ߒߞߏ ߥߙߎߞߟߌ ߛߌ߲߬ߝߏ߲߬ߧߊ߬ߟߌ߬ ߖߊ߯ߓߡߊ ߣߌ߫ ߊߡߙߌߞߌ߬ ߞߊ߬ߝߏ߫ ߘߍ߬ߣߍ߲ ߒߞߏ ߕߐ߲ ߞߊ߬ ߖߡߊ߬ߣߊ߬ ߦߙߌߞߊ߫ ߟߋ߬ ߟߊߛߣߍ߫ ߜߋ߲ߞߐ߰ߖߌ߬ߘߊ ߡߊ߬ߞߐ߬ߙߐ߲߬ߞߐ߬ߙߐ߲߬ߠߌ߲߬ ߞߎߓߋߘߊ ߟߊ߫ ߓߌ߬ ߕߎߟߊߝߌ߲ ߕߋ߬ߟߋ߫ ߂߆ ߣߌ߲߬ ߡߊ߬߸ ߞߊ߬ ߡߊ߲߬ߕߏ߲߲߬ߕߍ߬ ߜߙߊ߫ ߞߍ߫ ߒߞߏ ߛߍ߬ߘߏ߲߬ߠߊ ߟߎ߬ ߣߌ߫ ߝߊ߬ߛߏ߬ߞߊ߲ ߡߞߊߘߊ߲ߓߊ߮ ߟߎ߬ ߓߟߏ߫߸ ߛߌߣߌ߲߫ ߣߊ߬ߕߐ ߞߊ߲߫ ߞߏ߫ ߛߍߘߏ߲ ߓߟߏߘߐߓߍ߲ ߠߎ߬ ߢߊߝߐ߫ ߞߊ߲ߡߊ߬.
ߜߊ߬ߙߊ ߣߌ߲߬ ߘߊߦߟߍ߬ ߘߊ߫ ߊߓߏߓߏ߬ ߓߋ ߛߋ ߞߌ߲߬ߘߊ ߟߋ߬ ߟߊ߫ ߊߓߌߖߊ߲߬ ߞߣߐ߫ ߓߌ߬߸ ߞߵߊ߬ ߟߊߝߟߐ߫ ߝߏ߮ ߞߣߐ ߟߊߛߐ߲ߞߐ ߡߊ߬ ߛߞߎ߬ ߝߊߘߌ߲ ߠߎ߬ ߟߊ߫ ߡߎߣߎ߲߬߸ ߘߎ߲ߓߎ߫ ߛߘߊߡߊ߫ ߘߊ߲߬ߓߟߍ߬ ߓߟߏ߫߸ ߞߊ߬ ߓߐ߫ ߓߐ߬ߓߐ߫ ߖߎ߬ߟߊ߬ߛߏ߫ (ߓߙߎߞߌߣߊ߫ ߝߊ߬ߛߏ߬)߸ ߡߊ߲߱ߖߎ߬ ߞߡߊ߬ߙߊ߫߸ ߞߊ߬ ߓߐ߫ ߛߜ߭ߍߟߊ߫߸ ߊ߬ ߣߌ߫ ߛߎ߬ߟߋ߬ߡߊ߫ߣ ߖߓߊ߬ߕߍ߫߸ ߞߊ߬ ߓߐ߫ ߓߡߊ߬ߞߐ߫ (ߡߊ߬ߟߌ ߟߊ߫).
ߜߊ߬ߙߊ ߣߌ߲߬ ߘߐ߫ ߢߣߊߓߊ߯ߦߊߟߌ ߞߍ߫ ߘߊ߫ ߦߎ߯ߓߊ߬ ߖߌ߯ ߞߋߕߊ߬ ߟߋ߬ ߓߟߏ߫߸ ߏ߬ ߡߍ߲ ߞߵߊ߬ ߦߌ߬ߘߊ߬ ߞߏ߫ ߜߋ߲ߞߐ߰ߖߌ߬ߘߊ ߟߊ߬ߞߟߏ߬ߞߟߏ߬ߟߌ ߞߏߕߌ߯ߘߊ ߟߊ߫ ߗߋߘߋ߲ ߕߍ߬ߘߍ߫ ߦߋ߲߬߸ ߊ߬ ߣߌ߫ ߟߐ߲ߠߌ߲ߦߊ ߞߏߕߌ߯ߘߊ.
ߜߋ߲ߞߐ߰ߖߌ߬ߘߊ ߟߊ߬ߞߟߏ߬ߞߟߏ߬ߟߌ ߞߏߕߌ߯ߘߊ ߞߐߦߌߘߊ ߞߵߊ߬ ߦߌ߬ߘߊ߬ ߞߏ߫: <<ߊ߲ ߓߌ߬ߟߊ ߝߊ߬ߛߏ߬ ߞߊ߲ ߠߎ߬ ߟߊߓߊ߯ߙߊ߫ ߟߊ߫߸ ߏ߬ ߛߊ߲߭ ߂߄ ߠߋ߬ ߕߋ߲߬، ߊ߬ ߘߏ߲߬ ߞߐߝߟߌ ߟߎ߬ ߦߋ߫ ߡߐ߰ ߤߣߍ߫ ߟߊ߫ ߝߛߊߦߌ߫، ߊ߲ ߣߊ߬ߣߍ߲߫ ߒߞߏߞߏ ߘߊߞߎ߲ ߢߌ߲߬ ߘߐ߫ ߓߌ߬߸ ߞߊ߬ ߝߊ߬ߛߏ߬ ߞߊ߲ ߠߎ߬ ߛߓߍ߫ ߞߏ ߕߐ߬ߣߐ ߟߋ߬ ߟߐ߲߫ ߞߏߞߎߘߊ߫.>>
ߓߐ߬ߟߐ߲߬ߞߊ ߡߍ߲ ߞߊ߬ ߟߐ߲ߠߌ߲ߦߊ ߞߏߕߌ߯ߘߊ ߞߐߦߌ߬ߘߊ߬߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߊ߲ ߛߍߥߊߣߍ߲߫ ߊ߲ ߛߣߍߡߊ ߘߐ߫ ߖߊ߲߬ߖߏ߲ ߣߌ߲߬ ߘߐ߫ ߓߌ߬߸ ߟߐ߲ߠߌ߲ߦߊ ߞߏߕߌ߯ߘߊ ߟߋ߬ ߘߌ߫߸ ߡߍ߲ ߦߋ߫ ߛߌ߲ߡߌ߲߫ ߞߊ߲ ߠߎ߬ ߟߊߥߊ߲߬ߞߊ߲ ߘߊߞߘߐ߫، ߏ߬ ߟߋ ߞߏߛߐ߲߬߸ ߊ߲ ߛߍߥߊߣߍ߲߫ ߞߣߍ ߣߌ߲߬ ߞߊ߲߬ ߦߊ߲߬ ߓߌ߬߸ ߒ߬ ߠߊ߫ ߞߊ߲ ߠߎ߬ ߟߊߥߊ߲߬ߞߊ߲ ߘߐ߫.>> ߟߐ߲ߠߌ߲ߦߊ ߞߏߕߌ߯ߘߊ ߞߐߦߌߘߊߓߊ߮ ߟߋ߬ ߞߵߏ߬ ߝߐ߫߸ ߞߊ߬ ߓߊ߲߫ ߞߊ߬ ߕߊ߲߬ߘߏ߬ߟߌ ߟߊߛߋ߫ ߒ.ߥ.ߛ.ߖ ߡߊ߬߸ ߏ߬ ߟߎ߬ ߡߍ߲ ߠߎ߬ ߣߐ߬ ߖߊ߲߬ߖߏ߲ ߣߌ߲߬ ߛߌ߲߬ߝߏ߲߬ߧߊ߬ ߟߊ߫.
ߜߊ߬ߙߊ ߣߌ߲߬ ߘߐ߫߸ ߝߘߊ߬ߝߌ߲߬ߟߊ߲߬ߘߌ ߟߎ߬ ߣߌ߫ ߡߐ߰ߓߊ߬ ߛߌߦߊߡߊ߲߫ ߠߋ߬ ߕߘߍ߬ ߞߣߍ ߞߊ߲߬߸ ߞߊ߬ߙߊ߲߬ߝߊ߬ ߡߊߗߌߦߊߛ ߞߏߥߊߡߍ߫ ߕߊ߬ߣߎ߫ ߡߍ߲ ߦߋ߫ ߞߊ߬ߙߊ߲߬ߝߊ߫ ߡߎߛߑߕߊ߬ߝߊ߫ ߖߓߊ߬ߕߍ߫ ߟߊ߫ ߛߌߟߊ ߟߊߓߊ߬ߕߏ߬ߓߊ߮ ߘߏ߫ ߘߌ߫߸ ߏ߬ ߞߵߊ߬ ߦߌ߬ߘߊ߬ ߞߏ߫: <<ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߞߊ߬ ߓߊ߯ߙߓߊ߫ ߟߋ߬ ߞߍ߫ ߛߓߍߛߎ߲ ߣߌ߲߬ ߛߌ߲ߘߌ ߘߌ߫، ߒߞߏ ߡߊ߫ ߣߊ߬ ߝߘߊ߬ߝߌ߲߬ ߞߊ߲ ߠߎ߬ ߘߐߙߐ߲߫ ߛߓߍ߫ ߞߊ߲ߡߊ߬ ߞߎߡߊߕߍ߫ ߡߊ߲߬ߘߋ߲߬ ߞߊ߲ ߠߎ߬ ߡߊ߬߸ ߊ߬ ߣߊ߬ߣߍ߲߬ ߘߎߢߊ߫ ߞߊ߲ ߓߍ߯ ߟߋ߬ ߛߓߍ߫ ߞߊ߲ߡߊ߬.>>
ߖߊ߲߬ߖߏ߲ ߣߌ߲߬ ߘߐ߫߸ ߟߐ߲ߞߏߕߌ߯ ߛߌ߲ߘߟߌߟߊ߫ ߜߘߍ߫ ߝߣߊ߫ ߕߘߍ߬ ߞߣߍ ߞߊ߲߬߸ ߡߍ߲ ߣߐ߬ ߛߓߍߛߎ߲ ߘߏ߫ ߛߌ߲ߘߌ߫ ߟߊ߫ ߊ߬ߞߊ߲ ߥߟߊ߫ ߊ߬ߗߊ߲ ߛߓߍ߫ ߞߊ߲ߡߊ߬߸ ߣߴߊ߬ ߟߊ߫ ߛߓߍߟߌ ߕߐ߯ ߞߏ߫ ߞߑߟߍ߲ߜ߳ߊ߫، ߊ߬ ߟߊ߫ ߕߌߙߌ߲ߠߌ߲ ߠߎ߬ ߞߐߝߍ߬߸ ߊ߬ ߞߊ߬ ߒߞߏ ߦߋ߫ <<ߛߓߍߛߎ߲߫ ߠߋ߬ ߘߌ߫߸ ߡߍ߲ ߘߌ߫ ߞߍ߫ ߞߋ߬ߟߋ߲߬ߧߊ ߛߓߊߓߎ ߘߌ߫߸ ߞߊ߬ ߓߊ߬ߟߊ߲ ߓߐ߫ ߊ߲ ߣߌ߫ ߢߐ߲߯ ߕߍ߫، ߊ߲ ߢߍߓߊ߮ ߟߎ߬ ߟߊ߫ ߝߎ߬ߕߎ߲߬ߕߌ߬ ߓߟߋߓߟߋ ߞߍ߫ ߘߊ߫ ߡߍ߲ ߘߌ߫߸ ߏ߬ ߟߋ ߞߍ߫ ߘߊ߫ ߞߊ߲߫ ߞߏ ߢߊߦߋߓߊߟߌߦߊ ߘߌ߫، ߓߊߏ߬߸ ߊ߲ ߠߊ߫ ߛߍ߬ߘߏ߲߬ߠߊ ߟߎ߫ ߞߊ߬ ߓߘߍ߬ߓߘߍ߬ߟߌ ߘߍߒߖߘߍߟߦߊ ߟߋ߬ ߢߌߣߌ߲߫߸ ߊ߬ߟߎ߬ ߡߊ߫ ߛߐ߬ߘߐ߲ ߘߍߒߖߘߍߟߦߊ߫ ߢߌߣߌ߲߫.>> ߊ߬ߟߋ ߟߊ߫ ߞߎߡߊ ߞߊ߬ ߖߊ߬ߡߊ ߢߊߞߘߐߛߋ߫ ߞߏߛߓߍ߫.
ߊߓߌߖߊ߲߬ ߊߘߑߟߊߡ ߛߓߍߟߌ ߞߐߦߌߘߊߓߊ߮ ߊߡߊߘߎ߫ ߟߊߡߙߊߣߊ߬ ߖߊߟߏ߫ ߞߊ߬ ߞߎߟߎ߲ߖߋߟߌ ߟߊߛߋ߫ ߒ.ߥ.ߛ.ߖ ߡߊ߬߸ ߞߵߊ߬ ߦߌ߬ߘߊ߬ ߞߏ߫ ߊ߬ ߛߍߥߊߣߍ߲߫ ߜߊ߬ߙߊ ߣߌ߲߬ ߓߋߟߋ߲ߠߊ ߟߎ߬ ߞߍ ߞߏߛߐ߲߬ ߊ߲ ߠߊ߫ ߞߊ߲ ߠߎ߬ ߘߐ߫، ߊ߬ ߞߊ߲߫ ߞߏ߫ <<ߡߐߣߍ߫ ߞߡߊ߫ ߛߎ߬ߛߎ߬ߓߊߟߌ ߟߋ߬ ߦߴߊ߬ ߦߋ ߘߌ߫߸ ߞߏ߫ ߊ߮ ߒߠߋ ߦߋ߫ ߝߎߟߊ ߟߋ߬ ߘߌ߫߸ ߓߊ߬ߙߌ߬ ߒ ߕߍ߫ ߝߎߟߊ߫ ߞߊ߲ ߡߍ߲߫ ߠߊ߫߸ ߥߟߊ߫ ߒ ߧߋ߫ ߡߊ߬ߣߌ߲߬ߞߊ ߟߋ߬ ߘߌ߫߸ ߒߠߋ ߕߍ߫ ߡߊ߬ߣߌ߲߬ߞߊ߬ ߞߊ߲ ߡߍ߲ ߠߊ߫، ߌ ߘߴߏ߬ ߝߐ߫ ߞߍ߰߸ ߓߊߏ߬ ߡߊ߬ߣߌ߲߬ߞߊ߬ ߞߊ߲ ߓߐ߰ߓߐ߰ ߣߴߊ߬ ߓߎ߲ߓߎ߲߫ ߕߴߌ ߝߊ߬ߘߌ ߘߐ߫.>>
ߏ߬ ߘߐ߫߸ ߝߘߊ߬ߝߌ߲߬ ߞߊ߲ ߠߎ߬ ߡߞߊߘߊ߲ ߛߍ߬ߘߏ߲߬ߠߊ ߟߎ߬ ߣߌ߫ ߟߐ߲ߠߌ߲ߦߊ ߟߊ߬ߕߊ߲߬ߞߊ߬ߓߊ߰ ߛߌߦߊߡߊ߲߫ ߠߋ߬ ߞߣߍ ߣߌ߲߬ ߞߊ߲߬ ߕߋ߲߬߸ ߡߍ߲ ߠߎ߬ ߓߍ߯ ߣߊ߬ߣߍ߲߫ ߝߘߊ߬ߝߌ߲߬ ߞߊ߲ ߠߎ߬ ߛߋߞߏߦߊ ߦߌ߬ߘߊ߬ ߞߊ߲ߡߊ߬.
ߊ߲ ߠߊ߫ ߝߐ߰ߓߍ߫ ߣߊ߬ߕߐ ߓߍߣߊ߬ ߞߎߡߊ߫ ߒߞߏ ߗߋߘߋ߲ ߠߎ߬ ߟߊ߫ ߓߋߟߋ߲ߠߊ ߟߎ߬ ߟߋ߬ ߞߊ߲߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
