲ߖߍ߲ߛߍ߲ ߠߊ߫.
ߊ߬ߟߎ߬ ߡߊߟߐ߬ ߘߊ߫ ߡߊ߬ߡߊ߬ߘߌ߬ ߞߊ߲ߛߊ߲ ߘߎ߲߬ߓߎ߬ߦߊ߫ ߟߋ߬ ߓߟߏ߫߸ ߊ߬ߟߋ ߡߍ߲ ߦߋ߫ ߞߊ߲ߞߊ߲߫ ߕߌ߲߬ߞߎߘߎ߲ ߞߌ߬ߓߊ߬ߙߏ߬ߦߊ߬ߟߌ ߣߌ߫ ߓߌ߬ߟߊ߬ߢߐ߲߰ߡߊ ߗߋߕߌ߮ ߘߌ߫ ߞߊ߬ߣߌ߲߬߸ ߏ߬ ߞߵߊ߬ߟߎ߬ ߟߊ߫ ߕߊ߯ߡߊ ߣߌ߲߬ ߞߎ߲߭ ߢߊߝߐ߫ ߕߊ߲߬:
<<ߊ߲ ߣߊ߬ߣߍ߲߫ ߠߋ߬ ߞߊ߬ ߣߵߊ߬ ߝߐ߫ ߝߐ߰ߓߍ߬ߦߊ߬ߟߊ ߟߎ߬ ߦߋ߫߸ ߞߏ߫ ߊ߬ߟߎ߬ ߦߋ߫ ߓߊ߯ߙߊ߫ ߢߊߟߐ߲ ߠߊ߫߸ ߜߍߦߊ ߞߊ߲߬߸ ߢߣߊߕߊߟߌ ߥߎ߬ߛߎ ߣߌ߲߬ ߞߣߐ߫، ߝߐ߰ߓߍ߬ߦߊ߬ߟߊ ߕߍ߫ ߞߏߢߊߓߐ߫ ߞߍ߫ ߟߊ߫߸ ߢߣߊ߫ ߖߘߍ߬ ߕߴߊ߬ߟߎ߬ ߟߊ߫߸ ߝߐ߰ߓߍ߬ߦߊ߬ߟߊ ߕߍ߫ ߡߊ߬ߡߌ߬ߘߊ߬ߟߌ߬ߟߊ ߝߋ߲߫ ߞߍ߫ ߟߴߊ߬ ߟߊ߫ ߦߟߌߡߊߛߙߋ߫ ߘߌ߫߸ ߊ߬ߟߎ߬ ߞߊ߫ ߞߊ߲߫ ߞߊ߬ ߡߐ߱ ߟߎ߬ ߟߊߛߌ߲߫ ߠߋ߬߸ ߖߎ߯ߦߊ߫ ߞߎߡߊ߫ ߣߌ߫ ߞߐߣߌ߲ߧߊ߫ ߞߎߡߊ߫ ߞߊߣߊ߬ ߕߊ߬ߡߴߊ߬ߟߎ߬ ߟߊ߫ ߛߌߟߊ ߝߍ߬߸ ߞߎߡߊߕߍ߫ ߕߌߢߍߟߌ߫ ߞߊ߲߫ ߡߊ߬߸ ߛߊ߫ ߢߣߊߕߊߟߌ ߘߌ߫ ߕߊ߬ߡߌ߲߫ ߊ߬ ߢߌ߬ߡߊ ߟߊ߫.>> ߓߞߛ ߟߊ߫ ߞߐߦߌߘߊ ߟߋ߬ ߞߊ߲߫ ߕߋ߲߬.
ߤߊߡߍߘ ߞߊߡߌߟ ߞߡߊ߬ߙߊ߬߸ ߊ߬ߟߋ ߦߋ߫ ߕߐ߲ߕߌ߯ ߟߋ߬ ߘߌ߫ ߓߞߛ ߟߊ߫߸ ߊ߬ ߣߌ߫ ߞߌ߬ߓߊ߬ߙߏ߬ߦߊ߬ߟߌ ߣߌ߫ ߓߌ߬ߟߊ߬ߢߐ߲߰ߡߊ ߛߋߒߞߏߟߊߘߐߦߊ ߥߛߊ߬ߓߊ߰ߦߊ ߞߊ߲ߕߌ߮߸ ߏ߬ ߞߵߊ߬ ߦߌ߬ߘߊ߬ ߞߏ߫ ߡߊ߬ߡߌ߬ߘߊ߬ߟߌ߬ߟߊ ߓߍ߯ ߞߊ߫ ߞߊ߲߫ ߞߊ߬ ߡߌ߬ߣߊ߬ ߢߊ߫ ߞߋߟߋ߲߫ ߠߋ߬ ߡߊ߬߸ ߘߏ߫ ߡߊ߲߫ ߞߊ߲߫ ߞߊ߬ ߓߐ߫ ߘߏ߫ ߘߐ߫.
<<ߊ߬ ߕߟߋ߬ ߘߊ߲ߘߐ ߟߋ߬ ߕߋ߲߬߸ ߓߞߛ ߞߊ߲ߕߌ߮ ߞߎߡߊ߫ ߘߊ߫߸ ߞߏ߫ ߗߋߘߋ߲ ߠߎ߬ ߞߊ߫ ߞߊ߲߫ ߞߊ߬ ߟߛߊߙߌ߫ ߖߡߊ߬ߣߊ ߞߣߐߟߊ ߡߎ߰ߡߍ ߘߐ߫، ߌߞߏߡߌ߲߬ ߊ߲ ߧߋ߫ ߢߣߊߕߊߟߌ ߥߎ߬ߛߎ ߟߋ߬ ߘߐ߫߸ ߗߋߦߊߟߌ ߣߌ߲߬ ߞߎ߲߭ ߦߋ߫ ߛߏ߬ߓߌ߬ߟߊ߬ߞߎ߬ߣߎ߲߬ߠߌ߲ ߠߋ߬ ߘߌ߫߸ ߊ߬ ߣߌ߫ ߞߊ߬ ߝߐ߰ߓߍ߬ߦߊ߬ߟߊ ߟߎ߬ ߦߟߌߓߌ߬ߟߵߊ߬ߟߎ߬ ߟߊ߫ ߞߍߕߊ ߟߎ߬ ߘߐ߫ ߢߣߊߕߊߟߌ ߓߙߊߡߊߖߊ߲ߓߊ߲ ߣߌ߲߬ ߝߍ߬، ߏ߬ ߟߋ ߜߎ ߦߴߊ߲ ߠߊ߫ ߗߋߦߊߟߌ ߣߌ߲߬ ߞߎ߲߭ ߘߌ߫، ߊ߲ ߕߏߕߐ߫ ߟߋ߬ ߞߊ߲ߞߊ߲߫ ߕߌ߲߬ߞߎߘߎ߲ ߘߐ߫ ߦߊ߲߬ ߤߊ߲߯ ߢߣߊߕߊߟߌ߫ ߟߏ߲ ߘߎ߰ߛߊ߬ߜߍ߸ ߊ߲ ߣߌ߫ ߝߐ߰ߓߍ߬ߦߊ߬ߟߊ ߟߎ߬ ߓߍߣߊ߬ ߢߐ߲߮ ߕߊ߬ ߌߞߐ߫߸ ߞߊ߬ ߛߋ߫ ߥߟߊ߬ߘߊ߫ ߟߋ߬ ߖߍ߬ߘߍ ߛߐ߬ߘߐ߲߬ ߠߊ߫ ߢߣߊߕߊߟߌ ߥߎ߬ߛߎ ߣߌ߲߬ ߞߣߐ߫، ߞߏ߫ ߝߟߐߝߟߐ ߡߍ߲ ߦߋ߲߬߸ ߣߌ߫ ߞߌ߬ߓߊ߬ߙߏ߬ߘߊ ߞߊ߫ ߞߊ߲߫ ߞߵߊ߬ ߓߊ߲ߓߊ߲߫ ߊ߬ ߞߊ߲߬߸ ߏ߬ ߟߋ ߕߍߕߋߟߋ߲ ߘߌ߫߸ ߕߍߞߊ߲ߧߊߟߌ߸ ߊ߬ ߣߌ߫ ߜߍߦߊ ߡߊ߬ߡߌ߬ߘߊ߬ߟߌ߬ߟߊ ߟߎ߬ ߣߌ߫ ߢߐ߲߯ ߕߍ߫، ߊ߬ߟߎ߬ ߞߊ߫ ߞߊ߲߫ ߞߵߊ߬ ߞߍ߫ ߢߊ߫ ߟߋ߬ ߡߊ߬߸ ߛߊ߫ ߡߊ߬ߡߌ߬ߘߊ߬ߟߌ߬ߟߊ ߝߋ߲߫ ߞߊߣߊ߬ ߖߎ߯ߦߊ߫ ߞߎߡߊ߫ ߝߐ߫߸ ߕߌߢߍߟߌ߫ ߞߎߡߊ߫ ߝߐ߫߸ ߦߊ߬ߣߌ߫ ߞߎߡߊ߫ ߛߌ߫ ߦߋ߫ ߟߊߕߊ߬ߡߌ߲߬ ߡߎߣߎ߲߬߸ ߊ߬ ߓߍ߯ ߦߋ߫ ߡߊߝߟߍ߫ ߝߟߐ߫، ߊ߬ ߕߌ߯ߕߌ߯ ߖߍ߬ߘߍ߸ ߢߌ߬ߣߊ߬ ߡߊ߲߫ ߞߊ߲߫ ߞߊ߬ ߞߍ߫ ߦߟߌߟߊ߲ߘߌߦߊ߫ ߘߍ߰ߦߊ߲߬ߣߍ߲ ߞߐ߫߸ ߝߏ߫ ߝߐ߰ߓߍ߬ߦߊ߬ߟߊ ߦߴߊ߬ ߝߊ߲ߕߊ߲߬ߞߊ߲߫ ߏ߬ ߡߊ߬ ߟߋ߬ ߘߋ߬߸ ߞߵߊ߬ ߖߊ߲߬ߕߏ߬ ߜߘߋߜߘߋ߫.>> ߊ߬ ߞߵߏ߬ ߟߋ ߝߐ߫.
ߌߓߙߊߤߌߡߊ߬ ߝߙߊ߬ߓߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߞߐߦߌߘߊ ߛߌ߯ߙߌ߲߫.
