ߞߎߣߎ߲߬ ߠߋ߬߸ ߡߊ߬ߙߌ߬ߝߊ߬ ߜߊ߬ߛߌ߬ ߞߊ߲ ߡߍ߲߫ ߘߊ߫ ߡߐ߱ ߟߎ߬ ߓߟߏ߫ ߞߊ߲ߞߊ߲߫ ߥߛߎߖߌ߲ߓߊ ߟߊ߫، ߒ߬ߓߊ߬߸ ߞߕߌ ߝߊ߰ߡߊ ߟߎ߬ ߓߘߊ߫ ߢߊߝߐߟߌ߫ ߖߐ߲ߖߐ߲߫ ߞߍ߫ ߊ߬ ߞߏ ߞߊ߲߬߸ ߞߊ߬ ߓߍ߲߬ ߊ߬ ߞߏ ߕߊ߬ߡߌ߲߬ ߢߊ ߡߊ߬߸ ߡߍ߲ ߞߍ߫ ߘߊ߫ ߟߊ߬ߡߊ߮ ߘߌ߫ ߜ߭ߊ߯ߙ ߞߌ߲߬ߘߊ ߟߊ߫.
ߞߎߣߎ߲ߟߏ߲ ߢߌ߲߬ ߡߊ߬߸ ߂߀߂߆ ߕߎߟߊߝߌ߲ ߕߟߋ߬ ߃߀߸ ߞߊ߲ߞߊ߲߫ ߞߕߌߘߊ ߦߌߟߡߊ߫ ߝߟߐ ߞߊ߲ߓߍ߲ ߞߕߌߞߊ߲ߘߊ߸ ߌߓߙߊߤߌߡߊ߬ ߁߭ ߞߡߊ߬ߙߊ߬ ߓߘߊ߫ ߢߊߝߐߟߌ߫ ߞߍ߫ ߝߐ߰ߓߍ߬ߦߊ߬ߟߊ ߟߎ߬ ߦߋ߫߸ ߞߊ߬ ߓߍ߲߬ ߡߊ߬ߙߌ߬ߝߊ߬ ߡߊ߲ߞߊ߲ ߘߏ߫ ߓߐ ߡߊ߬ ߞߊ߲ߞߊ߲߫ ߥߛߎߖߌ߲ߓߊ ߟߊ߫߸ ߡߍ߲ ߛߊߓߎ ߞߍ߫ ߘߊ߫ ߡߊ߲߬ߞߊ߲ ߘߏ߫ ߘߌ߫ ߥߛߎߟߊߘߋ߲ ߘߏ߫ ߟߊߓߐ߫ ߕߎߡߊ ߟߊ߫ ߞߵߊ߬ ߟߊߕߊ߯ ߞߌ߲ߘߌߦߊ߫ ߥߛߎߖߌ߲ߓߊ ߟߊ߫.
ߞߕߌߞߊ߲ߘߊ ߟߊ߫ ߝߐߟߌ߫ ߘߐ߫: <<ߞߎߣߎ߲߬߸ ߊߟߎ߫ ߛߌߦߊߡߊ߲߫ ߞߵߊ߲ ߞߟߌ߫ ߞߵߊ߬ ߝߐ߫ ߊ߲ ߧߋ߫ ߞߏ߫ ߊߟߎ߫ ߞߊ߬ ߡߎ߯ ߞߊ߲ ߡߍ߲߫ ߥߛߎߖߌ߲ߓߊ ߟߊ߫، ߝߏ߫ ߊ߲ ߧߋ߫ ߞߎߡߊ߫ ߏ߬ ߞߊ߲߬ ߠߋ߬، ߓߊߏ߬߸ ߣߴߊ߲ ߕߏ߫ ߘߊ߫ ߡߊ߬ߞߎ߲ ߘߐ߫ ߦߋ߲߬ ߕߋ߲߬߸ ߊ߬ ߝߐ߫ ߢߊ ߘߌ߫ ߛߌߦߊߦߊ߫.>> ߊ߬ ߞߵߏ߬ ߝߐ߫.
ߛߊ߬ߙߌ߬ߦߊ߬ߓߊ߰ߙߊ߬ߟߊ ߟߊ߫ ߝߐߟߌ߫ ߘߐ߫߸ ߞߊ߲ߞߊ߲߫ ߞߕߌ߫ ߡߛߊߦߌ߲ߘߊ ߝߘߏ߬ߓߊ߬ ߞߕߌߞߊ߲ߘߊ ߣߐ߬ ߟߌ߬ߤߟߊ ߘߏ߫ ߟߎ߫ ߟߋ߬ ߛߐ߬ߘߐ߲߬ ߠߊ߫߸ ߞߏ߫ ߥߛߎߟߊߘߋ߲ ߘߏ߫ ߦߋ߫ ߥߛߎߖߌ߲ ߠߊ߫߸ ߡߍ߲ ߠߊ߫ ߞߏ ߦߋ߫ ߖߐ߬ߘߐ ߘߌ߫ ߦߋ߲߬، ߏ߬ ߞߏߛߐ߲߬߸ ߝߘߏ߬ߓߊ߬ ߞߕߊߞߊ߲ߘߊ ߞߵߊ߬ ߡߙߌߘߐߕߊ߬ ߏ߬ ߟߋ ߘߐ߫߸ ߞߏ߫ ߞߊ߬ ߥߛߎߟߊߘߋ߲ ߏ߬ ߟߊߦߟߍ߬ߡߊ߲߬ ߦߙߐ߫ ߜߘߍ߫ ߘߐ߫.
ߌߓߙߊߤߌߡߊ߬ ߁߭ ߞߡߊ߬ߙߊ߫ ߞߵߊ߬ ߝߐ߫ ߏ߬ ߦߙߐ ߟߋ߬ ߘߐ߫ ߞߏ߫:<<ߝߘߏ߬ߓߊ߬ ߞߕߌߞߊ߲ߘߊ ߟߊ߫ ߟߊ߬ߞߙߐ߬ߛߌ߬ߟߌ ߘߐ߫، ߡߐ߱ ߘߏ߫ ߦߋ߫ ߥߛߎ ߟߊ߫ ߞߊ߲ߞߊ߲߫ ߥߛߎߖߌ߲ ߠߊ߫ ߦߊ߲߬߸ ߏ߬ ߕߏ ߊ߲ ߝߍ߬ ߦߊ߲߬߸ ߊ߬ ߡߊ߫ ߢߌ߲߬ ߞߊ߲ߞߊ߲߫ ߥߛߎߖߌ߲ ߟߊ߬ߞߊ߲߬ߘߊ߬ߟߌ ߡߊ߬߸ ߏ߬ ߞߘߐ ߟߋ߬ ߞߏ߫ ߡߐ߰ ߢߌߡߊ߫ ߟߋ߬ ߕߍ߫، ߏ߬ ߘߐ߫߸ ߝߘߏ߬ߓߊ߬ ߞߕߌߞߊ߲ߘߊ ߣߐ߬ ߏ߬ ߟߋ ߛߓߍ ߕߊ߬ ߟߊ߫߸ ߞߏ߫ ߞߵߊ߬ ߕߌ߱ ߕߊ߬ ߦߊ߲߬߸ ߞߊ߬ ߥߴߊ߬ ߘߌ߫ ߞߌ߲ߘߌߦߊ߫߸ ߞߵߊ߬ ߓߐ߫ ߞߊ߲ߞߊ߲߫ ߦߊ߲߬. ߒ߬ߓߊ߬ ߞߎߣߎ߲߬߸ ߕߐ߲ߓߟߏߡߊ ߟߎ߬ ߥߊߣߍ߲߫ ߕߍ߬ߘߍ߫ ߏ߬ ߡߐ߱ ߟߋ߬ ߕߊ߬ ߞߊ߲ߡߊ߬ ߥߛߎߖߌ߲ ߞߣߐ߫ ߞߊ߬ ߥߴߊ߬ ߘߌ߫.>> ߞߕߌߞߊ߲ߘߊ ߟߋ߬ ߞߊ߲߫ ߕߋ߲߬.
ߓߊ߬ߙߌ߬߸ߥߛߎߟߊߘߋ߲ ߏ߬ ߟߊߓߐ߫ ߕߎߡߊ ߟߋ߬ ߟߊ߫ ߡߎ߬ߕߎ߲߬ ߛߊ߫߸ ߊ߬ ߟߊ߫ ߥߛߎߓߏ߲ߣߍ߲ ߞߣߐ߫߸ ߞߏ ߟߎ߬ ߥߟߏ߫ ߘߴߊ߬ ߢߊߖߎ߮ ߞߊ߲߬، ߞߕߌߞߊ߲ߘߊ ߞߊ߲߫ ߞߏ߫: <<ߞߏ߬ߣߌ߲߬ ߊ߲ ߡߴߊ߬ ߟߐ߲߫ ߡߍ߲ ߕߊ߬ߡߌ߲߬ߣߍ߲߫، ߊ߬ ߝߐ ߞߏ߫ ߊ߬ ߕߊ߬ߕߐ߫ ߞߊ߬ ߥߴߊ߬ ߘߌ߫߸ ߥߛߎߟߊߘߋ߲ ߕߐ߭ ߟߎ߬ ߞߊ߲߫ ߞߏ߫ ߊ߬ ߕߍ߫ ߥߊ߫ ߟߊ߫ ߦߙߐ߫ ߛߌ߫، ߊ߬ߟߎ߫ ߞߊ߬ ߡߣߊ߬ߡߣߊ ߘߊߡߌ߬ߣߊ߬.>>
ߞߊ߬ ߓߍ߲߬ ߥߛߎߟߊߘߋ߲ ߠߎ߬ ߟߊ߫ ߞߏߟߊߕߊ߯ߡߊ߫ ߢߊ ߏ߬ ߡߊ߬߸ ߥߛߎ ߞߣߐ߬ߜߍ߲߬ߓߊ߮ ߟߎ߫ ߞߊ߬ ߖߊ߬ߛߙߋ߬ߡߟߊ߬ ߡߎ߮ ߟߊߥߌ߬ߟߌ߫ ߏ߬ ߟߋ ߘߐ߫.
<<ߥߛߎ ߞߣߐ߬ߜߍ߲߬ߓߊ߮ ߡߍ߲ ߠߎ߬ ߕߍ߬ߘߍ߫ ߦߋ߲߬߸ ߏ߬ ߟߎ߫ ߞߊ߬ ߡߎ߮ ߞߊ߲ ߢߊ߫ ߘߊ߲ߘߐ߫ ߜߊ߬ߛߌ߬߸ ߞߵߊ߬ߟߎ߬ ߡߊߛߌߟߊ߲߫߸ ߖߐ߲߰ߛߊ߫ ߕߊ߲߬ߞߊ߬ ߘߌ߫ ߞߍ߫ ߊ߬ ߖߎ߯ߡߊ߲ ߡߊ߬.>>
ߞߕߌߞߊ߲ߘߊ ߞߊ߬ ߕߡߊ߬ߖߌ ߓߐ߫ ߓߍ߯ ߘߐ߫߸ ߞߏ߫ ߡߊ߬ߛߎ߬ߓߊ߬ ߜߘߍ߫ ߡߊ߫ ߞߍ߫߸ ߥߛߎߟߊ߲ߘߋ߲ ߘߏ߲߬ ߟߊߕߊ߯ ߞߏ ߡߍ߲ ߝߣߊ߫ ߢߊߢߌߣߌ߲ ߕߎ߲߬ ߦߴߌߘߐ߫ ߞߊ߬ ߥߴߊ߬ ߘߌ߫ ߞߌ߲ߘߌߦߊ߫߸ ߏ߬ ߞߍ߫ ߘߊ߫ ߦߏ߫ ߊ߬ ߝߐߣߍ߲߫ ߢߊ ߡߍ߲ ߡߊ߬.
<<ߣߴߊ߲ ߞߵߊ߬ ߟߊߞߙߐ߬ߛߌ߬ ߞߏ߫ ߡߐ߱ ߘߏ߫ ߦߋ߫ ߥߛߎ ߟߊ߫߸ ߡߍ߲ ߠߊ߫ ߞߏ ߡߊߛߌߟߊ߲ߣߍ߲߫߸ ߊ߬ ߟߊ߫ ߞߏ ߦߋ߫ ߖߐ߬ߘߐ ߟߋ߬ ߘߌ߫߸ ߊ߲ ߘߌ߫ ߛߴߊ߬ ߟߊߕߊ߯ ߟߊ߫ ߦߙߐ߫ ߜߘߍ߫ ߘߐ߫߸ ߊ߬ ߡߊߛߌߟߊ߲ߣߍ߲߫ ߕߍ߫ ߦߙߐ ߡߍ߲ ߘߐ߫.>> ߊ߬ ߞߵߏ߬ ߢߊߝߐ߫.
ߞߕߌߞߊ߲ߘߊ ߟߊ߫ ߞߎߡߊ ߢߌ߲߬ ߠߋ߬ ߊ߬ ߦߌ߬ߘߊ߬ ߟߊ߫߸ ߞߏ߫ ߡߊ߬ߙߌ߬ߝߊ߬ ߞߊ߲ ߡߍ߲ ߓߐߣߍ߲߫߸ ߣߌ߫ ߡߐ߱ ߟߎ߬ ߞߵߊ߬ ߡߊ߲߬ߞߊ߲ ߡߍ߲߫ ߥߛߎߖߌ߲ߓߊ ߟߊߡߌߣߌ߲ ߘߐ߫߸ ߞߣߐ߬ߘߐ߬ߝߟߌ߬ ߞߏ߫ ߕߍ߫ ߡߎ߬ߕߎ߲߬، ߓߊߏ߬߸ ߞߕߌߞߊ߲ߘߊ ߞߊ߲߫ ߞߏ߫ ߊ߬ ߟߊߥߟߌ߬ߣߍ߲߫ ߡߍ߲ ߠߊ߫ ߕߊ߯ߟߌ߫ ߞߏ ߡߊ߬ ߞߌ߲ߘߌߦߊ߫߸ ߏ߬ ߥߊ߫ ߘߊ߫، ߊ߬ ߘߏ߲߬߸ ߤߊߡߌ߲߫ ߞߏ߫ ߛߌ߫ ߕߴߦߋ߲߬ ߡߎ߬ߕߎ߲߬. ߊ߬ ߟߊ߫ ߝߐߟߌ߫ ߘߐ߫ ߞߊ߬ߣߌ߲߬.
