ߓߌ߬ ߓߌߟߏ߲ ߛߐ߱ ߣߌ߲߬ ߡߊ߬߸ ߂߀߂߅ ߞߏߟߌ߲ߞߏߟߌ߲ ߕߟߋ߬ ߁߁߸ ߕߊ ߟߋ߬ ߥߟߌ߬ ߘߊ߫ ߥߊߟߌߝߊ߫ ߓߙߋߡߊ߬ ߞߡߊ߬ߙߊ߬ ߟߊ߫ ߓߏ߲ ߠߊ߫߸ ߊ߬ߟߋ ߡߍ߲ ߦߋ߫ ߒߞߏ ߞߊߙߊ߲ߕߊ߫ ߒߝߊ߲߬ߘߋ߲߬ߡߏߙߌ߫ ߞߡߊ߬ߙߊ߬ ߛߌ߲ߘߌߓߊ߮ ߘߌ߫، ߕߊ ߣߌ߲߬ ߓߐ߫ ߢߊ߫ ߖߐ߲ߖߐ߲߫ ߟߐ߲ߣߍ߲߫ ߕߍ߫߸ ߤߊߟߌ߬ ߣߴߊ߬ ߦߋ߫ ߛߐ߬ߘߐ߲߬ ߞߏ߫ ߡߐ߰ ߛߌߦߊߡߊ߲߫ ߛߌߞߊߣߍ߲߫ ߢߎߡߍ߫ ߞߏ ߟߋ߬ ߡߊ߬، ߕߊߓߐ ߣߌ߲߬ ߞߍ߫ ߘߊ߫ ߕߙߎ߬ ߘߌ߫ ߞߊ߬ ߕߌߢߍߟߌ߫ ߛߌߦߊߡߊ߲߫ ߠߋ߬ ߞߍ߫ ߓߟߏߝߋ߲߫ ߞߎ߲ߘߊ߫߸ ߡߍ߲ ߓߘߊ߫ ߘߋ߲ߓߦߊ ߣߌ߲߬ ߓߌ߬ߟߊ߫ ߛߎ߬ߣߎ߲ ߘߝߊߣߍ߲ ߘߐ߫ ߕߋ߲߬.
ߓߌ߬ ߓߌߟߏ߲ ߣߌ߲߬ ߛߐ߰ߡߊ߬ߘߊ ߟߊ߫߸ ߕߊ ߟߋ߬ ߥߟߌ߬ ߘߊ߫ ߓߙߋߡߊ߬ ߞߡߊ߬ߙߊ߬ ߟߊ߫ ߟߎ ߡߊ߬ ߓߎ߬ߙߋ߬ ߓߎߞߊߙߌߦߊ߫، ߊ߬ߟߋ ߡߍ߲ ߛߏ߬ߙߌ߬ ߘߊ߫ ߕߊ߯ ߟߊ߫ ߓߊ߯ߙߊ߫ ߦߌߟߊ ߛߐ߱ߡߊ߬߸ ߥߊߟߌߝߊ ߣߌ߲߬ ߞߵߊ߬ ߦߌ߬ߘߊ߬ ߞߏ߫ ߊ߬ ߓߐ߫ ߘߊ߫ ߟߎ ߡߊ߬ ߆ߙߋ߲ ߠߋ߬ ߡߊ߬، ߕߎ߬ߡߊ߬ߙߋ߲߫ ߝߌ߬ߟߊ߫ ߏ߬ ߞߐߝߍ߬߸ ߊ߬ ߟߊ߫ ߜߋߟߋ߲ߜߋߟߋ߲ ߞߊ߬ߛߌ߬ ߘߊ߫: ߊ߬ ߝߐ߫ ߘߴߊ߬ ߦߌ߫ ߞߏ߫ ߕߊ ߓߘߊ߫ ߓߐ߫ ߊ߬ ߟߊ߫ ߟߎ ߡߊ߬، <<߈ߙߋ߲ ߠߋ߬ ߡߊ߬߸ ߊ߬ߟߎ߫ ߞߊ߬ ߒ ߞߟߌ߫ ߞߏ߫ ߕߊ ߓߘߊ߫ ߒ ߠߊ߫ ߓߏ߲ ߡߌ߬ߣߊ߬، ߒ ߣߊ߬ ߢߊ ߟߋ߬ ߞߍߣߴߏ߬ ߘߌ߫ ߞߊߟߌߦߊ߫ ߓߟߏ ߡߊ߬.>>
ߊ߬ ߣߊ߭ ߟߎ ߡߊ߬߸ ߊ߬ ߞߵߊ߬ ߛߐ߬ߘߐ߲߬ ߛߌ߰ߢߐ߲߮ ߠߎ߬ ߓߘߊ߫ ߕߊ ߟߊߛߊ߬، ߕߊ ߘߌ߯ ߘߴߊ߬ ߖߍ߬ߘߍ ߛߌ߬ߓߏ߲ ߠߋ߬ ߟߊ߫ ߓߘߍߞߍ߭، ߛߙߋ߫ ߞߎ߲߬ߝߟߐ ߟߎ߬ ߟߊ߫ ߝߐߟߌ߫ ߘߐ߫߸ ߡߍ߲ ߠߎ߬ ߕߘߍ߬ ߕߊߓߐ߫ ߘߌ߲ߞߌߙߊ ߘߐ߫ ߦߋ߲߬߸ ߏ߬ ߟߎ߫ ߞߊ߬ ߕߊߓߐ ߣߌ߲߬ ߟߊ߫ ߢߎߡߍ߫ ߞߏ ߟߋ߬ ߞߎ߲߬، <<ߊ߬ߟߎ߫ ߞߵߊ߬ ߦߌ߬ߘߊ߬ ߒ ߠߊ߫ ߞߏ߫ ߕߊߓߐ ߣߌ߲߬ ߞߎ߲߭ ߞߍߣߍ߲߫ ߢߎߡߍ ߟߋ߬ ߘߌ߫ (ߞߎ߬ߙߊ߲߬ߓߊ)߸ ߓߊ߬ߙߌ߬ ߝߐߟߌ ߘߏ߫ ߟߎ߫ ߦߴߊ߬ ߦߌ߬ߘߊ߬ ߟߊ߫ ߞߏ߫ ߢߎߡߍ ߏ߬ ߥߊ߫ ߘߊ߫ ߆ߙߋ߲ ߣߌ߫ ߇ߙߋ߲ ߕߍߟߊ ߟߋ߬ ߘߐ߫߸ ߕߊ ߘߏ߲߬ ߥߟߌ߬ ߘߊ߫ ߈ߙߋ߲ ߠߋ߬ ߡߊ߬>> ߦߙߐ ߏ߬ ߟߋ ߘߐߝߌ߲߬ߣߍ߲߬ ߛߍߣߍ߲߬ߛߊ߫.
ߕߊߓߐ ߣߌ߲߬ ߘߐ߫߸ ߌߞߏߡߌ߲߬ ߓߏ߲ ߦߋ߫ ߘߏ߯ߘߏ߮ ߟߋ߬ ߘߐ߫ ߝߊߦߌߘߊ߫߸ ߞߣߍߡߊ߫ ߡߐ߮ ߟߎ߬ ߡߊ߫ ߕߊߓߐ ߣߌ߲߬ ߞߙߐ߬ߛߌ߬ ߞߊߟߌߦߊ߫ ߘߐ߫، ߛߌ߰ߢߐ߲߮ ߠߎ߬ ߟߋ߬ ߣߊ߬ ߘߊ߫ ߟߊ߬ߟߐ߲߬ߠߌ߲߬ߠߌ߲ ߞߍ߫߸ ߞߏ߫ ߕߊ ߓߘߊ߫ ߓߏ߲ ߡߌ߬ߣߊ߬߸ ߊ߬ߟߎ߫ ߝߙߊ߬ ߢߊ ߟߋ߬ ߞߍߣߍ߲߫ ߢߐ߲߮ ߞߊ߲߬ ߏ߬ ߘߌ߫ ߞߊ߬ ߕߊ ߟߊߛߊ߬߸ ߤߊ߲߯ ߕߌߢߍߟߌ ߡߊ߫ ߓߏ߲ ߕߐ߭ ߟߎ߬ ߟߊߛߐ߬ߘߐ߲߬߸ ߊ߬ ߘߊ߲߬ ߘߊ߫ ߞߋߟߋ߲߫ ߡߊ߬.
ߓߊ߬ߙߌ߬߸ ߗߍ߭ ߖߍ߬ߘߍ ߛߌ߬ߓߏ߲ ߓߊ߬ <<ߝߏߦߌ߬ ߡߊ߫ ߓߐ߫، ߊ߬ ߓߍ߯ ߖߋ߬ߣߌ߲߬ ߘߊ߫ ߟߋ߬، ߝߏ߫ ߒ ߣߌ߫ ߝߊ߰ߣߌ߲ ߡߍ߲ ߕߘߍ߬ ߓߊ߯ߙߊ߫ ߦߌߟߊ.>> ߓߙߋߡߊ߬ ߞߡߊ߬ߙߊ߫ ߞߵߏ߬ ߟߋ ߝߐ߫ ߛߎ߬ߣߎ߲ ߣߌ߫ ߞߣߐ߬ߘߐ߬ߝߟߌ ߘߐ߫، ߤߊߟߵߊ߬ ߡߏ߬ߛߏ߸ ߕߊߓߐ ߞߵߏ߬ ߛߐ߬ߘߐ߲߬ ߟߐ߯ߝߍ ߟߋ߬ ߘߐ߫߸ ߏ߬ ߝߣߊ߫ ߟߊ߫ ߝߋ߲߫ ߛߌ߫ ߡߊ߫ ߓߐ߫، <<ߊ߬ߟߋ ߝߣߊ߫ ߓߊ߬߸ ߝߏ߫ ߊ߬ ߟߊ߫ ߝߊ߰ߣߌ߲ ߡߍ߲ ߕߍ߬ߘߴߊ߬ ߝߊ߬ߘߌ ߡߊ߬.>>
ߕߊߓߐ ߣߌ߲߬ ߕߌߢߍߟߌ ߥߙߊ߬ߣߍ߲߬ ߞߏߛߓߍ߫߸ ߊ߬ ߖߊ߬ߕߋ߬ ߟߊߕߍ߰ߣߍ߲߬ ߡߊ߫ ߟߐ߲߫ ߊ߲ ߓߟߏ߫ ߡߎߣߎ߲߬، ߓߊ߬ߙߌ߬߸ ߊ߬ ߦߌ߬ߘߊ߬ߣߍ߲߬ ߞߏ߫ ߥߊߘߌ߫ ߜߍ ߡߍ߲ ߕߏߣߴߊ߬ ߘߐ߫߸ ߣߴߊ߬ ߖߊ߬ߕߋ ߟߐ߲ߣߍ߲߫߸ ߏ߬ ߘߌ߫ ߞߋ߲߬ߥߟߎ߫ ߡߎ߬ߥߊ߲߬ ߓߐ߫߸ ߒߞߏ ߞߝߊ߫ ߗߍ߬ߡߍ߫ ߝߌ߬ߟߊ߫ ߢߐ߲߰߸ ߏ߬ ߟߎ߫ ߖߋ߬ߣߌ߲߬ ߘߊ߫ ߟߋ߬ ߞߎߙߍ߫ <<ߝߋ߲߫ ߛߌ߫ ߕߘߍ߬ ߓߏ߲ ߞߣߐ߫߸ ߊ߬ ߓߍ߯ ߟߋ߬ ߖߋ߬ߣߌ߲߬ ߘߊ߫.>>
ߕߋ߲߭ߕߋ߲߭ ߣߌ߲߬ ߘߐ߫߸ ߓߍ߯ ߦߋ߫ ߞߐߙߍ ߢߌ߲߬ ߠߎ߬ ߞߟߌ ߟߋ߬ ߞߊ߲߬ ߞߵߊ߬ߟߎ߫ ߡߊ߬ߤߌ߬ߣߊ߬ ߟߊߡߌ߬ߣߊ߬߸ ߦߊ߬ߣߌ߫ ߕߌߢߍߟߌ߫ ߞߍߣߐ ߓߍ߯ ߖߊ߬ߕߋ ߓߊ߲ߕߐ߫ ߟߐ߲߫ ߠߊ߫، ߊ߬ ߞߏ߬ߣߌ߲߸ ߡߊ߬ߞߏ ߦߋ߫ ߡߊ߬ߜߍ߲ ߠߊ߫߸ ߊ߬ ߣߌ߫ ߘߍ߬ߡߍ߲ ߠߊ߫߸ ߞߵߊ߬ ߓߍ߲߬ ߡߐ߰ߦߊ ߕߌ߲߭ ߡߊ߬.
ߟߏ߲ߞߊߛߌߦߊ߫ ߞߡߊ߬ߙߊ߬ ߓߟߏ߫߸ ߛߌߟߊߓߐߛߐ߯ߣߊ߫ ߝߐ߰ߓߍ߬ߘߊ ߦߋ߫.
