ߛߏ߲߭ ߠߎ߬ ߦߋ߫ ߛߊ߲ߖߌ߫ ߣߊ߬ ߕߎߡߊ߫ ߏ߬ ߟߎ߫ ߟߋ߬ ߓߍ߲߬ߛߋ߲߬ߡߊ߫ ߕߣߐ߬ߓߐ߬ ߟߊ߫ ߛߐ߲߬.
ߒ߬ߓߊ߬ ߸ߡߊ߯ߡߎ߫ ߦߴߊ߬ ߕߊ߫ ߛߏ ߟߋ߬ ߘߌ߫ ߖߌ߬ߣߍ߬ ߞߣߐ߫ ߸
ߛߏ߲߬ߧߊ߬ߟߌ ߞߏߢߊ ߟߎ߬ ߦߋ߫ ߛߘߊ ߛߐ߬ߘߐ߲߬ ߠߊ߫ ߘߌ߲߬ߞߌߙߊ ߡߍ߲ ߘߐ߫ ߛߊ߬ߡߊ ߕߎ߬ߡߊ ߟߊ߫ ߛߐ߲߬ ߞߘߊߎ߫.
ߏ߬ ߓߟߏߡߊ߬ ߸ߛߏ߲߬ߧߊ߬ߟߌ ߞߍߣߍ߲߫ ߝߎ߲ߞߎ߲߫ ߛߘߍߡߊ߲߫ ߠߋ߬ ߟߊ߫ ߞߍ߲ߘߍߟߏ߲ ߛߎ ߘߐ߫ ߞߵߊ߬ ߘߎ߬ߛߊ ߜߍ߫ ߞߊ߯ߙߌ ߡߊ߬ ߂߀߂߅ ߞߊ߬ߙߌ߬ߝߐ ߕߟߋ߬ ߆ ߡߊ߬ ߊߟߑߡߊ߬ߡߌ߬ߦߊ߫ ߞߌ߲߬ߘߊ ߞߣߐ߫.
ߥߊߘߌ߫ ߛߘߍߡߊ߲߫ ߠߋ߬ ߕߊ߬ߣߍ߲߫ ߛߏ߲߬ߧߊ߬ߟߌ ߣߌ߲߬ ߘߐ߫ ߞߵߏ߬ ߟߊ߫ ߝߋ߲߫ ߡߐ߬ߟߐ߲߬ߡߊ߬ߓߊ ߘߏ߫ ߟߎ߫ ߞߊ߲߬.
ߘߊ߲߬ ߡߊ߫ ߞߍ߫ ߏ߬ ߘߐߙߐ߲߫ ߡߊ߬ ߘߋ߬ ߸ ߘߎ߬ߓߊ߬ߙߋ߲ ߣߌ߫ ߛߊ߲ߓߍ߲ ( ߔߟߊߝߐ߲) ߠߎ߬ ߕߌߢߍߣߍ߲߫ ߠߋ߬ ߖߊ߲߬ߖߏ߲ ߣߌ߲߬ ߘߐ߫…
ߌ ߖߍ߬ߘߍ߫ ߓߊ߯ ߛߋ߫ ߊ߬ ߘߌ߲߬ߞߌߙߊ ߘߐ߫ ߌߞߘߐ߫ ߸ ߌ ߘߴߊ߬ߟߎ߫ ߣߐ߭ ߦߋ߫ ߦߋ߲߬.
ߛߏ߲߬ߧߊ߬ߟߌ ߞߍߣߍ߲߫ ߝߎ߲ߞߎ߲߫ (߄) ߠߋ߬ ߟߊ߫ ߸ ߔߋߔߋ߫ ߞߊ߬ߟߋ߫ ߟߐ߯ߝߍ ߛߐ߲ߞߢߊ ߘߐ߫ ߛߌߟߘߊ ߝߍ߬ ߸ ߝߎ߲ߞߎ߲ ߏ߬ ߟߎ߬ ߓߍ߯ ߞߣߐ߫ ߝߋ߲ ߠߎ߬ ߕߊ߬ߣߍ߲߫ ߠߋ߬.
ߞߊߘߌߦߊߕߎ߬ ߖߊ߲ߟߏ߫ ߸ ߏ߬ ߡߍ߲ ߦߋ߫ ߡߊ߲߬ߕߙߐ߬ߓߊ߰ߕߐ ߟߎ߬ ߘߏ߫ ߘߌ߫ ߛߏ߲߬ߧߊ߬ߟߌ ߣߌ߲߬ ߘߐ߫ ߸ ߏ߬ ߞߵߊ߬ ߞߏߢߊ ߘߐ߬ߝߍ߬ߦߊ ߕߊ߲߬ ߘߐ߫ ߞߏ߫ : <<ߒ ߕߘߍ߬ ߒ ߞߐߛߊ߬ߦߌ߲߬ ߠߋ߬ ߟߊ߫ ߞߐߣߊߞߙߌ߫ ߸ ߘߊ߬ߡߊ߲߬ߛߊ߫ ߒ ߥߟߋ߫ ߘߊ߫ ߞߵߊ߬ ߝߐ߫ ߒ ߧߋ߫ ߞߏ߫ ߛߏ߲߭ ߠߎ߬ ߓߘߊ߫ ߒ ߠߊ߫ ߝߎ߲ߞߎ߲ ߞߍ߫ ߊ߬ߟߎ߫ ߛߊ߬ߥߏ ߘߌ߫ ߸ ߕߘߍ߫ ߒ ߠߊ߫ ߞߏ߲ߢߌ߲ ߦߋ߫ ߡߐ߱ ߡߍ߲ ߓߟߏ߫ ߸ ߒ ߞߵߏ߬ ߥߟߋ߫ ߜߋߟߋ߲ߜߋߟߋ߲ ߠߊ߫ ߌߞߘߐ߫ ߞߊ߬ ߕߊ߯ ߝߎ߲ߞߎ߲߫ ߘߊ ߟߊߞߊ߬ ߞߵߊ߬ ߘߐߜߍ߫.
ߒ߬ߓߊ߬ ߸ߡߐ߰ ߞߏߙߏ߲߫ ߢߌ߲߬ ߠߎ߫ ߣߐ߬ ߊ߬ߟߎ߬ ߜߊ߲߫ ߠߊ߫ ߓߏ߲ ߛߊ߲ߝߍ߬ ߟߋ߬ ߞߣߊ߬ ߕߏ߫ ߖߌ߰ ߟߴߊ߬ ߞߣߐ߫.
ߝߊ߰ߣߌ߲߬ ߘߊ߫ ߜߍߟߍ߲ ߠߎ߬ ߟߊߣߍ߲߫ ߕߘߍ߬ ߦߋ߫ ߘߎ߬ߡߊ߬ߝߍߙߍ߲߫ ߡߍ߲ ߘߐ߫ (ߝ߭ߌߕߑߙߌ߬) ߸ ߊ߬ߟߎ߫ ߞߵߏ߬ ߝߣߊ߫ ߘߐߕߋ߭ ߟߋ߬ ߞߊ߬ ߕߊ߯ ߊ߬ ߓߍ߯ ߘߌ߫߸ ߝߊ߰ߣߌ߲ ߏ߬ ߟߎ߬ ߡߍ߲ ߠߎ߬ ߘߏ߫ ߟߎ߫ ߡߐ߬ߟߐ߲ ߦߋ߫ ߓߍ߲߬ ߠߊ߫ ߆߀߀.߀߀߀ ߡߊ߬ ߞߊ߬ߣߌ߲߬.
ߓߊ߬ߙߌ߬ ߸ߊ߬ ߜߍ߬ߟߍ߲߬ߡߊ߲߫ ߠߴߊ߲ ߡߊ߬ ߕߋ߲߬ ߡߎߣߎ߲߬ ߸ߞߊ߬ ߛߋ߫ ߖߊ߬ߕߋ߬ߡߌߘߊ ߞߍ߫ ߟߊ߫ ߸ ߊ߬ߟߎ߫ ߣߐ߬ ߝߋ߲ ߡߍ߲ ߠߎ߬ ߕߊ߬ ߟߊ߫ ߞߊ߬ߣߌ߲߬ >>. ߞߊߘߌߦߊߕߎ߬ ߖߊ߲ߟߏ߫ ߟߋ߬ ߞߊ߲߫ ߕߋ߲߬.
ߊ߬ߟߎ߬ ߡߊ߫ ߤߌߣߊ߫ ߗߍߦߑߣߐ߬ ߓߊ ߟߊ߫ ߝߎ߲ߞߎ߲ ߠߊ߫ ߸ ߏ߬ ߡߍ߲ ߦߋ߫ ߡߊ߬ߟߏ ߣߌ߫ ߟߌߞߐ߯ ߝߙߋߟߊ ߘߌ߫.
<< ߏ߬ ߝߣߊ߫ ߓߣߐ߬ߣߍ߲߫ ߥߊߘߌ߫ ߘߍ߰ߜߍ ߟߋ߬ ߟߊ߫ ߸ߞߵߏ߬ ߟߴߊ߬ ߟߊ߫ ߕߟߋ߬ߓߊ߮ ߝߣߊ߫ ߞߊ߲߬ ߸ ߏ߬ ߟߎ߬ ߓߍ߯ ߓߘߊ߫ ߞߍ߫ ߛߊ߲߬ߘߊ ߘߌ߫ ߕߋ߲߬.
ߛߏ߲߭ ߢߌ߲߬ ߠߎ߬ ߦߴߊ߬ߟߎ߬ ߜߊ߲߫ ߠߊ߫ ߓߏ߲߫ ߛߊ߲ߝߍ߬ ߕߎ߬ߡߊ߫ ߡߍ߲ ߠߊ߫ ߞߣߊ߬ ߕߏ߫ ߖߌ߰ ߟߴߊ߬ ߞߣߐ߫ ߸ ߏ߬ ߞߵߊ߬ ߕߍ߬ߘߍ߫ ߟߋ߬ ߸ ߖߌ߬ߣߍ߬ ߕߊߡߊ߲ ߞߋ߲߬ߥߟߎ߬ ߥߙߐߥߌ߬ߟߊ߫ ߥߊ߯ ߗߡߍ߬ ߟߏ߯ߟߎ߫ (߇.߅߀߀.߀߀߀) ߟߋ߬ ߕߍ߬ߘߍ߫ ߦߋ߲߬ ߊ߬ ߣߌ߫ ߘߏ߫. ߓߊ߬ߙߌ߬ ߥߊߦߌߞߊ߫….
ߊ߬ ߓߍ߯ ߕߴߏ߬ ߘߌ߫ ߘߋ߬ ߸ ߊ߬ߟߎ߫ ߞߵߊ߬ߟߎ߬ ߜߊ߲߫ ߓߏ߲߫ ߦߙߐ ߡߍ߲ ߘߐ߫ ߞߊ߬ ߖߌ߰߸ ߛߊ߲ߖߌ ߝߣߊ߫ ߘߏ߲߬ߣߍ߲߫ ߦߋ߲߬ ߠߋ߬ ߞߊ߬ ߒ ߠߊ߫ ߓߣߐ߬ ߡߊ߬ߟߏ ߣߌ߫ ߟߌߞߐ߯ ߓߘߐ߫ ߛߘߍߡߊ߲߫ ߠߊ߫.
ߊ߲ ߧߴߊ߬ ߢߌߣߌ߲߫ ߠߊ߫ ߝߊ߰ߡߊ ߟߎ߬ ߝߍ߬ ߸ ߊ߬ ߕߌ߯ߕߌ߯ ߟߊ߬ߞߊ߲߬ߘߊ߬ߟߌ߬ ߝߊ߲ߞߊ ߟߎ߬ ߸ ߞߊ߬ ߘߎ߰ߘߋ߲ ߠߎ߬ ߟߊߞߊ߲ߘߊ߫ >> ߗߍߙߑߣߐ߬ ߓߊ ߟߋ߬ ߞߊ߲߫ ߕߋ߲߬.
ߛߍ߲߬ߛߍ߲߬ߠߌ߲ ߘߏ߫ ߞߐ߬ߣߌ߲߫ ߓߘߊ߫ ߛߌ߰ ߛߋ߲߬ ߠߊ߫ ߕߋ߲߬، ߖߐ߲߰ߛߊ߫ ߞߊ߬ ߛߋ߫ ߘߍߘߍߟߌߟߊ ߏ߬ ߟߎ߬ ߡߌ߬ߘߊ߬ ߟߊ߫.
ߡߊ߯ߡߎ߫ ߛߏ ߞߣߐߟߊ ߦߋ߫ ߦߙߐ߫ ߡߍ߲ ߘߐ߫ ߕߋ߲߬ ߸ ߘߎ߰ߘߋ߲ ߠߎ߬ ߓߘߊ߫ ߦߌߟߊ߲ߦߌߟߊ߲ ߘߊߡߌ߬ߣߊ߬ ߞߵߊ߬ ߓߍ߲߬ ߟߊ߬ߞߊ߲߬ߘߊ߬ߟߌ߬ߓߊ߬ߟߌ߬ߦߊ ߞߏ ߡߊ߬.
ߓߊߏ߬ ߝߎ߲ߞߎ߲ߕߌ߮ ߟߎ߬ ߦߋ߫ ߛߌߟߊ߲߫ ߠߊ߫ ߛߏ߲߬ߧߊ߬ߟߌ ߢߍ߫ ߟߋ߬ ߕߋ߲߬ ߞߏߛߓߍ߫.
ߣߊߡߊ߲߬ߖߊ߲߫ ߡߐ߰ߟߊ߲߬ߘߌ߫ ߡߊ߰ߛߎ߬ߓߊ߬ ߓߟߏ߫
