ߊ߬ߟߌ ߓߊߘߊ߬ߙߊ ߦߋ߫ ߘߋ߲ߡߌߛߍ߲߫ ߠߋ߬ ߘߌ߫ ߖߌ߬ߣߍ߬ ߞߣߐ߫ ߓߌ߬߸ ߊ߬ ߟߊ߫ ߣߕߊ߬ ߓߘߍ ߟߎ߬ ߣߴߊ߬ ߟߊ߫ ߥߙߎߞߌߟߊ߲ߘߌߦߊ ߞߏߛߐ߲߬߸ ߘߋ߲ߡߌߛߍ߲ ߠߎ߬ ߞߊ߫ ߞߊ߲߫ ߞߵߊ߬ߟߎ߬ ߢߡߊߟߴߊ߬ ߡߊ߬.
ߌ ߓߊ߯ ߖߌ߬ߣߍ߬ ߡߊߝߟߍ߫߸ ߜߟߍ߬ߦߊ߬ ߛߌߌߦߊߡߊ߲߫ ߠߋ߬ ߖߡߊ߬ߣߊ ߞߣߐ߫߸ ߓߊ߯ߙߓߊߟߌߦߊ ߖߊ߯ߓߊߕߐߦߊ ߦߴߏ߬ ߘߏ߫ ߟߋ߬ ߘߌ߫߸ ߞߊ߬ߙߊ߲߬ ߟߊ߬ߕߊ߰ߓߊߟߌߦߊ ߥߟߊ߫ ߞߊ߬ߙߊ߲߬ ߠߊ߬ߓߊ߲߬ߓߊߟߌߦߊ߸ ߞߵߏ߬ ߟߊ߫ ߕߎ߲ߞߊ߲߫ ߠߊߕߊ߯ ߛߌߦߊߡߊ߲ ߠߎ߬ ߞߊ߲߬߸ ߏ߬ ߓߘߊ߫ ߞߍ߫ ߘߋ߲ߡߌߛߍ߲ ߠߎ߬ ߥߊ߫ ߢߊ ߘߌ߫، ߓߊ߬ߙߌ߬߸ ߊ߬ߟߌ ߓߊߘߊ߬ߙߊ ߞߊ߲߫ ߞߏ߫ ߊ߬ߟߋ ߢߊ߯ ߛߌߟߊ߫ ߜߘߍ߫ ߟߊ߫߸ ߡߍ߲ ߣߌ߫ ߘߐ ߏ߬ ߟߎ߬ ߕߍ߫ ߞߋߟߋ߲߫ ߘߌ߫، ߓߌ߬ ߓߌߟߏ߲ ߣߌ߲߬ ߡߊ߬ ߂߀߂߅ ߘߓߊ߬ߓߌߟߊ ߕߟߋ߬ ߁߄ ߡߊ߬߸ ߊ߬ ߕߏ߫ ߘߊ߫ ߝߐ߰ߓߍ߬ ߜߙߊ ߟߋ߬ ߟߊ߫ ߞߊ߲ߞߊ߲߫߸ ߊ߬ ߞߊ߬ ߓߊ߯ߙߊ߫ ߞߍߕߊ ߘߏ߫ ߟߎ߫ ߡߊߘߊ߲߫߸ ߡߍ߲ ߠߎ߬ ߟߊߥߟߌ߬ߣߍ߲߫ ߘߋ߲ߡߌߛߍ߲ ߠߎ߬ ߤߊߞߟߌ ߡߊߞߊ߬ߝߏ ߡߊ߬߸ ߞߵߊ߬ߟߎ߬ ߛߋ߫ ߊ߬ߟߎ߫ ߖߘߍ߬ ߞߘߐ߫.
ߊ߬ߟߌ ߓߊߘߊ߬ߙߊ ߦߋ߫ ߞߏߢߊߓߐߟߊ ߟߋ߬ ߘߌ߫߸ ߊ߬ ߣߐ߬ ߟߊ߬ߞߐ߬ߟߌ߬ ߢߍߥߟߊ ߘߏ߫ ߟߋ߬ ߛߌ߰ ߟߊ߫ ߛߋ߲߬ߠߊ߫߸ ߡߍ߲ ߣߊ߲߬ߝߟߏ߬ߦߊ߬ߣߴߊ߬ ߖߍ߬ߘߍ ߓߟߏ߫߸ ߞߵߊ߬ ߦߌ߬ߘߊ߬ ߞߏ߫ ߊ߲ ߘߌ߫ ߛߋ߫ ߞߍ߫ ߟߊ߫ ߝߋ߲߫ ߘߌ߫ ߖߌ߬ߣߍ߬ ߞߣߐ߫ ߦߊ߲߬߸ ߊ߲ ߡߊ߫ ߥߊ߫ ߝߊ߲߬ ߛߌ߫، ߊ߬ ߟߊ߫ ߓߊ߯ߙߊ ߛߌ߰ߣߍ߲߫ ߞߏ ߡߍ߲ ߠߎ߬ ߞߊ߲߬߸ ߏ߬ ߟߎ߬ ߝߟߍ߫: ߞߊ߬ ߛߋ߫ ߘߋ߲ߡߌߛߍ߲߫ ߡߐ߰ ߅߀߀ ߟߊߞߐ߯ ߟߊ߫ ߞߊ߲ߞߊ߲߫ ߞߣߐ߫߸ ߞߊ߬ ߛߋ߫ ߡߊ߬ߘߍ߬ߡߍ߲߬ߠߌ߲ ߛߌߟߊ ߘߏ߫ ߟߎ߫ ߟߊߞߊ߬ ߟߊ߫ ߢߐ߲߯ߘߍߡߍ߲ ߞߣߐ߫߸ ߞߊ߬ ߓߊ߲߫ ߞߊ߬ ߜߊ߬ߛߊ ߘߏ߫ ߛߌ߰ ߛߋ߲߬ߠߊ߫ ߞߊ߬ ߛߎߘߊ߲ߓߊ߮ ߖߊ߲߬ߛߊ߫ ߞߐ߲ߘߐ߲߫ ߘߐߜߍ߫ ߟߊ߫.
ߊ߬ ߟߊ߫߫ ߞߎߡߊ ߡߊ߫ ߖߊ߲߰ߧߊ߫: <<ߊ߲ ߡߊ߲߫ ߞߊ߲߫ ߞߊ߬ ߕߏ߫ ߡߐ߱ ߟߎ߬ ߛߐ߫ ߟߊ߫ ߖߍ߮ ߟߊ߫ ߟߏ߲ ߓߍ߯ ߘߋ߬߸ ߊ߲ ߧߋ߫ ߛߴߊ߬ߟߎ߬ ߡߊߞߊ߬ߙߊ߲߬ߧߊ߬ ߟߊ߫ ߖߍ߯ ߡߌߘߊ ߟߋ߬ ߟߊ߫ ߡߎ߬ߕߎ߲߬.>> ߡߙߌߦߊ ߏ߬ ߟߋ ߣߐ߬ ߊ߬ߟߌ߫ ߓߊߘߊ߬ߙߊ ߞߐ߲ߘߍ߫ ߟߐ߬ ߟߊ߫ ߛߊ߲߬ߞߎ߲߬ߓߍ߲߬ ߞߏ ߦߟߍ߬ߡߊ߲߬ ߠߊ߫ ߓߊ߯ߙߊ߫ ߛߐߘߐ߲ ߘߌ߫ ߘߋ߲ߡߌߛߍ߲ ߠߎ߬ ߦߋ߫، ߦߊ߬ߣߴߊ߬ ߦߴߊ߬ ߞߍ߫ ߜߋߟߋ߲ߜߋߟߋ߲ߓߊ߫ ߛߊ߲ ߠߎ߬ ߘߌ߫߸ ߥߟߊ߫ ߝߙߎ߬ߝߙߎ߬ ߘߐ߬ߕߍ߮ ߟߎ߬ ߘߌ߫߸ ߞߏ߫ ߊ߬ ߦߋ߫ ߥߊߟߌߘߊ߫ ߡߊ߲ߞߊ߲ ߘߏ߫ ߟߊߘߊ߲߫ ߊ߬ ߟߊ߫ ߛߊ߲߬ߞߎ߲߲߬ߓߍ߲ ߣߌ߲߬ ߘߐ߫߸ ߞߊ߬ ߛߋ߫ ߔߏߔߏ߫ ߞߋߟߋ߲߫ ߘߌ߫ ߟߊ߫ ߛߎߘߊ߲ߓߊ߮ ߡߊ߬߸ ߔߏߔߏ ߏ߬ ߕߍ߫ ߞߍ߫ ߟߊ߫ ߣߋߥߏ߫ ߘߌ߫߸ ߊ߬ ߞߍߕߐ߫ ߔߏߔߏ߫ ߟߋ߬ ߘߌ߫߸ ߡߍ߲ ߘߌ߫ ߛߋ߫ ߞߍ߫ ߟߊ߫ ߥߊߟߌߥߊߟߌ ߘߌ߫߸ ߞߊ߬ ߓߊ߲߫ ߞߵߏ߬ ߕߌ߱ ߡߊߘߍ߬ߡߍ߲߬ ߞߵߊ߬ ߟߊߞߐ߯߸ ߞߊ߬ ߛߎ߲ߝߘߍ ߘߏ߫ ߟߎ߫ ߘߴߊ߬ ߡߊ߬߸ ߊ߬ ߘߌ߫ ߛߴߊ߬ ߟߊ߫ ߥߊߟߌߘߊ ߏ߬ ߡߊߡߙߊ߬ ߟߊ߫ ߡߍ߲ ߠߊ߫߸ ߞߵߊ߬ ߘߍ߬ߡߍ߲߬ ߞߊߙߏ߫ ߘߊ߲ߘߐ߫ ߢߐ߲߰ ߞߘߐ߫. ߣߴߊ߬ ߦߋ߫ ߘߊ߫ ߞߏ߫ ߊ߬ ߥߊ߫ ߢߊ ߞߊ߫ ߢߌ߲߬߸ ߊ߬ ߘߌ߫ ߔߏߔߏ߫ ߞߋߟߋ߲߫ ߟߊ߫ ߞߘߐ߬ߡߊ߲ ߏ߬ ߞߊ߲߬߸ ߞߵߏ߬ ߞߍ߫ ߘߋ߲ߡߌߛߍ߲ ߏ߬ ߡߊߘߍ߬ߡߍ߲ ߘߌ߫߸ ߊ߬ߟߋ ߘߴߊ߬ ߛߋ߲߬ߓߐ߫ ߡߎ߬ߕߎ߲߬ ߛߊ߫߸ ߞߵߊ߬ ߛߐ߬ߘߐ߲߬ ߤߊ߲ߞߟߌ ߓߘߊ߫ ߓߊ߲߫ ߟߊߞߐ߯ ߟߊ߫ ߣߊ߲߬ߝߟߏ߬ ߞߏ ߡߊ߬.
ߊ߬ ߟߊ߫ ߞߍߞߌߦߊ ߣߌ߲߬ ߛߎ߮ ߓߊ߯ ߛߌߦߊߦߊ߫ ߖߌ߬ߣߍ߬ ߞߣߐ߫߸ ߘߋ߲ߡߌߛߍ߲ ߠߎ߬ ߖߌ߱ ߘߌ߫ ߡߝߊ߫، ߓߊߏ߬߸ ߖߡߊ߬ߣߊ ߦߋ߫ ߓߟߏ ߡߍ߲ ߞߘߐ߫ ߣߌ߲߬߸ ߘߋ߲ߡߌߛߍ߲ ߓߍ߯ ߦߴߊ߬ ߛߐߙߐ߲߫ ߥߏ߫ ߢߌߣߌ߲ ߠߋ߬ ߟߊ߫߸ ߣߌ߫ ߖߘߍ߬ ߟߊ߬ߥߙߎߞߌ ߞߍߢߊ ߣߌ߲߬ ߛߋ߫ ߘߊ߫ ߟߊߥߙߊ߬ ߟߊ߫߸ ߏ߬ ߘߌ߫ ߣߊ߬ ߖߌ߰ߡߊ߬ߝߊ ߘߌ߫ ߥߏ߬ ߛߌߦߊߡߊ߲߫ ߠߊ߫.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
