ߘߊ߲߭ߓߊ߬ ߞߐ߲ߘߍ߫ ߦߋ߫ ߡߛߏ߬ ߞߣߐߡߊ߫ ߞߊߙߏ߫ ߞߐ߬ߣߐ߲߬ߘߐ ߟߋ߬ ߘߌ߫߸ ߏ߬ ߛߐ߰ ߘߴߊ߬ ߞߣߐ ߘߐ߫ ߡߎ߬ߙߎ ߟߊ߫ ߞߐ߬ߟߏ߲߸ ߂߀߂߆ ߕߎߟߊߝߌ߲ ߕߟߋ߬ ߈ ߡߊ߬߸ ߊ߬ ߟߊ߫ ߟߎ ߞߣߐ߫ ߛߍ߲߬ߞߍ߬ߝߙߊ߫߸ ߞߊ߲ߞߊ߲߫ ߛߏ ߞߣߐ߫، ߛߌߞߊ߫ ߞߍߣߍ߲߫ ߡߍ߲ ߡߊ߬߸ ߏ߬ ߟߋ ߖߐ߯ߙߊ߲ߞߊߣߌ߲߫ ߖߊ߬ߞߌ߬ߕߋ߬ ߘߌ߫߸ ߊ߬ ߗߍ߬ ߖߋ߬ߕߌ߰ߡߛߏ߫ ߟߵߏ߬ ߘߌ߫߸ ߏ߬ ߖߍ߬ߘߍ ߓߘߊ߫ ߛߋ߫ ߝߊ߰ߡߊ ߟߎ߬ ߕߊ߫ ߓߟߏ ߡߊ߬ ߕߋ߲߬߸ ߊ߬ ߦߋ߫ ߟߊ߬ߡߙߊ ߘߐ߫ ߞߊ߲ߞߊ߲߫ ߥߛߎߖߌ߲ߓߊ ߟߊ߫ ߕߋ߲߬، ߘߊ߲߭ߓߊ߬ ߞߐ߲ߘߍ߫ ߛߐ߱ ߊ߬ ߞߣߐ ߘߐ߫߸ ߊ߬ ߖߐߞߌ߫ ߘߊ߫߸ ߞߏ߫ ߡߴߊ߬ ߣߌ ߛߐ߬ߘߐ߲߬߸ ߒ߬ߞߵߊ߬ ߢߋ߬ߟߋ ߟߋ߬ ߡߊ߫ ߛߋ߫ ߓߐ߫ ߟߴߊ߬ ߘߐ߫ ߘߐ߬ߓߛߏ߬ߟߌ ߞߐߝߍ߬.
ߊ߲ ߣߐ߬ ߟߌ߬ߤߟߊ ߡߍ߲ ߛߐ߬ߘߐ߲߬ ߠߊ߫ ߓߌߟߏ߲ ߢߌ߲߬ ߡߊ߬߸ ߕߎߟߊߝߌ߲ ߕߟߋ߬ ߁߀߸ ߞߊ߬ ߝߘߊ߫ ߞߕߌ ߝߊ߰ߡߊ ߟߎ߬ ߟߊ߫߸ ߓߌ߬ߟߊ߬ ߞߍߣߍ߲߫ ߖߐ߯ߙߊ߲ߞߊߣߌ߲߫ ߖߊ߬ߞߌ߬ߕߋ߬ ߞߐ߫ ߛߊ߬ߙߌ߬ߦߊ߬ ߓߟߏ߫߸ ߞߊ߬ ߓߍ߲߬ <<ߞߘߎ߬ߟߌ ߣߌ߫ ߡߊ߬ߘߌ߬ߡߌ߲߬ߠߌ߲ ߟߊ߬ߥߟߌߒߡߊ߭ ߡߍ߲ ߞߐߝߟߌ ߞߍߣߍ߲߫ ߢߋ߬ߟߋ ߘߏ߫ ߟߊ߫ ߛߊ߬ߦߊ ߘߌ߫.>>
ߊ߲ ߠߊ߫ ߓߐߛߎ߲ ߞߵߊ߬ ߦߌ߬ߘߴߊ߲ ߠߊ߫ ߞߏ߫ <<ߛߌߞߊ߫ ߞߍߣߍ߲߫ ߡߏ߬ߛߏ ߡߍ߲ ߡߊ߬ ߘߊ߲߭ߓߊ߬ ߞߐ߲ߘߍ߫ ߛߐ߰ ߞߏ ߘߐ߫ ߣߌ߲߬߸ ߣߴߊ߬ ߦߌ߬ߘߊ߬ߣߍ߲߬ ߞߏ߫ ߕߐ߯ ߟߋ߬ ߖߐ߯ߙߊ߲ߞߊߣߌ߲߫ ߖߊ߬ߞߌ߬ߕߋ߬ ߘߌ߫߸ ߊ߬ ߓߘߊ߫ ߓߌ߬ߟߊ߬ ߟߊ߬ߡߙߊ ߘߐ߫ ߥߛߎ ߘߐ߫߸ ߦߊ߬ߣߌ߫ ߞߕߌߝߘߋ ߟߎ߫ ߣߊ߬ߕߐ߫ ߞߊ߬ ߓߐ߫ ߊ߬ߟߎ߬ ߟߊ߫ ߞߕߌ߫ ߓߟߏߞߓߊ ߟߊ߫.>> ߓߐߛߎ߲ ߞߵߊ߬ ߟߴߊ߬ ߟߊ߫ ߞߎߡߊ ߞߊ߲߬ ߌߞߐ߫߸ ߞߏ <<ߊ߬ ߘߌߣߊ߬ ߞߕߌ߫ ߦߏ߫ ߛߊ߬ߙߌ߬ߦߊ߫ ߞߵߊ߬ ߝߐ߫ ߢߊ ߡߍ߲ ߡߊ߬.>>
ߊߟߎ߫ ߦߴߊ߬ ߟߐ߲߫߸ ߊ߲ ߞߊ߬ ߟߌ߬ߤߟߊ߬ ߝߟߐ ߡߍ߲ ߛߐ߬ߘߐ߲߫ ߣߌ߲߬ ߞߏ ߞߊ߲߬ ߞߎߣߎ߲ߟߏ߲߸ ߕߎߟߊߝߌ߲ ߕߋ߬ߟߋ߫ ߉ ߡߊ߬߸ ߢߊߢߌߣߌ߲ߠߌ߲ ߞߊ߬ ߞߏߢߊ ߣߌ߲߬ ߘߎ߰ߙߋ߲߬ߧߊ ߘߏ߫ ߟߎ߫ ߟߊߓߐ߫߸ ߡߍ߲ ߕߊ߬ߡߌ߲߬ ߘߊ߫ ߛߐ߰ߟߌ ߢߍ߫.
ߕߍ߮ ߞߍ ߡߍ߲ ߞߍ߫ ߘߊ߫ ߖߐ߯ߙߊ߲ߞߊߣߌ߲߫ ߖߊ߬ߞߌ߬ߕߋ߬ ߘߐ߫߸ ߊ߬ ߞߵߊ߬ ߦߌ߬ߘߴߊ߬ ߘߊߘߐߢߌ߬ߣߌ߲߬ߞߊ߬ ߕߎߡߊ ߟߊ߫ ߞߏ߫ ߘߊ߲߭ߓߊ߬ ߞߐ߲ߘߍ߫ ߞߵߊ߬ߟߋ߫ ߣߊ߬ߣߌ߲߫ ߠߋ߬ ߊ߬ߟߎ߬ ߟߊ߫ ߜߋߟߋ߲ߜߋߟߋ߲߫ ߠߊ߫ ߞߎߡߊ ߘߏ߫ ߘߐ߫، ߓߊߏ߬߸ ߘߊ߲߭ߓߊ߬ ߞߵߊ߬ ߝߐ߫ ߊ߬ߟߋ߫ ߡߊ߬ ߞߏ߫ ߊ߬ <<ߛߎ߲ߞߎߘߎ߲ߓߊ>>߸ ߏ߬ ߟߋ ߡߊ߫ ߓߍ߲߬ ߖߐ߯ߙߊ߲ߞߊߣߌ߲߫ ߡߊ߬ ߝߋߎ߫.
ߒ߬ߓߊ߬߸ ߞߎߡߊ ߏ߬ ߟߋ ߞߐ ߘߐ߫߸ ߖߐ߯ߙߊ߲ߞߊߣߌ߲߫ ߥߟߌ߬ ߘߊ߫ ߞߊ߬ ߥߊ߫ ߘߊ߲߭ߓߊ߬ ߞߐ߲ߘߍ߫ ߟߎ߫ ߓߘߊ߸ ߞߵߊ߬ ߛߐ߰ ߊ߬ ߞߣߐ ߘߐ߫ ߡߎ߬ߙߎ ߟߊ߫.
ߞߵߊ߬ ߛߐ߬ߘߐ߲߬ ߊ߬ ߞߣߐߡߊ ߦߋ߫߸ ߊ߬ ߕߊ߬ ߢߊ ߟߋ߬ ߞߍߣߴߏ߬ ߘߌ߫ ߞߊ߬ ߥߴߊ߬ ߘߌ߫ ߘߊ߲ߘߊߛߏ ߟߊ߫߸ ߏ߬ ߟߎ߫ ߞߵߊ߬ ߘߐߓߛߏ߫، ߊ߬ߟߋ ߛߋ߫ ߘߊ߫ ߡߞߊߘߊ߲߫ ߠߊ߫߸ ߓߊ߬ߙߵߊ߬ ߘߋ߲ ߡߊ߫ ߛߋ߫ ߡߞߊߘߊ߲߫ ߠߊ߫߸ ߏ߬ ߕߏ߫ ߘߴߊ߬ ߘߐ߫ ߟߋ߬.
ߘߊ߲߭ߓߊ߬ ߞߐ߲ߘߎ߫ ߛߐ߬ߘߐ߲߬ ߠߊ ߟߊ߫ ߞߎߡߊ߫ ߘߐ߫ ߒ߬ ߧߋ߫ ߘߊ߲ߘߊߛߏ ߟߊ߫߸ ߊ߬ ߞߵߊ߬ ߦߌ߬ߘߊ߬ ߞߏ߫ ߊ߬ ߡߴߊ߬ ߟߐ߲߫ ߞߏ ߡߍ߲ ߞߍߣߍ߲߫ ߣߌ߲߬ ߛߓߊߓߎ ߘߌ߫.
ߝߊ߲ߕߊ߬ ߞߐ߲ߘߍ߫ ߞߵߊ߬ ߦߌ߬ߘߊ߫ ߏ߬ ߟߋ ߘߐ߫ ߞߏ߫: <<ߒ ߕߏߣߍ߲߫ ߟߎ ߡߊ߬ ߟߋ߬߸ ߊ߬ ߣߊ߬ ߘߊ߫ ߝߐ߫ ߒ ߧߋ߫ ߞߏ߫ ߒ ߘߋ߲ߡߛߏ߫ ߗߍ߬ ߖߋ߬ߕߌ߰ߡߛߏ߬ ߓߘߴߊ߬ ߛߐ߰ ߡߎ߬ߙߎ ߟߊ߫، ߊ߬ ߖߋ߬ߕߌ߰ߡߛߏ߫ ߟߋ߬߸ ߊ߬ ߝߊ߲߭ ߺ ߊ ߺ ߝߊ߲߬ ߦߋ߫߸ ߊ߬ߟߎ ߟߋ߬ ߞߵߏ߬ ߟߐ߲߫߸ ߒߠߋ ߡߴߏ߬ ߟߐ߲߫، ߞߎ߲߬ ߞߋߟߋ߲ ߡߍ߲ ߦߴߊ߬ ߟߊ߫߸ ߊ߲ ߡߴߏ߬ ߟߐ߲߫. ߘߋ߲ߡߛߏ ߡߍ߲ ߦߋ߫߸ ߒ ߘߋ߲ ߡߴߊ߬ ߟߐ߲߫߸ ߊ߬ ߡߴߊ߬ ߓߘߊ߫ ߟߐ߲߫.>>
ߡߍ߲ ߓߍ߲߬ߣߍ߲߫ ߛߊ߬ߙߌ߬ߦߊ߬ ߞߏ ߡߊ߬߸ ߡߛߏ߬ߞߘߐ ߞߵߊ߬ ߦߌ߬ߘߊ߬ ߞߏ߫ ߊ߬ߟߋ ߛߋ߲߬ ߕߍ߫ ߛߊ߬ߙߌ߬ߦߊ߬ ߞߏ ߘߐ߫߸ ߣߴߊ߬ߟߋ ߘߋ߲ ߢߌ߬ߡߊ߬ ߓߘߊ߫ ߟߊߛߊ߬ߦߌ߲߫ ߊ߬ ߡߊ߬߸ ߏ߬ ߟߋ ߊߟߊ߫ ߕߊ߲ߘߏ ߘߌ߫، ߛߊ߬ߙߌ߬ߦߊ߬ ߞߏ ߦߴߊ߬ ߗߍ߬ ߟߎ߫ ߟߋ߬ ߓߟߏ߫.
ߊ߲ ߞߏ߬ߣߌ߲ ߡߊ߫ ߘߋ߲ߡߛߏ ߗߍ߬ ߟߌ߬ߤߟߊ߬ ߞߋߟߋ߲߫ ߛߌ߫ ߟߐ߲߫ ߣߌ߲߬ ߞߏ ߘߐ߫ ߡߎߣߎ߲߬، ߓߊߏ߬߸ ߊ߲ ߞߵߊ߬ ߡߍ߲߫ ߞߏ߫ ߊ߬ ߣߌ߫ ߡߐ߱ ߘߏ߫ ߞߎߡߊ߫ ߘߊ߫ ߜߋߟߋ߲ߜߋߟߋ߲ ߠߊ߫߸ ߏ߬ ߞߍߣߍ߲߫ ߦߏ߫ ߟߊ߬ߝߛߊ߬ߟߌ߬ߟߊ߫، ߞߊ߬ߦߌ߯ ߊ߬ ߓߐ߫ ߘߊ߫ ߟߎ ߡߊ߬ ߕߎ߬ߡߊ ߏ߬ ߟߊ߫߸ ߤߊ߲߯ ߞߵߊ߬ ߛߋ߫ ߣߌ߲߬ ߢߊߝߐ߫ ߕߎߡߊ ߡߵߊ߲ ߓߟߏ߫߸ ߊ߬ ߟߌ߬ߤߟߊ߬ ߞߋߟߋ߲߫ ߟߐ߲ߣߍ߲߫ ߕߍ߫ ߊ߲ߠߎ߬ ߓߟߏ߫ ߡߎߣߎ߲߬.
ߊ߬ ߞߏ߬ߣߌ߲߸ ߖߐ߯ߙߊ߲ߞߊߣߌ߲߫ ߖߊ߬ߞߌ߬ߕߋ߬ ߦߋ߫ ߞߊ߲ߞߊ߲߫ ߥߛߎߖߌ߲ߓߊ ߟߊ߫ ߡߎߣߎ߲߬߸ ߦߊ߬ߣߴߊ߬ ߟߊ߫ ߞߏ ߓߊ߲ߕߐ߫ ߢߊߓߐ߫ ߟߊ߫ ߛߊ߬ߙߌ߬ߦߊ߬ ߓߟߏ߫.
