ߣߐ߬ߓߊߟߌ ߕߊ߬ߟߌ߬ߛߍ߬ ߂ ߁߀߀ ߡߍ߲ ߞߊ߬ߙߌ߬ߝߊ߬ ߘߊ߫ ߎߛߑߡߊ߯ߣ ߞߊ߬ߓߊ ߟߊ߫߸ ߏ߬ ߥߊߣߍ߲߫ ߡߌ߲߫؟ ߢߌ߬ߣߌ߲߬ߞߊ߬ߟߌ ߏ߬ ߟߋ ߕߍ߬ߘߍ߫ ߝߍ߬ߘߍ ߘߐ߫ ߞߕߌ߫ ߘߊߞߎ߲ ߘߏ߫ ߘߐ߫ ߞߊߟߎߡ ߞߕߌߘߊ ߦߌߟߡߊ߫ ߝߟߐ ߟߊ߫ ߞߎߣߎ߲ߟߏ߲߸ ߂߀߂߆ ߞߏ߲ߓߌߕߌ߮ ߕߟߋ߬ ߁߄، ߞߕߌ ߣߌ߲߬ ߘߐ߫߸ ߎߛߑߡߊߣߌ߲߬ ߞߊ߬ߓߊ ߟߋ߬ ߡߊߝߌ߲߬ߣߍ߲߬߸ ߞߏ߫ ߊ߬ ߓߘߊ߫ ߟߊ߬ߤߘߌ߬ ߕߌߢߍ ߞߍ߫߸ ߞߊ߬ ߓߊ߲߫ ߞߊ߬ ߞߊ߬ߙߏ߲ ߕߍ߰ ߣߐ߬ߓߊ߬ߟߌ߬ ߞߏ ߘߐ߫߸ ߊ߬ ߣߌ߫ ߘߟߊ ߅ ߀߀߀ ߞߏ ߘߏ߫ ߝߣߊ߫.

ߡߞߊ߬ߛߌ߬ߓߊ߰ߕߐ ߦߋ߫ ߝߏߘߋ߫ ߡߊߡߊߘߎ߫ ߕߎ߲߬ߞߙߊ߫ ߟߋ߬ ߘߌ߫߸ ߏ߬ ߞߊ߲߫ ߞߏ߫ ߊ߬ ߟߊ߫ ߣߐ߬ߓߊߟߌ ߕߊ߬ߣߍ߲ ߞߵߊ߬ ߟߊ߫ ߘߟߊ ߅ ߀߀ ߞߊ߲߬߸ ߞߏ߫ ߝߏ߫ ߞߵߏ߬ ߟߋ ߘߴߊ߬ ߡߊ߬، ߞߊ߬ߕߎ߲߯߸ ߊ߬ ߟߊ߫ ߝߐߟߌ߫ ߘߐ߫߸ ߞߏ߫ ߊ߬ ߞߊ߬ ߣߐ߬ߓߊߟߌ ߘߌ߫ ߎߛߑߡߊߣߌ߲߬ ߞߊ߬ߓߊ ߡߊ߬ ߟߋ߬ ߞߏ߫ ߞߵߊ߬ߟߎ߬ ߟߊߕߊ߯ ߓߙߌߞߑߛߍߟ، ߞߊ߬ߕߎ߲߯߸ ߞߏ߫ ߊ߬ߟߋ ߣߌ߫ ߘߍ߬ߞߙߎ ߘߏ߫ ߟߎ߫ ߟߋ߬ ߓߊ߯ߙߊ߫ ߟߊ߫߸ ߏ߬ ߟߎ߫ ߟߋ߬ ߣߐ߬ߓߊߟߌ ߘߌ߫ ߟߴߊ߬ ߡߊ߬، ߏ߬ ߘߐ߫߸ ߣߌ߫ ߓߊ߬ߛߊ߲ ߘߏ߲߬ ߘߊ߫ ߏ߬ ߘߐ߫߸ ߊ߬ߟߋ ߟߋ߬ ߘߏ߬ߣߌ߲ ߦߋ߫.

ߞߕߌ߫ ߦߙߌ ߟߊ߫߸ ߎߛߑߡߊ߯ߣ ߞߊ߬ߓߊ ߡߊ߫ ߛߐ߲߬ ߡߊ߬ߝߌ߲߬ߞߊ߲߬ߠߊ ߏ߬ ߟߎ߫ ߡߊ߬، ߊ߬ ߞߊ߲߫ ߞߏ߫ ߣߐ߬ߓߊߟߌ ߡߍ߲ ߠߊ߫ ߞߕߎߡߊ ߦߴߌߘߐ߫߸ ߊ߬ߟߎ߬ ߕߐ߮ ߘߏ߫ ߣߌ߫ ߊߟߍߞߛ ߕߐ߮ ߘߏ߫ ߟߋ߬ ߕߊ߫ ߦߴߏ߬ ߘߌ߫߸ ߝߏߘߋ߫ ߡߊߡߊߘߎ߫ ߕߊ߫ ߕߍ߫ ߝߋߎ߫، ߞߊ߬ߕߎ߲߯߸ ߞߏ߫ ߊ߬ߟߋ ߛߋ ߓߍߟߑߖ߭ߌߞ ߛߊ߲ߡߊߘߊ߲ ߠߊ߫߸ ߕߐ߲ߓ\ߟߏߡߊ ߟߎ߫ ߞߵߊ߬ ߡߌ߬ߣߊ߫ ߦߋ߲߬߸ ߞߵߊ߬ ߡߊߝߟߍ߫ ߞߊ߬ ߥߊ߫ ߣߐ߬ߓߊߟߌ ߦߴߊ߬ ߞߣߐ ߘߐ߫، ߊ߬ߟߎ߫ ߞߵߊ߬ ߡߌ߬ߣߴߊ߬ ߟߊ߫ ߦߋ߲߬ ߠߋ߬، ߊ߬ ߞߊ߬ ߕߟߋ߬ ߣߊ߯ߣߌ߲߫ ߠߋ߬ ߞߍ߫ ߕߐ߲ߓߟߏߡߊ ߏ߬ ߟߎ߬ ߓߟߏ߫ ߦߋ߲߬߸ ߦߊ߬ߣߴߊ߬ߟߎ߬ ߦߴߊ߬ ߟߊߞߐߛߊ߬ߦߌ߲߬ ߊ߲ߜ߭ߏߟߊ߫.

ߝߏߘߋ߫ ߡߊߡߊߘߎ߬ ߣߌ߫ ߎߛߑߡߊ߯ߣ ߞߊ߬ߓߊ ߓߍ߯ ߛߐ߲߬ߣߍ߲߫ ߊ߬ ߡߊ߬ ߞߏ߫ ߊ߬ߟߎ߬ ߥߊ߫ ߘߊ߫ ߕߊ߯ߡߊ ߘߐ߫ ߞߋߟߋ߲ߘߌ߫ ߝߋߎ߫، ߞߏ߬ߣߌ߲߬ ߞߎߡߊ ߦߋ߫ ߦߙߐ߫ ߢߌ߬ߡߊ߲߬߸ ߏ߬ ߟߋ ߣߐ߬ߓߊ߬ߟߌ߬ ߞߏ ߘߌ߫߸ ߊ߬ ߣߴߊ߬ߟߎ߬ ߕߎߣߎ߲߫ ߢߊ ߢߐ߲߮ ߡߊ߬.

ߓߊߏ߬߸ ߝߏߘߋ߫ ߡߊߡߊߘߎ߬ ߕߎ߲߬ߞߙߊ ߞߊ߲߫ ߠߋ߬ ߞߏ߫ ߞߏ߫ ߣߐ߬ߓߊߟߌ ߕߴߛߋ߫ ߡߌ߬ߣߊ߬ ߟߊ߫ ߞߊ߬ߓߊ ߬ߟߊ߫ ߢߊ ߏ߬ ߡߊ߬ ߝߋߎ߫߸ ߣߌ߫ ߛߙߋߦߊ ߘߏ߫ ߕߴߊ߬ ߟߊ߫، ߊ߬ ߞߵߊ߬ ߝߐ߫ ߏ߬ ߟߋ ߘߐ߫߸ ߞߏ߫: <<ߕߊ߬ߡߌ߲߬ߘߊ ߕߴߛߋ߫ ߘߟߊ ߥߟߎ߬ߡߊ߬ ߝߌ߬ߟߊ߬ ߣߐߓߊߟߌ ߡߌ߬ߣߊ߬ ߟߊ߫߸ ߞߏ߫ ߊ߬ߟߎ߬ ߡߊ߫ ߛߓߍ߫ ߞߍ߫ ߏ߬ ߟߊ߫.>> ߊ߬ߟߋ ߟߊߣߍ߲߫ ߏ߬ ߟߋ ߟߊ߫ ߝߛߊߦߌ߫.

ߎߛߑߡߊ߯ߣ ߞߊ߬ߓߊ ߞߏ߬ߣߌ߲ ߞߊ߲߫ ߞߏ߫ ߊ߬ߟߎ߫ ߞߵߊ߬ߟߎ߫ ߓߊ߲߬ ߠߋ߬߸ ߞߏ߫ ߊ߬ߟߋ ߕߍ߫ ߘߏ߲߬ ߠߊ߫ ߓߍߟߑߖ߭ߌߞ߸ ߓߊߏ߬ ߊ߬ ߟߊ߫ ߘߌ߬ߢߍ߬ߡߊ߬ߛߓߍ ߘߏ߫ ߕߍ߬ߘߍ߫ ߊ߬ ߟߊ߫ ߕߊ߬ߡߌ߲߬ߛߓߍ ߞߣߐ߫߸ ߡߍ߲ ߝߛߏ߬ߝߛߊ߬ߣߍ߲߫ ߕߐ߲ߓߟߏߡߊ ߟߎ߬ ߟߊ߫ ߦߋߟߌ߫ ߘߐ߫، ߓߊ߬ߙߌ߬߸ ߞߏ߫ ߡߊߡߊߘߎ߬ ߕߊ߬ߡߌ߲߬ ߘߊ߫ ߟߋ߬ ߞߊ߬ ߥߊ߫߸ ߊ߬ ߡߊ߫ ߝߋ߲߫ ߝߐ߫ ߝߣߊ߫.

ߊ߬ߟߋ߫ ߓߊ߬ߟߌ߬ ߘߊ߫ ߡߎ߲߬ ߘߐ߫ ߏ߬ ߘߐ߫߸ ߊ߬ ߛߋ ߖߌ߬ߣߍ߫ ߦߊ߲߬߸ ߡߊߡߊߘߎ߫ ߞߋߟߋ߲ ߏ߬ ߦߋ߫ ߥߴߊ߬ ߡߊߞߊ߬ߛߌ߫ ߊ߬ ߞߊ߲߬߸ ߞߏ߫ ߊ߬ ߡߴߏ߬ ߢߊߦߋ߫، ߓߊߏ߬߸ ߊ߬ߟߎ߬ ߓߍ߯ ߣߴߊ߬ߟߎ߬ ߟߊ߫ ߘߏ߬ߣߌ߲߫ ߠߋ߬ ߕߘߍ߬.

ߡߊߡߊߘߎ߬ ߞߏ߬ߣߌ߲ ߞߊ߲߫ ߠߋ߬߸ ߞߏ߫ ߊ߬ߟߋ ߞߊ߬ ߡߍ߲ ߟߐ߲߫߸ ߏ߬ ߟߋ߸ ߞߊ߬ߓߊ ߦߴߊ߬ ߟߊ߫ ߣߐ߬ߓߊߟߌ ߘߴߊ߬ ߡߊ߬߸ ߞߵߊ߬ ߟߊ߫ ߘߟߊ߫ ߅ ߀߀ ߝߣߊ߫ ߘߴߊ߬ ߡߊ߬، ߓߊߏ߬߸ ߞߏ߫ ߊ߬ߟߋ ߟߊߣߴߊ߬ ߟߊ߫ ߛߋߚߋ߫߸ ߊ߬ ߖߍ߬ߘߍ ߓߟߏ ߟߋ߬ ߞߊ߬ ߣߐ߬ߓߊߟߌ ߢߌ߲߬ ߟߊ߫ ߞߊ߬ߓߊ ߕߍ߯ ߘߐ߫، ߞߊ߬ߕߎ߲߯߸ ߞߏ߫ ߊ߬ߟߎ߬ ߦߋ߫ ߕߊ߯ߡߊ ߟߎ ߞߍ߫ ߟߊ߫ ߢߐ߲߯ ߝߍ߬ ߛߐ߲߬߸ ߊ߬ߟߎ߬ ߟߊ߫ ߕߊ߯ߡߊ߫ ߞߋߟߋ߲ ߘߐ߫߸ ߊ߬ߟߎ߬ ߦߋ߫ ߘߟߊ߫ ߃ ߀߀߀ ߟߋ߬ ߛߐ߬ߘߐ߲߬ ߠߊ߫ ߕߣߐ߬ߦߊ ߟߊ߫. ߏ߬ ߘߐ߫߸ ߞߏ߫ ߊ߬ߟߋ ߞߊ߬ ߣߐ߬ߓߊߟߌ ߕߏ߫ ߞߊ߬ߓߊ ߟߋ߬ ߓߟߏ߫߸ ߞߵߊ߬ ߞߐߛߊ߬ߦߌ߲߬.

ߐ߲߸ ߛߊ߬ߙߌ߬ߦߊ߫ ߞߏ߬ߣߌ߲ ߓߘߊ߫ ߞߕߌ ߟߊߕߊ߯ ߂߀߂߆ ߞߏ߲ߓߌߕߌ߮ ߂߈ ߣߊ߬ߕߐ ߘߐ߫߸ ߞߊ߬ ߞߎߡߊ ߕߐ߭ ߞߍ߫.