ߊ߬ ߡߊ߫ ߡߍ߲߫ ߡߎߣߎ߲߬߸ ߞߌ߲߬ߕߌ߬ߢߊ߲߬ ߞߍ߫ ߘߊ߫ ߡߙߊ߬ߘߊ߬ߓߊ ߘߌ߫، ߒ߬ߓߊ߬߸ ߞߌ߲߬ߕߌ߬ߢߊ߲߬ߞߊ ߟߎ߬ ߓߐ߫ ߘߊ߫ ߟߋ߬ ߞߐ߬ߟߏ߲ ߂߀߂߆ ߕߎߟߊߝߌ߲ ߕߟߋ߬ ߁߅ ߡߊ߬߸ ߞߵߊ߬ߟߎ߬ ߟߊ߫ ߛߍߥߊ ߦߌ߬ߘߊ߫߸ ߞߵߊ߬ߟߎ߬ ߟߊ߫ ߞߏߢߌߡߊߟߐ߲ ߦߌ߬ߘߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫߸ ߏ߬ ߡߍ߲ ߞߊ߬ ߡߙߌߦߊ߫ ߛߊߣߌ߲߫ ߕߊ߬ ߞߵߊ߬ߟߎ߫ ߝߊ߬ߛߏ ߞߍ߫ ߡߙߊ߬ߘߊ߬ߓߊ ߘߌ߫، ߊ߬ߟߎ߫ ߞߵߊ߬ ߦߌ߬ߘߊ߬ ߞߏ߫ ߏ߬ ߞߏ ߕߍ߫ ߓߐ߫ ߊ߬ߟߎ߬ ߦߟߌ߫ ߟߊ߫ ߡߎ߰ߡߍ߫߸ ߓߊߏ߬߸ ߊ߬ ߞߍߣߍ߲߫ ߞߏߓߊ߫ ߟߋ߬ ߘߌ߫ ߡߊ߬ߡߙߊ߬ߟߌ ߞߍߢߊ ߘߐ߫߸ ߊ߬ ߣߌ߫ ߛߏ ߟߊߥߙߎߞߌ ߛߌߟߊ ߘߐ߫.

ߊ߬ߟߎ߬ ߟߊ߫ ߕߏ߬ߟߊ߲߬ߕߊ߲߬ ߓߙߊ ߡߍ߲ ߕߐ߯ ߞߏ߫ ߘߎ߬ߛߎ ߓߊ߬ߛߌ߫ ߞߡߊ߬ߙߊ߬߸ ߖߊ߲߬ߖߏ߲ ߣߌ߲߬ ߞߍ߫ ߘߊ߫ ߦߋ߲߬ ߠߋ߬߸ ߛߍߍߥߊ ߣߌ߫ ߢߊ߯ߟߋ߲ ߘߝߊߣߍ߲ ߘߐ߫߸ ߓߊߘߋ߲ߧߊ ߣߌ߫ ߓߍ߲߭ ߞߣߐߡߊ߬، ߏ߬ ߟߋ ߓߍ߲߬ߒ߬ߛߋ߲߬ߡߊ ߞߏߛߐ߲߬߸ ߓߎ߬ߙߋ߬ߞߊ߬ߘߋ߲ ߠߎ߬ ߛߋ߫ ߘߊ߫ ߣߛߌ߬ ߉߆ ߟߊߓߐ߫ ߟߊ߫߸ ߞߵߏ߬ ߞߍ߫ ߛߘߊߞߊ ߘߌ߫ ߛߍߥߓߊ ߢߌ߲߬ ߘߐ߫.

ߣߌ߲߬ ߞߍ߫ ߘߊ߫ ߓߍ߲߬ߒ߬ߛߋ߲߬ߡߊ߬ ߝߣߊ߫ ߘߌ߫߸ ߊ߬ߟߎ߫ ߞߊ߬ ߘߎ߬ߥߊ߬ߥߎ߬ ߞߙߍߞߙߍߣߍ߲ ߠߎ߬ ߞߍ߫ ߛߏ ߟߊ߫ ߛߓߊ߬ߕߌ ߣߴߊ߬ ߟߊ߫ ߥߙߎߞߌ ߟߊ߫߸ ߊ߬ ߣߌ߫ ߓߍ߲߭ ߣߌ߫ ߖߛߎ߬ߛߎߡߊ ߟߊߥߙߎߞߌ ߟߊ߫.

ߟߊ߱ߖߌ߬ ߓߌ߲ߕߎ߫ ߡߊߘߎߝߌ߲߫ ߞߡߊ߬ߙߊ߫ ߞߊ߬ ߞߎߡߊ ߕߊ߬ ߓߎ߬ߙߋ߫ ߡߐ߰ߓߊ ߟߎ߬ ߕߐ߯ ߘߐ߫߸ ߞߵߊ߬ߟߎ߬ ߟߊ߫ ߛߍߥߊ ߦߌ߬ߘߊ߫ ߡߙߊ߬ߘߓߊ߬ ߞߏ ߣߌ߲߬ ߘߐ߫߸ ߞߵߊ߬ ߦߌ߬ߘߊ߬ ߞߏ߫ ߊ߬ߟߎ߬ ߟߊ߫ ߛߊ߲߬ ߦߙߌߞߊ߫ ߖߊ߲ ߛߍ߬ߘߏ߲ ߓߘߊ߫ ߓߐ߫ ߜߍߟߊ߫. <<ߣߌ߲߬ ߞߍߣߍ߲߫ ߛߋ߲߬ߕߊ߬ ߞߎߘߊ߫ ߟߋ߬ ߘߌ߫ ߓߎ߬ߙߋ߬ ߦߋ߫، ߊ߬ ߛߊ߲߬ ߃߇ ߟߋ߬ ߕߋ߲߬߸ ߊ߲ ߧߴߊ߬ ߢߊߢߌߣߌ߲ ߞߊ߲߬ ߛߴߊ߲ ߘߌ߫ ߞߍ߫ ߡߙߊ߬ߘߊ߬ߓߊ ߘߌ߫، ߊߟߊ߫ ߞߕߌߣߍ߲߫ ߛߌ߬ߓߏ ߏ߬ ߟߋ ߓߐ ߟߊ߫ ߜߍߟߊ߫ ߣߌ߲߬߸ ߟߊ߱ߖߌ߬ ߛߊ߬ߞߐ߫ ߞߡߊ߬ߙߊ߫ ߕߋ߬ߟߋ ߘߐ߫، ߊ߲ ߧߋ߫ ߝߊ߰ߡߊ ߟߎ߫ ߝߏ߬ ߟߊ߫ ߘߊߞߎ߲ ߓߍ߯ ߘߐ߫߸ ߞߵߊ߬ ߘߊߡߌ߬ߣߊ߬ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߡߊ߬߸ ߘߎ߰ߞߣߍ ߡߊ߬ߡߙߊ߬ߟߌ ߣߌ߫ ߕߊ߲ߓߊ߲ߓߐߟߌ ߞߏߕߌ߮߸ ߞߊ߲ߞߊ߲߫ ߞߎ߲߬ߠߊ߬ߛߌ߰ߟߊ߸ ߛߌ߯ߙߌ߲߫ ߡߙߊ߬ߓߊ߮߸ ߊ߬ ߣߌ߫ ߡߙߊ߬ߓߊ߰ߘߎ߯ߟߊ ߟߎ߬ ߣߌ߫ ߞߊ߬ߝߏ߬ߙߋ߲߬ߕߌ߮ ߝߋ߲ ߺ ߋ ߺ ߝߋ߲߫ ߣߊ߬ߣߍ߲߬߸ ߊ߲ ߧߴߊ߬ߟߎ߬ ߓߍ߯ ߝߏ߬ ߟߊ߫. ߡߐ߰ߓߊ ߟߎ߬ ߟߊ߫ ߓߋߟߋ߲ߕߌ߮ ߞߵߏ߬ ߦߌ߬ߘߊ߬.

ߞߌ߲߬ߕߌ߲߬ߢߊ߲߬ ߛߏߓߊ ߞߊ߬ߝߏ߬ߙߋ߲߬ߕߌ߰ ߞߎߘߊ߸ ߞߏ߲߬ߓߏ߫ ߓߊ߲߬ߞߊߟߌ߬ ߞߡߊ߬ߙߊ߫ ߞߊ߬ ߛߙߊ߬ߣߎ߲ ߕߊ߬߸ ߞߊ߬ ߓߍ߲߬ ߊ߬ ߟߊ߫ ߛߍߥߊ ߡߊ߬ ߖߊ߬ߡߊ ߟߊ߫ ߓߐߟߌ߫ ߞߐߟߌߞߐߟߌ ߟߊ߫߸ ߊ߬ ߞߊ߬ ߓߍ߯ ߞߟߌ߫ ߓߟߏ߫ ߘߌ߫ ߢߐ߲߰ ߡߊ ߟߋ߬ ߡߊ߬߸ ߞߊ߬ ߘߍ߬ ߞߊ߬ ߞߏ ߟߎ߬ ߞߍ߫ ߢߐ߲߮ ߝߍ߬.

<<ߒ ߧߋ߫ ߛߐ߰ ߟߊ߫ ߓߎ߬ߙߋ߬ߞߊ ߟߎ߫ ߟߋ߬ ߝߏ߭ ߡߊ߬߸ ߞߵߊ߬ ߞߏߢߌߡߊߟߐ߲߫ ߊ߬ߟߎ߬ ߟߊ߫ ߓߐߟߌ ߟߊ߫߸ ߊ߬ ߣߴߊ߬ߟߎ߬ ߦߋ߫ ߘߐ߬ߖߊ ߡߍ߲ ߞߍ ߞߊ߲߬.

ߓߌ߬ ߢߐ߲߰ ߟߏ߲߫߸ ߊ߲ ߓߘߊ߫ ߛߋ߲߬ߕߊ߬ ߞߎߘߊ߫ ߞߍ߫ ߛߘߊߞߊߓߐ ߢߌ߲߬ ߘߌ߫، ߞߏ߬ߣߌ߲߬߸ ߊ߬ ߓߍ߯ ߕߍ߫ ߣߌ߲߬ ߘߋ߬، ߓߊ߯ߙߊ߫ ߜߘߍ߫ ߟߎ߫ ߝߣߊ߫ ߦߋ߫ ߛߋ߲߬ߠߊ߫߸ ߏ߬ ߟߋ ߖߊ߬ߡߊ ߓߍ߯ ߘߍ߭ ߘߌ߫ ߞߊ߬ ߞߍ߫ ߞߋߟߋ߲߫ ߘߌ߫. ߒ ߓߘߊ߫ ߛߍߥߊ߫ ߖߡߊ߬ߓߊ ߢߌ߲߬ ߠߎ߬ ߟߊ߫ ߓߐߟߌ ߟߊ߫ ߕߋ߲߬، ߢߐ߲߯ߘߍߡߍ߲ ߕߐ߰ߡߊ߬ߛߙߋ ߟߋ߬߸ ߞߋߟߋ߲߬ߧߊ ߣߌ߫ ߊߘߡߊߘߋ߲ߧߊ ߕߐ߰ߡߊ߬ߛߙߋ ߟߋ߬، ߡߐ߰ ߺ ߐ ߺ ߡߐ߰ ߣߊ߬ ߘߊ߫ ߢߌ߲߬ ߞߏ ߘߐ߫߸ ߒ ߧߴߊ߬ ߓߍ߯ ߝߏ߬ ߟߊ߫߸ ߡߍ߲ ߠߎ߬ ߞߊ߬ ߘߏ߫ ߓߐ߫ ߓߊ߬߸ ߌ ߞߍ߫ ߘߊ߫ ߦߊ߲߬ ߥߟߊ߫ ߞߐߞߊ߲߬߸ ߝߋ߲ ߺ ߋ ߺ ߝߋ߲߫ ߞߵߊ߬ ߛߋߞߏ ߞߍ߫ ߊ߬ ߞߏ ߓߐ ߘߐ߫ ߜߍߟߊ߫߸ ߊ߲ ߧߴߊ߬ ߓߍ߯ ߟߋ߬ ߝߏ߬ ߟߊ߫. ߊ߲ ߞߊ߫ ߞߊ߲߫ ߞߊ߬ ߛߌߟߊ߫ ߞߋߟߋ߲ ߢߌ߲߬ ߠߋ߬ ߕߊ߯ߡߊ߫.>> ߞߊ߬ߝߏ߬ߙߋ߲߬ߕߌ߮ ߟߋ߬ ߞߊ߲߫ ߕߋ߲߬.

ߞߊ߱ߓߌ߬ߣߍ߬ ߓߍ߯ߡߊ߲ߞߊ߲߫ ߖߊ߬ߞߌ߬ߕߋ߬ ߡߍ߲ ߦߋ߫ ߓߎ߬ߙߋ߬ ߒߞߏ ߘߍߞߙߎ ߞߊ߲ߕߌ߮ ߘߌ߫߸ ߏ߬ ߝߣߊ߫ ߞߵߊ߬ ߟߊ߫ ߛߍߥߊ ߦߌ߬ߘߊ߫ ߞߊ߬ ߓߍ߲߬ ߞߌ߬ߕߌ߬ߢߊ߲߬ ߞߍ ߡߊ߬ ߡߙߊ߬ߘߊ߬ߓߊ ߘߌ߫.

<<ߊ߲ ߛߍߥߊߣߍ߲߫ ߞߊ߲ߕߌ߯ ߡߊ߬ߡߊ߬ߘߌ߬ ߘߎ߲ߓߎߦߊ߫ ߟߊ߫ ߡߙߌߦߊ߫ ߛߊߣߌ߲ ߠߊ߫ ߞߏߛߓߍ߫، ߞߊ߬ߕߎ߲߯߸ ߛߌߟߊ߫ ߟߋ߬ ߢߌ߲߬ ߘߌ߫߸ ߡߍ߲ ߦߋ߫ ߞߎ߲߬ߠߊ߬ߛߌ߮ ߟߎ߬ ߡߊߘߏ߲߬ ߠߊ߫ ߞߎ߲߬ߠߊߛߌ߰ߣߍ߲ ߠߎ߬ ߟߊ߫، ߘߎߢߊ߫ ߘߏ߲߬ ߦߋ߫ ߘߐ߬ߝߐ ߟߋ߬ ߘߌ߫، ߏ߬ ߟߋ ߞߏߛߐ߲߬߸ ߒߞߏ ߟߐ߬ߦߙߐ ߞߍ߫ ߘߊ߫ ߡߍ߲ ߘߌ߫ ߣߌ߲߬ ߛߍߥߊ߫ ߟߏ߲ߓߊ ߢߌ߲߬ ߘߐ߫߸ ߏ߬ ߟߋ ߞߍ߫ ߘߊ߫ ߥߊ߲߬ߥߊ߲ ߘߐߓߍ߲߭ ߘߌ߫ ߞߊ߬ ߒߞߏ ߛߓߍ߫ ߊ߬ ߞߊ߲߬߸ ߞߊ߬ ߟߐ߲ߞߏߕߌ߯ ߛߟߏ߬ߡߣߊ߬ ߞߊ߲ߕߍ߫ ߕߐ߯ ߘߐ߫߸ ߊ߬ ߣߌ߫ ߒߞߏ ߞߊߙߊ߲ߡߐ߮ ߣߌ߫ ߒߞߏ ߞߊߙߊ߲ߘߋ߲ ߓߍ߯ ߕߐ߯ ߘߐ߫.>> ߛߟߊߕߌ߯ ߖߊ߬ߞߌ߬ߕߋ߫ ߞߵߏ߬ ߦߌ߬ߘߊ߬.

ߖߊ߲߬ߖߏ߲ ߢߌ߲߬ ߘߊߞߎ߲ ߘߐ߫߸ ߝߊ߰ߡߊ ߟߎ߬߸ ߊ߬ ߣߌ߫ ߡߊ߲߬ߘߋ߲߬ ߟߐ߲ߠߌ߲ߦߊ߫ ߕߏߟߏ߲ߠߊ ߟߎ߬ ߣߴߊ߬ ߡߐ߰ߓߊ ߛߌߦߊߡߊ߲߫ ߕߘߍ߬ ߞߣߍ ߞߊ߲߬، ߊߟߎ߫ ߘߏ߲߬ ߦߴߊ߬ ߟߐ߲߫ ߞߏ߫ ߛߘߊߞߊߓߐ ߢߌ߲߬ ߞߍߣߍ߲߫ ߓߟߏߘߐߓߍ߲ ߠߋ߬ ߘߌ ߡߎߣߎ߲߬߸ ߞߏ߫ ߘߊߡߌߣߊ، ߓߊߏ߬߸ ߢߐ߲߯ߓߍ߲߫ ߟߏ߲ߓߊ ߡߍ߲ ߟߐ߯ߟߊߣߍ߲߫߸ ߏ߬ ߟߋ ߞߍ߲ߘߍߟߏ߲߫ ߣߊ߬ߕߐ ߘߌ߫߸ ߞߌ߲߬ߕߌ߬ߢߊ߲߬ ߛߏ ߞߣߐ߫.

ߒ߬ߓߊ߬߸ ߣߛߌ߬ ߉߆ ߢߌ߲߬ ߠߋ߬ ߝߊ߰ߣߍ߲߫߸ ߞߵߏ߬ ߞߍ߫ ߞߌ߲߬ߕߌ߬ߢߊ߲߬ ߣߌ߫ ߓߎ߬ߙߋ߬ ߟߊ߫ ߛߍߥߊ ߦߌ߬ߘߊ߬ߟߊ߲ ߘߌ߫߸ ߞߵߊ߬ ߞߍ߫ ߓߍ߲߭ ߣߌ߫ ߖߛߎ߬ߛߎߡߊ ߣߌ߫ ߢߝߍߕߊ߮ ߛߘߊߞߊ ߘߌ߫ ߊ߬ߟߎ߬ ߟߊ߫ ߛߌߟߊ߫ ߞߎߘߊ ߣߌ߲߬ ߞߊ߲߬߸ ߡߙߊ߬ߘߓߊ߬ߦߊ ߛߌߟߊ߫ ߞߎߘߊ.